Niknik Kajoor
Tōmak wōt im naan in Anij me ekobrak ad raorōk n̄an rejetake kōj—im n̄an kōtļo̧k bwe jen bōk kajoor eo An.
N̄an etali ekkatak ko an rikanaan eo ad ejitenbōro, Būreejtōn Russell M. Nelson, iaar lo juon naan me emakijkij an kōjerbale ilo elōn̄ kōnono ko. Enaan eo ej kajoor.
Ilo kweilo̧k eo eļap jinointata ālkin an kar rejetak āinwōt juon Rijilōk, Būreejtōn Nelson eaar kōnono kōn kajoor. 1 Ej kwaļo̧k wōt kōn kajoor ilo iiō kein. Jen ke jaar rejetake Būreejtōn Nelson āinwōt ad rikanaan ejitenbōro, ekar kwaļo̧k kōn pedped in kajoor—eļaptata, kajoor an Anij—im elmen ad maron̄ in bōke. Ekar kwaļo̧k elmen ad maron̄ epaakeļo̧k kajoor eo an Anij ilo ad jerbal in karejer n̄an ro jet, 2 elmen an ukweļo̧k karuwaineneik kajoor eo an Jisōs Kraist im Pinmuur eo An n̄an mour ko ad, 3 im elmen an priesthood—kajoor im mālim eo an Anij—ej kōjeraam̧m̧an aolep ro rej kōm̧m̧an im kōjparok bujen ko Ippān. 4 Būreejtōn Nelson eaar kam̧ool bwe kajoor eo an Anij ej ilo̧k n̄an aolep ro raar bōk menin letok kwojarjar ilo aer kōjparok bujen ko aer. 5
Ikar m̧weiir kōn juon idajon̄jon̄ Būreejtōn Nelson eaar kwaļo̧k ilo Eprōl 2020 kweilo̧k eo eļap. Eaar katakin kōj n̄an “katak im jar n̄an ekkatak kōn kajoor im jeļāļo̧kjeņ kōn ami kar bōk menin letok kwojarjar eo—ak kōn ami naaj bōk menin letok kwojarjar eo.” 6
N̄an uwaake idajon̄jon̄ in, iaar ekkatak im jar n̄an ekkatak kōn kajoor im jeļāļo̧kjeņ kōn aō kar bōk menin letok kwojarjar eo—ak kōn aō naaj bōk menin letok kwojarjar eo.
Meļeļe ta eo jej aikuj kōm̧m̧ane n̄an bōk kajoor eo an Anij ilo mour ko ad ejjab pidodo, ak iaar lo ke ekkar n̄an ekkatak ilo ļōmņak ko ad im jar bwe Jetōb Kwojarjar en kōmeramļo̧k kōj. 7 Elder Richard G. Scott eaar letok juon meļeļe ealikkarļo̧k kōn ta kajoor eo an Anij: “kajoor eo n̄an kōm̧m̧an eļapļo̧k jān ad maron̄ kōm̧m̧ane kōn kōj make.” 8
Kobrak būruwōd im bar ad kōn naan in Anij im kōn pedped in tōmak ilo Jisōs Kraist eaorōk n̄an bōk kajoor eo an Anij n̄an jipan̄ kōj ilo idajon̄jon̄ kein. N̄e jeban bōk naan in Anij im tōmak em̧wilaļ ilo Jisōs Kraist ilo būruwōd, naan in kam̧ool ko ad im tōmak emaron̄ jako, im jemaron̄ luji kajoor eo an Anij ekōņaan letok n̄an kōj. Ejabwe Tōmak. Tōmak wōt im naan in Anij me ekobrak ad raorōk n̄an rejetake kōj—im n̄an kōtļo̧k bwe jen bōk kajoor eo An.
Āinwōt Johnson im n̄a kar kōkaajririik ajri ro nejum̧ro, kōmro kar rōjan̄ er n̄an ekkatak kilen kōjan̄jan̄. Ak kom̧ro kar kōtļo̧k an ajri ro ekkatak al n̄e rej kōm̧m̧ane ijo kuņaer im kaminene kōjan̄jan̄ kajjojo raan. Juon Jadede, leddik eo nejum̧ Jalynn ekar lukkuun m̧ōņōņō in etal im ikkure ippān ro m̧ōttan, ak ekar jab ekkatak piano. Jeļā bwe ekar wūjlepļo̧k n̄an ekkatak 30 minit, leddik in eaar karōk awa eo, kōnke em̧akoko in kaminene aitokļo̧k jān bar juon minit.
