Menin Letok eo Eaiboojoj an Nejin
Kōn Jisōs Kraist, jemaron̄ in rōļo̧k jen likjab in būrom̧ōj ko ad ilo kanniōk im anjo̧ jen būromōj ko ad ilo mour wabanban in.
Ke ij riiti Bok in Mormon eo Itok, Ļoor Eō katak eo jōm̧ar eo ļo̧k, Iaar m̧weiūr kōn riboot eo an Alma ke eaar jino lukkuun kile jerawiwi ko an, ekar “ejjeļo̧k jabdewōt eaiboojojļo̧k im kanooj meo̧ļo̧k jān kar metak ko [An].” 1 Ij kwaļo̧k, kōnono kōn metak eo ekanooj ļap ippa kōn nan̄inmej eo aō kōn kidney stone eo jiljilimjuon milimeter. Ejjan̄in kar wōr juon armej ekar en̄jake “men ko reļļap” n̄e juon men “edik im ļam waan” kar “kūrm̧ool.” 2
Naan eo an Alma eaar ioktok eō kōnke naan eo aiboojoj, ilo ukook eo ilo In̄lij ilo Bok in Mormon, kōmeļelļe men ko reaiboojoj ak rem̧m̧an. N̄an waanjon̄ak, Josep Smith ekar keememej enjeļ Moronai ke eaar kōņak juon liboror ebbooļoļ “ekanooj mouj,” mouj eo ļo̧k jān jabdewōt,” eaar loe.” 3 Aaet aiboojoj maron̄ bar waļo̧k ilo men ko renana. Lo Alma im tikjinede ko ilōn̄ tata rej kwaļo̧k kōn metak eo eaiboojoj “en̄taan,” “widbwebwe,” im “ikimmaļ” n̄an “jon̄an eo eļaptata.” 4
Kōmeļeļe eo an Alma ej kwaļ̧o̧k bwe juon men em̧ool ilo juon tōre bōd eo ekanooj ļap, kilep an aolep jerawiwi jej kōm̧m̧ane aikuj en̄jake. Jim̧we ej aikuji im Anij Make eban ukōte. 5 Ke Alma eaar keememej “aolep” jerawiwi ko an—eļaptata ro me raaar kakkure tōmak eo an ro jet—an metak ekar pen keidi, im ļōmņak eo n̄an jutak im̧aan Anij ekar obrak kōn “leln̄on̄ eļap.” Ekar en̄jake an “ānbwinnin im jetōb jim̧or jepeebļo̧k.” 6
Ijoke, ilo iien eo Alma ekar ba aolep men raar jino oktak “kōļmānļo̧kijeņ eo aō eaar pen” ioon kar kanaan eo “itok eo an juon Jisōs Kraist … n̄an pinmuur kōn jero̧wiwi ko an laļ,” iaar kūr “ilo [būruwōn]: O Jisōs, kwe Nejin Anij, kwōn tūriam̧o kake eō.” Kōn ļōmņak im akweļap, Alma eaar obrak kōn m̧ōņōņō eo “eaiboojoj” “kōn metak eo [an] ekanooj ļap.” 7
Jen jab meļo̧kļo̧k bwe lukkuun kōttōpar eo an ukweļo̧k ej n̄an bōkļo̧k būrum̧ōj im ukōt n̄an m̧ōņōņō eo erreeo. Kam̧m̧oolol kōn An “jidimkij in em̧m̧an,” 8 iien eo wōt jej itok n̄an Rilo̧mo̧o̧r—kōn tōmak ilo E im oktak in bōro em̧ool—eddodo kōn jerawiwi ko ad rejino jakoļo̧k jen kōj bwe en An. Menin ej maron̄ kōm̧m̧an kōnke E eo ejjeļo̧k an jerawiwi ekar “en̄taan kōn būrom̧ōj ko” 9 an aolep jerawiwi an kōm̧anm̧an ko An, bwe aolep kōm̧anm̧an ko An—kar en̄taan, toorļo̧k bōktōktōk jen aolep ron̄ ko ilo Ānbwiinin. Kōn tōl, en̄jake an juon make Rilo̧mo̧o̧r eaar kakkōļ kōj, ilo jeje ko rekwojarjar raan kein, bwe ejjeļo̧k ad jeļā elmen an naaj “aiboojoj” eo ad “en̄taan” n̄e jeban ukweļo̧k. Ak kōn jouj Eaar bar kalikkar bwe “N̄a, Anij Iaar en̄taan kōn men kein n̄an aolep, bwe ren maron̄ jab en̄taan eļan̄n̄e renaaj ukeļo̧k” 10 —juon ukweļo̧k eo ej kōm̧m̧an bwe jen “nemake” “m̧ōņōņō eo ekanooj m̧ōņōņō” eo Alma eaar nemeke. 11 N̄an katak in emake, “Ij Lokjenaō.” 12 Aaet, lokjenaō, Kraist ej letok em̧ool eļapļo̧k.
