Me
Sa Ou Filifili le Mea Sa’o Ina ua Ou Papatiso ma Faamauina e avea ma se Tagata o le Ekalesia
“Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala, ona maua lea e outou o le mea foai fua mai o le Agaga Paia lea” (Galuega 2:38).
Pese: “Pe A Ou Papatiso”
(TT, 53)
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Pe a ou salamo, o le a faamagaloina a’u.
Uunaia le [agaga] malamalama (auai i se lesona faatino): Tuu atu i tamaiti taitasi se tamai maa. Fai atu i tamaiti e tuu le tamai maa i totonu o o latou seevae, ma fai i ai e tutu i luga ma savavali. Fesili i tamaiti po o le a se lagona i le savavali ma se tamai maa i o latou seevae. Fesili i ai pe faapefea ona pei le agasala o le tamai maa. (E le lelei se lagona; tatou te faanoanoa ai.) Fai atu i ai e aveese le tamai maa, ma fesili atu pe faapefea ona pei le salamo ma le mauaina o le faamagaloga a le Tama Faalelagi o le aveesea o le tamai maa mai o tatou seevae. Faamalamalama atu ona o Iesu Keriso, ua mafai ai ona tatou salamo ma maua le faamagaloga o a tatou agasala. Tuu atu le molimau o le salamo o se faamanuiaga matagofie lea mai le Tama Faalelagi ma e aumaia ia i tatou le fiafia.
Vaiaso 2: Pe a ou papatiso ma faamauina, ua ou mulimuli i faataitaiga a Iesu.
Uunaia le [agaga] malamalama (taaalo i se taaloga o manatuaga ma faitau ia tusitusiga paia): Faaali atu ia ata o Ioane le Papatiso o loo papatisoina ia Iesu ma se tamaitiiti o loo papatiso. Tuu i tamaiti e matamata i ata mo le 20 sekone. Ona ufiufi lea o ata ae fai lea i tamaiti e ta’u atu ia te oe ni mea se tele e tutusa ai nei ata e lua. Atonu e te manao e lisi a latou tali i luga o le laupapa.
Fai atu i tamaiti e faitau le Mataupu Faavae ma Feagaiga 20:72–74 e iloa ai po o ai e mafai ona papatisoina se tagata ma pe faapefea ona faatinoina se papatisoga. Valaaulia ia tamaiti e faasoa mai mea na latou maua. Ia faamamafa atu o le tagata e faataunuuina le papatisoga e tatau ona i ai le pule o le perisitua ma o le tagata o loo papatiso e tatau ona faatofuina, pe faalilofia atoa i lalo o le vai. Toe faaali uma atu ia ata. Ia faailoa atu o Iesu ma le tamaitiiti o loo papatisoina e ala i le faatofuina, e se tasi e i ai le pule o le perisitua.
Uunaia le [agaga] malamalama (valivali ma usu se pese): Fai se kopi o le itulau e 111 i le tusi lesona o le vasega pepe, Vaai Ia I O Outou Tamaiti, mo tamaiti taitasi e valivali. Usu le pese “Papatisoga” (TT, 54–55), ma faamalosiau i tamaiti ina ia papatiso e pei o Iesu. Valaaulia se tamaitiiti e le’i leva ona papatiso e faamatala atu i isi tamaiti lona papatisoga.
O loo maua le tusi lesona a le vasega pepe i le sharingtime.lds.org
Vaiaso 3: E mafai ona fesoasoani le Agaga Paia ia te a’u.
Faailoa atu le aoaoga faavae (vaaia o se lesona faatino): Fai i se tamaitiiti e tu i autafa o le faitotoa. Fusi mata o le tamaitiiti, ma fai i ai e taumafai e saili lona nofoa ma nofo i lalo e aunoa ma se fesoasoani. Toe fai le gaoioiga, ae o le taimi la lenei fai atu i se isi tamaitiiti e taitai le tamaitiiti o loo fusi mata e ala i le pa’i atu i lona lima ma taitaiina le ala. Ia talanoaina ma tamaiti pe aisea na faigofie ai i le tamaitiiti le mauaina o le nofoa i le taimi lona lua. Faamalamalama atu e mafai ona fesoasoani le Agaga Paia ia i tatou e ala i le tuuina mai o taitaiga i o tatou olaga. Fai i tamaiti e fai mai, “E mafai ona fesoasoani le Agaga Paia ia te a’u.”
