Kwojarjar im Karōk in M̧ōņōņō eo
M̧ōņōņō eo eļap ej itok jān kwojarjar eo eļap an juon make.
Ro jeiū im jatū jitōn bōro, iaar jar kōn kajoor eo n̄an jipan̄ kom̧ ilo kappukot m̧ōņōņō eo ippāmi make. Jet remaron̄ dedeļo̧k aer en̄jake eļap m̧ōņōņō, aaet em̧ool ejjeļo̧k juon emaron̄ kowaan leļo̧k in n̄an m̧ōņōņō eļapļo̧k. Jabdewōt emaron̄ kar kijoroor n̄an bōk juon m̧ōņōņō aitok kitien ejjeļo̧k kajjitōk kake.
En̄in ej ta eo Jemedwōj Ilan̄, Nejin Jitōn bōro, Jisōs Kraist; im Jetōb Kwojarjar eo raar leļo̧k n̄an aolep ajri in jetōb ro nejin Jemedwōj Ilan̄ ro rej mour kiiō, renaaj mour, ak em̧ool rekar mour ilo laļ in. Menin letok eo ej jet iien ņa etan karōk in m̧ōņōņō. Kar ņa etan menin jān rikanaan Alma ke ekar katakin ļeo nejin, eo ekar libobo ilo en̄taan kōn jerawiwi. Alma ekar jeļā bwe jerawiwi ejjamin kar m̧ōņōņō n̄an ļeo nejin—ak n̄an ajri ro nejin Jemedwōj Ilan̄.1
Eaar katakin ļeo nejin bwe ļapļo̧k ilo kwojarjar eaar iaļ eo de eo n̄an m̧ōņōņō. Eaar kalikkare bwe kwojarjar eo eļapļo̧k kar kōm̧m̧an bwe en pidodo kōn Pinmuur eo an Jisōs Kraist n̄an karreoik im koweppān kōj.2 Kōn wōt tōmak ilo Jisōs Kraist, wōnm̧aanļo̧k wōt ilo ukweļo̧k, im kōjparok bujen ko rej kōm̧m̧an bwe jen maron̄ bōk m̧ōņōņō aitok kitien ilo ad jan̄nuwaad n̄an en̄jake im dāpij wōt.
Jar eo aō n̄an rainin ej bwe in maron̄ jipan̄ kom̧ meļeļe bwe m̧ōņōņō eo eļapļo̧k ej itok jān kwojarjar eo eļapļo̧k an juon make bwe kom̧in naaj jerbal ekkar n̄an tōmak eo. Innām inaaj kwaļo̧k ta eo ijeļā kōn n̄a make kōn ta eo jemaron̄ kōm̧m̧ane n̄an karbōb n̄an menin letok eo kōn eļapļo̧k kwojarjar.
Jeje ko rekwojarjar rej katakin kōj bwe ilubwilijin men ko jet, jemaron̄ kōkwojarjar ak erom̧ eļapļo̧k kwojarjar n̄e jej kōjerbal tōmak ilo Kraist,3 kwaļo̧k ad pokake,4 ukweļo̧k,5 kaarmejete kōn E,6 bōk kain̄i ko rekwojarjar, im kōjparok bujen ko ad Ippān.7 Karbōb n̄an menin letok eo an kwojarjar ej aikuji ettā bōro,8 ettā,9 im kijenmej.10
Juon en̄jake kōn kōņaan eļapļo̧k kwojarjar eaar itok n̄an n̄a ilo Salt Lake Tampeļ. Iaar deļo̧n̄ ilo tampeļ ejkab kein kajuon kar jiron̄ eō jidik kōn ta eo n̄an kōtmene. Iaar lo naan ko ilo m̧weo: “Kwojarjar n̄an Irooj” im “M̧weo Im̧ōn Irooj.” Iaar en̄jake juon kōtmene eļap. Bōtaab iaar ļōmņak eļan̄n̄e iaar pojak n̄an deļo̧n̄.
Jinō im jema raar pād im̧aō ke kōm kar deļo̧n̄ļo̧k ilo tampeļ eo. Kar kajjitōk ippām n̄an kwaļo̧k peba in mālim ko am, kam̧oole erreo eo am.
