Tesema
O Iesu Keriso o le Alo o le Atua
“Faauta, o a’u o Iesu Keriso, le Atalii o le Atua. O A’u o le ola ma le malamalama o le lalolagi” (MFF 11:28).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Na auina mai e le Tama Faalelagi Lona Alo i le lalolagi.
Faailoa atu le aoaoga faavae (toe fai se fuaiupu o le gaoioiga: Toe fai le fuaiupu o le gaoioiga i ni nai taimi faatasi ma tamaiti:
Na auina mai e le Tama Faalelagi Lona Alo i le lalolagi.
Na ia afio mai o se pepe. (faataooto lima)
Na Ia tuputupu ae faapei o oe ma a’u. (faapio mai le sulugatiti ma tu lemu ae i luga)
Aua na alofa o Ia ia i tatou, (tuu le lima i luga o le fatu) Na Ia maliu mo i tatou. (nofo i lalo)
Aua ua toetu o Ia, o le a tatou toe ola foi! (toe tu i luga)
Faamatala atu, i totonu o tusitusiga paia, o loo ta’u mai ai e Iesu o Ia o le Alo o le Atua. Faitau faatasi leotele le Mataupu Faavae ma Feagaiga 11:28. (E mafai ona e valaaulia ia tamaiti laiti e na o le faapea mai “o le Alo o le Atua” pe a e faitaua lena vaega o le mau.)
O le faatagaina o tamaiti e auai i le faamatalaina o le tala o le a latou mataalia ma auai ai ma le maelega.
Uunaia le [agaga] malamalama (tusi ni ata ma faalogologo i se tala): Tuu atu i tamaiti taitasi e tusi se ata o se vaaiga po o se tagata mai le tala o le fanau mai o Iesu Keriso (mo se faataitaiga, o Maria, Iosefa, po o leoleo mamoe). Toe faamatala le tala mai le Luka 2:4–17 ma Mataio 2:1–12. Valaaulia ia tamaiti e uu i luga a latou ata i taimi talafeagai o le tala. Atonu e te manao e usu ni pese Kerisimasi mai le Tusipese a Tamaiti i le taimi o lenei gaoioiga (tagai i itulau e 20–48). Mo ni fautuaga e uiga i le faaaogaina o musika e aoao atu ai, tagai i le AALVSA, 181–82.
Vaiaso 2: Na tuputupu ae Iesu i le poto ma le tino ma ua alofagia e le Atua atoa ma tagata.
Faailoa atu le aoaoga faavae (usuina o se pese ma taulotoina se mau): Faaali atu ni ata o le tuputupu ae o Iesu mai le pepe meamea e oo i le tamaitiiti seia oo ina avea ma tagata matua. Usu faatasi le pese “Sa Tamaitiiti o Iesu” (TT, 34), ma fai atu i tamaiti e faamatala mai mea o loo aoaoina e le pese e uiga ia Iesu. Fesoasoani i tamaiti e tauloto le Luka 2:52 e ala i le faaaogaina o ni taga faigofie e suitulaga i auala na tuputupu ae ai Iesu: i le poto (tusi i le ulu), i le tino (faamalo ia maso), ma na alofagia e le Atua (piilima) atoa ma tagata (talotalo atu i se uo).
Uunaia le faaaogaaga (faitauina o tusitusiga paia ma auai i ni gaoioiga): Vavae le potu i ni eria se fa, ma tuu se tasi o faailoga nei i eria taitasi: Na tuputupu ae Iesu i le poto—MFF 88:118; Na tuputupu ae Iesu i le tino—MFF 89:20; Na alofagia e le Atua ia Iesu—MFF 88:63; Na alofagia e tagata ia Iesu —Faataoto 18:24. Ia saunia se gaoioiga faigofie mo eria taitasi, e pei o ni fesili e talafeagai ma le matutua e uiga i le Tama Faalelagi ma Ana poloaiga (“poto”), o se fua faatatau e faamaumau ai le umi o tamaiti taitasi ma pepa e tusi ai ata o meaai maloloina lelei (“tino”), ma tala mai le Friend po o le Liahona e uiga i le molimau ma faauoga (“na alofagia e le Atua” ma “na alofagia e tagata”). Faamatala atu na tatou tuputupu ae uma lava i le auala e tasi e pei o Iesu—“i le poto ma le tino, ma na alofagia e le Atua atoa ma tagata” (Luka 2:52). Vaevae ia tamaiti i ni vaega se fa, ma fai atu i se tagata matua e taitai ia vaega taitasi i se tasi o faailoga, lea o le a latou faitau ai faatasi le mau ma auai i le gaoioiga. Ia taina se musika lemu pe a oo i le taimi e o ai tamaiti i se isi faailoga.
Na tuputupu ae Iesu i le tino
Na alofagia Iesu e le Atua
O le gaoioiga lenei, e mafai e tamaiti ona fesootai atu ia Iesu Keriso e ala i le iloaina na Ia tuputupu ae faapei o i latou.
