Kajjitōk, Kappukot, im Kaļļaļļaļ
Juon m̧ōttan eo eaorōk ilo karōk eo an Jemedwōj Ilan̄ ej iien ko rem̧m̧an n̄an kōnono Ippān jabdewōt iien jekōņaan.
Emān allōn̄ ko rem̧ootļo̧k, ilo iien aō ekkatak jeje ko rekwojarjar, ikar riiti bwebwenato in mijen eo an Alma ilo Ammonihah ke ikar tōpar elmakot in Itok, Ļoor Eō: “Ilo am riiti menin kōjeraam̧m̧an ko Anij ekar leļo̧k ñan armej ro an Nipai (lale Alma 9:19–23), ḷōmṇak kon menin kōjeraam̧m̧an ko ekar lewaj nan eōk.” 1 Ikar peke iba make bwe in kōlaajraki menin kōjeraam̧m̧an ko an Jemedwōj Ilañ im rekooti e ilo kein rekoot en ao make iar kōm̧m̧an e. Ilowaan wōt kar minit ko, ikar kōlaajrake 16 kōjeraam̧m̧an ko.
Eļaptata ilubwilijin aolep men ekar wōr kein kōjeraam̧m̧an in tūriamo eo an Rilo̧mo̧o̧r im katok in pinmuur eo An ilo eta. Ikar bar jeje kōn menin kōjeraam̧m̧an eo ke ikar bōk jikin Rilo̧mo̧o̧r eo āinwōt juon mijenede edik ilo Portugal im, tokālik ippān kōm̧pānien eo aō indeeo, Patricia, ilo Brazil Porto Alegre South Mission, ijo me kōm̧ro kar jerbal ippān 522 mijenede ro rekajoor im em̧m̧an. Ilo ad kōnono kōn Patricia, elōn̄ im lōn̄ menin kōjeraam̧m̧an ko ikar rakooti ilo raan n̄e rej kōjeraam̧m̧an ko kōm̧ ar m̧ōņōņō kaki ippān doo ium̧win 40 iiō in am̧ro m̧are—ekoba liāp eo am̧ro ilo São Paulo Brazil Temple, ajri ro jilu nejim̧ro, ro pāleer, im ajri ro 13 jibūm̧ ro.
Ļōmņak ko aō rekar oktakļo̧k barāinwōt n̄an jinō im jema ro rewāppen, ro rekar karūttoļo̧k n̄a ilo pepdped in katak ko an gospel in. Ikar keememej, ilo juon iien, iien eo ke jinō ekar bukwelōlō ippa im jar iturin peet eo aō ke ilo tore ne ekar10 aō iiō. Bōlen ekar en̄jake bwe eļan̄n̄e jar ko aō renej tōpar Jema Ilan̄, rej āikuj in em̧m̧anļo̧k. Kōn menin, jinō ekar ba, “Inaaj jar m̧okta, im ālkin aō jar, enaaj baj kwe jar.” Ekar wōnm̧aanļo̧k jon̄ak in ium̧win elōn̄ bon̄ ko, m̧ae iien ekar wōr an lōke bwe ikar ekkatak jān pedped in katak eo im jān ekkatak ewi wāween kōnono n̄an Jemedwōj Ilan̄. Inaaj n̄an indeeo kam̧m̧ool n̄an e kōn an kar katakin eō jar, bwe ikar ekkatak bwe Jemedwōj Ilan̄ ej ron̄jake jar ko aō im uwaaki.
Ilo m̧ool, ekar bar juon kōjeraam̧m̧an me ikar kobaiki ilo laajrak eo aō—menin letok eo n̄an maron̄ ron̄jake im ekkatak ankilaan Irooj. Juon m̧ōttan eo eaorōk ilo karōk eo an Jemedwōj Ilan̄ ej iien ko rem̧m̧an n̄an kōnono Ippān jabdewōt iien jekōņaan.
Juōn kajjitōk jān Irooj
Ke Rilo̧mo̧o̧r eo ekar loļo̧k Amedka ālkin Jerkakpeje eo An, Ekar āliji juon kajjitōk bwe Ekar bōk jān rijilōk ro An ilo Galilee. Eaar ba:
“Kajjitōk, im naaj lewōj e n̄an kom̧; kappukot, im kom̧ naaj lo; kaļļaļļaļ, im naaj kōpeļļo̧k e n̄an kom̧.
“Bwe eo ej kajjitōk ej bōk, im eo ej kappukot ej lo, im eo ej kaļļaļlaļ naaj kapeļļo̧k n̄an e” (3 Nipai 14:7–8; bar lale Matu 7:7–8).