Ro jinō im jema raar jeļā kajjien em̧m̧aan eo ilo jikin deļo̧n̄ eo ro rej wōnm̧aik peba in mālim eo. Kōn menin ekar to jidik aer pād ijo n̄an ekōnono ippān. Iaar etal wōt make n̄an juon jikin eļap ijo aolep men raar erabōōlbōl aer mouj. Iaar reilōn̄ļo̧k n̄an jiļin̄ eo ekanooj uteij itulōn̄ū eaar āinwōt juon mejatoto eo epeļļo̧k. Ilo iien eo, juon im̧we ealikkar eaar itok n̄an eō im kwalok bwe em̧ōj aō kar pād ijeņ m̧okta.
Ak bōtaab, Iaar ron̄ juon ainikien ekanooj mera—ejjab ainikiō make. Erkein naan ko remera kar kōnono kaki: “Kwojjan̄in de kar pād ijin m̧okta. Kwoj keememej juon iien m̧okta jān am̧ kar ļotak. Kwar pād ilo juon jikin ekwojarjar āinwōt in. Kwar en̄jake an Rilo̧mo̧o̧r kar pojak in itok n̄an jikin eo ijo kwaar jutak ie. Im kwaar en̄jake m̧ōņōņō kōnke kwar kijooror in lo E.”
En̄jake jab in ilo Salt Lake Tampeļ eo ekar pād wōt ilo jidik iien. N̄an kiiō ememļo̧kjeņ eo an ej bōktok aenōm̧m̧an, lan̄lōn̄, im m̧ōņōņō eo ejokne.
Ikar ekkatak elōn̄ katak ko ilo raan ņe. Men eo juon ekar bwe Jetōb Kwōjarjar ej kōnono ilo juon ainikien emera im lur. Imaron̄ ron̄ Ainikien n̄e ewōr aenōm̧m̧an in jetōb ilo būruwō. Ej bōktok juon en̄jake in m̧ōņōņō im kam̧ool bwe n̄aij ekwojarjar ļo̧k. Im bwe iien otemjej ej boktōk m̧ōņōņō eo iaar en̄jake ilo iien ko m̧oktata ilo tampeļ eo an Anij.
Kom̧ kar lale ilo mour ko ami make im ilo mour ko an ro jet menin bwilōn̄ eo kōn m̧ōņōņō eo ej itok jān ami eddōkļo̧k ilo kwojarjar, im erom̧ eļapļo̧k āinwōt Rilo̧mo̧o̧r. Ilo wiik ko rej kab jem̧ļo̧kļo̧k, ikar pād ilo turin jikin kiki eo an armej ro me remaron̄ jelm̧ae mej kōn tōmak edipio ilo Rilo̧mo̧o̧r im kōn piktokier rem̧ōņōņō.
Juon iaer ekar juon em̧m̧aan eo ekar jepooļ kōn baam̧le eo an. E im lio pāleen raar bwebwenato ke ļaddik eo nejū im n̄a kar deļo̧n̄ļo̧k. Ikar jeļā kajjier ium̧win elōn̄ iiō ko. Ikar lo Pinmuur eo an Jisōs Kraist ej jerbal ilo mour ko aer im ilo mour ko an ro uwaan baam̧le eo aer.
Erro kar kālet n̄an kabōjrak kein jipan̄ ko an kein taktō ko n̄an kaitokļo̧k an mour. Ekar wōr juon en̄jake elur ke eaar kōnono n̄an kom̧ro. Eaar ettōn̄ dikdik ilo an kar kwaļo̧k kam̧m̧oolol kōn gospel eo im an jeno̧k in karreo ilo e im baam̧le eo ejitōnbōro ippān. Eaar kōnono kōn iiō in jerbal ko an rekam̧ōņōņō ilo tampeļ. Kōn kajjitōk eo an em̧m̧aan in, ļeo nejū ekar kapit bōran kōn oil eo kar kōkwojarjar e. Iaar liāpe kapit eo. Ke iaar liāpe, ekar wōr juon aō en̄jake n̄an ba n̄an e bwe ejjab to enaaj lo an Rilo̧mo̧o̧r, jujelm̧ae.
Iaar kallim̧ur e bwe enaaj kar en̄jake m̧ōņōņō, iakwe, im kōmālim eo an Rilo̧mo̧o̧r. Eaar jouj ilo ettōn̄ dikdik ke kōm kar em̧m̧akūt. Naan ko an āliktata n̄an eō raar “Jiron̄ļo̧k Kathy ij iakwe e.” Lio pāleeō, Kathleen, ium̧win elōn̄ iiō ko ekar kōketak epepen ko an baam̧le eo an n̄an bōk kūr eo an Rilo̧mo̧o̧r n̄an itok n̄an E, kōm̧m̧ani im kōjparok bujen ko rekwojarjar, im kanooj karbōb n̄an m̧ōņōņō eo me ej itok āinwōt juon tōprak kōn kwojarjar eo eļap.