O le faaaogaina o tamaiti i faataitaiga o vaaia o le a latou tosina atu ai ma uunaia le aoaoina.
Uunaia le [agaga] malamalama (usuina o se pese ma taaalo i se taaloga faatusatusa): Tusi le upu fesoasoani i luga o le laupapa. Usu le pese “O Le Agaga Paia” (TT, 56), ma valaaulia ia tamaiti e faitau ia mea o loo ta’ua i le pese e fai e le Agaga Paia e fesoasoani ai ia i tatou.
O loo maua le faailoga o le FMT i le sharingtime.lds.org
Ao le’i amataina le Peraimeri, ia saunia ni fasi pepa se 10 o loo tusi ai le ata o le talita o le FMT i luma. O tua o pepa taitasi, ia tusi ai se tasi o fuaiupu nei e 5 o loo faamatalaina ai le auala e fesoasoani ai le Agaga Paia ia i tatou: e faamafanafanaina i tatou e le Agaga Paia, e molimau mai le Agaga Paia e uiga ia Iesu Keriso, e aoaoina i tatou e le Agaga Paia, e ta’u mai e le Agaga Paia ia i tatou mea e tatau ona fai po o le le faia, ma e fesoasoani le Agaga Paia ina ia tatou faia mea lelei (o le a i ai fuaiupu taitasi i luga o pepa eseese e lua). Faapipii ia pepa i luga o le laupapa i soo se faatulagaga ae faasaga i tamaiti ia talita o le FMT. Valaaulia se tamaitiiti e fuli i luga se tasi o pepa. Fai faatasi ia upu o loo i tua. Filifili se isi tamaitiiti e fuli i luga se isi pepa ma taumafai e faatutusa. Toe fai faatasi ia upu o loo i le pito i tua. Afai e tutusa ia pepa, ona aveese lea mai le laupapa. Afai e le tutusa, fuli i lalo. Toe fai seia tutusa uma.
Uunaia le faaaogaaga (talanoaina o tusitusiga paia): Vaevae ia tamaiti i ni vaega. Tuu atu i vaega taitasi se tasi o mau faasino nei: Ioane 14:26; Ioane 15:26; 2 Nifae 32:5; MFF 11:12. Fai atu i vaega taitasi e faitau a latou mau ma talanoa ia uiga. Valaaulia ia tamaiti ma o latou faiaoga e faasoa mai ni faataitaiga o le auala na latou lagonaina ai le uunaiga a le Agaga Paia.
Vaiaso 4: Ou te toe faafouina a’u feagaiga o le papatisoga pe a ou ‘ai ma inu i le faamanatuga.
Uunaia le [agaga] malamalama (talanoaina o feagaiga ma faitau ia tusitusiga paia): Faamalamalama atu o le feagaiga o se folafolaga paia e valalua i le va o i tatou ma le Tama Faalelagi; tatou te folafola atu le faia o ni mea faapitoa, ma pe a tatou faia, e Na te folafola mai faamanuiaga ia i tatou. Ia faamanatu atu i tamaiti tatou te osia se feagaiga ma le Tama Faalelagi pe a tatou papatiso, ma ia faamalamalama atu, tatou te toe faafouina lena feagaiga pe a tatou aai ma feinu i le faamanatuga. Fai ni uputusi i ni fuaiupu mai i tatalo o le faamanatuga lea e faamatala ai mea na tatou folafola atu pe a tatou aai ma feinu i le faamanatuga ma mea na folafola mai e le Tama Faalelagi ia i tatou (tagai i le Mataupu ma Feagaiga 20:77, 79). Tuu atu i nai tamaiti ia uputusi, ma fai atu ia i latou e tutu i le faasologa sa’o ao e faitauina leotele ia mau.