Ij Tōmak ilo Enjeļ ro
Irooj ej jeļā kōn apan̄ ko kwoj jelm̧ae. Ejeļā kajjeem̧, Ej iakwe eok, im ij kallim̧ur, Enaaj jilkinwaj enjeļ ro n̄an jipan̄ eok.
Maan im kōrā ro jieū im jatū, ij tōmak ilo enjeļ ro, im inej kōņaan kwaļo̧k n̄an kom̧ en̄jake ko aō ippāer. Ilo aō kōm̧m̧ane wāween in, ij kōjatdikdik im jar bwe jenaaj kile aorōk eo an enjeļ ro ilo mour ko ad.
Erkein rej naan ko an Elder Jeffrey R. Holland jān juon kweilo̧k eļap jem̧aanļo̧k: “N̄e jej kōnono kōn ro otemjej rej kein jerbal ko ilo pein Anij, jej keememej jaab kōn aolep enjeļ ro rej itok jān jikin eo iturājet in rōn̄ōļ eo. Jet iaer jej etetal ippāer im kōnono ippāer—ijin, kiiō, aolep raan. Jet iaer rej jokwe ilo jukjukin pād ko ad make. … Ilo m̧ool, lan̄ ej jāmin epaaktok n̄e jejjab loe iakwe eo an Anij ej waļo̧k ilo jouj im kijejeto ko an armej relukkuun em̧m̧an im erreo me enjeļ ej naan eo wōt me ej itok ilo kōļmenļo̧kjeņ” (“The Ministry of Angels,” Liahona, Nov. 2008, 30).
Ej kōn enjeļ ro ilo turājet eo juon an rōn̄ōļ eo me ij kōņaan kōnono n̄an er. Enjeļ ro rej etetal ilubwilijid ilo aolep raan in ad mour rej kakeememej ko rekajoor kōn iakwe eo an Anij n̄an kōj.
Enjeļ eo kein kajuon me inaaj kōnono kaki rej ruo sister mijenede ro rekar katakin eō gospel eo ke ikar juon likao em̧m̧an dettan: Sister Vilma Molina im Sister Ivonete Rivitti. Leddik eo jatū im n̄a kar karuwaineneik er n̄an juon m̧akūtkūt an Kabun̄ in ijo me ikar ioon ruo enjeļ. Ij jan̄in kar pijaikļo̧k ilo kōļmenļo̧kjeņ ewi jon̄an an juon m̧akūtkūt edik naaj kar ukōt mour eo aō.
Jinō im jema im ajri ro jeiū im jatū rekar jab itok limo in ekkatak eļapļo̧k kōn Kabun̄ in ilo iien in. Rekar jab barāinwōt m̧ōņōņō bwe mijenede ro rej pād ilo m̧weo im̧ōm̧, kōn menin ikar bōk katak ko an mijenede ilo juon m̧ōnjar an Kabun̄ in. Ruum̧ in edik ilo m̧ōnjar in ekar “bukwin wōjke eo aō ekwojarjar.”
Juon allōn̄ ālkin an enjeļ rein kwaļo̧k kadkad in gospel eo n̄an n̄a, ikar peptaij. Ekar 16 iiō detta. Ilo m̧ool, ejjeļo̧k juon pija in m̧akūtkūt in ekwojarjar ippa, ak ewōr juon pija in an leddik eo jatū im n̄a ilo tōre eo pād ilo iien m̧akūtkūt eo. Inej aikuj in kalikkar wōn ro rej pād ilo pija in. N̄a in ekar aitoktata ilo tuanbwijmaron̄ in pija in.
Ilo am maron̄ pijaik ilo kōļmenļo̧kjeņ, pād ilo niknik ilo Kabun̄ in ekar juon apan̄ n̄an juon rūm̧m̧an ded eo me wāween an mour ekar oktak im baam̧le eo rekar jab bōk ejja iaļ in wōt.
Ilo aō kar kajjieon̄ ukukōt mour eo aō ekāāl, juon m̧anit ekāāl, im ro m̧ōtta rekāāl, ikar en̄jake aō jab aenōm̧m̧an. Ikar en̄jake aō make iaaō im ebbweer elōn̄ alen. Ikar jeļā bwe Kabun̄ in em̧ool, ak ekar pen aō en̄jake ij m̧ōttan. Ilo iien ikar jab aenōm̧m̧an im kapokpok ke ikar kajjieon̄ karōk aō n̄an kabun̄ eo aō ekāāl, ikar kōperan eō bwe in kobaļo̧k ilo jilu raan in kweilo̧k eo eļap an jodikdik ro, eo ikar ļōmņak enaaj jipan̄ eō lo ro m̧ōtta rekāāl. En̄in ej iien in ikar ioone bar juon enjeļ etan in Mônica Brandão.
Ekar kāāltok ilo eria eo, ekar em̧m̧akūttok jān bar juon jikin ilo Brazil. Ekar m̧ōkaj an jeļā kajeeō im, ikar jeraam̧m̧an, ekar bōk eō āinwōt juon m̧ōttan. Ij ļōmņak ekar kalimjōk eō eļapļo̧k ilo itulowaaō jān itulikū.
