2020
Anij En Anjo̧
Nobōm̧ba̧BA 2020

Anij En Anjo̧

Jān Būreejtōn Russell M. Nelson

Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata

Kwoj ke kōņaan bwe Anij en anjo̧ ilo mour eo am̧? Kwoj ke kōņaan bwe kajoor eo an Anij en im̧we mour eo am̧?

Ro jeiū im jatū rejitenbōro, ewi jon̄an aō m̧ōņōņō kōn ennaan ko rekabwilōn̄lōn̄ ilo kweilo̧k in im aō iien em̧m̧an bwe in kōnono n̄an kom̧ kiiō.

Elōn̄ ļo̧k 36 iiō ko in aō juon Rijilōk, katak eo kōn aiintok Israel eaar juon unin katak n̄an eō. 1 Men otemjeļo̧k raar kam̧weiir eō, ekoba jerbal in karejar ko im āt ko 2 an Ebream, Aisōk, im Jekab, mour ko aer im kōrā ro pāleer; bujen eo Anij eaar kōm̧m̧an ippāer im ilo bwij ko aer; 3 im ajedeed eo an bwij ko jon̄oulruo; im jon̄an kanaan ko kōn aiintok in ilo tōre in ad.

Ikar ekkatak kōn aiintok doon eo, kar jar kake, kar lin̄uri kajjojo eoon ko rekkar, im kar kajjitōk ippān Irooj n̄an kōļapļo̧k aō meļeļe.

Kōn menin ij m̧ōņōņō ke iaar tōl n̄an juon ļōmņak ekāāl. Kōn jipan̄ eo an ruo rimāletlet in Hibru, iaar jeļā bwe juon iaan meļeļe eo ilo kajin Hibru kōn naan in Israel ej “an Anij anjo̧.” 4 Lo lukkuun āt eo etan Israel ej armej eo ej kōņaan bwe Anij en anjo̧ ilo mour eo an. Ļōmņak in ekar im̧we eō.

Naan eo kōņaan eaorōk n̄an ukook eo an Israel 5 Ewōr ippād aolep anemkwoj. Jemaron̄ kālet Israel, ak jaab. Jemaron̄ kālet bwe Anij en anjo̧ ilo mour ko ad, ak jaab. Jemaron̄ kālet bwe kajoor eo an Anij en im̧we mour ko ad, ak jaab.

Ilo jidik iien, jen keememej juon iien oktak ilo mour eo an Jekab, ļaddik eo jibun Ebream. Jekab eaar ņa etan jikin eo Peniel (me meļeļe “mejen Anij”), 6 Jekab eaar jelm̧ae kōn eļap apan̄. Kar mālijjon̄e anemkwoj eo an. Men̄e jelm̧ae in, Jekab ekar kam̧ool ta eo eļap aorōk n̄an e. Ekar kwaļo̧k bwe ekar kōņaan bwe Anij en anjo̧ ilo mour eo an. N̄an uwaake, Anij eaar ukōt etan Jekab n̄an Israel, 7 meļeļein “Anij en anjo̧.” Innām Anij eaar kallim̧uri Israel bwe aolep kōjeraam̧m̧an ko me an Ebream renaaj bar an. 8

Ejerata, ro ineen Israel raar rube bujen eo aer ippān Anij. Raar kad rikanaan ro im kar jab kōņaan bwe Anij en anjo̧ ilo mour ko aer. Innām, Anij ekar kōjeplōklōk er n̄an kona ko emen ilo laļin. 9 Ilo tūriam̧o, tokālik E ekar kallim̧ur n̄an aiin er, āinwōt an kar Aiseia je: “Ium̧win jidik iien Iar ilo̧k jān kwe [Israel]; a kōn tūriam̧o ko re ļap Inaaj kokweilo̧ktok eok.” 10

Ippān meļeļe eo an Hebraic kōn Israel ilo ļōmņak, jej lo bwe n̄an aiintok Israel ebar wōr meļeļein. Irooj ej aiintok ro rej kōņaan bwe Anij en anjo̧ ilo mour ko aer. Irooj ej aiintok ro renaaj kālet bwe kajoor eo an Anij en im̧we mour ko aer.

Elōn̄ iiō ko, rikanaan ro rekar kanaan kōn aiintok in, 11 im ej waļo̧k kiiō! Menin ej aikuj kōm̧m̧an m̧okta jen Itok eo Kein Karuo an Irooj, eo ej make wōt jerbal eo eaorōk ilo laļin!

