Ako’y Nakakita ng Isang Pangitain

Ni Propetang Joseph Smith (1805–44)

Unang Pangulo ng Simbahan

Mula sa Joseph Smith—Kasaysayan 1:13–17, 25.

Noong tagsibol ng 1820, pinag-isipan ng 14 na taong gulang na si Joseph Smith kung aling simbahan ang dapat niyang sapian. Bumaling siya sa mga banal na kasulatan para sa kasagutan. Sa Santiago 1:5 nabasa niya na kung tayo ay nagkukulang ng karunungan maaari tayong humingi sa Diyos.

Sa wakas nakarating ako sa pagpapasiya na alin sa dalawa, ako ay mananatili sa kadiliman at kaguluhan, o kaya’y kinakailangan kong gawin ang tagubilin ni Santiago, yaon ay, humingi sa Diyos. …

Kaya nga, alinsunod dito … nagtungo ako sa kakahuyan upang maisagawa ang aking pagtatangka. Ito ay sa umaga ng isang maganda, maaliwalas na araw, sa tagsibol ng taong isanlibo walong daan at dalawampu. …

Matapos na magtungo ako sa lugar na kung saan ko binalak magtungo, matapos kong tingnan ang aking paligid, at nang matiyak kong ako’y nag-iisa, ako’y lumuhod at nagsimulang ialay ang mga naisin ng aking puso sa Diyos. Bahagya ko pa lamang nagagawa ito, nang daglian akong sinunggaban ng isang kapangyarihan na ganap akong dinaig, … Nagtipon ang makapal na kadiliman sa aking paligid, at sa wari ko ng sandaling yaon, na tila ako ay nakatadhana sa biglaang pagkawasak.

Subalit, sa paggamit ng lahat ng aking lakas upang tumawag sa Diyos na iligtas ako sa kapangyarihan ng kaaway na ito na sumunggab sa akin, at sa sandaling yaon nang ako ay nakahanda nang pumailalim sa kawalang-pag-asa at ipaubaya ang aking sarili sa pagkawasak … ako ay nakakita ng isang haligi ng liwanag na tamang-tama sa tapat ng aking ulo, higit pa sa liwanag ng araw, na dahan-dahang bumaba hanggang sa ito ay pumalibot sa akin.

… Nang tumuon sa akin ang liwanag, nakakita ako ng dalawang Katauhan, na ang liwanag at kaluwalhatian ay hindi kayang maisalarawan, nakatayo sa hangin sa itaas ko. Ang isa sa kanila ay nagsalita sa akin, tinatawag ako sa aking pangalan, at nagsabi, itinuturo ang isa—Ito ang Aking Pinakamamahal na Anak. Pakinggan Siya! …

… Ako’y tunay na nakakita ng liwanag, at sa gitna ng liwanag na yaon nakakita ako ng dalawang Katauhan, at sa katotohanan kinausap nila ako; at bagaman kinamuhian ako at inusig dahil sa pagsasabi na nakakita ako ng pangitain, gayon man ito’y totoo; … nakakita ako ng pangitain; ito’y alam ko, at nalalaman ko na ito ay alam ng Diyos, at ito’y hindi ko maipagkakaila.

Isang Huwaran para sa Paghahanap ng Katotohanan

Paano natin malalaman kung ano ang totoo? Nagbigay si Propetang Joseph Smith ng huwaran na susundan natin.

Si Joseph ay may tanong at binasa niya ang Santiago 1:15 na kung tayo ay nagkukulang ng karunungan maaari tayong humingi sa Diyos.

Ang paghahanap ni Joseph ay humantong sa Panunumbalik ng ebanghelyo ni Jesucristo. Ano ang kahahantungan ng iyong paghahanap?

Kapag may mga tanong ka, saan ka pupunta para sa mga sagot?

Ibinahagi ni Pangulong Russell M. Nelson kung paano natin matutularan ang halimbawa ni Propetang Joseph:

“Humanap ng tahimik na lugar. Magpakumbaba sa harapan ng Diyos.”
“Ipanalangin sa pangalan ni Jesucristo ang inyong mga alalahanin, ang inyong mga takot, mga kahinaan —oo, ang pinakainaasam ng inyong puso.”
“At makinig!”
“Isulat ang mga naiisip ninyo.”
“Isagawa ang mga bagay na ipinahiwatig sa inyong gawin.”

“Talaga bang nais ng Diyos na mangusap sa inyo? OO!”

(Mula sa pangkalahatang kumperensya ng Abril 2018.)

Mga paglalarawan ni Andrew Roberts