Kōnke ekar m̧ōttāiki eō, ekar kwaļo̧k kadkadū n̄an ro m̧ōttan, ro rekar erom̧ ro m̧ōtta ilo am lan̄lōn̄ kōn elōn̄ m̧akūtkūt ko an jodikdik ikar pād ie tokālik. M̧akūtkūt kein rekar aorōk n̄an ekkejelļo̧k eō aō n̄an mour in ekāāl.
Rein m̧ōtta rem̧m̧an rekar kōm̧m̧ane juon oktak eļap, ak ekar jab wōt n̄an katakin gospel eo ilo m̧weo im̧ō ippān juon baam̧le rekar rie wōt jerbal in oktak eo aō ilo kauwōtata. Ekkejelļo̧k ko aō ilo gospel ilo Kabun̄ in rekar m̧ool aorōkļo̧k n̄an eddōkļo̧k in oktaktok eo aō. Innām ruo bar enjeļ ro rekar bar jilkintok jān Irooj n̄an jipan̄.
Juon iaer ekar Leda Vettori, rūkaki in jemenere eo aō ilo jibbon̄tata. Kōn an maron̄ jeļā iakwe im im̧we kūlaaj ko, ekar letok n̄an eō juon jaat aolep iien jān “naan ko rem̧m̧an an Anij” (Moronai 6:4), eo ekar lukkuun mennin aikuj aolepān raan ko aō. Menin ekar jipan̄ eō bōk kajoor ilo jetōb n̄an wōnm̧aanļo̧k wōt.
Bar juon enjeļ ekar jipan̄ eō ekar būreejtōn eo an Doulul eo an Likao ro, Marco Antônio Fusco. Kar barāinwōt jitōn̄ e bwe en erom̧ kōmpānien eo aō erūtto n̄an loļo̧k ko an m̧ōko. Mekarta ejjeļo̧k aō kar imminene im eoktak paaktokū, ekar letok n̄an eō jerbal ko n̄an katakin ilo kweilo̧k ko an doulul eo an pris im loļo̧k ko an m̧ōko. Ekar letok aō iien n̄an m̧akūtkūt im n̄an ekkatak ejjab n̄an erom̧ juon rikkatak wōt an gospel eo. Ekar lōke eō, eļapļo̧k jān aō lōke eō make.
Kam̧m̧oolol n̄an aolep enjeļ rein, im elōn̄ ro jet ikar ioon er ilo iiō ko raorōk im̧aantata, ikar bōk ebwe kajoor n̄an pād wōt ilo iaļen bujen eo ke ikar bōk juon kam̧ool in jetōb kōn m̧ool eo.
Im jān wāween in, leddik in enjeļ in em̧m̧an ded, Mônica? Ālkin am̧ro jim̧or kar jerbale mijen ko, ekar erom̧ kōrā eo pāleeō.
Ijjab ļōmņak ekar juon jide bwe ro m̧ōttam rem̧m̧an, eddo ko ilo Kabun̄ in, im naajdik jān naan ko rem̧m̧an an Anij rekar m̧ōttan wōt jerbal in. Būreejtōn Gordon B. Hinckley ekar katakin: “Ejjab juon men epidodo n̄an kōm̧m̧an oktaktok ko n̄an kobatok ilo Kabun̄ in. Ej meļeļein bwe jej m̧wijiti jem̧jerā ko remo̧r. Ej meļeļein etal jān ro m̧ōttad. Emaron̄ meļeļein likūt itulik tōmak ko raorōk ippād. Emaron̄ aikuji juon oktak in m̧wil ko im kōm̧m̧an jon̄ak ak peek an̄ūrlep ko. Ilo elōn̄ jekjek ko emaron̄ meļeļein ajimakeke im aaet mijak ta eo ejjeļo̧k ad jeļā kake. Ej aikuj in wōr naajdik im kōkajoorļo̧k ilo season eo epen an juon mour an rioktaktok an Kabun̄ in” (“There Must Be Messengers,” Ensign, Oct. 1987, 5).
Tokālik ekar ba, “Aolepāer raikuj jilu men ko: juon m̧ōttā, juon eddo, im naajdiki kōn ‘em̧m̧an eo an naan ko an Anij’” (“Converts and Young Men,” Ensign, May 1997, 47).
Etke ij kwaļo̧k ippemi en̄jake kein?
Juon, ej n̄an jilkinļo̧k juon ennaan n̄an ro otemjej rej jelm̧ae wāween in kiiō. Bōlen komaron̄ juon rioktak tok eo ekāāl, ak juon eo ej ro̧o̧ltok n̄an Kabun̄ in ālkin jebwābwe ium̧win juon tōre, ak juon ej kate bwe en em̧m̧an an pād. Jouj, jouj, jab ebbweer ilo kijejeto eo am̧ n̄an erom̧ m̧ōttan baam̧le in ekilep. En̄in ej Kabun̄ eo em̧ool an Jisōs Kraist!
