2019
Oktak Ko n̄an Kōkajoorļo̧k Jodikdik ro
Oktoba 2019

Oktak Ko n̄an Kōkajoorļo̧k Jodikdik Ro

Jān Elder Quentin L. Cook

Jān Doulul eo an Jon̄oulruo Rijilōk ro

Elōn̄ ļo̧k likao im jiron̄ ro renaaj maron̄ jelm̧ae apan̄ im pād wōt ilo iaļan bujen eo kōn kajoor in mijōk in ioon jodikdik ro nejid.

Kom̧m̧ol, Būreejtōn Nelson ejitōnbōro, kōn revelesōn in tōl in ekam̧ōņōņō ilo kautiej n̄an rikam̧ool ro ilo iien peptaij ko im tōl eo em̧ōj am̧ kar kajjitōk bwe n̄a im Sister Cordon kōm en kwaļo̧k n̄an jipan̄ kōkajoorļo̧k jodikdik ro im kōļapļo̧k kwojarjar eo aer make.

M̧okta jān aō kwaļo̧k jet iaan oktak kein, jej kwaļo̧k am kam̧m̧oolol em̧ūlaļ kōn wāween ko rem̧m̧an tata em̧ōj an membōr ro kar eo̧ron̄ n̄an kaļapļo̧k ilo gospel in me em̧ōj an Jepļaaktok im ej wōnm̧aanļo̧k wōt. Āinwōt an Būreejtōn Nelson kar letok ļōmņak in iiō eo ļo̧k, kopojak ke n̄an oktak ko renaaj bōk jikier!1

Kwoj lan̄lōn̄ ilo am̧ ekkatak Itok, Ļōōr Eō ilo m̧weo m̧ōm̧.2 Barāinwōt em̧ōj am̧ kar eo̧ron̄ n̄an oktak ko ilo kabun̄ in. Membōr ro ilo doulul eo an em̧m̧aan ro im sister ro ilo doulul eo an Kōrā Ro rekar ippān doon n̄an kōm̧m̧an jerbal in lo̧mo̧o̧r.3

Ad kam̧m̧oolol etar jān jon̄an.4 Jej lukkuun m̧ōņōņō bwe jodikdik ro nejid rej wōnm̧aanļo̧k wōt ilo aer kajoor im tiljek.

Jodikdik ro nejid rej mour ilo juon tōre eo ekaitoktok limo im barāinwōt epen. Kāālōt ko repojak n̄an er rejjan̄in kar ļap n̄an jon̄an in. Juon waanjon̄ak: smartphone ko raan kein rej kōtļo̧k ad delo̧n̄e meļeļe ko relukkuun aorōk im rekōketak, ekoba menmenbwij ko im jeje ko rekwojarjar. Ak ilo wāween eo juon, epād ie kein kabwebwe ko, jerawiwi, im nana ko me ejeja aer kar waļo̧k m̧okta.

Pija
Laajrak in kein katak ko rej pedped wōt kōn m̧ōko
Pija
M̧akūtkūt an Jodikdik ro

N̄an jipan̄ jodikdik ro nejid kōm̧m̧ani kāālōt ko jān kāālōt kein, Kabun̄ in ekar kōpooj ijjino ko rekwabwilōn̄lōn̄ im remeļeļe. Kein kajuon, curriculum eo em̧ōj kapene im kadepakpak n̄an m̧ōko. Kein karuo, būrokūraam eo an ajri im jodikdik ro ekoba m̧akūtkūt ko me rekaitoktok limo im eddōkļo̧k an juon make kar kwaļo̧k Jabōt eo ļo̧k jān Būreejtōn Russell M Nelson, Būreejtōn M. Russell Ballard, im Opija ro Reutiej. Ijjino eo kein kajilu ej oktak ilo doulul n̄an kōm̧m̧an bwe en ļapļo̧k an bisop ro im ritōl ro jet mije jodikdik ro. Mije in ej aikuj kajoor in jetōb im jipan̄ jodikdik ro nejid erom̧ doulul in ritariņae an jodikdik me Būreejtōn Nelson ekar kajjitōk bwe ren erom̧.

Jon̄ak ko Rekkar

Kijejeto kein, ippān doon kōn men ko em̧ōj kōjeļļāiki jet iiō rem̧ootļo̧k, rejjab jet oktak ko rettoļo̧k. Kajjojo iaan oktak ko ej juon m̧ōttan eo eaorōk ilo juon jon̄ak eo ekkar n̄an kōjeraam̧m̧an Rikwojarjar ro im kōpooj er n̄an ioon Anij.