Ekar mej awa ko tokālik. Ilowaan wiik ko ālkin jako eo an, lio pāleen ekar boktok juon menin letok n̄an lio pāleeō im n̄a. Eaar ettōn̄ dikdik ke kōm kar kōnono. Ekar ba ilo an medikdik, “Ikar kōtmene bwe inaaj kar en̄jake būruom̧ōj im ajimakeke. Ikanooj in m̧ōņōņō. Kom̧ro ej ļōmņak ke bwe em̧m̧an?”
Jeļā ewi jon̄an an kar iakwe ļeo pāleen im ekōjkan aerro kar jim̧or itok n̄an jeļā, iakwe, im jerbal n̄an Irooj, iaar jiron̄ e bwe en̄jake ko an kōn m̧ōņōņō raar juon kar menin letok kar kallim̧ur kake kōnke ekar, kōn jerbal in jipan̄ tiljek eo an, ekar kōm̧m̧an an ļapļo̧k an kwojarjar. Kwojarjar eo an eaar kōkarbōb e n̄an m̧ōņōņō eo.
Jet ro rej ron̄jake rainin remaron̄ in ļōmņak: “Etke ijjab en̄jake aenōm̧m̧an im m̧ōņōņō eo kar kallim̧ur kake n̄an ro me rekar tiljek? Ikar tiljek ilo apan̄ ko renana, bōtaab ijjab en̄jake m̧ōņōņō eo.”
Jekdo̧o̧n Rikanaan Josep Smith ak ekar bar jelm̧ae mālijjon̄ in. Ekar jar kōn deeor ke kar kalbuuj e ilo jikin kalbuuj ilo Liberty, Missouri. Ekar tiljek wōt n̄an Irooj. Ekar eddōkļo̧k ilo kwojarjar. Bōtaab ekar en̄jake ke m̧ōņōņō ekar jab itok n̄an e.
Irooj eaar katakin e katak eo kōn kijenmej eo jej aolep naaj aikuji ilo jet iien, im bōlen ilo tōre ko aitok kitier, ilo mālijjon̄ eo ilo mour in. En̄in ej ennaan eo an Irooj n̄an rikanaan eo An etiljek im en̄taan:
“Im eļan̄n̄e renaaj joļo̧k eok ilo ron̄ eo, ak ilo pein riuror ro, im jem̧ļo̧k in mej ej likūt ioom; eļan̄n̄e renaaj joļo̧k eok ilo m̧wilaļ eo; eļan̄n̄e ņo n̄irn̄ir ko rej pepe ņae eok; elan̄n̄e kōto kajoor ko rej erom am rikōjdāt; eļan̄n̄e lan̄ ko rej nijōkļo̧k, im aolep lan̄ im kobban rej koba n̄an pijen iaļ eo; im ilōn̄ in aolep, eļan̄n̄e atlaļ im atlōn̄ ko in hell rej kanooj eļļan̄ ilokam̧, kwōn jeļā, nejū m̧aan, bwe aolep men kein otemjeļo̧k renaaj lewōj n̄an eok imminene, im naaj n̄an em̧manļo̧k eo am.
“Eo Nejin Armej eaar wanlaļļo̧k ium̧wier aolep. Kwe kwo ļapļo̧k jān E ke?
“Kōn menin, pād wōt ilo iaļ eo am̧, im priesthood eo enaaj pād wōt ippam̧; ko aer emōj karōki, re jamin ellā. Raan ko am em̧ōj jeļā kaki, im iiō ko am rej jamin iietļo̧k; kōn menin, jab mijak ta armej emaron̄ kōm̧m̧an, bwe Anij enaaj pād ippam̧ indeeo im indeeo.”11
Eaar ejja katak eo ekobbwā Irooj eaar leļo̧k n̄an Job, eo ekar dibuk māllijon̄ ko reppen tata n̄an kōm̧m̧an bwe Pinmuur eo en kōm̧m̧an an ļapļo̧k an kwojarjar. Jejeļā bwe Job ekar kwojarjar, jān kōmeļeļe eo ewōr ippād kōn e: “Juon em̧m̧aan etan Job ear pād ilo āne in Uz, im armej eo e weeppān im wānōk, im ear mijak Anij im jeorļo̧k jān nana.”12
Innām Job eaar jako m̧weie eo an, baam̧le eo an, im em̧ool ājmour eo an. Kom̧ maron̄ keememej bwe Job ekar pere bwe kwojarjar eo an eļapļo̧k, kar bōke kōn eļapļo̧k kapan̄pan̄, im kar kakōrbōbe n̄an eļapļo̧k m̧ōņōņō. Ekkar n̄an Job ilo lale bwe kwojarjar eo ekar boktok en̄taan.
