Kajoor n̄an Anjo̧ Ioon Rijum̧ae eo

Jān Elder Peter M. Johnson

Jān Jiljilimjuonn̄oul eo

Elmen ad pukot aenōm̧m̧an, keememej wōn kōj, im anjo ioon men kein jilu an Rijum̧ae eo?

Ro jeiū im jatū, kom̧m̧ool kōn aolepān kōm̧m̧ani ko ami n̄an erom̧, im n̄an jipan̄ ro jet erom̧, rikaļoor o rem̧ool an Jisōs Kraist im lemōņōņō kōn kōjeram̧m̧an ko an tampeļ eo ekwojarjar. Kom̧ em̧m̧ool kōn ami em̧m̧an. Kom̧ em̧m̧an; kom̧ aiboojoj.

Ej aō jar bwe jenaaj kile im̧we eo an Jetōb Kwojarjar ilo ad lukkuun itok im meļeļe bwe jej armej ro nejin Anij. “Baamle Eo: Juon Naan in Kean̄ n̄an Lal in” ej kwaļo̧k: “Aolep armej otemjej—em̧m̧aan im kōrā—kar kōm̧anm̧an ilo nememein wōt Anij.j. Kajjojo ej juōn jetōb jitōnbōro likao im jiron̄ nejin jined im jemed ilan̄, im, ilo āinwōt, kajjojo ewōr juōn mour kwojarjar im jipadpad ippān.”¹ Kōj jej “jetōb ko jet rejenoļo̧k ro kar jabwik er n̄an wōnm̧aantak ilo tarlep in iien ko n̄an bōk kuņaer ilo kōm̧m̧ani foundasōn ko an jerbal eo eļap ilo raan ko āliktata.”² Būreejtōn Russell M. Nelson ekar ba: “Em̧ōj katakin kom̧ ilo laļ eo an Jetōb n̄an kōpooj kom̧ n̄an jabdewōt men im aolep men ko kom̧ naaj iooni ilo m̧ōttan in ilo raan kein āliktata (lale K&B 138:56). Bwe ta eo em̧ōj katakin eok enaaj pād wōt ippam̧”³

Kwoj ļaddik im leddik ro nejin Anij em̧ōj kālete jān jinoin. Ewōr am̧ kajoor n̄an anjo̧ ioon Rijum̧ae eo. Rijum̧ae eo, ijoke, ejeļā wōn kwe. Ejeļā kōn jolet eo am̧ ekwojarjar im ej pukot kilen n̄an kajemļo̧k marōn ko ami ilo laļ in im lan̄ ilo an kōjerbal men kein jilu:

• Riab

• Kamad

• Kabbweer

Riab

Rijum̧ae eo ekar kōjerbal tuuļ in riab ilo raan ko an Moses. Irooj ekar kwaļo̧k n̄an Moses:

“Im, lo, kwe kwōj nejū m̧aan. …

“Ewōr Aō jerbal n̄an eok, … im kwe kwōj ilo jekjekin Nejū iaar Make Keotake.”⁴

Ilo jet iien ekadu ālkin visōn eo aiboojoj, Setan ekar kajjeon̄ riab e Moses. Naan ko ekar kōjerbal ekar lukkuun kabūlōn̄lōn̄: “Moses, nejin armej, kabūn n̄an iō.”⁵ Riab eo ejjab wōt n̄an kūrtok n̄an kabun̄ n̄an Setan ak ej barāinwōt kariab ilo juon wāween kajjeon̄ kōmeļeļeik ke Moses ej nejin armej. Keememej, Irooj ej kab mōj an ba n̄an Moses ke ej m̧aan nejin Anij, kōm̧anm̧an ilo jekjekin Nejin Eaar Make Keotake.

Rijum̧ae eo ekar jab bōjrak an kajjeon̄ in riab e Moses, bōtaab Moses ekar anjo̧, im ba: “Etal jān iō, Setan, bwe juon wōt Anij inaaj kabun̄ n̄ane, eo ej Anij in aiboojoj.”⁶ Moses ekar keememej wōn e—nejin Anij.

