Iuni
Ou Te Filifili le Mea Sa’o e ala i le Ola ai i Mataupu Faavae o le Talalelei
“Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga Na te saunia le ala mo i latou ia mafai ai e latou ona fai le mea ua Ia poloaiina ai i latou” (1 Nifae 3:7).
Pese: “Lototele o Nifae”
(TT, 64–65)
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Ou te tatalo i le Tama Faalelagi mo le malosi e fai ai le mea sa’o.
Uunaia le [agaga] malamalama (talanoaina o le tatalo): Faaali i tamaiti se telefoni po o se isi tulaga o fesootaiga. Talanoa pe faapefea ona faaaogaina. Fesili atu i tamaiti pe faapefea ona tatou fesootai ma le Tama Faalelagi. Ia faamatala atu e pei lava foi ona tatou viliina se numera e talanoa ai i se tasi i le telefoni, e mafai foi ona tatou tatalo e fesootai ai ma le Tama Faalelagi; e mafai ona tatou talosaga atu ia te Ia mo le malosi e fai ai le mea sa’o. Tuu atu i vasega taitasi se ata o ituaiga tatalo eseese (mo se faataitaiga, tatalo faaletagata lava ia, tatalo faaleaiga, faamanuiaga o meaai, po o le tatalo o le vasega). Fai atu i vasega taitasi e faaali mai o latou ata i isi tamaiti ma tau atu ia i latou le ituaiga tatalo o loo faaali mai ma po o afea, po o fea, ma pe aisea e fai ai lea ituaiga tatalo.
Uunaia le faaaogaaga (taaalo i se taaloga): Tutui se tamai pu i le pito i lalo o ni atigi apa se lua, ma faapipii faatasi ia apa i se manoa. Toso faamau le manoa, ma tuu i tamaiti latou te auauai e faamatala lemu atu i totonu o se tasi o apa se mea e mafai ona latou tatalo atu ai i le Tama Faalelagi ao latou taumafai e fai le mea sa’o (mo se faataitaiga, ta’u le mea sa’o, ia migao, po o le agalelei atu). Tuu i se isi tamaitiiti e faalogo i le isi apa. Faasoa atu (pe fai i se tamaitiiti e faasoa mai) se aafiaga na maua ai le malosi mai le Tama Faalelagi e fai le mea sa’o. Molimau atu e faafofoga ma taliina e le Tama Faalelagi a tatou tatalo ma e tuu mai ia i tatou le malosi e fai ai le mea sa’o.
Vaiaso 2: Pe a ou totogiina la’u sefuluai, o le a faamanuia a’u e le Tama Faalelagi.
Faailoa atu le aoaoga faavae ma uunaia le [agaga] malamalama (vaaia o se faatinoga): Faamatala atu o le sefuluai o le tuuina atu lea o le tasi-vaesefulu o au tupe maua i le Alii e ala atu i Lana Ekalesia. Faaali atu i tamaiti ni tupe siliva se 10. Fesili atu ia i latou pe fia ni tupe siliva e tatau ona faaaoga e totogi ai le sefuluai. Faaali atu se teutusi o le sefuluai ma le pepa o le foai, ma faamalamalama atu tatou te totogiina le sefuluai e ala i le faatumuina o le pepa o le foai, tuu i totonu o le teutusi faatasi ma la tatou sefuluai, ma tuu i le epikopo po o se tasi o ona fesoasoani.
Uunaia le [agaga] malamalama (taaalo i se taaloga ma faalogo i ni molimau): Faaali atu ni ata ma ni mea faitino e suitulaga i faamanuiaga e oo mai i le totogi o le sefuluai, e pei o malumalu, falelotu, o se tusipese, o le Tusipese a Tamaiti, o se tusi lesona o le Peraimeri, ma tusitusiga paia. Tau atu i tamaiti ua mafai ona tuuina mai e le Ekalesia nei mea ona o tupe o le sefuluai. Ufiufi ia ata ma mea faitino. Aveese mai se mea se tasi pe lua foi. Aveese le ufiufi ma fesili atu i tamaiti e mate mai le mea o loo misi. Ia toe fai mo ni nai taimi. Faamatala atu e i ai nisi faamanuiaga e oo mai i le totogi o le sefuluai lea e le mafai ona vaaia (tagai i le 3 Nifae 24:10). Fai atu i se tagata matua e toatasi pe toalua foi e faamatala atu ni faamanuiaga na latou maua mai le totogiina o le sefuluai.
