Novema
E Mafai ona Ou Filifili e Avea ma se Faifeautalai i le Taimi Nei
“Ua fetalai atu foi o ia ia te i latou, O atu ia outou i le lalolagi uma, ina tala’i atu ai le tala lelei i tagata uma lava” (Mareko 16:15).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: E mafai ona avea a’u ma se faifeautalai i lo’u auauna atu i isi.
Uunai le [agaga] malamalama (faia o ni tala faatino): Faitau le Mataio 25:34–40, ma faamatala atu pe a tatou auauna atu i isi ua tatou auauna atu foi i le Tama Faalelagi (tagai i le Mosaea 2:17) ma o lena auaunaga o le a aumaia ia i tatou le fiafia ma fesoasoani ia i tatou ina ia toe nonofo faatasi ma le Atua. Fai atu i ni nai tamaiti e faatino se tala o nisi o galuega auauna atu, e pei o le tuuina atu o meaai i se tasi o loo fiaai, faauo atu i se tasi ua tuua toatasi, pe asiasi i se tasi o loo ma’i. Faataga ia isi tamaiti e mate mai le mea o loo tupu i tala faatino taitasi. Faaali atu se ata o faifeautalai. Fesili atu po o le a le auala o loo auauna atu ai ia faifeautalai i le Atua. Faamatala atu o lo tatou auauna atu i isi ua avea ai foi i tatou ma faifeautalai.
Uunaia le faaaogaaga (taaalo i se taaloga): Fai se taaloga laupapa ma se auala e faia i ni lanu eseese se ono e agai atu i le ata o Iesu. Ia saunia se mea faataavili e i ai vaega e ono lanu e fetaui i lanu o loo i le taaloga laupapa. I lanu taitasi ia tusia le igoa o se tagata e mafai e tamaiti ona auauna atu i ai, e pei o se matua, se uo, ma se tuaoi. Filifili se tamaitiiti e faatamiloina le mea faataavili ma tau atu pe faapefea ona ia auauna atu i le tagata o le a faasino i ai. Ona fai lea i le tamaitiiti e sui le tulaga o le taaloga i le isi sikuea e talafeagai i le lanu i le mea faataavili. Toe fai ma isi tamaiti seia oo ia vaega o le taaloga i le ata o le Faaola. Faamanatu atu i tamaiti a tatou auauna atu i isi, ua tatou auauna atu i le Atua. Usu le pese “Pe a Tatou Fesoasoani” (TT, 108).
E maua taaloga laupapa ma mea faataavili i le sharingtime.lds.org
Vaiaso 2: E mafai ona avea a’u ma se faifeautalai i le faia o se faataitaiga lelei.
Faailoa atu le aoaoga faavae (vaaia o se lesona faatino): Ao le’i amataina le Peraimeri, ia fausia se fale i ni poloka, ma ufiufi e aua le vaai i ai ia tamaiti. (Afai e le maua ni poloka, e mafai ona e tusiina se ata i luga o le laupapa ma ufiufi le ata i se fasi pepa.) Faamatala atu le fale o loo nana ma le auala na e fausia ai. Ona tuu atu lea i ni nai tamaiti ni poloka ma fai i ai e taumafai e fausia se fale e tutusa ma le fale na e fausiaina. Pe a maea, aveese le ufiufi o lau fale, ma matau le eseesega i le va o le lua. Fai i tamaiti e toe fausia le latou fale ao latou vaai i lau faataitaiga. Faamatala atu o le tele o mea, e faigofie pe a outou mulimuli i se faataitaiga.
Faaaoga ia avanoa e uunaia ai tamaiti e mafaufau. Ia luiina o latou mafaufau i ni fesili e talafeagai ma lo latou matutua po o tulaga e siitia ai le aoaoina.
Uunaia le [agaga] malamalama ma le faaaogaaga (faalogologo i ni tala ma le usuina o ni pese): Faaali atu ni ata ma faamatala puupuu ni nai tala faatusipaia lea na avea ai le autalavou ma ni faataitaiga lelei (mo se faataitaiga, o Tanielu ma ana uo o loo teena e inuina le uaina a le tupu [tagai i le Tanielu 1:5–16]; Sataraka, Mesako, ma Apeteniko [tagai ile Tanielu 3:4–29]; ma Tanielu i le lua o liona [tagai i le Tanielu e 6]). Faaali atu se ata o faifeautalai, ma fai atu i tamaiti pe faapefea ona avea faifeautalai ma ni faataitaiga lelei. Faamatala atu o lo tatou faia o se faataitaiga lelei, ua avea ai i tatou ma faifeautalai aua o a tatou faataitaiga e mafai ona fesoasoani i isi e aoao atili ai e uiga ia Iesu Keriso. Faasoa atu nisi o taimi na e vaai ai i tamaiti o lau uarota po o paranesi o avea ma ni faataitaiga lelei.
Fai i tamaiti e usu le pese o le “Susulu Pea” (TT, 96). Ao latou usuina, fai atu i ai e pasi faasolo i totonu o le potu se ata o le la na fai i se fasi pepa. O taimi uma lava e taofi ai le musika, fai i le tamaitiiti o loo uuina le ata o le la e tau mai pe faapefea ona ia avea ma se faataitaiga lelei (mo se faataitaiga, e ala i le agalelei atu, tauina o le mea moni, po o le valaauliaina o uo i le Peraimeri).
