Un̄n̄ūr in Kōmour an Rilo̧mo̧o̧r
Ilo ad itok n̄an E, Anij enaaj itok im lo̧mo̧o̧ren kōj, men̄e n̄an kōmour kōj ak n̄an letok n̄an kōj kajoor n̄an jelm̧ae jabdewōt jekjek ko jepād ie.
Tarin 2,000 iiō ko rem̧ootļo̧k, Rilo̧mo̧o̧r ekar wanlaļtak jān toļ eo ālkin an kar katakin katak ko an im katak ko jet an gospel eo. Ke E ekar etetal, Ekar itok juon em̧m̧aan n̄an ippān eo enan̄inmej in lōba. Em̧m̧aan eo ekar kautiej im wūjlepļo̧k ilo an kar bukwelōlō im̧aan Kraist, kappukot kōmour jān an en̄taan. Kajjitōk eo an eļam waan: “Irooj, eļan̄n̄e Kwō kōņaan, Kwōj maron̄ karreo eō.”
Innem Rilo̧mo̧o̧r ekar erļo̧ke pā ko Pein im, un̄n̄ūr e, im ba, “I kōņaan, kwōn erreo.”1
Jej ekkatak ijin bwe Rilo̧mo̧o̧r eo aolep iien ekōņaan kōjeraam̧m̧an kōj. Jet kōjeram̧m̧an remaron̄ kajju itok, ko jet emaron̄ bōk iien, im jet remaron̄ itok ālkin mour in, ak kōjeram̧m̧an ko renaaj itok ilo iien ko rejejjet.
Eiten āinwōt ri lōba eo, jemaron̄ lo kajoor im kaeņōm̧m̧an ilo mour in ilo ad bōk Ankilaan im jeļā bwe E ekōņaan kōjeram̧m̧an kōj. Jemaron̄ lo kajoor n̄an jelm̧ae jabdewōt melejon̄, n̄an anjo jān kapo ko, im n̄an meļeļe im kijenmej ilo jekjek ko reppen jej pād ie. Em̧ool, ilo juon iaan tōre ko eddo tata ilo mour eo An, kajoor eo an Rilo̧mo̧o̧r n̄an niknik ekar lukkuun m̧wūlaļ ke E ekar ba n̄an Jemān, “En ankil Am̧.”2
Ri lōba eo ekar jab kajjitōk ilo an ļōmņak wōt kōn e make ak wāween kakijoroor. Naan ko An rej kwaļo̧k juon m̧wil ettā, kōn kōtmene ko reutiej ak barāinwōt kōn juon ikdeleel em̧ool bwe ankilaan Rilo̧mo̧o̧r en dedeļo̧k. En̄in ej juon waanjon̄ak in m̧wil eo me jej aikuj itok n̄an Kraist. Jemaron̄ itok n̄an Kraist kōn alikkar bwe ikdeleel eo An ej kiiō im naaj aolep iien em̧m̧an n̄an mour ko ad ilo mour in im n̄an indeeo. Ewōr juon An kōļmenļo̧kjeņ indeeo me ejjeļo̧k ippād. Jej aikuj itok n̄an Kraist kōn juon bōro em̧ool bwe ankilaad ej aikuj jejjet ilo ankilaan Jemān, āinwōt kar E.3 Menin enaaj kōpooj kōj n̄an mour indeeo.
Epen n̄an pijaikļo̧k en̄taan in ānbwin im kōļmenļo̧kjeņ me ri lōba ro rekar en̄jake ro me rekar itok n̄an ippān Rilo̧mo̧o̧r. Lōba ejelōt eke im kil, kōm̧m̧an bwe en nana kilier im nana ājmour eo aer. Im eļaptata, ej kōm̧m̧an bwe ren jo̧o̧l jab maron̄ iiaio ippān armej. Juon armej eo ewōr ippān lōba ej aikuj etal jān ro rejitōnbōro ippān im jokwe ettoļo̧k jān jukjuk in pād eo. Ri lōba ro kar watōke er rettoon, jim̧or ilo ānbwin im jetōb. Kōn un in, kien eo an Moses ekar menin aikuj bwe rilōba ro ren kōņak nuknuk ko repotaktak im kar kūr er, “Ettoon!” n̄e rej etetal.4 Rilōba ro renan̄inmej im rejitōn bōro rekar āliktata jokwe ilo m̧ōko renana ak ilo lūb ko.5 Ejjab pen n̄an pijaikļo̧k ke ri lōba ro rekar kepaakeļo̧k Rilo̧mo̧o̧r rekar en̄taan ilo ānbwin im kōļmenļo̧kjeņ.
Jet iien—ilo bar juon wāween—jej barāinwōt en̄jake en̄taan, men̄e kōn kōm̧m̧an ko ad make ak kōn ro jet, kōn jekjek ko me jemaron̄ ak jemaron̄ jab kantōroli. Ilo iien rōt kein, jemaron̄ likūt ankilaad ilubūden Pein.
