Oketopa
O Faamanuiaga o le Perisitua E Maua e Tagata Uma
“O i latou uma o e maua lenei perisitua ua talia a’u, ua fetalai mai ai le Alii” (MFF 84:35).
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: E maua e alii talavou agavaa le perisitua pe a atoa lo latou ta’i 12 tausaga.
Faailoa atu le aoaoga faavae (vaaia o se ata): Faaali i tamaiti se ata o Iesu Keriso o loo faatuina le faamanatuga. Faamatala atu na tuuina atu e Keriso le faamanatuga i Ana Aposetolo ma Ona soo i le Tusi a Mamona, ma na Ia fetalai atu ia i latou e faaauau ona faamanuia ma tufatufa atu le faamanatuga pe a aluese o Ia. Faitau faatasi le 3 Nifae 18:5–6. Fai atu ni fesili faapea i tamaiti: O ai e faamanuiaina le faamanatuga i o tatou aso? O ai e tufatufaina le faamanatuga? O le a le mana e manaomia ona umia e se tagata ina ia faamanuia ma tufatufa atu ai le faamanatuga?
Uunaia le [agaga] malamalama (talanoaina le aoaoga faavae): Faamalamalama atu o le perisitua o le mana lea o le Atua e auauna atu ai ma faamanuia ia tagata i le lalolagi. Ua aoaoina i tatou e Keriso i aso e gata ai e mafai e soo se alii ona mauaina le perisitua pe afai e na te ausia mea e lua e manaomia. O le mea muamua e tatau ona i ai i le tausaga faapitoa. Fai i tamaiti e tutu i luga pe a latou faalogo o e fai atu le tausaga e mafai ai e se alii ona maua le perisitua. Faitau lemu mai le tasi e oo i le sefululua. Fai atu i tamaiti o le isi tulaga e manaomia e tatau i le alii ona agavaa. Faamatala atu le uiga o le agavaa, ma faamatala atu e mafai uma e alii ma teine ona faaaogaina le “O Ou Tulaga Faatalalelei” e fesoasoani ia latou iloa ai le auala e ola agavaa ai.
Uunaia le faaaogaaga (auai i se gaoioiga faaletino): Vaevae ia tamaiti i ni vaega. Ia tofu vaega taitasi ma se tulaga faatonuina mai le “O Ou Tulaga Faatalalelei”. Fai atu i vaega taitasi e mafaufau i se taga faigofie e suitulaga i lo latou tulaga faatonuina. Valaau atu ni nai upu e faailoa ai se tulaga faatonuina, ma fai atu i le vaega ua tofia e tutu i luga ma faailoa mai le latou taga. Ia toe fai seia oo ina tofu maua e vaega uma se avanoa. Faamatala atu o le ola ai i nei tulaga faatonuina o le a fesoasoani i alii ina ia agavaa ai pea ma maua sauniga o le perisitua ma ia agavaa foi tamaitai ina ia maua sauniga o le perisitua, e pei o le papatisoga ma sauniga o le malumalu.
Vaiaso 2: Tatou te maua ia sauniga o le faaolataga e ala i le perisitua.
O lesona faitino e mafai ona faaaoga e faaosofia ai le fiafia, taulai atu ai mafaufauga o tamaiti, pe folasia atu ai se mataupu faavae o le talalelei.
Faailoa atu le aoaoga faavae (vaaia o se lesona faatino): Tuu atu i se tamaitiiti se toatasi e uu se faamalu o loo tatala. Faataga ni nai tamaiti e tutu i lalo ifo. Faatusatusa le faamalu i le perisitua. Faailoa atu afai o loo timu, o tamaiti uma lava o loo i lalo o le faamalu o le a maua faamanuiaga o le mamago pea, e le na o le toatasi lea o loo uuina. Ua faapea foi, ona saunia e le Atua, e ala i Lana perisitua, se auala mo Ana fanau uma ina ia faamanuiaina. E ala mai le perisitua ua tatou maua ai ia sauniga o le faaolataga lea e faataga ai i tatou e toe foi atu ma mau faatasi ai ma le Atua.
