Kajoor in Kōmour an Pinmuur eo
Ilo ad itok n̄an Jisōs Kraist jān ad kōmourur tōmak ko ad ilo E, ukweļo̧k, im kōm̧m̧an im kōjparok bujen ko, mour ko ad rerūb—jekdoon ta un eo—emaron̄ kōmour e.
Jān jinoun iiō in, jekar jelm̧aik elōn̄ men ko jekar jab kōtmeni. Jako mour an armej im jāān kōn nan̄inmej in me ej pedjaake aolepān laļ in me em̧ōj an jelōt jukjuk in pād ko im jeraam̧m̧an ko an laļ ko.
Makūtkūt an laļ, kijeek ko, im ibwijleplep ko ilo m̧ōttan ko reoktak ilo laļ in, ippānļo̧k bar jet idin̄ ko in mejatoto, em̧ōj an kōm̧m̧an bwe armej ren en̄jake m̧ōjņo̧, ejjeļo̧k kōjatdikdik, im rūb būruweer, ļōmņak ippāer make eļan̄n̄e mour ko aer renaaj ke kar āinwōt m̧okta.
In jiron̄ kom̧ juon aō make bwebwenato kōn rūb bōro.
Ke ajri ro nejimim rekar dik, rekar kālet bwe rekōnaan bōk kūlaaj in piano. N̄a im ļāeo ippa, Rudy, kom̧ro kar kōņaan leļo̧k iien in em̧m̧an n̄an ajri ro nejūm̧ro, ak ekar ejjeļo̧k nejūmim piano. Jekar jab maron̄ kōļļāik juon piano, kōn menin, Rudy ekar jino kappukot juon piano m̧ōr.
N̄an kūrijm̧ōj ilo iiō eo, ekar kailbōk kōm aolep kōn juon piano, im ilo aolepān iiō ko, ajri ro nejūm̧ro rekar ekkatak piano.
Ke ļaddik ro nejūm̧ro rekar rūttoļok im em̧m̧akūt jān m̧weo, piano eo ekar būn̄aln̄alļo̧k, kōn menin kōm ekar wia kake. Jejjo iiō ko remootļo̧k, im kōm ekar kakoņ jet jāān. Juon raan Rudy ekar ba, “ij ļōmņak ej iien n̄an wiaki juon piano kāāl.”
Ikar kajjitōk, “Etke jej aikuj bōke juon piano kāāl, n̄e kōjero jim̧ōr jaje piano?”
Ekar ba, “O, ak jemaron̄ bōke juon piano eo me ej make kōjan̄jan̄! Jān kōjerbale juon Ipad, kwomaron̄ būrokūraam̧e piano eo n̄an kōjan̄ elōn̄ļo̧k jān 4,000 al ko, ekoba al in jar ko, al ko an Tabernacle Kuwaer, aolepān al ko an Būraimere im ko rellon̄ļo̧k.”
N̄an kōkadu aō ba, Rudy ej juon rikawiakake eo eļap an jeļā.
Kom̧ro ekar wiaki juon piano eo eļap a aiboojoj, im jejjo raan tokālik, ruo em̧m̧aan ro reineia im kajoor rekar bōktok n̄an m̧weo im̧ōm̧ro.
Ikar kwaļo̧k n̄an er ia eo ikōņaan bwe en bed ie im em̧m̧akūt jān iaļ in aerro jerbal.
Ekar juon brand eo elukkuun eddo, im n̄an kar kōdeļo̧n̄e ilo kōjem eo, rekar aikuj tūm̧i ne ko neen im maron̄ kar kōbabu kowaitoktok e ioon waan bwilbwil eo rekar boktok ippāer tok.
Mweo im̧ōm ekar pād ilo juon bwidej eutiej jidik, im jibon̄inļo̧k raan eo ekar sņo, im kōm̧m̧an bwe men ko ren tutu im ijjūr. Kwomaron̄ ke loe ia menin ej etal n̄ane?
Ke em̧m̧aan ro rekar kōm̧akūt lōn̄ļo̧k piano eo ilo bwidej eo eutiej, ekar roļo̧k, im ikar ron̄ juon ainikien jorāān eļap. Piano eo em̧ōj an wōtlo̧k jān waan bwilbwil eo im ļap an itaak ilaļ ke ekar kōm̧m̧an bwe en ro̧n̄ro̧n̄ ioon ujooj ko.
