Mej ko n̄an Loļo̧kjeņ
Kōn kajoor eo an Jetōb Kwojarjar, Kraist enaaj kamaron̄ kōj n̄an kalimjōk kōj make im ro jet āinwōt An kalimjōk kōj aolep.
Lo Pein Anij
Ij iakwe bwebwenato eo ilo Kallim̧ur Ekāāl kōn juon likao eo me ekar jerbal n̄an rikanaan Ilaisha. Juon jibbon̄ mejojo likao eo ekar rūj, etal n̄an nabōj, im lo jikin eo me kar jepooļe kōn juon jar in ritariņae me rekar kōttōpar n̄an kakkure er. Likao eo ekar ettōrļo̧k n̄an ippān Ilaisha “Yok, aō Irooj! Jenaaj et?”
Ilaisha ekar uwaak, “Kwōn jab mijak: bwe ro rej rie kōj relōn̄ jān ro rej rie er.”
Ilaisha ekar jeļā bwe likao eo ekar aikuj eļapļo̧k kein kam̧ool ko rekaeņōm̧m̧an; ekar aikuj juon visōn. Im kōn menin “Ilaisha ear jar, … Irooj, … kwōn kapeļļo̧k mejān lein, bwe en loļo̧kjeņ. Im Irooj ekar kapeļļok mejān likao in; im ekar loe: im, lo, toļ eo e obrak kōn kidia ko im jariot kijeek ko rej jepooļe Ilaisha.” 1
Emaron̄ lōn̄ tōre ko ke kwe, āinwōt juon rikarejar, en̄jake am̧ make apan̄ n̄an lo wāween an Anij jerbal ilo mour eo am̧—iien ko ke kwoj en̄jake am̧ pād ium̧win likwarkwar—ippān an mellijon̄ ko an mour in kōmm̧an bwe kwon ettā. Kōttar im lōke Anij im iien ko An, kōnke kwomaron̄ lōke Buruōn kōn aolepān am̧. Ak ebar wōr juon katak ijin. Ro jeiū im jatū jitenbōro, kwomaron̄ barāinwōt jar n̄an Irooj n̄an kōpelļo̧k mejam̧ n̄an lali men ko kwoj jab maron̄ make loi.
Kalimjōk kōj Make āinwōt an Anij Kalimjōk Kōj
Bolen men ko raorōk tata n̄an kōj bwe en alikkar ad loi rej wōn Anij im lukkuun wōn kōj—ļaddik im leddik ro nejin jined im jemed ilan̄ kōn juon “kadkad ekwojarjar im mejān kajjik indeeo.” 2 Kajjitōk ippān Anij n̄an kwaļo̧k aolep m̧ool ko n̄an kwe, ippānļo̧k ta en̄jake eo An kōn kwe. Jon̄an ļap in am̧ meļeļe kōn kadkadūm̧ im jibadbad eo am̧ em̧ool, ilo m̧wūlaļin am̧, enaaj ļapļo̧k an im̧we aolep men ko ilo mour eo am̧.
Kalimjōk Ro Jet
Meļeļe kōn wāween an Anij kalimjōk kōj ej kōpooj iaļ eo n̄an jipan̄ kōj kalimjōk ro jet āinwōt An kalimjōk er. Juon rijeje nuuj etan David Brooks ekar ba: “Elōn̄ iaan būrabōļōm ko reļļap ilo jukjuk in pād eo rej itok jān an armej atajinemjān im jab lukkuun aorōk. … [Ewōr juon] kapeel … eaorōk me jej aolep … jeļā kilen [, im bwe] ej kapeel n̄an kalimjōk ro jet ilo m̧ool im aer lukkuun m̧ool in kalimjōk kōj.” 3
Jisōs Kraist ej kalimjōk armej ilo lukkuun m̧ool. E ej lo kajjojo, aikuj ko aer, im wōn eo me renaaj erom̧. Ke ro jet rekar kalimjōk ri en̄ōd ro, rijerawiwi ro, ak ritōl owōj ro, Jisōs ekar kalimjōk er rej rikaļoor ro; ilo an ro jet kalimjōk juon em̧m̧aan eo me kar jok devil ippān, Jisōs ekar kajekdo̧o̧n burom̧ōj im inepata ilo paaktokin, ekar kile e, im kōmouri. 4
Jekdo̧o̧n ad boub, jemaron̄ ļoor waanjon̄ak eo an Jisōs im kalimjōk kajjojo armej—aikuj ko aer, tōmak ko aer, apan̄ ko aer, im wōn eo remaron̄ erom̧. 5
Ke ij jar n̄an Irooj n̄an kōpelļo̧k mej ko meja n̄an loi men ko me ijjab maron̄ make loi, ekkā aō kajjitōkin eō make kajjitōk ko ruo im leļo̧k aō n̄an im̧we ko rej itok: “Ta eo ij kōm̧m̧ane me ij aikuj bōjrak jene?” im “Ta eo ijjab kōm̧m̧ane me ij aikuj jino kōm̧m̧ane?” 6
Allōn̄ ko rem̧ootļo̧k, ilo juon iien kweilo̧k in kwojkwoj, ikar kajjitōkin eō make kajjitōk kein im ikar bwilōn̄ kōn im̧we eo ekar itok ippa. “Bōjrak am̧ kalimjōk taļeboon eo am̧ n̄e kwoj jutak im kōttar ilo lain ko.” Kalimjōk taļboon eo am̧ ilo lain ko āinwōt juon iminene; ikar lo bwe ekar juon iien n̄an kōm̧m̧an elōn̄ļo̧k jerbal, lali email ko, lale nuuj ko raorōk, ak alooji meļeļe ko ilo social media.