Vaiaso 3: O Iesu Keriso o le malamalama ma le ola o le lalolagi.
Faailoa atu le aoaoga faavae (faia o se gaoioiga faatusipaia): Faapipii ni ata o le fanau mai ma le maliu o Keriso e faafesagai i itu o le potu. Tau atu i tamaiti o le a e faitauina nisi o mau, a le o ni faailoga o le fanau mai o Iesu po o ni faailoga o Lona maliu. Fai atu i tamaiti e faasaga i le ata e o faatasi ma mau o e faitauina. (Afai e toalaiti lau Peraimeri, atonu e te manao e savavali ia tamaiti i ata.) Faitau le 3 Nifae 1:15, 19, 21; 8:20, 22–23. Ia talanoaina pe na faapefea ona aumai e Iesu Keriso le malamalama i le lalolagi. Fai atu i tamaiti e pupuni o latou mata ma mafaufau i nisi o luitau atonu latou te fetaiai pe ana faapea na latou ola e aunoa ma se malamalama. Ia faatusatusa nei luitau i isi semanu tatou te fetaiai pe ana faapea tatou te le’i mauaina le talalelei a Iesu Keriso. Faitau le Ioane 8:12, ma valaaulia ia tamaiti e faalogo mo mea e tatau ona tatou faia ina ia aua nei savavali i le pouliuli.
Uunaia le [agaga] malamalama (taaalo i se taaloga taumatemate): Faamatala atu o le tele o faailoga o le a fesoasoani lea ia i tatou ina ia manatua o Iesu o le malamalama o le lalolagi; o nisi o faailoga o loo faaaogaina i le Kerisimasi. Tuu nisi o nei faailoga (e pei o moligao, fetu pepa, po o moli) i totonu o se taga pepa. Fai i se tamaitiiti e aapa i totonu o le taga pepa, tagotago i se tasi o mea faatino e aunoa ma le tilotilo i ai, mate po o le a lea mea, ona faaali atu lea i isi tamaiti. Fai i le tamaitiiti e faasoa mai se mea na faia e Iesu Keriso e aumai ai le malamalama i o tatou olaga. Toe fai mo isi ata.
Uunaia le faaaogaaga (tusi se ata): Tuu atu i tamaiti taitasi se la e fai i le pepa. Fai atu ia i latou e tusi pe tusi se ata o se tasi o auala latou te mulimuli ai i le malamalama o Iesu Keriso. Uunaia i latou e faasoa atu a latou pepa i o latou aiga.
E maua ata tusi o le la i le sharingtime.lds.org
Vaiaso 4: Na vaai Iosefa Samita ma molimau atu ia Iesu Keriso.
Uunaia le [agaga] malamalama (tatalaina o ni meaalofa): Afifi se ata o le Uluai Faaaliga e avea o se meaalofa. Faamatala atu o le toatele o tagata e tuuina atu ni meaalofa e faamanatu ai ni aso fanau. Fesili atu po o ai e ana le aso fanau lea tatou te faamanatuina i le Kerisimasi. Faamatala atu e i ai foi se isi tagata taua o loo i ai se aso fanau ia Tesema. Valaaulia se tamaitiiti e tatala le meaalofa e iloa ai po o ai lena tagata. Tau atu i tamaiti o le aso 23 o Tesema o le aso fanau lea o Iosefa Samita. Ia talanoaina le Uluai Faaaliga, ma faamatala atu na tuuina mai ia i tatou ni meaalofa taua aua na vaai ma molimau mai Iosefa Samita ia Iesu Keriso. Tusi i luga o le laupapa, “Ua tuuina mai meaalofa aua na vaai ma molimau mai Iosefa Samita ia Iesu Keriso.” Ia saunia ni fasi pepa lapopoa se fa, o loo tusia ai se tasi o meaalofa nei i pepa taitasi: “Ua ia i tatou le Tusi a Mamona.” “Ua ia i tatou le Ekalesia moni i luga o le fogaeleele i le aso.” “Ua ia i tatou le perisitua.” “Ua tatou iloa e faafofoga ma taliina e le Tama Faalelagi ia tatalo.”
E maua uputusi i le sharingtime.lds.org
Vaevae tamaiti i ni vaega se fa. Tuu atu i vaega taitasi se tasi o pepa, ma fai atu ia i latou e tusi se ata o lena meaalofa. Fai atu i ai e tuu atu a latou ata o se meaalofa i se isi vaega. Valaaulia ia vaega taitasi e faaali atu ma faamatala le latou meaalofa i isi tamaiti ma tuu le ata i luga o le laupapa.
Uunaia le faaaogaaga (molimau atu ia Iesu Keriso): Fai i tamaiti e moeiini o latou mata ma mafaufau i se tasi e mafai ona latou faasoa atu i ai le meaalofa o le talalelei. Tau atu ia i latou e mafai ona avea i latou faapei o Iosefa Samita ma molimau atu ia Iesu Keriso.