Juon m̧ōttan jon̄ak eo ej iookļo̧k epepen eo tokālik. Jodikdik ro nejid em̧ōj kajjitōk ippāer n̄an bōk eļapļo̧k eddo ko ilo iiō ko aer ke rej dik wōt—ilo an jab ro jineer im jemāer im ritōl kōm̧m̧ani n̄an er men ko me remaron̄ kōm̧m̧an n̄an er make.5

Kōjeļļā

Rainin jej kōjeļļāik oktak ko ilo doulul ko n̄an jodikdik ro ilo ward im stake ko. Ilo wāween an Būreejtōn kar kōmeļeļeiki, Sister Bonnie H. Cordon enaaj kōmeļeļeik oktak ko n̄an jiron̄ ro ilo jotenin. Juon kōttōpar n̄an oktak ko inaaj kiiō kōmeļeļeik ej n̄an kōkajoorļo̧k ro rej kabwijer Priestood eo an Aron, doulul ko, im doulul an būreejtōnji ro. Oktak kein rej pedped ilo iminene ko ad kōn Katak im Bujen Ko 107:15, eo ej riit, “Bisoprik eo ej būreejtōnji eo an priesthood in an [Aron], im ej kabwijer kii ko ak mālim an ejja in wōt.”

Juon iaan eddo ko ilo jeje ko rekwojarjar an bisop ej n̄an tōl pris ro im n̄an jijet ilo ko̧o̧njeļ ippāer, katakin er eddo ko ilo opiij eo aer.6 N̄an kōmeļeļeikļo̧k, rikakpilōklōk eo kein kajuon ilo bisoprik eo enaaj wōr an eddo ejeņo̧lo̧k n̄an rūkaki ro im rikakpilōklōk eo kein karuo n̄an tikōn ro.

Ilo jejjetin, n̄an pedped kōn revelesōn in ilo Katak im Bujen Ko, būreejtōnji ro ilo doulul an Likao Ro ilo ward ļābōļ enaaj jem̧ļo̧k kitien. Em̧m̧aan rein retiljek em̧ōj aer kōm̧m̧an eļap tōprak, im jej leļo̧k ad kam̧m̧oolol er.

Ej juon ad kōjatdikdik bwe bisoprik ro renaaj leļo̧k alikkar ko reļļapļo̧k im mije eddo ko an priesthood n̄an jiron̄ ro im jipan̄ er ilo eddo ko aer ilo doulul eo aer. Rikapilōk ro an Likao Ro renaaj kūr n̄an jipan̄ būreejtōnji ro ilo doulul eo an Priesthood eo an Aron im bisoprik eo ilo eddo ko aer.7 Jej lōke bwe elōn̄ ļo̧k likao im jiron̄ ro renaaj maron̄ jelm̧ae apan̄ im pād wōt ilo iaļan bujen eo kōn kajoor in mijōk in ioon jodikdik ro nejid.

Ilo jon̄ak eo an Irooj eim̧we, bisop ro ewōr aer eddo n̄an aolep ilo ward eo. Ej kōjeraam̧m̧an ro jinen im jemān jodikdik ro barāinwōt jodikdik ro. Juon bisop ekar lo bwe ilo an kar kapilōk juon likao eo me ej apan̄ kōn pija nana, emaron̄ kar jipan̄ likao in ilo an ukweļo̧k n̄e enkar ejja wāween in wōt jipan̄ ro jinen im jemān an kwaļo̧k iakwe im meļeļe. Kōmour eo an likao in ekar juon kōmour n̄an baam̧le eo an im ekar maron̄ bōk jikin kōn an bisop eo kar jerbal ilo etan aolepān baam̧le eo an. Likao in ej kiiō erom̧ juon rikabwijer eo erreo an Melkesidek Priesthood im ej juon mijenede ej jerbal aolep raan.

Bwebwenato in ej letok ļōmņak in, oktak kein renaaj:

  • Jipan̄ bisop ro im rikakpilōklōk ro aer mije eddo ko aer reaorōk n̄an jodikdik ro im ajri in Būraimere.

  • Likūt kajoor in eddo ko an Piesthood eo an Aron ilo ioļapļap in mour ko an juon likao make im kōttōpar ko.