Bōtaab Irooj ekar leļo̧k n̄an Job ejja katak in kajim̧we eo wōt Eaar leļo̧k n̄an Josep Smith. Eaar kōm̧m̧an bwe Job en lo jekjek eo an ekabwūrom̧ōjm̧ōj kōn mej ko mejān jetōb. Eaar ba:
“Kwōn jutak im pojak kiiō āinwōt juon em̧m̧aan; bwe inaaj kajjitōk ippam̧, im kwōn kwaļo̧k n̄an eō.
“Kwaar pād ia ke Iar likūt foundesōn ko an laļ? Kwōn kwaļo̧k, eļan̄n̄e ewor jeļāļo̧kjeņ ippam̧.
“Wōn ear pepe kōn jon̄ak ko an? Kwō jab jeļā ke? Ak wōn eo ear kanōke juon lain in jon̄e ņa ioon?
“Foundesōn ko em̧ōj kapeni ioon ta? Ak wōn eo ear likūt dekā in kona;
“Ke iju ko in raan raar jim̧or al, im ro nejin Anij otemjej raar lam̧ōj kōn lan̄lōn̄?”13
Innām̧, ālkin an Job kar ukweļo̧k jān an kar ba Anij ekalijekļo̧k, kar kōtļo̧k an Job kar lo mālijjon̄ ko an ilo juon wāween eutiejļo̧k im kwojarjar ļo̧k. Ekar ukweļo̧k.
“Innām Job ear uwaak Irooj im ba,
“I jeļā bwe Kwō maron̄ in kōm̧m̧an men otemjej, im ejjeļo̧k e maron̄ dem̧ake jabdewōt iaan pepe ko Am̧.
“Wōn in ej ņooje pepe im ejjeļo̧k an jeļāļo̧kjeņ? Kōn men in iar kōnono men eo iar jab meļeļe, im men in bwilōn̄ ko i bani, im i jaje kake.
“Ij akweļap bwe kwōn ron̄jake, im Inaaj kōnono: Inaaj kajjitōk ippam̧, im kwōn kwaļo̧k n̄an eō.
“I kar ron̄ kōn kwe kōn wōt lo̧jiln̄iō, imi kiiō meja ej kab lo eok.
“Kōn men in ij make jōjōik eō, im ukeļo̧k ilo bun̄al im bwidej in wūpaaj.”14
Ālkin an Job kar ukweļo̧k im jān an kōm̧m̧ane menin ekar ļapļo̧k an kwojarjar, Irooj eaar kōjeram̧m̧an e eļapļo̧k jān aolep men ko ekar luuji. Bōtaab bōlen kōjeram̧m̧an eo eļap tata n̄an Job ekar ļapļo̧k ilo kwojarjar kōn kapan̄pan̄ im ukweļo̧k. Ekar karbōb n̄an eļapļo̧k m̧ōņōņō ilo raan ko ekar jan̄in de mour ie.
Eļapļo̧k kwojarjar ejjamin naaj itok jān kajjitōk wōt kake. Enaaj itok jān kōm̧m̧ane ta eo ej menin aikuj n̄an an Anij ukōt kōj.
Būreejtōn Russell M. Nelson eaar letok ta eo āinwōt n̄an n̄a kapilōk eo em̧m̧an tata kōn ekōjkan wōnm̧anļo̧k wōt ilo iaļ in bujen eo n̄an kwojarjar eo eļapļo̧k. Eaar ba kajjien iaļ eo ke eaar karreilo̧k:
“En̄jake kajoor in kajoorļo̧k eo an ukweļo̧k aolep raan—jān kōm̧m̧an im maron̄ kōm̧m̧an em̧m̧anļo̧k jidik kajjojo raan.