Jet iien metak eo eaiboojoj ej itok ejjab jjen erawiwi ak bōd ko rem̧ool, jerbal ko an ro jet, ak kajoor ko reļļap jān ad maron̄i. Ilo iien kein, jemaron̄ lam̧ōn̄ āinwōt rijej Sam Ko rōwānōk.
“Būruō ej en̄taan ilo n̄a: im lōļņo̧n̄ ko in mej raar kainepataik eō.
“… Im wūdiddid raar itok ioō.
“… O em̧m̧an ippa eļan̄n̄e peiū āinwōt m̧uļe! innām inaaj kelo̧k im kakkije.” 13
Medical science, kapilōk ko retijemļo̧k, ak kōļļā ko em̧ōj kōm̧m̧ani emaron̄ jipan̄ kōkm̧anm̧anļo̧k kain en̄taan in. Ak keememej, aolep menin letok ko—ekoba kein—rej itok jen Rilo̧mo̧o̧r eo. 14 Jekdo̧o̧n ta men ko rej kōm̧m̧an menin metak im rub bōro ko, kein jipan̄ eo eļaptata ej ilo: Jisōs Kraist. E wōt ej kabwijer aolep kajoor n̄an kōmour n̄an kajim̧we aolep likjab, kajim̧we aolep bōd, ukōt aolep jab wānōk, karpen aolep kinej, im kadiwōjļo̧k aolep kōjeraam̧m̧an ko kar karum̧wijļo̧k. Āinwōt rikam̧ool ro an etto, Ij kam̧ool bwe “bwe ad pris eļap e jab juon ej ban tūriam̧okake m̧ōjņo ko ad” 15 ak juon Ripinmuur eo ej iakwe ekar itok jān turoon eo An eutiej im kar ilo̧k im “en̄taan kōn metak ko im kaen̄tanaan ko im kapo ko otemjeļo̧k … bwe En maron̄ jeļā … jipan̄ armej ro An.” 16
N̄an aolep rainin ro ewōr metak ko rekanooj kōmettak ak kanooj jej uwaer me kom̧ij en̄jake an ejjeļo̧k bar juon emaron̄ kanooj kam̧m̧oolol kaki, kom̧ maron̄ jim̧we. Emaron̄ ejjeļo̧k ro uwaan baam̧le, m̧ōttad, ak priesthood ritōl—ijoke lale im kajjieon̄ kōm̧m̧ane kajjojo emaron̄e—wōn elukkuun jeļā ta eo kwoj en̄jake ak naan ko n̄an jipan̄ eok mour. Ak jeļā menin: ewōr Juon eo eweppān an meļeļe en̄jake, eo ej “kajoor jān aolep lal,” 17 im eo ej “maroñ in kōṃanṃan kōn men otemjej e kanooj utiejḷọk jān [am̧] kajjitōk ak ḷōmṇak.” 18 Jerbal in enaaj waļo̧k ilo jekjek eo An im ilo iien eo An, ak Kraist epojak kadede iien otemjej n̄an kōmour aolep būrom̧ōj ko am.
