Pangkalahatang Kumperensya ng Oktubre 2019

Lahat ng numero ng pahina ay galing sa Liahona ng Nobyembre 2019.

Mas Malalim na Pag-aaral

Ano ang Ibig Sabihin ng Maging Disipulo?

“Ang pagiging disipulo ay hindi tungkol sa paggawa sa mga bagay sa perpektong paraan,” sabi ni Elder Dieter F. Uchtdorf, “tungkol ito sa pagpiling gawin ang mga bagay” (“Ang Malaking Pakikipagsapalaran Ninyo,” 87). Ang ating mga pagpili, sabi niya at ng iba pang mga tagapagsalita sa kumperensya, sa halip na ang ating mga kakayahan, ang nagpapakita kung sino talaga tayo.

“Tayo ba ay tunay na mga alagad Niya na nagbigay ng lahat ng Kanya para sa atin? … Nakikiusap ako sa lahat ng nakakarinig at nakakabasa sa mga salitang ito: Pakiusap, huwag ninyong ipagpaliban ang inyong lubos na katapatan hanggang sa maisip ninyo ito sa isang di-umiiral na hinaharap” (Elder Terence M. Vinson, “Tunay na mga Disipulo ng Tagapagligtas,” 11).
“Ang mga Banal ay yaong mga nakapasok sa tipan ng ebanghelyo sa pamamagitan ng binyag at nagsisikap na sundin si Cristo bilang Kanyang mga disipulo. Sa gayon, ‘ang kagalakan ng mga banal’ ay nangangahulugan ng kagalakan sa pagiging katulad ni Cristo” (Elder D. Todd Christofferson, “Ang Kagalakan ng mga Banal,” 15).
“Inaanyayahan ko kayong maging matapat sa habambuhay na proseso ng pagkadisipulo. Gumawa at tumupad ng mga tipan. Itapon ang mga dating gawi ninyo sa malalalim at rumaragasang mga talon. Lubusang ibaon ang inyong mga sandata ng paghihimagsik nang hindi nakausli ang mga hawakan” (Elder Dale G. Renlund, “Hindi Natitinag na Katapatan kay Jesucristo,” 25).
“Ang ating pangako na laging aalalahanin ang Tagapagligtas ay nagbibigay sa atin ng lakas na manindigan sa katotohanan at kabutihan—tayo man ay naroon sa maraming tao o sa lugar na nag-iisa lamang tayo, kung saan walang sinuman ang nakaaalam ng ating mga kilos maliban sa Diyos” (Lisa L. Harkness, “Paggalang sa Kanyang Pangalan,” 61).
“Ang mga tunay na disipulo ni Jesucristo ay nagmamahal sa Diyos at sa Kanyang mga anak nang walang inaasahang kapalit. Minamahal natin ang mga bumibigo sa atin, ang mga taong ayaw sa atin. Kahit ang mga nangungutya, nang-aabuso, o nagnanais na saktan tayo” (Elder Dieter F. Uchtdorf, 88).

Larawan ng lalaking naglalakad na kuha ni Judith Beck, larawan ng mga babaeng nagbabasa na kuha ni Catherine Frost