Ilo aiintok in m̧okta ej an kajjojo eddo kwaļo̧k tōmak im leke ilo jetōb n̄an milien armej ro. Im āinwōt membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata, ak armej in Israe bujen ko raan kein āliktata,” 12 em̧ōj ad bōk eddo n̄an jipan̄ Irooj ilo jerbal in eaorōk. 13

N̄e jej kōnono kōn aiintok eo an Israel kōn ro remour im remej, jej kōnono, em̧ool kōn, jerbal in mjinede, tampeļ, im jerbal in menmenwij an baam̧le. Jej barāinwōt kōnono n̄an kalōk tōmak im naan in kam̧ool ilo būruwōn ro jej mour ippāer, jerbal, im jipan̄. Aolep iien jej kōm̧m̧an jabdewot me ejipan̄ juon—ilo jim̧or rejet ko an rōn̄ōl eo—bōk juon bun̄ton m̧aanļo̧k ilo am̧ kōm̧m̧ani bujen ko ippān Anij, kwoj jipan̄ aiintok Israel.

Ejjab to, kōrā eo ippān juon iaan ļaddik ro jibum̧ ekar apan̄ ilo mour in jetōb. Inaaj kūr etan “Jill.” Kōn jitlo̧k, jar, im kōjeraam̧m̧an ko an priesthood, jemen Jill eaar nan̄inmej. Eaar lukkuun mijak n̄e enaaj jim̧or jako jemen im naan in kam̧ool eo an.

Juon joteen, kōrā eo ippa, Sister Wendy Nelson, kar jiron̄ eō kōn mejatoto eo an Jill. Jibbon̄ eo juon Wendy eaar en̄jake im̧we n̄an kwaļo̧k n̄an Jill bwe naan eo aō n̄an e ekar jelm̧ae juon jetōb in naan! Naan eo ekar kiiō.

Tokālik Jill ekar ba n̄an Wendy ke ekar ilbōk kōn enaan eo aō. Eaar ba, “ikar kōjatdikdik bwe jim̧m̧a en kar kallim̧uri n̄a kōn juon kabwilōn̄lōn̄ kōn jema. Ikar ļōmņak etke naan eo kiiō ekar juon en̄jake ekajoor n̄an ba.”

Ālkin an jemen Jill jako, naan eo kiiō ekar itok wōt n̄an kōļmenļo̧kjeņ eo an. Eaar kōpeļļo̧k būruwōn n̄an meļeļe em̧wilaļļo̧k bwe kiiō meļeļein “repaak.” Im eaar jino oktak an ļōmņak. Innām Jill ekar ba, “Kiiō ekōm̧m̧an menin aō bōjrak, ļōmņak, im mour. Naan eo kiiō ekobrak eō kōn aenōm̧m̧an. Ej kakeememej eō n̄an kōļapļo̧k bōklekōt eo aō im kappukot mour indeeo. Ej kakeememej eō bwe ewōr juon karōk ekwojarjar im bwe jema ej mour wōt im iakwe wōt im reitok n̄an eō.. Kiiō eaar tōlļo̧k eō n̄an Anij.”

Ij m̧ōņōņō kōn leddik in jibum̧ eaorōk. Ilo tōre in epen n̄an e, Jill eo ejitenbōro eaar jeļā n̄an atbokwoje ankilaan Anij kōn jemen, kōn juon bōklekōt indeeo n̄an mour eo an make. N̄an kālet bwe Anij en anjo̧, eaar lo aenōm̧m̧an.

Eļan̄n̄e jenaaj kōtļo̧ke, ekanooj lōn̄ wāween ko ukook in an Hebraic kōn Israel emaron̄ jipan̄ kōj. Elmen jar ko ad kōn mijinede ro nejid—im kijejeto ko ad make n̄an aiintok Israel—emaron̄ ukōt ļōmņak in ilo ļōmņak. Ekkā ad jar bwe kōj im mijinede ro naaj tōlļo̧k n̄an ro repojak n̄an bōke m̧ool ko an gospel in em̧ōj an jepļaaktok an Jisōs Kraist. Ij ļōmņak, bwe wōn jenaaj tōlļo̧k n̄e jej akweļap n̄an pukot ro rej kōņaan bwe Anij en anjo̧ ilo mour ko aer?

Jemaron̄ in tōl n̄an ro me rejjan̄in tōmak ilo Anij ak Jisōs Kraist ak ro kiiō rej m̧ōņōņō in ekkatak kōn Er im karōk in m̧ōņōņō eo Aer. Jet em̧ōj aer kar “lo̧tak ilo bujen” 14 ak raar eļļak jen iaļen bujen in. Bōlen kiiō repojak in ukweļo̧k, ro̧o̧ltok, bwe Anij en anjo̧. Jemaron̄ jipan̄ er n̄an karuwaineneik er kōn pā im bōro ko repeļļo̧k. Im ro jet me kar tōlļo̧k kōj kar aolep iien kar en̄jake ewōr jet men ko ejako ilo mour ko aer. Barāinwōt er rej pād ilo juon wōt im m̧ōņōņō me ej itok n̄an ro rej kōņaan bwe Anij en anjo̧ ilo mour ko aer.