Ikar ba, “O, ekwe in̄ak. Em̧m̧an ke jabdewōt?”
Kam̧m̧oolol bwe aolepān em̧m̧aan ro rekar jab jorrāān.
Mej ko mejeer rekar lukkuun kilep ilo aerro kalimjōk doon, innem kalimjōktok eō im ba, “Lukkuun joļo̧k am̧ro bōd. Kom̧ro enaaj bar kōro̧o̧le n̄an m̧ōn wia eo im ba mānija eo am̧ro en ko̧o̧le eok.”
Ilo iien eo em̧ōkaj tokāļik mānija eo ekar ekōnono ippān Rudy n̄an karōke juon iien n̄an bōktok juon piano kāāl. Rudy ekar jouj im tūriam̧o im ekar ba n̄an mānija eo ke ej EMMAN wōt im remaron̄ joļo̧k wōt an jorrāān im bar kōro̧o̧le tok ejja piano eo wōt, ak mānija eo ekar akweļap bwe renaaj letok juon kāāl.
Rudy ekar uwaak, im ba, “eban ļap an nana. Kōm̧m̧ane wōt im bar bōktok e.”
Mānija eo ekar ba “Aļaļ eo erūb, im n̄e erūb aļaļ eo, enaaj oktak ainikien. Kwonaaj bōk juon piano kāāl.”
Ro jeiū im jatū, jejjab ke āinwōt piano in, jidik rūb, bwilak, im jorrāān, en̄jaake bwe jeban bar āinwōt m̧okta? Bōtaab, ilo ad itok n̄an Jisōs Kraist jān ad kōmourur tōmak ko ad ilo E, ukweļo̧k, im kōm̧m̧an im kōjparok bujen ko, mour ko ad rerūb—jekdoon ta un eo—emaron̄ kōmour e. Wāween in, eo ej karuwaineneik kajoor in kōmour eo an Rilo̧mo̧o̧r eo n̄an mour ko ad, ejjab kōjepļaatok n̄an kōj ta eo jekar āinwōt m̧okta ak ej kōkm̧anm̧anļo̧k kōj eļapļo̧k jān ke jekar m̧okta. Ijeļā bwe kōn Rilo̧mo̧o̧r, Jisōs Kraist, jemaron̄ aolep ro̧o̧l n̄an m̧okta, kōm̧m̧an bwe jen likieo, im aiboojoj ainikied, āinwōt juon piano ekāāl.
Būreejtōn Russell M. Nelson ekar katakin: “N̄e māllijon̄ ko rekōmettak rej itok n̄an kōj, ej iien n̄an kam̧wilaļļo̧k tōm̧ak eo ad ilo Anij, n̄an likkuun jerbal, im n̄an jerbal n̄an ro jet. Innem E enaaj kōmour bōro ko būruwōd me rerūb. E enaaj likūt iood make aenōm̧m̧an im kajoor. Menin letok kein reļļap reban kakkurri, aeet jekdoon bar jān mej.” 1
Jisōs eaar ba:
‟Kom̧in itok n̄an ippa, kom̧ otemjej rej jerbal im ban, im Inaaj kakkijeik kom̧.
‟Kom̧win bōk Aō ine im likūte iaerami, katak Ippa, bwe Ij ineem̧m̧an im ettā būruō, kom̧ naaj lo ami kakkije.
“Bwe Aō ine ej em̧m̧an, im men eo Ij ineke e m̧ōrā” (Matu 11:28–30)
N̄an kōmour rūb in bōro ilo ad itok n̄an E, jej aikuj wōr ipped tōmak ilo Jisōs Kraist. “Tōmak ilo Jisōs Kraist ej meļeļein pedped ioon E ilo ejjeļo̧k kalijōkļo̧k—lōke ilo kajoor eo An ejjeļo̧k jem̧ļo̧kin … im iakwe. Ekoba tōmak ilo katak ko An. Ej meļeļein tōmak men̄e jejjab meļeļe aolep men, E emeļeļe kaki. Kōnke E ekar tōpar aolepān metak ko ad, en̄taan ko, m̧ōjņo̧ ko, E ejeļā wāween jipan̄ kōj eļļā ioon men ko reppen rej waļok n̄an kōj aolep raan.” 2
Ilo ad itok n̄an E, “jemaron̄ obrak kōn lan̄lōn̄, ainem̧m̧an, im kajoor. Aolepen men ko [reppen im kaen̄tanaan] kōn mour in remaron̄ kōm̧m̧an bwe ren jim̧we kōn Pinmuur eo an Jisōs Kraist.” 3 Em̧ōj An kar kapilōk kōj, “Reitok n̄an E ilo aolep ļōmņak; jab pere, jab mijak.” (Katak im Bujen Ko 6:36).
