Aenōm̧m̧an, Jab M̧akūtkūt
Rilo̧mo̧o̧r eo ej katakin kōj n̄an en̄jake aenōm̧m̧an im jab inepata jekdo̧o̧n n̄e kōto ko rekajoor rej pād ipeļaakid rej kōm̧m̧an ņo ko reļļap n̄an kamijak kōj bwe en jakoļo̧k kōjatdikdik ko ad.
Ke ajri ro nejimim rekar dik, baam̧le eo am ekar joļo̧k jejjo raan ippān doon ilo juon ļe eaibojooj. Juon ālikin rālep, ajri ro nejim ekar ekanōk kein epāpe m̧okta jān aer keļo̧k jān ilo ob eo n̄an lo̧jet. Leddik eo nejim edik ekar lale ilo an ebweer, lukkuun in lale ajri ro jeiū. Kōn aolepān an maron̄ eo epād ippān, ekar kiil bo̧tin kōn juon pā im kelo̧k. Ekar kajju walōn̄tak im kōn mijak ilo ainikien ekar lamōj, “Jipan̄ eō! Jipan̄ eō!”
Kiiō, ekar jab pād ilo jabdewōt jorrāān, kein epāpe eo ekar kōm̧m̧ane jerbal eo an im ekar epāpe wōt. Jān kar etal n̄an jipan̄e im kannōk tok n̄an bar ioon ob eo kōn bar jidik kijejeto. Bōtaab, jān ta eo ej ļōmņake, ekar aikuj jipan̄. Bōlen kōn an kar mōlo dān eo ak jinoin an en̄jake ta eo ekar waļo̧k. Kōn jabdewōt wāween, ekar tallōn̄ n̄an bar ob eo, ijo kōm̧ ekar atokbakwoje kōn juon to̧o̧l mōrā im ba kōn an peran.
Men̄e jerūtto ak jedik, elōn̄ iaad jej, ilo iien mijak, ekairiiri im ba ilo naan ko āinwōt, “Jipan̄ eō!” “Ļom̧ooren eō!” ak “Jouj, uwaake jar eo aō!”
Kain jōkjōk in ekar waļo̧k ippān rikaļoor ro an Jisōs ilo iien jerbal in karejar eo An. Ilo Mark jej kōnono bwe Jisōs “bar jino An katakin iturin lo̧jet: im eļap jar eo rej kwiļo̧kļo̧k n̄an Ippan̄.” 1 Ekar lōn̄ļo̧k armej ro jon̄an Jisōs ekar “relōn̄e juon tima” 2 im ekōnono jān ob eo. Aolepān raan eo Ekar katakin armej ro kōn barabōļ ko ilo aer jijjōt ilo āne.
“Im … ilo raan eo ke e [jota] ej itok,” Ej ba n̄an rikaļoor ro an, “Jen iļo̧k n̄an lom̧aļo jab uweo. Im rej iļo̧k jān jar eo,” 3 rekar etal jān āne im etal ilo iaļ eo aer n̄an Dān in Galilee . Kabbok juon jikin ilo lo̧kwon tima eo, Jisōs ekar babu im mōkaj an kiki. Ejjab to jān iien eo “im e bun̄ n̄at, im ņo ko rej juur ioon wa eo, innām elōn̄” 4 kōn dān.
Elōn̄ iaan rikaļoor ro an Jisōs rekar rienōd im kar jeļā kilen kōm̧m̧an tima eo n̄e ej lōn̄ nana in mejatoto. Ekar lukkuun lōke er—aaet, rekar rikaļoor ro An—rejitōnboro. Rekar etal jān jerbal ko aer, men ko em̧m̧an ippān, im baam̧le ko aer n̄an ļoore Jisōs. Tōmak eo aer ilo E ej kam̧ool eo ilo aer pād ilo loon eo ippān. Im kiiō loon eo waer ekar pād ilo ioļap in kōto in m̧ōttan wōt jidik etūm̧laļļo̧k.
Jej jab jeļā ewi to in aer kar kajjieon̄ n̄an kōm̧m̧an bwe loon eo en epāpe wōt ilo kōto eo, ak rekar karuj Jisōs kōn mijak ilo anikier, im ba:
“Maajta, kwoj jab ļōmņak kōn am jako ke?” 5
“Irooj, lo̧mo̧o̧ren kōm: jenaaj jako.” 6
Rekar kūr E “Maajta,” im bwe E eo. E ej barāinwōt “Jisōs Kraist, eo Nejin Anij, Jemān lan̄ im laļ, Rikōm̧anm̧an aolep men ko otemjeļo̧k jān jinoin.” 7
Jān ijo Ej pād ie ilo loon eo, Jisōs ekar jerkak im kapojrak kōto eo im ba n̄an lom̧alo̧ enana, “aenōm̧m̧an, jab m̧akūtkūt. Im kōto [e jako], im eļap lūr.” 8 Innām Maajta Rūkaki, Jisōs ekar katakin rikaļoor or An ilo an kōjerbal ruo kajjitōk ko repidodo im eļap iakwe ilo kajjitōk kein. Eaar kajjitōk.