Ok in gospel eo n̄an aiintok Israel eo ejeplōklōk edepakpak. Ewōr ruum̧ n̄an aolep armej ro rekōņaan lukkuun atbokwoje gospel eo an Jisōs Kraist. Kajjojo rioktak rej erom̧ juon iaan ajri in bujen ro nejin Anij, 15 men̄e ilo ļotak ak ilo kōkaajriri. Aolep rej lukkuun jolete aolep ta eo Anij eaar kallim̧ur n̄an ro nejin Israel retiljek! 16

Kajjojo iiad ewōr juon kwojarjar eoarōk ippād kōnke jej juon nejin Anij. Kōjjojo rej juon wōt im̧aan Mejen. Enaan ko an m̧ool in rem̧ool. Ro jeiū im jatū, jouj lukkuun ron̄jake ta eo ij tin ba. Anij ejjab iakwe juon armej jen bar ro jet. Katak eo An kōn menin ealikkar. Ej karuwaineneik aolep n̄an itok n̄an E, “kilmeej im mouj, rilokjak im rianemkwoj, m̧aan im kōrā.” 17

Ijeļā bwe n̄e kwonaaj jutak im̧aan Anij eban kōn kōļar in ānbwiinum̧. Em̧m̧an im jab em̧m̧an ippān Anij ej pedped ioon wūjlepļo̧k eo am̧ n̄an Anij im kien ko An im ejjab kōn kōļar in ānbwiinum̧.

Ij būrom̧ōj bwe ro jeid im jatid Rikilmeej bwe aolepen laļin rej nikniki metak ko kōn kil im kalijōkļo̧k. Rainin ij kūr n̄an aolep membōr ro ad ijoko jabdewōt n̄an joļo̧k m̧wiļ im m̧akūtkūt ko renana n̄an kalikjōkļo̧k. Ij akweļap ippāmi n̄an kautiej aolep ro nejin Anij.

Kajjitōk eo n̄an kōj kajjojo, jekdo̧o̧n armej rot, ejjeļo̧k oktak. Kwoj ke kōņaan bwe Anij en anjo̧ ilo mour eo am̧? Kwoj ke kōņaan bwe kajoor eo an Anij en im̧we mour eo am̧? Kwon ke kōtļo̧k naan ko An, kien ko An, im bujen ko An n̄an im̧we ta eo kwoj kōm̧m̧ane kajjojo raan? Kwon ke kōtļo̧k Ainikien bwe en m̧oktata ioon jen ko jet jabdewōt? Kwoj ke kōņaan bwe jabdewōt men eo Ej kōņaan bwe kwon kōm̧m̧an en aorōk ļo̧k jen ko jet? Kwoj ke kōņaan bwe ankilaam en oran̄ļo̧k Ankilaan? 18

Ļōmņake elmen an kōņaan naaj kōjeraam̧m̧an eok. Eļan̄n̄e kwojjan̄in m̧are im kappukot juon m̧ōttam̧ indeeo, kwoj m̧ōttan “Israel” naaj jipan̄ eok kālet wōn eo kwoj m̧ōttāiki im elmen.

Eļan̄n̄e em̧ōj am̧ m̧are n̄an eo m̧ōttam̧ eo em̧ōj an rube bujen ko an, am̧ kōņaan bwe Anij en anjo̧ ilo mour eo am naaj kōtļo̧k bwe bujen ko am̧ ippān Anij rejamin jako. Rilo̧mo̧o̧r enaaj kōmour bōro ko rerub. Lan̄ ko renaaj peļļo̧k ilo am̧ kappukot n̄an jeļā elmen bun̄ m̧aanļo̧k. Kwojjab aikuj in bwilōn̄ ak ļōmņak.

Eļan̄n̄e ewōr am̧ kajjitōk em̧ool kōn gospel in ak Kabun̄ in, ilo am̧ kālet bwe Anij en anjo̧, kwonaaj tōlļo̧k n̄an lo im lukkuun meļeļe, m̧ool ko indeeo me renaaj tōl mour eo am im jipan̄ eok dāpdep wōt ilo iaļen bujen in.

