Maron̄ ilo Jetōb
Āinwōt rikaļoor ro An Jisōs Kraist rem̧ool, komaron̄ bōk ellowetak im revelesōn, ko me rejejjet n̄an kien ko An, me kar lewaj n̄an eok.
Ke ikar ro̧o̧l jān juon camp an Jiron̄ ro summer eo kiiō, juon jiron̄ em̧m̧an ekar jibwe tok juon peba. Ilowaan peba eo, ekar kajjitōk, “Elmen aō jeļā n̄e Anij ej kajjieon̄ in ba juon men n̄an n̄a?” Ij iakwe kajjitōk in an. Jetōb ko ad rej on̄ kake kōtaan eo ad ippān m̧weo im̧ōd ilan̄. Jekōņaan bwe jān en̄jake ke rej aikuji kōj im ewōr tokjād. Bōtaab jet iien epen ad kwaļo̧k ļōmņak ko ad make im im̧we ko an Jetōb. Rikanaan ro, jem̧aan im raan kein, emōj aer katakin bwe eļan̄n̄e juon men ej “karuwainene im n̄an kōm̧m̧an em̧m̧an, ej itok jān Kraist.”1
Būreejtōn Russell M. Nelson ekar letok juon karuwainene ekajoor im pidodo: “Ro jeiū im jatū rejitōn bōro, ij akweļap ippemi n̄an kōļapļo̧k maron̄ in jetōb n̄an bōk revelesōn. … Kālet n̄an kōm̧m̧ane jerbal eo ekwojarjar emenin aikuj lan̄lōn̄ kōn menin letok eo an Jetōb Kwojarjar im eo̧ron̄ ainikien Jetōb eo emakijkijļo̧k im alikkarļo̧k.”2
Ej aō ikdeelel ilo jibbon̄ in rainin n̄an kōnono n̄an eok jān būruō kōn emān wāween ko n̄an kōlļapļo̧k maron̄ in jetōb eo am̧ n̄an bōk revelesōn.
1. Lukkuun ļōmņak n̄an kōm̧m̧ane juon Iien im Jikin n̄an Ron̄ Ainikien Anij.
Ilo am̧ kōjerbale anemkwoj in kālet eo am̧ n̄an leļo̧k aolep iien ko am̧ kajjojo raan n̄an epaakeļo̧k ainikien Anij, eļaptata ilo Bok in Mormon, iien otemjej Ainikien enaaj alikkar ļo̧k im ļapļo̧k am̧ jiniete.
N̄an keidi, kam̧ad ko im kawaron̄ron̄ ko rej kobrak laļ in im m̧oko imōd im mour ko ad emaron̄ kōm̧m̧an bwe en pen ad ron̄ Ainikien. Kein kam̧ad kein remaron̄ jelōt kōlmenļo̧kjeņ ko ad im būruwōd bwe en ejjeļo̧k jikin n̄an unoojdikdik eo an Jetōb Kwojarjar.
Rikanaan Josep Smith ekar katakin bwe Anij ekkā an kwaļo̧k E make “n̄an ro kajjojo ilo ittiņo̧, ilo ijoko jikieer; ilo āne jamden ko ak meļaaj, im bwe ilo m̧ool ejjeļo̧k kawaron̄ron̄ ak kabūnōnō.”3
Setan ekōņaan kajepel kōj jān ainikien Anij ilo an bōbraeik kōj jān ijoko ejjeļo̧k keroro ie. N̄e Anij ej kōnono ilo ainikien lur, ainikien edik, kwe im n̄a jej aikuj epaakļo̧k n̄an ron̄ Ainikien. Baj ļōmņak kake ta eo enaaj waļo̧k eļan̄n̄e jān kar ekkeijelļo̧k wōt ilo ilan̄ āinwōt ad ekkeijelļo̧k wōt ilo Wi-Fi eo! Kālet juon iien im juon jikin im ron̄jake ainikien Anij kajjojo raan. Im kōjparok karōk in ekwojarjar ilo jejjetin, bwe kwon lukkuun pedped wōt ie.
2. Jerbal ilo Am̧ Jab To̧rto̧rem̧aanļo̧k
N̄e jej bōk im̧we ko im jerbal kōn m̧ool in bōro, Irooj emaron̄ kōjerbal eok. N̄e eļapļo̧k am̧ jerbal, eļapļo̧k am̧ kile ainikien Jetōb eo. Enaaj ļapļo̧k am kile tōl eo an Anij im bwe E enaaj “kōtļo̧k … n̄an kwaļo̧k kōļmenļo̧kjeņ eo An im ankilaan.”4 N̄e kwoj to̧rto̧rem̧aanļo̧k, kwonaaj meļo̧kļo̧k im̧we eo ak rūmūji iien eo n̄an jipan̄ juon armej n̄an Anij.