Oktak kein rej barāinwōt:

  • Kwaļo̧k eddo ko an būreejtōnji ro ilo doulul eo an Priesthood eo an Aron im ļain eo me ej kajju riboot n̄an bisoprik eo.

  • Kōketak ritōl ro rerūtto n̄an jipan̄ im tōl būreejtōji ro ilo doulul eo an Priesthood eo an Aron ilo aer kōļapļo̧k kajoor im mālim ilo opiij eo aer.

Āinwōt kar je, oktak kein rejjab kadikļo̧k eddo ko an bisoprik ro n̄an jiron̄ ro. Āinwōt Būreejtōn Nelson ej kab katakin, “Kein kajuon eddo [an bisop] im aorōk tata ej n̄an kea kōn likao im jiron̄ ro ilo ward eo an.”8

Elmen an naaj bisop ro ad rejitōnbōro im reniknik kakūrm̧ool eddo eo aer? Ilo am̧ keememej ļo̧k, ilo 2018, doulul eo an Priesthood eo an Melkesidek rekar oktak bwe ren epaakeļo̧k aer jerbal ippān Kōrā ro bwe doulul eo an em̧m̧aan ro im kōrā ro ren maron̄, iumin tōl eo an bisop eo, jipan̄ bōk eddo ko reaorōk me rekar m̧oktaļo̧k bōk eļap iien ko an. Eddo kein ekoba jerbal in mijenede im tampeļ im jerbal in menmenbwij ilo ward eo9—barāinwōt eļapļo̧k kōn jerbal in karejar n̄an membōr ro ilo ward eo.

Pija
Eddo ko an juon bisop

Bisop eo ejjab maron̄ kappeik bar juon kōn jet eddo, āinwōt lale jodikdik ro, erom̧ juon riekajet, kea kōn ro rej aikuj, im eddoik jeen im aikuj ko an armej. Men kein, ijoke, reiiet jān ta eo jekar meļeļe kake m̧okta. Āinwōt an Elder Jeffrey R. Holland kar kōmeļeļeļik iiō eo ļo̧k ke rekar kōjeļļāik oktak ko n̄an doulul eo an Melkesidek: “Bisop eo ej, aaet, tōl high priest ilo ward eo. Oktak in ekāāl [an doulul eo an em̧m̧aan im kōrā ro] rej aikuj kōtļo̧k bwe en tōl jerbal ko an Melkesidek im Kōrā ro ilo aer jab aikuj bwe en kōm̧m̧ane jerbal ko an aer kajjojo.10

N̄an waanjon̄ak, juon būreejtōn eo an Doulul eo an Kōrā ro im būreejtōn eo an em̧m̧aan ro, me em̧ōj kar kappe, emaron̄ bōk eddo eo eļapļo̧k ilo kapilōk ippān rūtto ro—āinwōt an juon būreejtōn eo an Doulul eo an Jiron̄ ro ilo an kapilōk jiron̄ ro. Ilo an bisop eo maron̄ erom̧ juon riekajet, ritōl rein jet rej barāinwōt bōk revelesōn jān lan̄ n̄an jipan̄ kōn apan̄ ko me rejjab menin aikuj n̄an erom̧ juon riekajet ak ekitbuuj kakkure ko ilo jabdewōt wāween.11

Ejjab meļeļein juon jiron̄ ejjab maron̄ ak ejjab aikuj kōnono n̄an bisop ak n̄an ro jinen im jemān an. Mije eo aer ej jodikdik ro! Ak ejjab meļeļe bwe juon ritōl an Jiron̄ emaron̄ ņa mejļan aikuj ko rem̧m̧an tata an juon jiron̄ make. Bisoprik ej ellowetak kōn jiron̄ ro im kōn likao ro, ak jej kile kajoor eo me ej itok jān ritōl ro rekajoor, reniknik im retiljek ro me rej iakwe im rej rijipan̄, rejjab bōk eddo ko an būreejtōnji ro an kūlaaj eo, ak rej jipan̄ jodikdik ro tōprak ilo eddo ko aer.