N̄e kwoj ioon kapo—em̧ool n̄e kapo rej itok n̄e kwoj m̧ōk ak ajimakeke ak jab meļeļe—ļōmņake ļo̧k ke kwomaron̄ bōk peran ilo am̧ kālet bwe Anij en anjo̧ ilo mour eo am̧ ilo am̧ akweļap n̄an E n̄an kōkajoorļo̧k eok.

N̄e ikdeleel eo am̧ eļap bwe Anij en anjo̧, n̄an m̧ōttan Israel, elōn̄ kālet ko remaron̄ pidodo. Elōn̄ men in kōnono ko rej jino erom̧ jab unin kōnono ko! Kwojeļā ewi karbab eo am̧ make. Kwojeļā ta eo n̄an alooje im riiti, ia n̄an joļo̧k am̧ iien, im ro kwoj iaio̧ ippāer. Kwojeļā ta eo kwoj kōņaan n̄an kadedeļo̧k. Kwojeļā kain rot armej eo kwoj kōņaan āinwōt.

Kiiō, ro jeiū im jatū rejitenbōro, ebōk jim̧or tōmak im leke bwe Anij en anjo̧. Ebōk kijenmej, jetōbin jerbal ko rem̧ōkaj n̄an ukweļo̧k im n̄an utikļo̧k armej eo ilo lukkuun biktokin kōn Pinmuur eo an Jisōs Kraist. 19 Ebōk iien, kajjojo kijejeto n̄an kōļapļo̧k imminene an juon make n̄an ekkatak gospel eo, n̄an ekkatak eļapļo̧k kōn Jemedwōj Ilan̄ im Jisōs Kraist, im n̄an kappukot im jerbale revelesōn an juon make.

Ilo tōre in ekauwōtata eo me Rijilōk Paul eaar kanaan, 20 Setan eban bar kajjieon̄ in ņooj an kakkure karōk eo an Anij. Ainikien ko renana. Kōn menin, wāween eo wōt n̄an mour ilo jetōb ej n̄an kwaļo̧k bwe Anij en anjo̧ ilo mour ko ad, n̄an jeļā ron̄ Ainikien, im n̄an kōjerbal kajoor eo ad n̄an aiintok Israel.

Kiiō, elmen an Irooj en̄jake kōn armej ro renaaj kōtļo̧k bwe Anij en anjo̧? Nipai eaar ba: “Bwe [Irooj] ej iakwe ro renaaj bōk E aer Anij. Lo, Eaar iakwe ro jemād, im Eaar kōm̧m̧an bujen ippāer, aaet, em̧ool ippān Ebream, Aisak, im Jekab; im Eaar keemem[ej] bujen ko E [eaar] kōm̧m̧ani.” 21

Im ta eo Irooj ekōņaan n̄an kōm̧m̧ane n̄an Israel? Irooj eaar akweļap bwe Enaaj “kōpata n̄an [kōj], im pata ko n̄an [ro] nejid im [pata] an ro nejin ro nejier … n̄an epepen eo kein kajilu im kāāmen”! 22

Ilo am̧ ekkatak jeje ko am̧ rekwojarjar ilo jiljino allōn̄ rej itok, ij rōjan̄ kom̧ n̄an kōm̧m̧ane juon laajrak in aolep men me Irooj ekar kallim̧ur Enaaj kōm̧m̧an n̄an ro bwijin Israel. Ij tōmak kwonaaj lukkuun bwilōn̄. Lin̄uri kallim̧ur kein. Kōnōnō kaki ippān baam̧le eo am̧ im ro m̧ōttam̧. Innām mour kaki im lali kallim̧ur kein naaj kūrm̧ool ilo mour eo am̧ make.

Ro jeiū im jatū rejitenbōro, ilo am̧ kālet bwe Anij en anjo̧ ilo mour ko am̧, kwonaaj en̄jake kōn kwe make bwe ad Anij ej “juon Anij in kabwilōn̄lōn̄.” 23 Āinwōt juon armej, jej ajri in bujen ro Nejin, im naaj kūr kōj kōn Etan. Eo Ij kam̧ool ilo āt eo ekwojarjar etan Jisōs Kraist, amen.

Kakeememej ko

  1. Em̧ōj aō kōnono kōn Israel emaron̄ 378 elōn̄ļo̧k jen 800 ennaan ko em̧ōj aō kwaļo̧ki ilo 36 iiō in aō Rijilōk.

  2. Ilo Hibru, Abram ej juon āt ekwojarjar meļeļein “jemed indeeo.” Ak ke Anij ekar ukōt etan n̄an Abraham, āt eo ekar bōk juon āt eļap aorōkin, meļeļein “jemen aolep.” Em̧ool, Ebream ekar “jemen aolep rilaļ.” (Lale Jenesis 17:5; Nehemia 9:7.)