3. Bōke Jerbal eo Am̧ jān Irooj.
Jar eo me Jemedwōj Ilan̄ ekkein kijorror in uwaake ej kajjitōk eo ad bwe en tōl kōj n̄an juon armej eo ej aikuj jipan̄ eo ad. Būreejtōn Henry B. Eyring ekar katakin kōj n̄an kappukot revelesōn ko ilo ad kajjitōk ippān Anij wōn eo jemaron̄ jipan̄e n̄an E. “N̄e kwoj kajjitōk kain kajjitōk rōt in, Jetōb Kwojarjar enaaj iwōj im konaaj en̄jake jim̧we eo kōn ta ko kwoj aikuj kōm̧m̧ani n̄an ro jet. N̄e konaaj etal im kōm̧m̧ane men kein, kōj pād ilo jerbal eo an Irooj, im n̄e kwoj pād ilo jerbal in an Irooj, kwoj mālim n̄an bōk menin letok in an Jetōb Kwojarjar.”5
Komaron̄ jar im kajjitōk ippān Irooj kōn juon jerbal. Ilo am̧ kōm̧m̧ane men in, Emaron̄ kōjerbal kapāāl ko am̧ n̄an kamōj jerbal eo An eļap.
Lōlļap eo jimmaō, Fritz Hjalmar Lundgre, kar itok jān Sweden ke ekar jon̄oul ratimjuon an iiō. Ekar itok n̄an Amedka, e make, kōn juon kōban̄ im jiljino iiō in an pād ilo jikuuļ. Ekkar jaje kajin pālle, ekar etal ilo iaļ eo an n̄an Oregon im jerbal ijōn āinwōt juon rijōkjōk wōjke innem tokālik ippān jibū im jinō, ro rekar kobatok ilo Kabun̄ in. Ejjan̄in kar tōl juon ward, ak ekar juon rūkaki in loļo̧k m̧ōko eo etiljek, ekar karo̧o̧l tok elōn̄ļo̧k jān 50 baam̧le ko kajjojo n̄an m̧akūtkūt ko an Kabun̄ in. Ekōjkan an kar kōm̧m̧ane?
Ālkin mej eo an jimma, ikar edede juon an bo̧o̧k in peba im ikar loe juon leta kar je jān juon em̧m̧aan eo ekar bar jepļaaktok n̄an jikin jar kōn wōt iakwe eo an Jimma. Leta eo ej riit āinwōt in “Men eo ettiņo̧ ippān Brother Fritz, ij tōmak, ej pojak aolep iien n̄an kōm̧m̧ane jerbal eo an Jemedwōj Ilan̄.”
Leta in ej jān Brother Wayne Simonis. Jimma ekar loļo̧k e im kar jeļā kajjien ro uwaan baam̧le eo. Ilo iien eo, Jimma ekar ba n̄an er bwe rekar aikuji er im kar karuwainene er n̄an itok n̄an jikin jar. Bōtaab ilo Jabōt eo, Brother Simonis ekar ilbok kōn juon apan̄—ekar jab kamōj bōro̧o̧j in m̧weo imōn, im en kar wōt ilo wiik eo. Ekar kālet bwe en kar etal im jar, idik pein Jimma, im kaju ro̧o̧l n̄an m̧weo imōn n̄an kamōj bōro̧o̧j eo. Baam̧le eo rekar maron̄ pād ilo iien kwojkwoj eo ijeļo̧kin e.
Pepe eo an en kar kōm̧m̧ane jidik jidik m̧ae, ej ron̄ jān ioon bōro̧o̧j eo, juon armej taļļōn̄ ilo jikinwe eo. Ilo naan ko an: “Ke ikar reilōn̄ļo̧k, … jutak ilo lōn̄ in jikinwe eo kar Brother Fritz. Ekar lukkun ļap an ettōn̄ dikdik. M̧oktata, ikar jook im kar en̄jake ke āinwōt n̄a juon ajri eo ekar ko jān jikin jikuuļ. Innem … ikar illu. [Ak Brother Fritz ekar] utiki kopā eo an im katotoik ilo jikinwe eo. Ilo an kar lelōn̄ļo̧k pein jōōt mouj eo an, ekar reitok n̄an n̄a im ba, ‘Brother Simonis, ewōr ke am̧ bar am̧a? Jerbal in ekanooj in aorōk n̄an kwe bwe koban kar etal jān baam̧le eo am̧, im n̄e eaorōk, ikōnaan jiban̄.’ Ke iaar kalimjōk mejen, ikar loe jouj im iakwe eo āinwōt an Kraist. Illu eo aō ekar jako. … Ikar door kein jerbal ko aō Jabōt eo im ļoore eo m̧ōtta em̧m̧an ilo jikinwe eo laļļo̧k im ro̧o̧l n̄an imōnjar eo.”