Naan ko an Irooj n̄an Moses ej iooktok kwe im n̄a. Jekar kōm̧anm̧an āinwōt nemeimein wōt Anij, im ewōr An jerbal n̄an kōj n̄an kōm̧m̧ane. Rijum̧ae eo ej kajjeon̄ in riab e kōj ilo an kōm̧m̧an bwe jān meļo̧kļo̧k lukkuun wōn kōj. Eļan̄n̄e jej jab meļeļe wōn kōj, innem enaaj pen n̄an ad kile wōn eo jekōņaan erom̧.

Kamad

Rijum̧ae eo ej barāinwōt kajjeon̄ in kamad jān Kraist im iaļan bujen eo An. Elder Ronald A. Rasband ekar kwaļo̧k men in: “Jerbal an Rijum̧ae eo ej n̄an kapoik kōj jān kam̧ool ko an jetōb, ak Irooj ej ikdeelel n̄an kōmeram im kōjerbal kōj ilo jerbal in An.”⁷

Ilo raan kein ad, elukkuun lōn̄ kein kamad ko, āinwōt Twitter, Facebook, mijiik game ko ilo online, im ebar lōn̄ ļo̧k. Technology ko raan kein rekabūlōn̄lōn̄, bōtaab eļan̄n̄e jej jab mejmej karuo, remarōn kamad kōj jān ad kōm̧m̧ani jerbal ko ad rekwojarjar. Ilo ad kōjerbali ilo tujim̧we in emarōn boktok kajoor jān lan̄ im kōtļo̧k bwe jen kam̧ooli men in būlōn̄ ko ilo ad pukot n̄an kobaiktok bwij in Israel ilo jim̧or turājet in ron̄ōļ eo.

Jān mejmej karuo im jab kōjerbal technology ko ilo jatiljek.⁸ Wōnm̧aanļo̧k n̄an pukot wāween ko n̄an kōjerbal technology ko bwe en marōn kepaakļo̧k kōj n̄an Rilo̧mo̧o̧r im kōtļo̧k kōj n̄an kadedeikļo̧k jerbal eo An ilo ad kōppopo n̄an Itok eo An Kein Karuo.

Kabbweer

Āliktata, Rijum̧ae ekōnaan bwe jān ebbweer. Jemarōn en̄jake ebbweer n̄e jej keidi kōj ippān ro jet ak n̄e jej en̄jake ke jej jab mour kōn kōņaan ko, ekoba kōņaan ko ad make.

Ke ikar jino jikuuļ in taktō, ikar en̄jake ebbweer. Būrookraam̧ eo ekar bōke wōt emān rijikuuļ ro ilo iiō eo, im rijikuuļ ro jet rekar lukkuun kapāāl. Bōnbōn in teej ko aer rekar uteij im ekar wōr aer iminene kōn jerbal ko reutiej, im rekar lukkuun kwaļo̧k lōke ilo jeļā ko aer. Ālkin wiik ko aō ruo ilo būrookraam̧ in, en̄jake in ebbweer im pere rekar jino bōk jikin, ekar m̧ōttan jidik bwe en lukkuun kainepataik eō.

Ikar kālet bwe eļan̄n̄e inaaj kadedeikļo̧k emān iiō ilo būrookraam̧ in, ij aikuj kam̧ōj aō riiti Bok in Mormon kajjojo jamejta. Kajjojo raan ke ikar riit, ikar kile ke Rilo̧mo̧o̧r ekar kwaļo̧k bwe Jetōb Kwojarjar enaaj katakin eō aolep men ko im enaaj letok aolep men n̄an emeemļo̧kjeņ eo aō.⁹ Ekar kalikkar wōn n̄a āinwōt nejin Anij, kakeememej eō bwe in jab keid n̄a make ippān ro jet, im kar letok n̄an n̄a kajoor n̄an kōm̧m̧an ijo kwonaeō ekwojarjar n̄an tōprak.¹⁰

Ro mōtta, jouj jab kōtļo̧k bwe juon en ko̧o̧te m̧ōņōņō eo am̧ jān eok. Jab keidi kwe make n̄an ro jet. Jouj keememej iakwe in naan ko an Rilo̧mo̧o̧r: “Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧: N̄a ij lewōj n̄an kom̧, jab āinwōt an laļ lewōj. En jab pok, būruemi, im en jab lōļn̄o̧n̄.”¹¹

Kōn menin, elmen ad kōm̧m̧ane menin? Elmen ad pukot aenōm̧m̧an, keememej wōn kōj, im anjo̧ ioon men kein jilu an Rijum̧ae eo?