Vaiaso 3: Ou te usitai i le Upu o le Poto e ala i le ai ma inu i mea e lelei ae aloese mai mea e le lelei.
Uunaia le [agaga] malamalama (faitauina o tusitusiga paia ma taaalo i se taaloga): Faitau faatasi le 1 Korinito 3:16–17. Valaaulia ia tamaiti e faasoa mai po o le a le uiga o lenei mau ia i latou. Faamalamalama atu e finagalo le Tama Faalelagi ina ia tatou tausia lelei o tatou tino. Tuu ni ata o ni meaai eseese, meainu, ma isi mea e lelei pe leaga foi mo le tino (e pei o fualaau aina, fualaau faisupo, falaoa, alakaholo, ma le sikaleti) i totonu o se koneteina. Fai se kopi o le itulau e 43 o loo i le tusi lesona a le vasega pepe, ma otioti i ni fasi pepa. Fai atu i tamaiti e auauai e aumai ni ata mai le koneteina. Afai e lelei mo i tatou le mea o loo i le ata, fai i le tamaitiiti e faapipii se fasi pepa o le paso i luga o le laupapa. Afai e le lelei le mea, toese mai le fasi pepa o le paso. Faaauau le taaloga seia atoa le paso (e manaomia le sili atu ona tele mea lelei i totonu o le koneteina nai lo mea le lelei). Fai atu i se tagata matua po o se tamaitiiti e faasoa mai nisi o faamanuiaga na latou maua e ala i le usiusitai i le Upu o le Poto (tagai i le MFF 89:18–21).
O loo maua tusi lesona o le vasega pepe i le sharingtime.lds.org
Vaiaso 4: Pe a talafeagai le faiga o o’u ofu, ua ou faaaloalo i lo’u tino o se meaalofa mai le Atua.
Faailoa atu le aoaoga faavae (vaaia o se ata ma le faitauina o tusitusiga paia): Tusi mea nei i luga o le laupapa: “O lo’u o se .” Faaali atu se ata o se malumalu. Fesili atu, “Aisea e taua ai tele malumalu?” Fai i tamaiti e sue le 1 Korinito 6:19. Fai atu ia i latou e vaai po o a ni mea o loo ta’u mai e uiga i o latou tino ao outou faitau leotele faatasi. Fai atu i tamaiti po o a ni upu e faamae’a ai le fuaiupu o loo i luga o le laupapa (tino, malumalu). Valaaulia ia tamaiti e tutu ma fai faatasi le fuaiupu.
Uunaia le [agaga] malamalama ma le faaaogaaga (usuina o se pese ma talanoaina): Tau atu i tamaiti o o tatou tino o ni malumalu e mafai ona nofo ai le Agaga Paia. Usu le fuaiupu muamua o le pese “Ua Tuu Mai E Le Alii Se Malumalu” (TT, 73). Valaaulia ia tamaiti e faasoa mai po o le a se auala e finagalo le Tama Faalelagi tatou te oofu ai ma pe aisea. Ia faamatala atu e masani lava ona fautua mai e le aunoa ia perofeta a le Atua i Ana fanau ina ia lelei le faiga o lavalava. Vaevae ia tamaiti e faalogo po o a vaega o o latou tino e tatau ona ufiufi ao e faitau mai le vaega o “Ofu ma Foliga Vaaia” i le Mo Le Malosi o le Autalavou. Fai atu i tamaiti e mafaufau i se auala se tasi e mafai ona lelei ai le faiga o latou lavalava. Togi i se tamaitiiti se mea faatino vaivai ma valaaulia lena tamaitiiti e faasoa mai sona manatu. Fai atu i lena tamaitiiti e togi le mea faatino i se isi tamaitiiti, lea o le a faasoa mai foi ona manatua. Faaauau ma isi tamaiti.