  3. Irooj Anij Jeova ekar kōm̧m̧ane juon bujen ippān Ebream bwe Rilo̧mo̧o̧r in laļ enaaj lo̧tak jen ineen Ebream, jet āne ko naaj jolete, im aolep laļ naaj jeraam̧m̧an kōn bwijin Ebream (lale Bible Dictionary, “Abraham, covenant of”).

  4. Lale Bible Dictionary, “Israel.”

  5. Naan eo Israel ej waļo̧k elōn̄ļo̧k jen taujin alen ilo jeje ko rekwojarjar. Emaron̄ jerbal n̄an baam̧le eo an Jekab (Israel) ļōm̧aro 12 nejin, koba leddik ro (lale Jenesis 35:23–26; 46:7). Rainin emaron̄ jerbal ipeļaakin āinwōt juon jikin ilo Laļin. Ak katak ko rej jerbal n̄an armej ro rekōņaan bwe Anij en anjo̧ ilo mour ko aer.

  6. Lale Jenesis 32:30; barāinwōt jipeel Penruel ilo Jenesis 32:31.

  7. Lale Jenesis 32:28.

  8. Lale Jenesis 35:11–12.

  9. N̄an ekkatak eļapļo̧k, lale , Unin Tōl n̄an Jeje ko Rekwojarjar“Israel, Scattering of.”

  10. Aiseia 54:17.

  11. Lale Aiseia 11:11–12; 2 Nipai 21:11–12; Mosaia 15:11.

  12. Lale Encyclopedia of Mormonism (1992), “Covenant Israel, Latter-Day,” 1:330–31.

  13. Ilo ad bōk kuņaad ilo aiintok Israel, ewōr juon wāween em̧m̧an an Irooj kōmeļeļeik ro rej aiini. Ej kōjerbal kōj āinwōt “menin letok ko raorōk,” An (Exodus 19:5 Sam Ko 135:4), aorōk ” ko An (Malakai 3:17; Katak im Bujen ko 101:3), im āinwōt juon “laļ ekwojarjar” (Exodus 19:6), bar lale Deuteronomy 14:2; 26:18).

  14. Naan in ej iokļo̧k bujen eo me Anij eaar kōm̧m̧an ippān Ebream, eaar ba “Ilo ineem naaj aolep nukwin ko an laļ jeraam̧m̧an” (3 Nipai 20:27). “Lo̧tak ilo bujen” meļeļein bwe m̧okta an juon armej kar lo̧tak, jinen im jemen armej eo raar liāp ilo tampeļ.

  15. Āinwōt juon kallim̧ur kar kwaļo̧k jen Anij n̄an Ebream: “Bwe jon̄an wōt lōn̄in eo enaaj bōk Gospel in naaj ņa etan ilo̧kan Eta, im enaaj bōnbōn ineem, im enaaj jutaktok im kōjeraam̧m̧an eok, āinwōt jemāer” (Ebream, 2:10; bar lale Rom 8:14–17; Galatia 3:26–29).

  16. Kajjojo membōr retiljek remaron̄ kajjitōk juon kōjeraam̧m̧an in petriak. Kōn im̧we eo an Jetōb Kwojarjar, petriak eo ej kwaļo̧k bwij eo an armej eo ilo m̧weeo im̧ōn Israel. Kean̄ in ejjab aikuj in kwaļo̧k armej rot, laļ, ak men bajjōk. Ak, kean̄ eo ej kwaļo̧k bwij eo an Israel eo me kajjojo naaj bōk kōjeraam̧m̧an eo.

  17. 2 Nipai 26:33.

  18. Lale Mosaia 15:7. N̄an erom̧ Israel ejjab armej ro rejjab kōņaan mālijjon̄. N̄an bōk aolep kōjeraam̧m̧an ko me Anij eaar kepooji n̄an ro ineen Ebream, jemaron̄ bar buki im lelo̧k n̄an ijo ad ejejjet n̄an “Abrahamic test.” Anij enaaj mālijon̄n̄e kōj, āinwōt kar Rikanaan Josep Smith, jen lukkuun rub bōro ko ad. (Lale recollection of John Taylor in Teachings of Presidents of the Church: Joseph Smith [2007], 231.)

  19. Lale Mosaia 3:19.

  20. Lale 2 Timote 3:1–13.

  21. 1 Nipai 17:40; eoon eo eaorōk kar kobaiktok.

  22. Katak im BujenKo 98:37; bar lale Sam Ko 31:23; Aiseia 49:25; Katak im Bujen Ko 105:14.

  23. Mormon 9:11