Jimma ekar bōk jerbal in jān Irooj, im ejeļā ke ej aikuj in kar pukot siip ko rejako. Āinwōt an kar ļōm̧aro emān kotake lōn̄ļo̧k eo m̧ōttaer eo ekar kā ilo bōro̧o̧j eo im kōtļo̧k laļļo̧k bwe Jisōs Kraist en kōmour e,6 āinwōt jerbal eo an Jimma ekar bōk e n̄an lōn̄ in bōro̧o̧j eo. Irooj ej jilkinļo̧k revelesōn n̄an ro rej kappukot n̄an jipan̄ ro jet.
4. Tōmak im Lōke
Ejjab to, ikar riit jen jeje ko rekwojarjar kōn juon mijenede em̧m̧an ekar bōk jerbal eo an jān Irooj. Aron ekar katakin kiin̄ eo an RiLeman ro, ro rekar ļo̧kjenaer etke Brother eo an Ammōn ekar jab bar itok n̄an katakin e. “Im Aron eba n̄an kiin̄ eo: Lo, Jetōb eo an Irooj eaar kūr e ilo bar juon iaļ.”7
Jetōb eo ekar kōnono ilo būruō: kajjojo iaad eoktak mijen ko jej kōm̧m̧ani, im jet iien Jetōb emaron̄ kūr kōj ilo “bar juon ial.” Elōn̄ wāween ko n̄an kalōk aelōn̄ eo an Anij āinwōt kōm̧m̧ani bujen ko, rikaļoor an Kraist ro rej kōjparoki bujen ko. Āinwōt rikaļoor ro An rem̧ool, komaron̄ bōk ellowetak im revelesōn, rejejjet n̄an kien ko An, me kar lewaj n̄an eok. Ewōr am̧ mijen ko reoktak im jerbal n̄an kōm̧m̧ani im naaj lewaj n̄an eok tōl ko reoktak n̄an kakūrm̧ooli.
Nipai, brother eo an Jared, im barāinwōt Moses aolepāer ekar aikuj kijoone ļomalo eļap—im kajjojo iaer ekar oktak aer kōm̧m̧ane. Nipai ekar kōm̧m̧ane “aļaļ kein aļaļ in wa eo.”8 Brother eo an Jared ekar ekkal baaj ko me rekar “kōnke rekar āinwōt juon jāpe.”9 Im Moses eka “etal ioon āne e m̧ōrā eoļōpan lo̧jet.”10
Er kajjojo kar bōk tōl n̄an iaļ ko aer make, kar leļo̧k n̄an er, im kajjojo rekar lōke im kōm̧m̧ane. Irooj ej lale ro rej pokake im, ilo naan ko an Nipai, naaj “kōpooj juon iaļ [n̄an kōj] n̄an kōtōprak men eo Ej kean̄.”11 Keememej bwe Nipai ej ba, “juon ial”—ejjab “ial eo.”
Jej ke rūmuji ak joļo̧ke juon ad make jerbal jān Irooj kōnke emōj An kōpooj “juon ial” oktak jān iaļ eo jekar kōtmene?
Jimma kar tōl e n̄an juon jikin ejaje kake—kōn kopā, ilōn̄in juon bōro̧o̧j, ilo juon Jabōt. Lōke Anij n̄an tōl eok, mekarta n̄e iaļ eo enaaj oktak jān ta eo kwaar kōņaan ak ej oktak jān ro jet.
Armej ro Rekwojarjar ilo Raan Ko Āliktata rej itok ilo elōn̄ annan̄, dettan, ak “aolep rej āinwōt juon n̄an Anij”—“kilmeej im mouj, riļo̧kjak im rianemkwōj, m̧aan im kōrā,” make iaam im rim̧are, m̧weie im jarmōļ, dik im ritto, ro eto aer membōr im ro rej kab oktaktok.12 Jekdoon wōn kwe ak ta eo kwoj ioone, kwoj ruwainene n̄an tabōl eo an Irooj.13
Ilo am̧ kappukot im kōm̧m̧ane ankilaan Jemed rej men ko kwoj kōm̧m̧ani ilo kajjojo raan, konaaj, aaet, kar tōl n̄an oktak im ukweļo̧k.
Būrokōraam eo ekāāl an Kabun̄ in n̄an ajri im jodikdik ro rej ekkal ioon pedped in ekkatak n̄an kappukot revelesōn, n̄an jelā ta eo Irooj ekōņaan bwe jān kōm̧m̧ane, innem ļoor tōl eo. Kajjojo iaad, jekdoon iiō ta ak ta eo ej kōttōpare, emarōn kakkōt n̄an kappukot, bōke, im jerbale. Ilo am̧ ļoore wāween in em̧ōj karōke ilo raan kein ad, konaaj epaake Jisōs Kraist—iakwe eo An, meram eo An, tōl eo An, aenōm̧m̧an eo An, im kōmour eo An im kajoor n̄an kōmaron̄. Im enaaj ļapļo̧k maron̄ in jetōb eo am̧ n̄an erom̧ juon kein jerbal ilo Pein kajjojo raan ilo am̧ kōttōprak jerbal eo An. Ilo etan Jisōs Kraist, Amen.