Sister Cordon enaaj kwaļo̧k oktak ko rekam̧ōņōņō n̄an jiron̄ ro jotenin. N̄a, ijokwe, ij kōjeļļā bwe būreejtōn ro an Jiron̄ Ro renaaj kajju riboot n̄an im kapilōk ippān bisop eo ilo ward eo. Kar m̧okta, ijjitōn in emaron̄ kappeik bar juon rikakpilōklōk, ak ej wōnm̧aanļo̧k, jiron̄ ro enaaj kajju juon eddo an juon eo me ej kabwijer kii in tōl ko n̄an ward eo. Būreejtōn eo an Doulul eo an Kōrā ro enaaj wōnm̧aaļo̧k wōt n̄an kajju riboot n̄an bisop eo.12

Ilo ļābōļ in aolep im stake ko, jenaaj wōnm̧aanļo̧k wōt im wōr būreejtōnji ro an Doulul eo an Likao ro. Ilo ļābōļ eo an stake, juon high ko̧o̧njel enaaj būreejtōn n̄an Likao Ro13 im enaaj, ippān high ko̧o̧njel ro me kar kappeik er n̄an Doulul eo an Jiron̄ ro im Būraimere, rej erom̧ m̧ōttan stake Kamiti eo an Priesthood eo an Aron–Doulul eo an Jiron̄ ro. Em̧m̧aan rein renaaj jerbal ippān būreejtōnji eo an Doulul eo an Jiron̄ ro ilo stake ilo kamiti in. Ippān juon rikakpilōklōk n̄an būreejtōn eo an stake āinwōt juon ritōl kamiti in, kamiti in enaaj kōļāpļo̧k aorōk in kōnke elōn̄ būrokūraam ko im m̧akūtkūt ilo ijjino eo ekāāl an Ajri im Jodikdik ro me pād ium̧win ļābōļ eo an stake.

High ko̧o̧njeļ rein, ium̧win tōl eo an būreejtōnji eo an stake, remaron̄ jerbal āinwōt juon kein jipan̄ n̄an bisop im doulul eo an Priesthood eo an Aron ilo juon jekjek einļo̧k juon n̄an jerbal ko me an high ko̧o̧njeļ n̄an doulul eo an elder ro ilo ward eo.

Āinwōt juon jekjek eo einļo̧k wōt, bar juon high ko̧o̧njel enaaj jerbal āinwōt būreejtōn an Jabōt Jikuul ilo stake im, n̄e emenin aikuj, emaron̄ jerbal ilo stake kamiti eo an Priesthood eo an Aron–Doulul eo an Jiron̄ ro.14

Oktak ko reļļapļo̧k ikkijeen doulul ko enaaj ļapļo̧k kōmeļeļeik ilo meļeļe ko me naaj jilkiļo̧k n̄an ritōl ro. Oktak kein ekoba:

  • Juon ko̧o̧njeļ an jodikdik ro ilo ward eo enaaj bōk jikin kweilo̧k eo an kamiti eo an jodikdik ippān bisoprik eo.

  • Naan in “Ippān Doon” enaaj jako im erom̧ “m̧akūtkūt ko an Doulul eo an Jiron̄ ro,” “m̧akūtkūt an doulul eo an Priesthood eo an Aron,” ak “m̧akūtkūt an jodikdik ro” eo enaaj bōk jikin aolep wiik n̄e ekkar.

  • Bajet eo an ward n̄an m̧akūtkūt ko an jodikdik ro aikuj in kejjemooj ikōtaan doulul ko an Likao im Jiron̄ ro ekkar n̄an oran jodikdik ro ilo kajjojo doulul. Juon oran eo ebwe naaj leļo̧k n̄an m̧akūtkūt ko an Būraimere.

  • Ilo ļābōļ ko ilo—ward, stake im aolep—jenaaj kōjerbal naan in “doulul” ijjeļo̧k ad ba naan in “ra dik” Ro me rej tōl Doulul eo Eutiej an Kōrā, Doulul eo an Jiron̄ ro, Doulul eo an Likao ro, Būraimere, im Jabōt Jikuul ro Reutiej renaaj ān̄inn̄in er “Opiija ro Reutiej.” Ro me rej tōl doulul eo ilo ward im stake ļābōļ renaaj ān̄inn̄in er āinwōt “ward opiija ro” im “stake opiija ro.”15

Oktak ko kar kōjeļļāiki rainin remaron̄ jino iien eo wōt branch ko, ward, district, im stake ko repojak ak rej aikuj bōk jikier ilo Jānwōde 1, 2020. Oktak kein, n̄e rej koba ippān doon im koba ippān oktak ko m̧oktaļo̧k, ej bōk jikin juon kijejeto eļap jetōbōn im ellaajrak me ejejjet ippān katak ko n̄an kōjeraam̧m̧an im kōkajoorļo̧k kajjojo em̧m̧aan, kōrā, jodikdik, juon ajri, jipan̄ kajjojo n̄an ļoor waanjon̄ak eo an ad Rilo̧mo̧o̧r, Jisōs Kraist, ilo ad wōnm̧aanļo̧k ilo iaļan bujen in.