M̧oktata, keememej bwe kien eo m̧okta im eļap ej n̄an iakwe Anij kōn aolepān būruōm̧, am̧, ļōmn̄ak, im kajoor.¹² Aolepān men ko jej kōm̧m̧ani ej n̄an iakwe eo An im eo Nejin. Ilo ad kaddōk iakwe eo ad n̄an Er ilo aō kōjparok kien ko Aer, jon̄an ad maron̄ n̄an iakwe kōj make im n̄an iakwe ro jet enaaj ļapļo̧k. Jenaaj jino jerbal n̄an baam̧le ko ad, ro m̧ōttad, im ro riturur kōnke jenaaj lale er āinwōt an Rilo̧mo̧o̧r eo lale er—āinwōt m̧aan im kōrā ro nejin Anij.¹³

Kein karuo, jar n̄an Jemed ilo etan Jisōs Kraist aolep raan, aolep raan, aolep raan.¹⁴ Ej ilo jar jej en̄jake iakwe eo an Anij im kwaļo̧k iakwe eo ad n̄an E. Ej ilo jar jej kwaļo̧k ad kam̧m̧oolol im kajjitōk kōn kajoor im peran n̄an leļo̧k aolepān ad n̄an Anij im n̄an tōl im jiniet ilo aolep men.

Ij rōjan kom̧ n̄an “jar n̄an Jemād kōn aolep kajoor in bōro, bwe kom̧in maron̄ obrak kōn iakwe , … bwe kom̧in maron̄ m̧aan [im kōrā ro] nejin Anij; bwe n̄e Enaaj waļo̧k jenaaj āinwōt E.”¹⁵

Kein kajilu, riit im ekkatak jān Bok in Mormon aolep raan, aolep raan, aolep raan.¹⁶ Riit ko aō ilo Bok in Mormon rej em̧m̧anļo̧k eļan̄n̄e ewōr kajjitōk ilo kōļmenļo̧kjeņ e aō. Ilo ad riit kōn juon kajjitōk, jemarōn bōk revelesōn im kile bwe Rikanaan Josep Smith ekar kōnono m̧ool ke ekar kwaļo̧k, “Bok in Mormon [ej] bok eo ejimwe tata jān bok otemjej ioon laļ in, … im m̧aan [ak kōrā] enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet.”¹⁷ Bok in Mormon epād naan ko an Kraist im ej jipan̄ kōj keememej wōn kōj.

Āliktata, lukkuun jar ilo am̧ bōk kwojkwoj eo aolep wiik, aolep wiik, aolep wiik. Ej kōn bujen ko an priesthood, ekoba kwojkwoj eo, bwe kajoor eo an mour erreo ej alikkar ilo mour ko ad.¹⁸ Elder David A. Bednar ekar katakin: “Kain̄i eo an kwojkwoj ej juon kūr eo ekwojarjar n̄an eo ej lukkuun ukweļo̧k ilo m̧ool n̄an kōkāāl mour in jetōb. Jerbal in bōk m̧ōttan kwojkwoj eo, ilo im jān e, ejjab karreoik kōj jān jerawiwi ko. Ak ilo ad lukkuun kōppopo im bōk koņaad ilo kain̄i in ekwojarjar kōn bōro erup im juon jetōb ettā, innām kallim̧ur in ej bwe jemaron̄ iien otemjej bōk iood Jetōb eo an Irooj.”¹⁹

Ilo ad lukkuun etta n̄an bok kwojkwoj eo, jej keememej en̄taan eo An ilo jikin kallip Gethsemane ekwojarjar im en̄taan eo An ilo debwāāl. Jej kwaļo̧k ad kam̧m̧oolol n̄an Jemed kōn an kar jilkintok Nejin eo Emake Wōt, ad Ripinmuur, im kwaļo̧k an ikdeleel n̄an kōjparok kien ko An im keememej E iien otemjej.²⁰ Ewōr juon meram ej itok ippān kwojkwoj eo ej n̄an—kwe make, ekajoor, im emenin aikuj.