Valaaulia ia tamaiti taitasi e fai ni a latou lava ata o le la i le pepa faatasi ai ma upu “E Mafai ona Ou Avea ma se Faataitaiga Susulu” o loo tusia ai. Fai i tamaiti e uu i luga a latou la ao latou usuina le “E Pei A’u o se Fetu” (TT, 84), “E Manao Iesu Ia Ou Fai ma Sulu” (TT, 38–39), po o le “Susulu Pea” (TT, 96).
Vaiaso 3: E mafai ona ou aoao atu a’u uo e uiga ia Iesu Keriso ma Lana Ekalesia.
Faailoa atu le aoaoga faavae (vaaia o se faatinoga): Faatalofa atu i le lima o se tasi po o le sili atu foi o tamaiti ma faatino se tala e valaauliaina ai i latou e o mai i le Peraimeri ma aoao ai e uiga ia Iesu. Faatonu i latou o e na maua se tusi valaaulia ina ia valaaulia isi ma seia valaauliaina uma ia tamaiti. Faamatala atu e finagalo le Alii ia i tatou uma e avea ma ni faifeautalai e ala i le aoaoina atu o a tatou uo e uiga ia Iesu Keriso ma Lana Ekalesia.
Uunaia le [agaga] malamalama (faalogologo i se tala): Faasoa atu le tala na faamatalaina e Peresitene Spencer W. Kimball e uiga i se tamaitiiti Peraimeri lea na avea ma se faifeautalai lelei: Sa fesili atu se tamaloa i luga o le nofoaafi i le tamaitiiti e uiga i le Ekalesia Mamona. Na taulotoina e le tamaitiiti ia Mataupu Faavae uma o le Faatuatua. Na matuai faagaeetia le tamaloa i le iloaina e lenei tamaitiiti mea na ia talitonu i ai ma o lea sa ia alu ai i le Aai o Sate Leki ina ia aoao atili ai e uiga i le Ekalesia (tagai i le Conference Report, Oke. 1975, 117–19; po o le Ensign, Nov. 1975, 77–79). Faamatala atu o le aoaoina o Mataupu Faavae o le Faatuatua e mafai ona fesoasoani ia i tatou ina ia avea ai ma faifeautalai i le taimi nei.
Uunaia le faaaogaaga (iloiloina o Mataupu Faavae o le Faatuatua): Sauni ni fasi pepa se 13 ma faanumera pepa taitasi mai le 1 e oo i le 13. Vaevae tamaiti i ni vaega. Fai atu i vaega taitasi e filifili se fasi pepa ma galulue faatasi e aoao le mataupu faavae o le faatuatua e talafeagai ma lena numera. Pe a saunia vaega taitasi, tuu atu latou te taulotoina mai i isi tamaiti ona ave lea o se isi pepa. Ia faaauau pea pe a lava le taimi.
Vaiaso 4: E mafai ona ou saunia nei e avea ma faifeautalai faamisiona.
Faailoa atu le aoaoga faavae (vaaia o ni mea faatino e fesootai i galuega faafaifeautalai): Ia saunia se tamai taga po o se atopau o loo i ai mea e faaaoga e faifeautalai, e pei o seevae o le Aso Sa, se fusiua, ma ni tusitusiga paia. Valaaulia ni nai tamaiti e aveese mai ia mea mai le ato ma faaali atu i tamaiti uma. Fesili atu i tamaiti pe aisea ua le avea ai le i ai o nei mea ma auala ua faapea ai ua saunia se tasi e avea ma se faifeautalai. Faitau atu le Mataupu Faavae ma Feagaiga 84:62, ma valaaulia ia tamaiti e faalogo mo se isi mea e manaomia e faifeautalai uma (molimau). Molimau atu i le taua o le mauaina o se molimau patino.
Fuafua ni auala e faagaua’i mai ai tamaiti i le amataga o se gaoioiga. Mo se faataitaiga, o lenei gaoioiga o le a fiafia ai ia tamaiti ao latou mafaufauina mea o le a aveese mai i fafo o le ato.
Uunaia le [agaga] malamalama (vaaia o ni ata ma le taliina o ni fesili): Fesoasoani i tamaiti ia malamalama i vaega taua o se molimau. Faaali atu ia ata e suitulaga i nisi o na vaega (mo se faataitaiga, e alofa le Tama Faalelagi ia i tatou, o Iesu Keriso o lo tatou Faaola, o Iosefa Samita o se perofeta, o Le Ekalesia a Iesu Keriso o le Au Paia o Aso e Gata Ai o le Ekalesia moni lea a le Alii, ma ua taitaiina i tatou e se perofeta soifua). Fai atu ni nai fesili e uiga i ata taitasi, e pei o le: O le a lenei mea, po o ai lenei? O le a se mea e te iloa e uiga i lenei mea? E faapefea ona e faamalosia lau molimau i lenei mea? Fai atu i tamaiti e tau mai ni tagata e mafai ona latou faasoaina i ai a latou molimau. Molimau atu faapea ao faasoa mai e tamaiti i isi mea latou te iloa, o le a faatupulaia a latou molimau ma o le a latou sauniuni e faamisiona.