Ro jeiū im jatū rejitōn bōro, ij kallim̧ur im kam̧ool bwe oktak kein remeļeļe, ium̧win tōl eo an būreejtōn im rikanaan eo ad eim̧we, Russell M. Nelson, enaaj letok kajoor im kōkajoorļo̧k kajjojo member ilo Kabun̄ in. Jodikdik ro nejid renaaj kōļapļo̧k tōmak eo aer ilo Rilo̧mo̧o̧r, bōk kōjparok jān kapo ko an rikapo eo, im jutak pen im pojak n̄an jelm̧ae apan̄ ko an mour in. Ilo et eo ekwojarjar etan Jisōs Kraist, amen.

Kakeememej ko

  1. Russell M. Nelson, in “Latter-day Saint Prophet, Wife and Apostle Share Insights of Global MinistryNewsroom, Oct. 30, 2018, newsroom.ChurchofJesusChrist.org.

  2. N̄an kōļapļo̧k, em̧ōj am̧ kōm̧m̧ane kijejeto ko rejeņoļo̧k n̄an kajim̧we etan Kabun̄ in me em̧ōj kar katakin jān Būreejtōn Russell M. Nelson im n̄an kakeememej ad Rilo̧mo̧o̧r kōn iakwe im kautiej āinwōt ad kōm̧m̧ane.

  3. “Membōr ro an Kabun̄ eo an Jisōs Kraist kar jilkinļo̧k er ‘n̄an jerbal ilo jikin kallib grep eo An n̄an lo̧mo̧o̧r eo an jetōb ro an armej raņ’ (Katak im Bujen Ko 138:56). Jerbal in lo̧mo̧r in ekoba jerbal in mijenede an membōr, dāpij ro rekāāl, kōkajoorļo̧k membōr ro rejeniknik, jerbal an tampeļ im menmenbwij an baam̧le, im katakin ko̧jpeļ eo. The bishopric directs this work in the ward, assisted by other members of the ward council” (Handbook 2: Administering the Church, 5.0, ChurchofJesusChrist.org).

  4. Ilo eddo ko am āinwōt jet ritōl, kōm ej iakwe membōr ro ilo Kabun̄ eo an Jisōs Kraist im Armej ro Rekwojarjar ilo Raan ko Āliktata Kōm ej ņōbar kom̧ kajjojo, mama ro, baba ro, jodikdik ro, im ajri ro ro me rej etetal ilo iaļan bujen in—im kōm̧m̧ane āindein kōn wūjlepļo̧k im lan̄lōn̄.

  5. Ilo 2019, tikōn ro me 11 iiō dettaer rej jino ajeej kwojkwoj, im jiron̄ ro 11 iiō dettaer im likao ro rej bōk mālim n̄an delo̧n̄e tampeļ eo me elōn̄ jon̄an kōjerbale. Iiō eo ļo̧k, Būreejtōn Nelson ekar kajjitōk bwe jiron̄ ro im kōrā ren erom̧ m̧ōttan jarlepju in jodikdik ro n̄an kakobaik Israel eo ejepeelļo̧k ilo jim̧or jait ko ilo ran̄ōļ eo (lale “Hope of Israel” [worldwide devotional for youth, June 3, 2018], HopeofIsrael.ChurchofJesusChrist.org). Uwaak ekar lukkun ļap.

    Mijenede ro rej jerbal aolep raan rej kiiō ilo wāween ko rem̧m̧an tata ilo iio ko me reddik wōt. Jān Oktoba 6, 2012, likao ro em̧ōj ad maron̄e n̄an jerbal n̄e rej 18 iiō dettaer im jiron̄ ro n̄e rej 19 iiō dettaer.