Ilo am̧ kōtļo̧k bwe En kōm̧m̧ane, kwonaaj lo bwe en̄taan eo am̧ eban men bajjōk. Kōnono kōn elōn̄ ro reperan ilo Baibōļ im kōn būrom̧ōj ko aer, Rijilōk Paul eaar ba bwe “Anij … ear kōppojak n̄an kōj jabdewōt men eo em̧m̧an jān men ko aer, bwe ren jab weeppān makeļo̧k iaer jān kōj.” 19 Kwoj loe, lukkuun piktok in Anij im jibadbad eo ad ilaļ in ej m̧ōņōņō, 20 bōtaab jejjab maron̄ erom armej in lan̄lōn̄ ekwojarjar ilo jab en̄jake ko me rej idajon̄jon̄e kōj, jet iien n̄an ijo em̧wilaļ tata. Āinwōt an Paul kar āliji, Rilo̧mo̧o̧r Make ekar “koweeppān [ak kadedeļo̧k] kōn en̄taan.” 21 Kōn menin jutak ņae unoojdikdik ko an setan me n̄e kwon kar juon armej em̧m̧an, koban kowaan kain apan̄ kein.
Kwoj aikuj barāinwōt jum̧ae riab eo me ej ba en̄taan ko am̧ remaron̄ pād itulik in doulul in ro kāālet er an Anij, ro kāālet er rej lan̄lōn̄ im jeraam̧m̧an im rejjab en̄jake en̄taan. Ijoke, lo eok make āinwōt Jon Revelator eo em̧ool ekar lo eok ilo revelesōn eo an ekabwilōn̄lōn̄ an raan ko āliktata. N̄an Jon ekar lo “juon jar eļap, eo ejjeļo̧k armej ej maron̄ in bwinier, jān aolep kain armej, im bwij, aelōn̄, im kajin [ro] rej jutak im̧aan tūroon eo, im im̧aan mejān Lamb, em̧ōj aer kōņak nuknuk ko re mouj, … [ro] rej lam̧ōj ilo ainikien eļap, im ba, Lo̧mo̧o̧r n̄an amwōj Anij.” 22
N̄e kajjitōk, “Er rej kōņak nuknuk mouj? im er rekar itok jān ia?” Jon ej bōk uwaak eo, “Rein ro raar itok jān eļap eo eļap, im raar kwaļe im kamouj nuknuk ko aer kōn bōtōktōkin Lamb.” 23
Ro jeiū im jatū, en̄taan ilo kwojarjar ej jipan̄ kōkarbab eok n̄an, ijello̧kin ukōt eok jān juon men, rikāālet eo an Anij. Im ej kōm̧m̧ani kallim̧ur ko aer ami kallim̧ur. Āinwōt Jon eaar kwaļo̧k, kwo “jāmin bar kwōle, re jāmin bar maro, im aļ ej e jāmin bar kōjeek [eok], ak ejjeļo̧k bwiļ. Bwe Lamb eo ej eoļōpan tūroon Enaaj naajdik [eok], im Enaaj tōl [eok] n̄an unin dān ko dān in mour; im Anij enaaj kōm̧ōrāik dānnin kōmjaaļaļ jān mejem̧.” 24
“Im enaaj ejjeļo̧k bar mej, re jāmin bar liaajlo̧l, ak jan̄, ak en̄taan.” 25
Ij kam̧ool n̄an kom̧ bwe kōn kam̧m̧ool ko kōn em̧m̧an eo eļap an Jisōs Kraist Pinmuur eo An eļap, emaron̄ in rōļo̧k jen likjab in būrom̧ōj ko ad ilo kanniōk im anjo̧ jen būromōj ko ad ilo mour wabanban in. Ium̧win tōl eo An, mejān kajjik eo am̧ ekwojarjar ej juon wōj ban keidi im lan̄lōn̄ eo ba kōmeļeļeik—juon lan̄lōn̄ eo ekanooj in ļap im kanooj in jej uwaan n̄an eok, enaaj kam̧ool “men otemjeļo̧k ioon laļ.” 26 Bwe kwon maron̄ edjon̄e m̧ōņōņō in kiiō im en obrak n̄an indeeo, ij karuwaineneik eok n̄an kōm̧m̧ane ta eo Alma ekar kōm̧m̧ane: kōm̧m̧an bwe kōļmenļo̧kjeņ eo am en ilo menin letok eo aiboojoj an Nejin Anij āinwōt an kar waļo̧k ilo gospel in An ilo, Kabun̄ in An em̧ool im emour. Ilo etan Jisōs Kraist, amen.