Jibbon̄on eo tok juon, ikar jutak ilo juon lain aitoktok ilo juon m̧ōn wia. Ikar kadiwōjtok taļeboon eo innem kar keememej im̧we eo ikar en̄jake. Ikar likūt taļeboon eo nejū im reito reitak. Ikar lo juon em̧m̧aan elōļļap ilo lain eo im̧aan. Waan kaikujkuj eo ej bwili ekar ejjeļo̧k kobban ijjeļo̧kin jejjo kuwat kijen kuuj. Ikar āliklik jidik, ak ikar ba juon men lukkuun em̧m̧an āinwōt, “Ij lo bwe ewōr nejim kuuj.” Ekar ba bwe juon ļan̄ ej pojen itok, im ekar jab kōņaan bwe kuuj eo nejin en ejjeļo̧k kijen. Ekar m̧ōkaj am̧ro bwebwenato, innem ekar oktak tok n̄an n̄a im ekar ba, “Kwojeļā, ijjan̄in kar ba n̄an juon menin, ak rainin ej raan eo ikar ļotak ie. Menin ekar lukkuun un̄ūr buruō. Ikar kōjeram̧m̧ane ilo raan in ļotak eo an im kar kōm̧m̧an juon aō jar in kam̧m̧oolol bwe ijjan̄in kar bar jibwe taļeboon eo aō im kar jab elļo̧k jān iien eo em̧m̧an n̄an lukkuun loe im koneek ippān bar juon eo me eļapļo̧k an aikuj jipan̄ eo aō.
Kōn aolepān buruō ijjab kōņaan bwe in āinwōt pris ak ri Livai ro ilo iaļ eo n̄an Jericho—juon eo ej lale im etal wōt. 7 Ak emakijkij aō ļōmņake ke ij āinwōt er.
Lo jerbal ko an Anij n̄an Eō
Ij kab kar ekkatak juon katak eaorōk kōn kalimjōk em̧ool jān juon jiron̄ etan Rozlyn.
Bwebwenato eo ekar kwaļo̧k tok jān eo m̧ōtta eo ekar inepata ke ļeo pāleen ium̧win 20 iiō ko ekar diwōjļo̧k jān m̧weo im̧ōer. Ajri ro nejier rekar kōjeņoļo̧k iien ko ippān ro jineer im jemāer, ļōmņak in n̄an pād ilo iien jar make ļo̧k iaad āinwōt ekaburom̧ōjm̧ōj. Ej kakeememej:
“Ilo m̧ōn jar eo ijo baam̧le elukkun ļap an aorōk, jijjet make ļo̧k iaad emaron̄ lukkuun kōmmetak. Jabōt eo jinoin tata ikar deļon̄e lowaan m̧ōn jar im ij jar ilo buruō bwe en ejjeļo̧k en kōnnaan tok. Ikar lukkuun kajjieon̄ dāpiji, im m̧ōttan jidik etoor dānin kōmjalaaļ. Ikar jijet ilo ijo ekkā aō jijet ie, kōjatdikdik bwe ejjeļo̧k juon enaaj lo an ejjeļo̧k kobban jea eo ij jijet ie.
“Juon jiron̄ ilo ward eo am ekar oktaktok im reitok n̄an n̄a. Ikar kōtōnn̄e ij ettōn̄. Eaar bar ettōn̄ tok n̄an n̄a. Ikar lo ta eo ej inepata kake ilo turin mejān. Ikar akweļap ilo buruō bwe en jab itok im kōnono ippa—ejjeļo̧k naan em̧m̧an inej ba im ikar jeļā bwe inej jan̄. Ikar reilaļ ļo̧k n̄an neeō im kar jab lukkuun kalimjōk mejān.