  6. “Barāinwōt jerbal eo an president eo ioon Priesthood eo an Aron ej n̄an tōl pris [ro], im jijet ilo ko̧o̧njeļ ippāer, n̄an katakin er eddo ko an opij eo aer. … Būreejtōn in ej juon bisop; bwe en̄in ej juon iaan eddo ilo priesthood in.” (Katak im Bujen Ko 107:87–88).

  7. Ritōl ro rerūtto naaj bar ān̄inn̄in er ritijem̧ļo̧k ilo doulul eo an Priesthood eo an Aron n̄an jipan̄ kōn būrokūraam ko im m̧akūtkūt ko im n̄an pād ilo kweilo̧k ko bwe bisoprik ren maron̄ loļo̧k kūlaaj ko an Jiron̄ Ro im m̧akūtkūt ko im jet iien loļo̧k Būrāemāri. Jet ritijem̧ļo̧k remaron̄ bar kūr n̄an jipan̄ kōn m̧akūtkūt ko āinwōt kāām; ro jet remaron̄ bōk kūr ilo juon tōre aeitok n̄an jipan̄ rikapilōk ro an doulul eo. Enaaj aolep iien wōr diktata ruo em̧m̧aan rūtto aolep iien ilo kajjojo kweilo̧k an doulul ko, būrokūraam, ak m̧akūtkūt. Ilo an eddo ko im taitōļ ko naaj oktak, jenaaj kōtmene juon dikļo̧k ilo bōnbōn in em̧m̧aan ro rerūtto ilo aer jerbal im rie doulul eo an Priesthood eo an Aron.

  8. Russell M. Nelson, “Rikam̧ool Ro, Priesthood eo an Aron Doulul Ko, im Kūlaaj ko an Jiron̄ Ro,” Liahona, Nov. 2019, 39, aorōk eo kar kobaiktok, bar lale Ezra Taft Benson, “To the Young Women of the Church,” Ensign, Nov. 1986, 85.

  9. Jej barāinwōt kapilōk bisop ro n̄an joļo̧k eļap iien ippān membōr ro rerūtto ejjeļo̧k pāleer im baam̧le ko aer make.

  10. Jeffrey R. Holland, general conference leadership meeting, Apr. 2018; bar lale “Effective Ministering,” ministering.ChurchofJesusChrist.org. Elder Holland ekar katakin bwe eddo ko ad me bisop eo ejjab maron̄ kappeik bar juon ej tōl doulul eo an Priesthood eo an Aron im jiron̄ ro, āinwōt juon ri ekajet, loloorjake jeen im aikuj ko jet ilo Kabun̄ in, kea im ro ri jeramōļ im ri aikuj. Doulul eo an būreejtōnji ro an em̧m̧aan ro im Kōrā Ro im ro jet remaron̄ bōk eddo eo m̧oktata kōn jerbal in mijinede, tampeļ im jerbal in menmenbwij an baam̧le, im wōr maron̄ n̄an katakin ilo ward eo im lale im jerbal in karejar n̄an membōr ro ilo Kabun̄ in.

  11. N̄an kakobaba n̄an jekjek ko remenin aikuj kii ko an juon ri ekajet, būrabļōm ko an kakkure ilo jabdewōt wāween maron̄ madmōd jān bisop ro ekkar n̄an kakien ko an Kabun̄ in.

  12. Būreejtōn eo an Kōrā Ro ilo stake renaaj wōnm̧aanļo̧k n̄an kajju riboot n̄an stake būreejtōn eo.

  13. Rikakpilōklōk ro an būreejtōn eo an stake Jiron̄ Ro remaron̄ kūr er jān ro uwaan stake eo ak, n̄e emenin aikuj, emaron̄ high ko̧o̧njel eo kar kappeik n̄an Jiron̄ ro im high ko̧o̧njel eo kar kappeik n̄an Būraimāri.

  14. Būratōr eo ej jerbal āinwōt juon būreejtōn an Jabōt Jikuul ewōr an eddo ejeņoļo̧k n̄an curriculum eo an jodikdik ro ilo Jabōt ko ruo kajjojo allōn̄.

  15. Būreejtōnji ro ilo doulul eo an Kōrā Ro, Jiron̄ Ro, Likao Ro, Jabōt Jikuul im Būraemāri ilo aolep lebōļ im stake rej Opija ro Routiej im opija ro an stake. Ilo ward lebōļ, bisoprik eo ej tōl likao ro, kōn menin rikapilōk ro an doulul eo an Priesthood eo an Aron rejjab opiija ro an ward eo.