N̄e ej itok n̄an m̧ōņōņō eo am̧ im karōk in lo̧mo̧o̧r eo, ej aorōk iien otemjej kijejeto eo n̄an kajjieon̄ wōt. Ej aorōk kijejeto eo n̄an kajim̧we wāween mour eo am̧ im imminene ko. Irooj ej jeļā kōn apan̄ ko kwoj jelm̧ae. Ejeļā kajjeem̧, Ej iakwe eok, im ij kallim̧ur, Enaaj jilkinwaj enjeļ ro n̄an jipan̄ eok.
Ilo naan ko An make, Rilo̧mo̧o̧r eo ekar ba: “Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (Katak im Bujen Ko 84:88).
Kōttōbar eo aō kein karuo ej n̄an kwaļo̧k en̄jake kein ej n̄an jilkinļo̧k juon ennaan n̄an aolep membōr ro an Kabun̄ in—n̄an kōj aolep. Jej aikuj in keememej bwe ejjab pidodo n̄an rioktak tok ro rekāāl, ro m̧ōttad rej ro̧o̧ltok, im ro otemjej ewōr juon aer wāween mour eoktak n̄an aer lukkuun oktaktok. Irooj ej kile apan̄ in er rej jelm̧ae, im E ej pukot enjeļ ro rem̧ōņōņō in jipan̄. Irooj ej aolep iien pukot balinteer ro rem̧ōņōņō in erom̧ enjeļ ro ilo mour ko an ro jet.
Ro jeiū im jatū, kwonaaj ke m̧ōņōņō in erom̧ juon kein jerbal ilo pein Irooj? Kwonaaj ke m̧ōņōņō in erom̧ juon iaan enjeļ rein? N̄an erom̧ juon ribōkļo̧k ennaan jān Anij, jān turājet eo juon an rōn̄ōļ eo, n̄an juon armej eo Ekar inepata kake? Ej aikuji kom̧. Rej aikuji kom̧.
Aaet, jemaron̄ aolep iien kōtmāne jān mijenede ro ad. Er rej aolep iien pād ijeņ, ro jinointata n̄an pād ilo laajrak in jerbal an enjeļ ro. Ak er rejjabwe.
Eļan̄n̄e kwoj reito reitak ipeļaakūm̧, kwonaaj loe elōn̄ ro rej repād ilo aikuj an juon jipan̄ an enjeļ. Armej rein remaron̄ jab ekkōņak jōōt mouj, nuknuk in jar ko rem̧m̧an an kōrā ro, ak jabdewōt nuknuk in jar ko. Er remaron̄ jijet iaer make, epaakeļo̧k liktata ilo m̧ōnjar eo ak kūlaaj ruum̧ eo, jet iien en̄jake eļan̄n̄e rejjab pād ijeņ. Bōlen jekjek in kōm̧m̧an bar ko aer ej jidik oktak ak naan ko aer roktak, ak er rej pād ijeņ, im rej kajjieon̄.
Jet remaron̄ ļōmņak: “Ij aikuj ke itok wōt? Ij aikuj ke kajjieon̄?” Ro jet remaron̄ ļōmņak eļan̄n̄e juon raan renaaj en̄jake aer bōk er im iakwe. Enjeļ ro jej aikuji er, kiiō, enjeļ ro rej m̧ōņōņō in likūt jikin rejokne n̄an rie er; [armej ro] relukkuun em̧m̧an im erreo me enjeļ ej itok ilo kōļmenļo̧kjeņ [n̄an kōmeļeļeik er] (Jeffrey R. Holland, “The Ministry of Angels,” 30).
Ro jeiū im jatū, ij tōmak ilo enjeļ ro! Kōj aolep rej pād ijin rainin, juon jarin ritariņae eo eļap an enjeļ ro rekar kōjenolo̧k er n̄an raan kein āliktata, n̄an jerbal in karejar n̄an ro jet āinwōt pā ko raitokļo̧k an Rikōm̧anm̧an eo eļap an iakwe. Ij kallim̧ur bwe eļan̄n̄e jej m̧ōņōņō in jerbal, Irooj enaaj letok n̄an kōj iien ko rem̧m̧an n̄an erom̧ enjeļ ro rej jerbal in karejar. Ejeļā wōn ro rej aikuj jipan̄ an enjeļ, im Enaaj likūt er ilo iaļ eo ad. Irooj ej likūt ro otemjej ro rej aikuj jipan̄ an enjeļ ilo iaļ eo ad aolep iien.
Ij lukkuun kam̧m̧oolol kōn elōn̄ enjeļ ro me Irooj ekar likūt ilo iaļ eo aō ilo aolepān mour eo aō. Kar lukkuun aikuji er. Ij barāinwōt kam̧m̧oolol kōn gospel eo An me ej jipan̄ kōj oktak im ej letok n̄an kōj iien em̧m̧an n̄an em̧m̧anļo̧k.
En̄in ej juon gospel in iakwe, juon gospel in jerbal in karejar. Jān menin ij kam̧ool ilo etan Jisōs Kraist, amen.