Rikanaan eo ad, Būreejtōn Russell M. Nelson, ekar letok juon ejja kain in ilo raan kein ad. Ekar ba: “Jar ilo etan Jisōs Kraist kōn inepata ko am̧, am̧ mijak, m̧ōjņo̧ ko am̧—aaet, jan̄uwaade ko an būruwōm̧. Innām ron̄jake! Je ļōmņak ko me rej itok n̄an kōļmenļo̧kjeņ eo am̧. Rekooti en̄jake ko am̧ im wōnm̧aanļo̧k wōt kōn m̧akūtkūt ko me kwōj bōk im̧we n̄an kōm̧m̧ani. Ilo am̧ āliji jerbal ilo raan n̄an raan, allōn̄ n̄an allōn̄, iiō n̄an iiō, kwonaaj “eddōkļo̧k n̄an pedped in abja in revelesōn.” 2
Būreejtōn Nelson ekar bar ba, “Ak ilo raan ko rej itok, enaaj maron̄ pen n̄an bōk jipan̄ ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.” 3
Ta unin an lukkuun aorōk revelesōn n̄an ad maron̄ emourur mour in jetōb kein ad? Kōnke laļ in emaron̄ in poktak im koļab, obrak kōn m̧oņ im kareleel ko. Kōnono ippān Jemed ilo Lan̄ ej kōmaron̄ ad kōjenolo̧ki ta eo em̧ool im ta eo eriab, ta aorōk in pepe ko an Anij n̄an kōj, im taeo ejjab aorōk n̄an kōj. Laļ in ej juon laļ eo elāj im kabūrom̧ōjm̧ōn̄. Ijoke ilo ad kōppeļļo̧k būruwōd im jar, jenaaj en̄jake kaenōm̧m̧an eo ej itok jān Jemed ilo Lan̄ im jeļā bwe E ej iakwe im kaorōk kōj.
Kajjitōk
Irooj ekar kajjitōk bwe “eo ej kajjitōk ej bōk.” Kajjitōk āinwōt epidodo, ak ej juon men eo ebwe an kajoor kōnke ej kwaļo̧k ad kōņaan im ad tōmak. Ijoke, ej bōk iien im kijenmej n̄an ekkatak n̄an meļeļe ainikien Irooj. Jej lukkuun leļo̧k ad n̄an ļōmņak ko im en̄jake ko me rej itok n̄an ļōmņak ko ad im būruwōd, im jej jeki, āinwōt an rikanaan eo ad kōkapilōklōk kōj n̄an kōm̧m̧ane. Rekooti āolepān en̄jake ko ad ej juon m̧ōttan eo eaorōk n̄an bōk. Ej jipan̄ kōj keememej, etale, im bar en̄jake ta eo Irooj ej katakin kōj kake.
Kiin jeṃaanḷọk, eo ejitōn bōro ekar ba n̄an n̄a, “Ij tōmak revelesōn ko kajjojo ad make bwe rej m̧ool. Ij tōmak bwe Jetōb Kwojarjar enaaj kwaļo̧k n̄an eō aolep men ko ij aikuj kōm̧m̧ani. 4 Epidodo n̄an tōmak eļan̄n̄e inaaj en̄jake bwe en māņāān ubōm̧ kōn kam̧ool eo ejjeļo̧k pere ie. 5 Ak ewi wāween an Jetōb Kwojarjar eo aolep iien kōnono n̄an eō ilo jon̄ak in?”
N̄an aō jitōn bōro, im n̄an aolepemi, ikōņaan ba bwe ij barāinwōt ikōņaan bwe aolep iien in en̄jake im̧we kein rekajoor jān Jetōb eo im aolep iien in loe iaļ eo edreo n̄an ļoore. Ak ijjab jeļā, ijoke, men eo jemaron̄ en̄jake aolep iien ej, ainikien edik im emera jān Irooj ej unoojdikdik n̄an ļōmņak im būruwōd, “N̄a e ije. Ij iōkwe eo̧k. Etal im, kate eōk. Inaaj rie eok.” Ejjab aolep iien jej aikuj in jeļā men otemjej ak loe aolep men.
Ainikien eo edik ej kam̧m̧oole, rōjan̄, im kaenōm̧m̧an—im elōn̄ iien ej men eo ņe im ej ta eo jej aikuj ilo raan eo. Jetōb Kwojarjar eo ej m̧ool, im im̧we ko an rem̧ool—ko reļļap im ko reddik.
Kappukōt
Irooj ekar etal wōt kallim̧ur, “E eo ej kappukot, ej lo.” Kappukot ej kwaļo̧k ļōmņak im kijejeto ilo jetōb—kejōkļo̧kjeņ, kajjieon̄, ekkatak. Jej kappukot kōnke jej lōke kallim̧ur ko an Irooj. “Bwe eo ej itok n̄an Anij ej aikuj tōmak kōn an Anij pād, im kōn An leļo̧k jinōkjeej n̄an ro rej kappukot E” (Hebru 11:6). Eļan̄n̄e jenaaj kappukot, jej kōttāik kōj im kwaļo̧k ke jej ekkatak wōt, im Irooj enaaj kōļapļo̧k ad jeļāļo̧kjeņ eo ad, im kōpooje kōj n̄an bōk eļapļo̧k. “Bwe lo, āindein Irooj Anij ej ba: Inaaj leļo̧k n̄an ro nejin armej lain im bar lain, naan in kain̄i im bar naan in kain̄i, ijin jidik im ijjuweo jidik; … bwe n̄an eo ej bōk Inaaj leļo̧k eļapļo̧k” (2 Nipai 28:30).