Ke ej etal iturin microwave eo ļo̧k n̄an piano eo, leddik eo ekar bōjrak im jiped jet batin. Ak ijeļo̧kin karōk awa eo, leddik eo ekar karōk awa eo an microwave eo bwe en kōmat 30 minit im kar jiped jinoe. Ālkin 20 minit in kaminene, leddik eo eaar ro̧o̧lļo̧k n̄an jikin kōmat eo in lale m̧ōttan jete an awa im ekar lo bwe microwave eo ekar urur.
Innām leddik eo ekar ettōrtok n̄an backyard eo ijo ij kōm̧m̧an ekkat ie, ļam̧ōjtok ke m̧weeo eurur. Iaar m̧ōkaj in ettōrļo̧k n̄an m̧weeo, im ilo m̧ool, iaar lo an microwave eo bwiļ.
Ilo juon kijejeto n̄an kōjparok m̧weeo jan an bwiļ, ikar bōk microwave eo, tum̧wi, im kōjerbal to in jarom n̄an joļo̧k bwiļin microwave eo jen kountōr eo. Kōtmene n̄an juon m̧ōkade im n̄an kōjparok m̧weeo m̧ōm̧, iaar kuniļo̧k kijeek ko jen itōrerein microwave eo kōn to in jarom eo bwe en jako jen ānbwinnū, n̄an backyard eo, im bar kuniļo̧k urur in microwave eo n̄an ujooj ko. Ijen kōm eaar maron̄ in kune kijeek eo kōn dān.
Ta eo ebōd? Microwave in kōmat eo ear aikuj jetmen n̄an an bōk an kajoor, im n̄e ejjeļo̧k men en ej jo ilo kobban n̄an kōjarom e, kein kōmat in make ej kōjarom e, ejino bwiļ, im maron̄ kōm̧m̧an kijeek, kakkure make n̄an jino kōm̧m̧an kijeek im melkwaarar. 9 Microwave eo am eaar uru im bwiļ kōnke ejjeļo̧k jabdewōt men ilowaan.
Ejjeļo̧k oktak, ro ewōr tōmak im em̧wilaļ naan in Anij būruweer naaj maron̄ in bōk im anjo̧ jen m̧ade kijeek ko me rikapo eo enaaj jilkintok n̄an kakkure kōj. 10 Āinwōt, ad tōmak, kōjatdikdik, im mije emaron̄ jab niknik, im āinwōt microwave eo ejjeļo̧k kobban, jemaron̄ oktak im jorrāān.
Em̧ōj aō jeļā bwe bōk em̧wilaļ naan in Anij ilo aō, kōn tōmak ilo Jisōs Kraist im Pinmuur eo An, ekōm̧m̧an bwe in epake kajoor in naan in Anij n̄an anjo̧ jen rikapo eo im jabdewōt men emaron̄ kajjieon̄ in kapo eō. Ilo ad jelm̧ae idajon̄jon̄ ko, jemaron̄ pedped ioon kallim̧ur eo an Irooj kar kwaļo̧k jen Paul: “Bwe Anij ear jab letok n̄an kōj jetōb in lōḷn̄o̧n̄; a jetōb in kajoor, im yokwe im kajim̧we.” 11
Jej jeļā bwe āinwōt kar juon ajri Rilo̧mo̧o̧r eo eaar “eddek, im kajoor, im E obrak kōn mālōtlōt: im jouj in Anij ej pād Ioon.” 12 Jej jeļā bwe ke Ej rūttoļo̧k, “Jisōs ej ļapļo̧k ilo An mālōtlōt im rūtto, im ilo jouj ippān armej im Anij” 13 Im jej jeļā bwe ke eaar jino jerbal in kwaļo̧k eo An, ro raar ron̄jake E re bwilōn̄ kōn An naan in katak: bwe An in naan ekajoor.” 14
Kōn kōppopo, Rilo̧mo̧o̧r eaar rūttoļo̧k ilo kajoor im kar maron̄ in anjo̧ jen aolep kapo ko an Setan. 15 Ilo ad ļoor waanjon̄ak eo an Rilo̧mo̧o̧r im keppopo ilo riiti naan in Anij im kam̧wilaļ ad tōmak, jemaron̄ bar bōk kajoor eo an Anij n̄an anjo̧ jen kapo ko.