Jet iiō rem̧ootļo̧k, Zulma—kōrā eo pāleeō, eo rejeta, eo m̧ōtta em̧m̧antata—ekar ron̄ jet enaan ko reppen ruo wiik m̧okta jān iien m̧are eo an juon iaan ro nejim. Ekar wōr juon tumo̧r ilo lojiln̄ūn im ekar m̧ōkaj an eddōkļo̧k. Turin mejān ekar jino ebbōj, im e ekar aikuj ilo iien eo em̧ōkaj bwe en mwijmwij. Elōn̄ ļōmņak ko rekar jiktok ilo kōļmenļo̧kjeņ eo an im ekar eddo buruōn. Tumo̧r eo ekar ke kauwōtata? Elmen an naaj ānbwinnin ājmour? Enaaj ke mej turin mejān? Ewi jon̄an an naaj metak? Naaj ke jorrāān turin mejān? Naaj ke jako tumor eo n̄e rejoļo̧ke? Enaaj ke maron̄ pād ilo iien m̧are eo an ļaddik eo nejim? Ilo an babu ilo ruum in m̧wijm̧wij eo, en̄taan ilo ānbwin im kōļmenļo̧kjeņ.
Ilo iien eo elukkun aorōk tata, Jetōb ekar unoojdikdik n̄an e bwen maron̄ bōk ankilaan Jemān. Innem ekar kāālōt n̄an likūt an lōke ilo Anij. Ekar lukkuun en̄jake bwe ta eo enaaj waļo̧k, Ankilaan enaaj em̧m̧an tata n̄an e. Ejjab to ekar kiki ālkin kar wā in kakiki eo.
Tokālik, ekar je juon boem̧ ilo jōōnōļ eo an: “Ilo tābōļ in mwijmwij eo Ikar bun̄ pedo im̧aan Mejān, im leļo̧k n̄an Ankilaan, im ikar kiki. Ikar jeļā bwe ij aikuj lōke E, jeļā bwe ejjeļo̧k men enana emaron̄ itok jān E.”
Ekar lo kajoor im aenōm̧m̧an jān an leļo̧k ankilaan n̄an ankilaan Jemān. Ilo raan eo, Anij ekar lukkuun kōjeram̧m̧an e.
Jabdewōt jekjek ko jepād ie, jemaron̄ kōjerbal tōmak ko ad n̄an itok n̄an Kraist im lo juon Anij jemaron̄ lōke. Juon iaan ajri ro nejū, Gabriel ekar je:
Ekkar n̄an rikanaan, turin mejān emeramram āinwōt al
im kooļān bōran re mouj āinwōt sno.
im Ainikien ej āinwōt ainikien dān ko re ļap,
im n̄an E armej ejej tokjān. …
N̄a juon eo iobrak kōn eddo ilo aō kile bwe bar n̄a ejej tokja.
Innem menin wōt Ij lo iaļa n̄an juon anij eo Imaron̄ lōke.
Innem menin wōt ij lo Anij eo imaron̄ lōke.6
Juon Anij eo jej lōke ej kaperan kōjatdikdik. Jemaron̄ lōke E kōnke Ej iakwe kōj im Ekōņaan ta eo ej em̧m̧an n̄an kōj ilo aolep jekjek.
Rilōba eo ekar kepaakeļo̧k Jisōs kōn kajoor in kōjatdikdik. Laļ in ekar leļo̧k ejjeļo̧k uwaak ko, barāinwōt ejjeļo̧k aenōm̧m̧an. Kōn menin, un̄n̄ūr eo an Rilo̧mo̧o̧r me eļam waan ej āinwōt juon jouj im iakwe ilo aolepān mour in jetōb eo an. Jemaron̄ wōt pijaikļo̧k en̄jake ko rem̧ūlaļ kōn kam̧m̧oolol me ri lōba ro ekar wōr ippāer ilo iien eo Rilo̧mo̧o̧r ekar un̄n̄ūr er eļaptata ke ekar ron̄ naan ko “I kōņaan; kwōn erreo.”
Bwebwenato eo an ej kwaļo̧k bwe “e m̧ōkaj an nan̄inmej in lōba eo jako im ej erreo.”7
Jemaron̄ bar maron̄ en̄jake un̄n̄ūr in pein iakwe im kōmour an Rilo̧mo̧o̧r. Ta lan̄lōn̄, kōjatdikdik, im kam̧m̧oolol ej itok ilo jetōb ko ad ilo ad jeļā bwe E ekōņaan jipan̄ kōj bwe jen erreo! Ilo ad itok n̄an E, Anij enaaj itok im lo̧mo̧o̧ren kōj, men̄e n̄an kōmour kōj ak n̄an letok n̄an kōj kajoor n̄an jelm̧ae jabdewōt jekjek ko jepād ie.
Jekdoon ewi jon̄an, ilo ad bōk Ankilaan—ejjab ad make—enaaj jipan̄ kōj meļeļe kon jekjek ko jepād ie. Ejjeļo̧k men eņ enana emaron̄ itok jān Anij. Ejeļā ta em̧m̧antata n̄an kōj. Bolen E eban kajju joļo̧k eddo ko ad. Jet iien E emaron̄ kōm̧m̧an bwe eddo ko ren meraļo̧k, āinwōt An kar kōm̧m̧ane n̄an Alma im armej ro an.8 Āliktata, kōn bujen ko, eddo ko naaj meraļo̧k,9 emaron̄ ilo mour in ak ilo iien Jerkakpeje eo ekwojarjar.
