Setema

E Aoao A’u e Tulafono e Sefulu ina ia Alofa i le Atua ma Ana Fanau

“Afai e te alofa mai ia te au e te auauna mai ia te au ma tausi au poloaiga uma” (MFF 42:29).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: E faamanuiaina i tatou pe a tatou tausia ia poloaiga.

Faailoa atu le aoaoga faavae (vaaia o se lesona faatino): Valaaulia se tina e aumai lana pepe i le taimi o le fetufaaiga. Valaaulia ia tamaiti e faasoa mai nisi o tulafono o le a fesoasoani ina ia tausia saogalemu ai le pepe. Fai atu i tamaiti o i tatou uma o fanau a le Tama Faalelagi; e alofa o Ia ia i tatou ma tuu mai ia i tatou ia tulafono ma poloaiga tatou te saogalemu ai ma fiafia. Faaali atu se ata o Mose ma Tulafono e Sefulu, ma faamatala puupuu atu le auala na maua ai e Mose ia tulafono (tagai i le Esoto 19–20).

Ata

The Ten Commandments

Uunaia le [agaga] malamalama (usuina o ni pese): Faapipii i luga o le laupapa ia fuaiupu ia e tolu: “Faaaloalo ma Tapuai i le Atua,” “Ava i Matua,” ma le “Faaaloalo i Isi.” Ta’u i tamaiti e mafai ona tuueseese ia Tulafono e Sefulu i vaega e tolu nei. Vavae ia tamaiti i ni vaega ma tuu atu ia i latou se pese e fesootai i se tasi o vaega. Fai atu i vaega taitasi e filifili po o ai o le a usuina le pese (mo se faataitaiga, na o tama, na o teine, na o i latou o loo ofuina le lanu mumu). Pe a maea ona usu le pese, fai atu i se tamaitiiti e faapipii le pese i lalo o le vaega e talafeagai ai. Mafaufau e faaaoga ia pese nei: “Aso Toonai” (TT, 105), “E Vave Ona Ou Usitai” (TT, 71), “Lo’u Tama” (TT, 111), “O Le Ekalesia a Iesu Keriso” (TT, 48), ma le “O Le Agalelei e Amata Ia Te A’u” (TT, 83).

Ata

arches

Uunaia le faaaogaaga (usuina o se pese): Usu le pese “Tausi Poloaiga” (TT, 68–69), ma fai i tamaiti e faalogo mo folafolaga tatou te maua pe a tatou tausia ia poloaiga. Valaaulia i latou e faasoa mai pe faapefea ona faamanuiaina i latou pe a latou tausia ia poloaiga.

Vaiaso 2: E tatau ona ou faaaloalo ma tapuai i le Atua.

Uunaia le [agaga] malamalama ma le faaaogaaga (faitauina o tusitusiga paia): Faamalamalama atu o poloaiga muamua e fa a le Tama Faalelagi na tuuina ia Mose o loo aoao ai i tatou e tatau ona tatou faaaloalo ma tapuai i le Atua. Tusi ia fuaiupu nei i luga o le laupapa. Tusi ia mau faasino i ni fasi pepa se fa.

Aua ne’i e fai mo oe ni i o’u luma. (Esoto 20:3)
Aua e te fai mo oe se . (Esoto 20:4)
Aua e te ta’u fua le suafa o Ieova lou Atua . (Esoto 20:7)
Ia e manatua le , e te faapaiaina. (Esoto 20:8)

Vaevae tamaiti i ni vaega se fa. Tuu i vaega taitasi se tasi o mau faasino, ma fai atu ia i latou e faitau le mau ma saili le fuaiupu e faatatau i ai i luga o le laupapa. Fai atu i le vaega muamua e faatumu a latou avanoa ma taitai isi tamaiti e toe fai faatasi mai le latou fuaiupu. Ia talanoaina le uiga o le poloaiga, ma tuu i tamaiti e fautua mai mea sa latou faia e usitai i ai. Tusi a latou fautuaga i luga o le laupapa. Toe fai mo isi vaega e tolu. Uunaia ia tamaiti e filifili se tasi o fautuaga i luga o le laupapa e galue ai i le aluga o le vaiaso.

Vaiaso 3: E tatau ona ou ava i o’u matua.

Faailoa atu le aoaoga faavae (taulotoina o se mau): Ia iloiloina puupuu ni poloaiga na aoaoina e tamaiti i le vaiaso ua te’a, ma fesili atu i ni nai tamaiti e faasoa mai mea na latou faia e ola ai i na poloaiga. Vaevae ia tamaiti i ni vaega se fa, ma tuu atu se uputusi se tasi o loo faailoa atu i lalo i vaega taitasi (tagai i le Esoto 20:12).

Ata

memorize a scripture

E maua uputusi i le sharingtime.lds.org

Valaaulia le vaega muamua e tutu, toe fai atu upu o luga o a latou uputusi, ma nonofo i lalo, sosoo ai ma isi vaega i le faatulagaga. Fai atu i vaega e tuu a latou uputusi i le isi vaega, ma toe fai le gaoioiga seiloga ua faitau e vaega uma ia uputusi taitasi.

Uunaia le faaaogaaga (taaalo i se taaloga): Vavae ia tamaiti i ni vaega. Fai atu i vaega taitasi e mafaufau i se mea e mafai ona latou faia e ava ai i o latou matua. Valaaulia vaega taitasi e faatino i a latou taga, ma fai atu i isi tamaiti e mate mai mea o loo latou faia. Pe a sa’o a latou mate, fai atu i se tasi o tamaitiiti i le vaega e tusi lo latou manatu i luga o le laupapa.

Vaiaso 4: E tatau ona ou faaaloalo i isi.

Faailoa atu le aoaoga faavae (talanoaina le faaaloalo): Tau atu i tamaiti e i ai se tagata matuai taua lava e sau i le Peraimeri i le aso. Fai atu i tamaiti e faatino mai pe faapefea ona latou faaalia le faaaloalo i lenei tagata. Tuu atu latou te matea mai po o ai le tagata. Usu le fati o le pese “O Au O Se Atalii o le Atua” ao e faapineina se fetu pepa i tamaiti uma. Faamatala atu e taua tagata uma ma e tatau ona tatou taulimaina tagata uma ma le faaaloalo. Tau atu i tamaiti o le tele lava o Poloaiga e Sefulu o loo aoaoina ai i tatou i le auala e faaaloalo ai i isi.

Uunaia le [agaga] malamalama ( ia talanoaina ni tulaga faatusa e aoao ai): Faamatala atu ua aoaoina i tatou e Tulafono e Sefulu e le tatau ona tatou gaoi pe pepelo; o se tasi lea o auala tatou te faaaloalo ai i isi. Ia saunia ni tulaga faatusa e aoao ai (tagai i le AALVSA, 170–) lea e tuuina mai ni tulaga o loo feagai ma tamaiti i se filifiliga e uiga i le faamaoni. Vaevae tamaiti i ni vaega, ma tuu atu i vaega taitasi ni tulaga faatusa e aoao ai. Fai atu ia i latou e faitau tulaga faatusa e aoao ai taitasi ma talanoaina pe faapefea ona latou faamaoni i tulaga taitasi.