Kaļļaļļaļ
Āliktata Irooj ekar ba, “N̄an eo ej kaļļaļļaļ, enaaj peļļo̧k n̄an e.” N̄an kaļļaļļaļ ej n̄an m̧akūtkūt ilo tōmak. N̄e jej lukkuun ļoor E, Irooj ej kōppeļļo̧k iaļ eo im̧aad. Ewōr juon al eaiboojoj me ej katakin kōj n̄an “jerkak im kōm̧m̧an eļapļo̧k jān ettōņak eo [ad] ilo m̧anjen ilōn̄. Kōm̧m̧ane men eo em̧m̧an ej juōn men eō eļap an kaṃōṇōṇō, juon lan̄lōn̄ eļapļo̧k jān jon̄an, juon kōjeraam̧m̧an in jerbal im iōkwe.” 6 Elder Gerrit W. Gong jān Doulul eo an Jon̄oulruo Rijilōk ro ekar kōmeļeļeiki bwe revelesōn ekkā an itok ilo iien eo jej kōm̧m̧ane men eo ejim̧we. Ekar ba: “Ilo ad kajjieon̄ diwōjļo̧k ilo jerbal in jipan̄ n̄an ipeļaakid, ij ļōmņak Irooj ej letok bar juon jon̄an An iakwe n̄an er im barāinwōt n̄an kōj. Ij ļōmņak jej ron̄jake ainikien, jej en̄jake E ilo juon wāween eoktak, ilo ad jar n̄an jipan̄ ro ipeļaakid kōnke ej juon iaan jar ko me E elukkuun kōņaan in uwaake.” 7
Waanjon̄ak eo an Alma
Elmakot eo epidodo ilo Itok, Ļoor Eō n̄an ļōmņak kōn kōjeraam̧m̧an ko aō ekar bōktok juon jetōb em̧m̧an im jet im̧we ko an jetōb ikar jab kōtmāni. Ilo aō wōnm̧aanļo̧k riiti kōn Alma im jerbal in karejar eo an ilo Ammoniha, ikar loe bwe Alma ekar leļo̧k juon waanjon̄ak em̧m̧an kōn ta meļeļein n̄an kajjitōk, kappukot, im kaļļaļļaļ. Jej riit bwe “Alma eaar kanooj jerbal ilo jetōb, likarōk ippān Anij ilo jar ekajoor, bwe En lutōkleplep jetōb eo An ioon armej ro.” Jar in, ijoke, ekar jab uwaak wāween an kar kōjatdikdik, im Alma kar joļo̧ke jān bukwōn eo. “Eddodo kōn būrom̧ōj,” Alma ekar baj ebbweer, ke juon enjeļ ekar bōktōk ennaan in: “Jeraam̧m̧an n̄an kwe, Alma, kōn menin, kotak bōram im lan̄lōn̄, bwe kwe e wōr unin am̧ lan̄lōn̄.” Enjeļ eo ekar jiron̄ e bwe en jepļaakļo̧k n̄an Ammōnaia im bar kajjieon̄, im Alma “em̧ōkaj an ro̧o̧l.” 8
Ta eo jekar ekkatak kōn naan eō Alma kajjitōk, kaļļaļļaļ? Jej ekkatak jar ke ej aikuji jerbal ilo jetōb, im ej jab aolep iien ej tōlļo̧k kōj n̄an men eo jej kōjatdikdik kake. Ak n̄e jej ebbweer ak eddodo kōn būrom̧ōj, Irooj ej letok n̄an kōj kaenōm̧m̧an im kajoor ilo wāween ko roktak. Emaron̄ jab uwaake aolep kajjitōk ko ad ak ņamejļan aolep jorrāān ko ad iien eo wōt, ijjelo̧k, E rōjan̄ kōj n̄an kajjieon̄ wōt. Eļan̄n̄e m̧ōkaj im kajim̧we karōk ko ad ippān karōk ko An, E enaaj kōppeļļo̧k iaļ eo n̄an kōj, āinwōt Ekar kōm̧m̧ane n̄an Alma.
En̄in ej aō naan in kam̧ool bwe en̄in ej tōre in bōk eddo an tarlep in gospel eo. Jej lan̄lōn̄ kōn kōjeraam̧m̧an ko an Pinmuur eo an Jisōs Kraist ilo mour ko ad. Jeje ko rekwojarjar relukkuun pojak n̄an kōj. Jej tōl jān rikanaan ro rej katakin kōj ankilaan Irooj n̄an iien ko reppen jej mour ie. Ilo kakkobaba, elōn̄ jim̧we in bōk revelesōn ko ad make bwe Irooj emaron̄ kaenōm̧m̧an im tōl kōj. Āinwōt an enjeļ eo kar ba n̄an Alma, ewōr “unin ad lan̄lōn̄ eļape” (Alma 8:15). Ilo etan Jisōs Kraist, amen.