“Ilo awa ko tok jet, ikar lo an lakkar reiliktak im kalimjōk eō. Ke ej jem̧ļo̧k ļo̧k wōt kweilo̧k eo, ekar kajju jibadōk tok n̄a. ‘Iakwe Rozlyn,’ ikar unoojdikdik. Ekar atbokwoji eō ilo pein im ekar ba, ‘Sister Smith, ijeļā bwe rainin ejjab juon raan em̧m̧an n̄an kwe. Joļo̧k bōd. Ij iakwe eok.’ Āinwōt kar kōtmene, ekar wōtļo̧k dānin kōmjaļaaļ im ekar bar atbokwoje eō. Ak ke ij etal, ikar ļōmņak ippa make, ‘Bolen imaron̄ anjo̧ jekdo̧o̧n ta.’
“Jiron̄ in me ekar jejjet 16 an iiō, iiō eo an ej jimatten in wōt iiō eo aō, aolep Jabōt ilo iiō eo ekar atbokwōj eō im kajjitōk, ‘Ejet am̧ mour?’ Ekar kōm̧m̧an eļap oktak ilo wāween aō en̄jake ilo aō etal im jar ilo m̧ōn jar eo. M̧ool eo ej bwe ikar jino pedped ioon atbokwōj ko. Juon armej ekar jeļā kōn eō. Juon armej ekar jeļā bwe ikar pād ijeņ. Juon armej ekar kea.”
Āinwōt aolep menin letok ko an Jemād ilo an m̧ōņōņō in letok, loe ilo m̧ool men ko remenin aikuj bwe jen kajjitōk Ippān—innem jerbali. Kajjitōk n̄an kalimjōk ro jet āinwōt An Kalimjōk er—āinwōt leddik im ļaddik ro nejin kōn maron̄ eo aer indeeo im ejjeļo̧k jem̧ļo̧kin n̄an erom̧ ro Anij ej kōņaan bwe ren erom̧. Innem jerbale kōn iakwe, jipan̄, im kwaļo̧k aorōkier im aer maron̄ erom̧ ro Anij ekōņaan bwe ren erom̧ ilo aer en̄jake im̧we. Ilo an menin erom̧ jon̄ak ilo mour ko ad, jenaaj loe kōj make ad erom̧ “rikaļoor ro rem̧ool an … Jisōs Kraist.” 8 Ro jet renaaj maron̄ lōke kōj. Im ilo jon̄ak in jenaaj bar lo kadkadid make me em̧ool im kōttōpar eo ad.
Eo m̧ōtta ekar bar keememej juon an en̄jake ke ej jijet ilo juon jikin ejjeļo̧k armej ie, ajimakeke, im bwilōn̄ eļan̄n̄e 20 iiō in kijejeto n̄an mour kōn gospel eo ilo m̧weo m̧ōn ekar ejjeļo̧k tokjen. Ekar aikuji eļapļo̧k jān uwaak eo ekaeņōm̧m̧an; ekar aikuj visōn. Ekar en̄jake juon kajjitōk ej un̄ūr buruōn: “Etke kwar kōm̧m̧ane men kein? Kwar ke kōm̧m̧ani nōbar kein, nōbar ro jet, ak bōk tōprak ko rem̧m̧an? Ekar āliklik jidik, lukkuun etale buruōn, innem ekar uwaake ilo lōke, “Ikar kōm̧m̧ani kōnke ij iakwe Rilo̧mo̧o̧r. Ij iakwe gospel in.” Irooj ekar kōpelļo̧k mejām n̄an jipan̄ eok loļo̧kjeņ. Oktak eo eļam waan im ekajoor kōn visōn eo ekar wōnm̧aanļo̧k wōt n̄an iuunm̧aanļo̧k kōn tōmak ilo Kraist, jekdo̧o̧n jekjek ko reppen.
Ij kam̧ool bwe Jisōs Kraist ej iakwe kōj im emaron̄ letok mejād n̄an loļo̧kjeņ—jekdo̧o̧n n̄e epen, jekdo̧o̧n n̄e jemōk, jekdo̧o̧n n̄e jej ajimkeke, im jekdo̧o̧n n̄e tōprak ko rejjab men ko me jej kōjatdikdik kake. Kōn jouj eo An, E enaaj kōjeraam̧m̧an kōj im kōļapļo̧k maron̄ eo ad. Kōn kajoor eo an Jetōb Kwojarjar enaaj kamaron̄ eō, Kraist enaaj kōtļo̧k kōj n̄an kalimjōk kōj make im kalimjōk ro jet āinwōt An kalimjōk kōj aolep. Kōn jipan̄ eo An, jemaron̄ jeļā ta eo elukkuun menin aikuj. Jemaron̄ jino lo pein Irooj ej jerbal ilo im kōn meļeļe ko retinwadik ko an mour kein ad—jenaaj lukkuuun lo ilo m̧ool.
Innem, ilo raan eo eļap “n̄e enaaj waļo̧k jenaaj āinwōt E, bwe jenaaj lo E ilo lukkuun nememen; bwe jen maron̄ bōk kōjatdikdik” 9 ej jar eo aō in ilo etan Jisōs Kraist, amen.