““Etke kom̧ij lōļn̄o̧n̄?” 9
“Ewi tōmak eo am̧?” 10
Ewōr juon imenene, n̄e kapo, n̄e jej loe bwe kōj make jepād ilo ioļap in kapo ko, tūrabōļ, ak en̄taan ko me jej ļamōj im ba, “Maajta, koj jab kea ne inaaj jako ke? Lo̧mo̧o̧ren iō.” Barāinwōt Josep Smith ekar jan̄ im lam̧ōj jān jikin kalibuuj, “O Anij, kwo pād ia? Im ia eo em̧ nuknuk eo ej kalbubu jikin tilekek eo Am?” 11
Aaet, Rilo̧mo̧o̧r eo an laļ in emeļeļe kōn ta ko ilo mour ko ad, bwe E ej katakin kōj n̄an en̄jake aenōm̧m̧an im jab inepata jekdo̧o̧n n̄e kōto ko rekajoor rej pād ipeļaakid rej kōm̧m̧an ņo ko reļļap n̄an kamijak kōj bwe en jakoļo̧k kōjatdikdik ko ad.
N̄an ro rej kwaļo̧k tōmak, tōmak āinwōt ajri, ak aaet m̧ōttan ko reddik an tōmak, 12 Jisōs ej kūr, im ba: “Itok, n̄an Eō.” 13 “Tōmak ilo eta.” 14 “Ekkatak jān Eō, im ron̄jaki naan ko Aō.” 15 Ettā ilo an kakien, “Ukweļo̧k im [n̄an] baptise ilo eta,” 16 Iakwe doon; āinwōt aō Iakwe kom̧,” 17 im “iien otemjej keememej n̄a.” 18 Jisōs ekar bar ba, kōmeļeļeik: “Men kein Iar kōnono n̄an kom̧, bwe ilo n̄a kom̧win aenōm̧m̧an. Ilo laļ kom̧ij en̄taan, ak kom̧win m̧ōņōņō; N̄a Iar bōk anjo̧ ioon laļ.” 19
Ij pijaik ļo̧k an rikaloor ro an Jisōs ilo kōto eo eļap, ilo aikuj, poub ilo aer lale an ņo ko iuwe ioon loon eo im bar ālimļo̧k dren eo. Ij pijaikļo̧k aer kajjieon̄ dāpij wūjlā eo im kajjieon̄ in lale ta eo remaron̄ kōm̧m̧nae ioon wa jidikdik eo wa er. Rekar ļōmņak wōt aer mour, im aer akweļap ekar lukkuun juon men in aikuj.
Ejjeļo̧k oktak n̄an elōn̄ iaad rainin. Ta ko rej waļo̧k ilo laļ in rainin im ilo laļ ko ad, jukjuk in pād ko, im baam̧le ko ad kajjojo kōn apan̄ ko jeban kar loi. Ilo iien ko reppen, tōmak eo ad emaron̄ etal wōt n̄an jon̄an eo jemaron̄e im jemeļeļe kake. Ņo in ļeln̄o̧n ko remaron̄ kamad kōj, kōm̧m̧an bwe jān meļo̧kļo̧k em̧m̧an eo an Anij, innem kōtļo̧k kōj bwe jān jab loļo̧kjen im jako ad ļōmn̄ak. Aaet emaron̄ ilo iien kein reppen ilo iaļ eo ad bwe tōmak eo ad emaron̄ jim̧or kajjieon̄ ak jako.