Ilo Bok in Mormon ke Alma im armej ro an rekar iten jakoļo̧k jān eddo ko kar likūt ioer, armej ro rekar akweļap n̄an jipan̄. Irooj ekar jab bōke eddo ko aer jān er; ijjelo̧kin E ekar kallim̧ūri er:
“Im Inaaj barāinwōt kameraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālikimi, em̧ool n̄e kom̧ij pād ilo kōm̧akoko; im men in Inaaj kōm̧m̧an bwe kom̧in maron̄ jutak āinwōt rikam̧ool ro n̄an Eō tokālik, im bwe kom̧in maron̄ jeļā kōn m̧ool in bwe N̄a, Irooj Anij, ij loļo̧k armej ro Aō ilo en̄taan ko aer.
“Im kiiō ālikin men kein, eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj” (Mosaia 24:14–15).
Kōn maron̄ eo an Rilo̧mo̧o̧r n̄an kōmour im kōmeraikļo̧k eddo ko, Elder Tad R. Callister ekar katakin:
“Juon iaan kōjeram̧m̧an ko an Pinmuur eo ej bwe jemaron̄ bōk kajoor in jipan̄ ko an Rilo̧mo̧o̧r. Aiseia ekar āliji an kōnono kōn kōmour im kainem̧m̧an an Irooj. Ekar kam̧ool bwe Rilo̧mo̧o̧r ekar juon ‘kwaar juon jikin e kajoor ñan ro ri jeraṃōl, juon jikin e kajoor n̄an ri aikuj ilo jorrāān eo an, juon jikin ko jān lan̄, juon ellor jān dāt’ (Aiseia 25:4). Āinwōt n̄an ro rej būrom̧ōj, Aiseia ekar kwaļo̧k bwe Rilo̧mo̧o̧r eo ewōr ippān kajoor n̄an ‘kaenōm̧m̧an ro otemjej rej liaajlọḷ’ (Aiseia 61:2), im ‘kaṃōrāik dānnin kōmjaaḷaḷ jān mejeir otemjej’ (Aiseia 25:8; bar lale Revelesōn 7:17); ‘kemour an eo ri ettā’ (Aiseia 57:15); im ‘kūtimi ro erup būrueir,’ (Aiseia 61:1; bar lale Luk 4:18; Sam Ko 147:3). Ļap in an depakpak kajoor in jipan̄ eo an ke emaron̄ ukot ‘pāllin bōraer kōn bwidej in upaaj, oil in lañlōñ kōn būroṃōj, im nuknuk in nōbar, kōn jetōb in parōk’ (Aiseia 61:3).
“O, eļap kōjatdikdik ilo kallim̧ūr ko! … An Jetōb ej kemour; kōkm̧anm̧anļo̧k; kaenōm̧m̧an; ej menonoiktok mour ekāāl n̄an bōro ko ejjeļo̧k kōjatdikdik ie. Ewōr ie kajoor in ukot aolep nana ko im kauwōtata im en̄jaake in jej tokje ilo mour in n̄an juon men ekajoor im eutiej aiboojoj. Ewōr Ippān kajoor eo n̄an ukot menkwarar in mour in n̄an aiboojoj ko an indeeo.” 4
Ij kam̧ool bwe Jisōs Kraist ej ad Rilo̧mo̧o̧r ejitōnbōro, Ripinmuur, Irooj in Kōmour im juon jerā eo em̧ool. Eļan̄n̄e jenaaj oktakļo̧k n̄an E, E enaaj kōmour kōj im kōm̧m̧an bwe jān likeo juon alen. Ij kam̧ool bwe en̄in ej Kabun̄ eo An im E ej kōpojak n̄an bar jepļaaktok juon alen n̄an laļ in n̄an tōl kōn kajoor im aiboojoj. Ilo etan Jisōs Kraist, amen.