Uunaia le [agaga] malamalama (tuufaatasiga o paso): Tusi mea nei taitasi i fasi pepa eseese: papatisoga, faamauga, faauuga o le perisitua (mo alii), faaeega paia o le malumalu, ma le faamauga faalemalumalu. Otioti fasi pepa taitasi i se paso. Ia faamalamalama puupuu i tamaiti po o le a le sauniga (o se sauniga paia po o se gaoioiga e i ai ni uiga faaleagaga), ma ta’u atu i tamaiti o nisi o sauniga faaleperisitua e manaomia mo i tatou ina ia toe foi atu ma nonofo faatasi ai ma le Tama Faalelagi. Tusi ni faasitepu se lima i luga o le laupapa, ma faapipii se ata o Iesu Keriso i luga o le faasitepu pito i luga. Vaevae ia tamaiti i ni vaega se lima ma ia tofu vaega taitasi ma se paso se tasi lea na e faia. Fai atu ia i latou e tuufaatasi a latou paso ona faasoa mai lea i le Peraimeri atoa ia mea latou te iloa e uiga i le sauniga. Fai i vaega e faapipii a latou paso ua uma ona tuufaatasi i se faatulagaga sa’o i luga o faasitepu o loo i le laupapa.
Vaiaso 3: E mafai ona ou maua le mana faamalosiau e ala i faamanuiaga faaleperisitua.
Faailoa atu le aoaoga faavae (talanoaina o le aoaoga faavae): Fai atu i tamaiti e tuu i luga o latou lima ma tilotilo i ai. Fesili i ai pe faapefea ona fesoasoani o latou lima ia i latou e taaalo ai, galulue, ma sauni ai mo le lotu. Valaaulia i latou e faatino mai ni taga o tali taitasi. Ona fesili atu lea ia i latou pe faapefea ona faaaoga e tagata o latou lima e fesoasoani ai i isi. Faamalamalama atu e mafai e e umia le perisitua ona faaaoga o latou lima e tuu atu ai faamanuiaga lea e fesoasoani ma faamalolosia ai i tatou.
Uunaia le [agaga] malamalama ma le faaaogaaga (vaaia o ata ma le faasoaina atu o aafiaga): Faapipii solo i totonu o le potu ia ata o le faamanatuga, papatisoga, faamauga, faamanuiaga o se pepe, ma le taulimaina o e mamai, ma ia faamatala atu le mea o loo tupu i ata taitasi. Valaaulia ia tamaiti e tusi ata o o latou lima i se fasi pepa ona oti lea. Fai i ai e tusi o latou igoa i luma o ata o lima. Valaaulia i latou e faapipii se tasi o a latou lima pepa e latalata i se ata o loo faailoa atu ai se faamanuiaga po o se sauniga na latou mauaina mai i aao o se umia le perisitua. Filifili ni nai lima, ma ia valaaulia na tamaiti e faasoa mai o latou lagona e uiga i le auala na faamanuiaina ai ma faamalosiauina ai i latou e le perisitua. Faamatala atu le tala ia Iesu o loo faamanuia i tamaiti mai le 3 Nifae 17:11–25. Faapipii se ata o Iesu o loo faatasi ma tamaiti i luma o le potu, ma valaaulia ia tamaiti taitasi e faapipii le latou ata lona lua o lima e latalata i lena ata. Faamatala atu e i ai i e umia le perisitua le mana e galulue ai i le suafa o Iesu Keriso; e mafai ona latou faamanuiaina i tatou e pei lava foi o Iesu pe ana o i ai iinei o Ia.
O le fesoasoani atu i tamaiti ina ia auai ma le maelega i le lesona o le a fesoasoani lea ia i latou e faaaoga le aoaoga faavae na aoaoina.
Vaiaso 4: E mafai ona ou alu i le malumalu ina ia maua sauniga mo ou tuaa pe a ou matua.
Faailoa atu le aoaoga faavae ma uunaia le [agaga] malamalama (valivali): Toe faamanatu atu i tamaiti tatou te manaomia e maua sauniga faapitoa o le perisitua ae tatou te le’i toe foi atu e nonofo faatasi ma le Tama Faalelagi. Fai atu i ai e ta’u mai nisi o na sauniga. Faamatala atu ua toatele tagata ua maliliu e aunoa ma se avanoa e maua ai nei sauniga, ma e latou te manaomia la tatou fesoasoani. Faamatala i tamaiti se tasi o ou tuaa na maliu ae le’i maua nei sauniga. Tuu atu i tamaiti taitasi se otootoga faigofie o se tagata na ooti mai se pepa. Fai atu ia i latou e tusi so latou ata i le tasi itu o le pepa ma se ata o le tuaa na e tauina atu ia i latou i le isi itu. (Afai e iloa e tamaiti se tasi o latou tuaa ua maliu e aunoa ma ni sauniga faaleperisitua, e mafai ona latou tusia lena tagata.) Fai atu ia i latou e toe fai le autu o lenei vaiaso ao uuina a latou pepa faatagata i o latou luma. Fai atu ia i latou e faaali mai o latou lava ata pe a latou tau maia le upu “A’u” ma le ata o le tuaa pe a latou tau maia le upu “tuaa”.