Jekdo̧o̧n ta eo jej iooni, jemaron̄ kajjieon̄ jerbal n̄an kaļōk im ļoon ta ko jej iooni, jemaron kajeon jerbal n̄an kaļōk im kōļaļo̧k tōmak eo ad ilo Jisōs Kraist. Ej kajoorļo̧k eļan̄n̄e jenaaj keememej bwe jej ro nejin Anij im bwe E ej iakwe kōj. Tōmak eo ad ej eddōkļo̧k ilo ad kajjieon̄ naan ko an Anij kōn kōjatdikdik im kijejeto, kajjieon̄ jon̄an wōt ad maron̄ n̄an ļoore katak ko an Kraist. Tōmak eo ad ej ļapļo̧k ilo ad kāālet n̄an tōmak ijeļo̧kin pere, joļo̧k bōd ijeļo̧kin ekajet, ukweļo̧k ijjeļo̧kin jum̧ae. Tōmak eo ej em̧m̧anļo̧k ilo ad kijenmej pedped ioon em̧m̧an im tūriam̧o im jouj eo an Messaia eo ekwojarjar. 20
“Ilo ad tōmak jab n̄an jeļāļo̧kjeņ eo eweppān,” Elder Neal A. Maxwell ekar ba, “Ej bōktok lōke eo em̧ūlaļ ilo Anij, eo jeļāļo̧kjen eo eweppān!” 21 Aaet ilo iien ko reppen, tōmak ilo Irooj Jisōs Kraist epen im kajoor. Ej jipan̄ kōj kajereer jān men ko rejjab aorōk me rej kōmad kōj. Ej rōjan̄ kōj n̄an wōnm̧aanļo̧k ilo iaļ in kallim̧ur eo. Tōmak ej anjo̧ jān menin kabwereer ko im kōtļo̧k kōj n̄an jelm̧ae ilju im jekļaj kōn aerā ko em̧ōj ņa mejļaer im kankan. Ej men bwe jān kajitōk n̄an lo̧mo̧o̧ren im deoor ilo ad jar n̄an Jemān ilo etan eo Nejin. Im n̄e akweļap in jar ko ad rej etal im jab uwaak, wōnm̧aanļo̧k wōt ilo tōmak ilo Jisōs Kraist ej kōm̧m̧an kijenmej, ettā, im maron̄ eo n̄an ba naan ko jidik jidik, “Enaaj tōprak.” 22
Būreejtōn Russell M. Nelson eaar katakin:
“Ak jejjab aikuj kōtļo̧k bwe mijak en bōk jikin tōmak eo ad. Jemaron̄ jum̧ae mijak ko ilo ad kōkajoorļo̧k tōmak ko ad.
“Jino kōn ajri ro nejim. … Kōtļo̧k bwe ren en̄jake tōmak eo am, men̄e kapok ko rej itok ioom̧. Kōtļo̧k bwe tōm̧ak eo am en pedped ioon Jemedwōj Ilan̄ eo ej iakwe im Nejin eo Ejitōnboro, Irooj Jisōs Kraist. Katakin kajjojo leddrik im laddrik bwe er rej nejin Anij, kōkam̧anm̧an āinwōt lememe in wōt E, kōn unin ko rekwojarjar im aer maron̄ erom̧ ak tōpar. Kajjojjo rej lōtak tok kōn apan̄ ko n̄an anjo̧ im tōmak eo n̄an an eddōkļo̧k.” 23
Ikar ron̄ an ruo ajri emen aer iiō kwaļo̧k tōmak eo aer ilo Jisōs Kraist n̄e rej uwaak n̄an kajjitōk ko “Elmen an Jisōs Kraist jipan̄ eok?” Ajri eo jinoin ekar ba “Ijeļā Jisōs Kraist ej iakwe n̄a bwe ekar mej kōn iō. Ej barāinwōt iakwe ro rerūtto.” Ajri eo kein karuo ekar ba, “Ej jipan̄ eō n̄e ij būrom̧ōj ak illu. Ej barāinwōt iakwe n̄a n̄e ij tumlaļļo̧k.”
Jisōs ekar ba, “Kōn menin, jabdewōt eo ej ukeļo̧k im itok n̄an Eō āinwōt juon ajri, e Inaaj bōk e, bwe kōn in ej an aelōn̄ in Anij.” 24
“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.” 25
Ejjab kar to Būreejtōn Nelson ekar kallim̧ur “bwe kadikļo̧k mijak im kōļapļo̧k tōmak enaaj tōlļo̧k” elan̄n̄e jenaaj “jino emool n̄an ron̄jake, eo̧ron̄, im pokake naan ko an Rilo̧mo̧o̧r.” 26
Ro jeiū im jatū, ta ko rapan̄ rej waļo̧k kiiō rejjab mejān kajjik eo ad āliktata indeeo. Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, em̧ōj bōk ioer etan Jisōs Kraist ilo kaļļm̧uur. Ewōr ad tōmak ilo kajoor eo An n̄an lo̧mo̧o̧r im kōjatdikdik ilo kallm̧ur ko an reļļap im aorōk. Ewōr unin men otemjej n̄an mōņōņō, bwe ad Irooj im Rilo̧mo̧o̧r ej lukkuun loe apān̄ ko, kea ko, būromōj ko ad. Ke Jisōs ekar pād ippān rikaļoor ro an jemaan, E ej pād wōt ioon loon eo waad! Ij kamool bwe em̧ōj an ajetok mour eo An bwe kwe im n̄a en jab jako. Jān lōke E, pokake kein ko An, im kōn tōmak ron̄jake E ilo an ba, “Aenōm̧m̧an, jab emakūtkūt.” 27 Ilo āt eo ekwojarjar etan Jisōs Kraist, amen.