Juon ikdeleel em̧ool bwe Ankilaan en kūrm̧ool, ippān juon jeļāļo̧kjeņ kōn kadkad eo ekwojarjar an ad RiPinmuur, ej jipan̄ kōj ejaak juon kain tōmak eo me ri lōba eo ekar kwaļo̧k bwe en maron̄ kar erreo. Jisōs Kraist ej juon Anij in iakwe, juon Anij in kōjatdikdik, juon Anij in kōmour, juon Anij eo ekōņaan kōjeram̧m̧an kōj im jipan̄ kōj bwe jen erreo. En̄ ne ta eo E ekar kōņaan m̧okta jān ad itok n̄an laļ in ke Ekar m̧ōņōņō in lo̧mo̧o̧ren kōj ke jekar wōtļo̧k ilo jerawiwi. En̄ ne ta eo E ekar kōņaan ilo Gethsemane ke ekar en̄taan kōn metak ko ban maron̄ kōmeļeļeiki ilo iien en̄taan nan kōļļā wōņeen jerawiwi. En̄ ne ta eo ekōņaan kiiō n̄e E ej akweļap ilo etad im̧aan mejān Jemān.10 Unin an wōnm̧aanļo̧k n̄an kūr: “Kom̧win itok n̄an Ippa, kom̧ otemjej rej jerbal in ban, im Inaaj kakkijeik kom̧.”11
Emaron̄ kōmour kōj im kōketak kōj kōnke E ewōr ippān maron̄ n̄an kōm̧m̧ane. Ekar bōk Ioon make aolep metak ko an ānbwin im jetōb bwe būruōn en maron̄ obrak kōn tūriam̧o bwe En maron̄ jeļā jipan̄ kōj ilo aolep men ko im kōmour im lan̄aj kōj lōn̄ļo̧k.12 Naan ko an Aiseia, ke Abinadai ekar ba, reaibojooj im rekabbakakkak.
“Em̧ool Eaar ineek en̄taan ko ad, im bōk būrom̧ōj ko ad. …
“… Eaar kinejnej kōn bōd ko ad, Ekar mao kōn nana ko ad; kaje eo an adwōj aenōm̧m̧an eaar pād Ioon; im kōn jenkwan den̄den̄ ko An jej ājmour.”13
Ejja katakin in wōt rej bar katakin ilo boem̧ in:
O, Ri Kaamtō in Nazareth,
Bōro in, erub im jab maron̄ kar kōmouri,
Mour in, erub im pedakilkil jon̄an epaake an jako,
O, Kwomaron̄ ke kōmour er, Ri kaamtō en?”
Im kōn An jouj im pein repojak n̄an jipan̄,
Mour eo an make em̧m̧aan em̧ōj āje kōn
Jetōb ko rerub m̧ae rej mour āinwōt
Juon Menin Kōm̧anm̧an eo Ekāāl—“aolep ko rekāāl.”
“Pedakilkil in [m̧ōttan] eo [ilo] heart,
Ikdeleel, niknik, kōjatdikdik, im tōmak.
Ļōme Er bwe ren m̧ōttan eo ewāppen
O, Ri kaamtō in Nazareth!”14
Eļan̄n̄e kwoj en̄jake bwe ilo jabdewōt wāween kwojjab erreo, eļan̄n̄e kwoj en̄jake rub bōro, jouj jeļā bwe komaron̄ bar erreo, kwomaron̄ bar bōk kōmour, kōnke Ej iakwe eok. Lōke bwe ejjeļo̧k men enana emaron̄ itok jān E.
Kōnke E ekar “wanlaļtak ium̧win aolep men ko otemjeļo̧k,”15 Ekar kōm̧m̧an bwe aolep men ren kūrm̧ool bwe men ko rekar jipikpik rekar bar likio ilo mour ko ad, bwe jen bar epaakeļo̧k Anij. Kōn E, men otemjej rej kajim̧we, jim̧or men ko me rej pād ioon laļ in im men ko rej pād ilan̄, kōm̧m̧an “aenōm̧m̧an ilo bōtōktōk in ilo dōbwāāl eo An.”16
Jej aikuj itok n̄an Kraist im kōm̧m̧ane aolep men ko remenin aikuj. Ilo ad kōm̧m̧ani, kōjatdikdik bwe m̧wil ko ad renaaj erom̧ juon m̧wil āinwōt ba: “Irooj, eļan̄n̄e Kwō kōņaan, Kwōj maron̄ karreo eō.” Eļan̄n̄e jej kōm̧m̧an āindein, jemaron̄ bōk kōmour in un̄n̄ur eo an M̧aajta eo, im ainikien jouj ilo Ainikien: “Inaaj; kwō erreo.”
Rilo̧mo̧o̧r ej juon Anij eo jemaron̄ lōke e. E ej Kraist eo, eo ekkapitum, Messaia eo me Ij kam̧ool ilo Etan ekwojarjar, em̧ool Jisōs Kraist, amen.