“N̄e jej kāālet n̄an ukweļo̧k, jej kāālet n̄an oktak! Jej kōtļo̧k an Rilo̧mo̧o̧r eo ukōt kōj n̄an juon nememe eo ekāāl ad make. Jej kāālet n̄an eddōļo̧k ilo jetōb im bōk lan̄lōn̄—lan̄lōn̄ eo jān pinmuur ilo E. N̄e jej kāālet n̄an ukweļo̧k, jej kāālet n̄an erom̧ āinwōt Jisōs Kraist!”
Būreejtōn Nelson eaar etal wōt n̄an kar letok n̄an kōj kōketak in ilo kijejeto ko ad n̄an erom kwojarjarļo̧k: “Irooj ejjab kōtmāne wāppen jān kōj ilo wāween in. … Ak Ej kōtmāne bwe en ļapļo̧k ad erreoļo̧k. Ukweļo̧k aolep iien ej iaļ eo n̄an erreo.”15
Būreejtōn Dallin H. Oaks, ilo juon kōnono ilo juon kweilo̧k eo eļap m̧oktaļo̧k, ekar barāinwōt jipan̄ an ļapļo̧k an alikkar aō lo ekōjkan ad eddōkļo̧k ilo kwojarjar im ekōjkan ad maron̄ jeļā ke jej em̧m̧akūt m̧aanļo̧k n̄an e. Eaar ba: “Ekōjkan ad bōk bwinnin jetōb? Ekōjkan ad bōk jon̄ak eo an kwojarjar ijo jemaron̄ bōk jemjerā eo ejjab jem̧ļo̧k an Jetōb Kwojarjar eo? Ekōjkan ad itok n̄an ļōmņak kōn im etale men ko an laļ in kōn juon kōļmenļo̧kjeņ an indeeo?”16
Uwaak eo an Būreejtōn Oaks ej ijjino kōn eļapļo̧k tōmak ilo Jisōs Kraist āinwōt ad Rilo̧mo̧o̧r, eo ej iakwe. Me ej tōlļo̧k kōj n̄an kappukōt jeorļo̧k bōd aolep raan im n̄an keememej E aolep raan ilo an kōjparok kien ko An. Tōmak eo eļapļo̧k ilo Jisōs Kraist ej itok ilo ad kwokwoj raan otemjej ioon naan eo An.
Al in jar eo “More Holiness Give Me (Eļapļo̧k Kwojarjar Letok N̄an Eō)” ej elmakote juon wāween n̄an jar kōn jipan̄ ilo erom̧ eļapļo̧k kwojarjar. Rijeje eo ej elmakote bwe kwojarjar eo jej kappukōte ej juon menin letok jān Anij eo ej iakwe, kar letok ilo iien ko, ālkin ad kōm̧m̧ane aolep men ko. Kwōkeememej eoon eo āliktata:
Eļapļo̧k erreo letok n̄an eō,
Eļapļo̧k kajoor n̄an anjo̧ ioon,
Eļapļo̧k anemkwoj jān lipijinjin ko an laļ,
Eļapļo̧k ikdeelel n̄an pād kapijuknen.
Eļapļo̧k pojak n̄an aelōn̄ in kiin̄ eo,
Kōļapļo̧k kōjerbal eō,
Eļapļo̧k jeraam̧m̧an im kwojarjar—
Eļapļo̧k, āinwōt e, Rilo̧mo̧o̧r.17
Jekdo̧o̧ņ ta jekjek eo am̧ make, jekdo̧o̧ņ ia eo jemaron̄ pād ie ioon iaļ in bujen eo ad n̄an kapijuknen, kōm̧m̧an bwe jar ko ad kōn eļapļo̧k kwojarjar ren uwaak. Ijeļā bwe ilo an kajjitōk eo ad uwaak, m̧ōņōņō eo ad enaaj ļapļo̧k. Emaron̄ in rūm̧ūj an itok, bōtaab enaaj itok. Ewōr ippa kam̧ool in jān Jemedwōj Ilan̄ eo ej iakwe im Nejin Jitōn Bōro, Jisōs Kraist.
Ij kam̧ool bwe Josep Smith ekar juon rikanaan an Anij, bwe Būreejtōn Russell M. Nelson ej ad rikanaan emour rainin. Anij Jemed ej mour im iakwe kōj. Ekōņaan bwe jen ro̧o̧l n̄an kapijuknen Ippān ilo baam̧le ko. Ad Rilo̧mo̧o̧r eo ej iakwe ej kajjitōk ippād n̄an ļoor E ilo iaļ eo ad n̄an ijōņ. Em̧ōj Aer kar kōpooj iaļ eo. Ilo et eo ekwojarjar etan Jisōs Kraist, amen.