Rikam̧ool ro, Doulul ko an Priesthood eo an Aron, im Kūlaaj ko an Doulul eo an Jiron̄ ro
Oktak kein jenaaj kiiō kōjjeļļā kaki, jibadbad eo aer ej n̄an jipan̄ likao ro im jiron̄ ro ejaake kōttōbar ko aer make im rekwojarjar.
Ro jeiū im jatū, elukkuun em̧m̧an n̄an pād ippemi bar juon alen ilo kweilo̧k eo eļap. Kar jinoin wiik in, kōjjeļļā ko rekar kōm̧m̧an n̄an ro uwaan Kabun̄ in kōn oktak ko ilo kakien eo ikkijeen wōn ro remaron̄ jerbal āinwōt rikam̧ool ro n̄an kain̄i ko an peptaij im liāp. Ikōņaan kalikkar jilu un ko raorōk.
-
Peptaij ilo etan juon armej eo emej emaron̄ kam̧ool jān juon eo ej kabwijer juon peba in mālim ekāāl n̄an delo̧n̄e tampeļ, ekoba juon peba in mālim eo me ewōr jon̄an kōjerbal.
-
Jabdewōt membōr eo em̧ōj an bōk mennin letok kwojarjar eo im ewōr juon an peba in mālim ekāāl n̄an delo̧n̄e tampeļ emaron̄ jerbal āinwōt juon rikam̧ool n̄an kain̄i in liāp ko, n̄an juon eo emour im n̄an juon eo ej jerbal ilo etan eo emej.
-
Jabdewōt membōr ro rekar peptaij ilo Kabun̄ in remaron̄ jerbal āinwōt juon rikam̧ool n̄an peptaij eo an juon armej emour. Oktak in ej iookļo̧k aolep kōpeptaij ko itulikin tampeļ.
Oktak kein ilo kakien eo rej wāween kōm̧anm̧ane. Katak im Bujen ko me rej iookļo̧k peptaij rejjab oktak. Im rej jokin wōt juon aer wājepdik ilo aolep kain̄i ko. Oktak kein rej aikuj in lukkuun kōļapļo̧k an baam̧le ko bōk koņaer ilo kain̄i kein rekwojarjar.
Ij barāinwōt kōņaan kōnono ippemi ilo iien in n̄an kwaļo̧k kadkad in oktak ko me rej iookļo̧k jodikdik ro ad im ritōl ro aer.
Kwonaaj keememej bwe ikar karuwaineneiki jodikdik ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata n̄an koba ippān jarin tariņae in jodikdik ro an Irooj n̄an bōk koņaer ilo jerbal in eļaptata ioon laļ in rainin—aiintok Israel.1 Ij lewaj kajjitōk in n̄an jodikdik ro ad kōnke er eāinjuon jeļā eo aer ilo pukotļo̧k ro jet im kwaļo̧k ta eo rej tōmak ie ilo juon wāween kareel eo em̧m̧an. Jerbal in aiintok eo ej juon m̧ōttan eo eaorōk n̄an jipan̄ kōpooje laļ in im armej ro ie n̄an Itok eo Kein Karuo an Irooj.
Ilo kajjojo ward, jarin tariņae in jodikdik ro an Irooj ej tōl jān juon bisop, juon rikarejar etiljek an Anij. Eddo eo an jinoin tata im eļap tata ej n̄an kea kōn likao ro im jiron̄ ro an ward eo an. Bisop eo im rikakpilōklōk ro an rej tōl jerbal eo an doulul ko an Priesthood eo an Aron im kūlaaj ko an Doulul eo an Jiron̄ ro.
Oktak kein jenaaj kiiō kōjjeļļā kaki, jibadbad eo aer ej n̄an jipan̄ likao ro im jiron̄ ro ejaake kōttōbar ko aer make im rekwojarjar. Jej barāinwōt kōkajoorļo̧k doulul ko an Priesthood eo an Aron im kūlaaj ko an doulul eo an Jiron̄ ro im leļo̧k jipan̄ n̄an bisop ro im ritōl ro jet rerūtto ilo aer jipan̄ diktak in epepen in.
Elder Quentin L. Cook enaaj kiiō kōnono kōn oktak ko me rejelet likao ro. Im joteenin, ilo m̧wen̄an eo eļap an kweilo̧k eo an kōrā ro, Sister Bonnie H. Cordon, Būreejtōn eo Eutiej an Doulul eo an Jiron̄ ro, enaaj kōnono kōn oktak ko me rejelet jiron̄ ro.
Būreejtōnji eo Kein Kajuon im Jon̄oulruo ro rej ippān doon im rie kijejeto ko n̄an kōkajoorļo̧k jodikdik ro. Eļap ad iakwe er im jar kōn er! Rej “Kōjatdikdik an Israel, ritariņae an Zion, ajri ro ilo raan in kallim̧ur.”2 Jej kwaļo̧k ad ļōke eļap ilo jodikdik ro nejid im ad kam̧m̧oolol kōn er. Ilo et eo ekwojarjar etan Jisōs Kraist, amen.