Ro mōtta, ij kallim̧ur bwe eļan̄n̄e jenaaj kajeon̄ n̄an iakwe Anij kōn aolepān būruwōd, jar ilo etan Jisōs Kraist, ekkatak jān Bok in Mormon, im lukkuun jar ilo ad bōk kwojkwoj eo, enaaj wōr ad maron̄, ippān kajoor eo an Irooj, n̄an anjo̧ ioon jerbal in riab ko an Rijum̧ae eo, n̄an kadikļo̧k kamad ko eo ej kamōjno̧ikļo̧k maron̄ eo ad ekwojarjar, im n̄an anjo̧ ioon kabbweer ko rej kaapdik ad en̄jake jon̄an iakwe eo an Jemedwōj Ilan̄ im eo Nejin. Jenaaj itok n̄an lukkuun meļeļe wōn kōj āinwōt m̧aan im kōrā ro nejin Anij.

Ro jeiū im jatū, ij kwaļo̧k n̄an kom̧ aō iakwe im kwaļo̧k aō kam̧ool bwe ijeļā Jemedwōj Ilan̄ ej mour im Jisōs ej RiKraist eo. Ij iakwe Er. Kabun̄ eo an Jisōs Kraist im Armej ro Rekwojarjar ilo Raan Ko Āliktata ej aelōn̄ in kiin̄ eo an Anij ioon laļ in. We have a divine appointment to gather Israel and prepare the world for the Second Coming of the Messiah. Ilo etan Jisōs Kraist, amen.

Kakeememej ko

1. “Baam̧le Eo: Juon Naan in Kean̄ n̄an Laļ in,” Liaona, Māe 2017, 145.

2. Katak im Bujen Ko 138:53; bar lale Katak im Bujen Ko 138:54-56.

3. Russell M. Nelson, “Stand as True Millennials,” Liaona, Okt. 2016, 48.

4. Moses 1:4, 6.

5. Moses 1:12.

6. Moses 1:20; lale barāinwōt Moses 1:16–19, 21.

7. Ronald A. Rasband, “N̄e Kwō Ab Meļo̧kļo̧k,” Liaona, Nob. 2016, 115.

8. Lale Becky Craven, “Tiljek ņae Jatiljek,” Liaona, Māe 2019, 9–11.

9. Lale Jon 14:26

10. Jerbal eo ad ekwojarjar ej n̄an tōprak n̄an bōk mour indeeo jekdoon n̄e juon ej bōk juon tōprak me laļ in ej watōke āinwot juon tōprak in kijejeto. Jetōb Kwojarjar ej kakeememej kōj kōn jerbal eo ad ekwojarjar im kōn wōn eo jemarōn erom̧ ilo ad pād wot ilo iaļan bujen eo im anjo̧, kōn kajoor eo an Irooj, jān kapo ko an Rijum̧ae eo.

11. Jon 14:27; eoon eo eaorōk kar kabaiktok.

12. Lale Matu 22:37–38.

13. Lale Jon 3:16; 1 Jon 4:19; Mosaia 2:17.

14. Lale 3 Nipai 18: 18–21.

15. Moronai 7:48; eoon eo eaorōk kar kobaiktok.

16. Lale Kevin W. Pearson, “Pād Iturin Wōjke eo,” Liaona, Māe 2015, 114–16.

17. Kadkad in Bok in Mormon.

18. Lale Katak im Bujen Ko 84:20–21.

19. David A. Bednar, “Always Retain a Remission of Your Sins,” Liaona, Māe 2016, 61–62.

20. Lale Moronai 4:2–3; 5:1–2; Katak im Bujen Ko 20:76–79. Jouj kemeemej bwe jej mour ilo iien eo eļap ad aikuji Jetōb eo An n̄an pād ippād iien otemjej.