Ilo iien in emo n̄an kuk ippān doon ekōm̧m̧an bwe etal n̄an tampeļ emakijkij en pen, iaar kōm̧m̧ane juon kōttōbar bwe in wōnm̧aanļo̧k wōt im ekkatak n̄an jeļā eļapļo̧k kōn kajoor eo an Anij n̄an kōj ilo ad kōm̧m̧an im kōjparok bujen ko an tampeļ. Āinwōt kar kallim̧ur ilo jar in aje eo an Kirtland Tampeļ, jej etal jen tampeļ eo kōn kajoor eo an Anij. 16 Ejjeļo̧k jem̧ļo̧kin iiō n̄an bōk kajoor eo an Anij letok ioon ro rej kōm̧m̧an im kōjparok bujen ko an tampeļ, ak ejjeļo̧k mo jān buki kajoor in ilo iien nan̄inmej in. Kajoor eo An ej dikļo̧k ilo mour ko ad wōt n̄e jej likjab in kōjparok bujen ko ad im jab mour kake juon wāween me ej kōtļo̧k ad karbab wōt n̄an bōk kajoor eo An.
Ke n̄a im kōrā eo ippa ejitenbōro kar jerbal āinwōt juon ritōl mijen ilo Thailand, Laos, im Myanmar, kom̧ro kar kam̧oole pein kajoor eo an Anij me ej itok n̄an ro rej kōm̧m̧an im kōjparok bujen ko rekwojarjar ilo tampeļ. Jāān in Jipan̄ n̄an Tampeļ ekar kapidodoik n̄an elōn̄ iaan ro Rekwojarjar ilo laļ kein jilu n̄an etal n̄an tampeļ ālkin aer dipļo̧ki kaarmejet ko im keppopo ko. Ij keememej ioon juon kurup 20 iaan ro Rekwojarjar rōtōmak jān Laos ilo juon airport ilo Bangkok, Thailand, n̄an jipan̄ er etal n̄an bar juon airport ilo Bangkok n̄an uwee ilo baluun eo waer ļo̧k n̄an Hong Kong. Membōr rein raar obrak kōn m̧ōņōņō n̄an jibadōkļo̧k m̧weeo im̧ōn Irooj.
Ke kom̧ro ej ioon rein Rekwojarjar rem̧m̧an ke rej ro̧o̧ltok, kajoor in gospel eo eaar juon tōprak in kam̧ool ilo aer kar bōk menin letok kwojarjar eo an tampeļ im deļo̧n̄e bujen ko ippān Anij Rekwojarjar rein ren ilo̧k jen tampeļ “pālpel kōn kajoor eo [An].” 17 Kajoor in n̄an kōm̧m̧an eļapļo̧k jen n̄e ren kar kōm̧m̧an n̄an er make kar leļo̧k n̄an er kajoor n̄an nikniki idajon̄jon̄ ko an ro uwaan Kabun̄ ilo laļ eo aer im n̄an bun̄m̧aanļo̧k n̄an bōk “men ko reļļap otem ļap im naan ko raiboojoj, ilo m̧ool ” 18 ilo aer wōnm̧aanļo̧k im kalōk aelōn̄ in kiin̄ eo an Irooj ilo Laos.
Ilo iien in me jejjab maron̄ etal n̄an tampeļ, jej ke kajjojo pedped ioon bujen ko jaar kōm̧m̧ani ilo tampeļ n̄an kalikkare, juon ko̧o̧j in tōl eo eban oktak ilo mour ko ad? Bujen kein, n̄e kōjparoki, ej letok n̄an kōj visōn im kōjatdikdik ekkar n̄an jeklaj eo im juon kōļmenļo̧kjeņ eo ealikkar n̄an kakarbab n̄an bōk aolep kallim̧ur ko an Irooj kōn wōt ad pokake.
Ij karuwaineneik eok n̄an kappukot kajoor eo an Anij ekōņaan lewaj n̄an eok. Ij kam̧ool bwe ilo ad kappukot kajoor in, jenaaj jeraam̧m̧an kōn eļapļo̧k meļeļe kōn iakwe eo an Jemedwōj Ilan̄ n̄an kōj.
Ij kam̧ool bwe kōnke Jemedwōj Ilan̄ ej iakwe kwe im n̄a, E eaar jilkintok Nejin Emake Wōt, Jisōs Kraist, bwe en ad Rilo̧mo̧o̧r im Ripinmuur. Ij kam̧ool kōn Jisōs Kraist, E eo epād aolep kajoor, 19 im kōm̧m̧an āindein ilo etan Jisōs Kraist, amen.