Lo Lan̄lōn̄ ilo Kwaļo̧k Gospel eo
Ewōr juon Jemed ilo Ilan̄ eo ej iakwe im eo ej kōttar ad jepļaak n̄an ippen n̄an kōjeram̧m̧an mour kein ad im mour ko an ro ipeļaakid.
Juon iaan al in Būraimere eo em̧m̧antata ippa ekoba naan kein:
Ij uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Ijeļā wōn N̄a.
Ijeļā karōk eo an Anij.
Inaaj ļoor e ilo tōmak.
Ij tōmak ilo Rilo̧mo̧o̧r eo, Jisōs Kraist.1
Juon ennaan eo elem waan im aibojooj kōn m̧ool ko jej tōmaki!
Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, Jejeļā wōn kōj. Jejeļā bwe “Anij ej Jemen jetōb ko ad. Kōj jej … ajri ro Nejin, im E ej iakwe kōj. Jekar mour [Ippān ilo Ilan̄] m̧okta jān ad [kar itok n̄an] laļ in.”
Jejeļā karōk eo an Anij. Jekar pād ijōņ Ippān ke Ekar kwaļo̧k e. An Jemedwōj Ilan̄ “jibadbad—An jerbal im An aibojooj—ej n̄an kōm̧m̧an bwe kajjojo iaad en m̧ōņōņō ilo aolep kōjeraam̧m̧an ko An. Ekar … letok juon karōk eweeppān n̄an kōttoprak jibadbad in An. Jekar meļeļe im bōk karōk in … in m̧ōņōņō, … pinmuur, im … lo̧mo̧o̧r” m̧okta jen ad kar itok n̄an laļ.
“Jisōs Kraist ej dilepen karōk eo an Anij. Kōn Pinmuur eo An, Jisōs Kraist eaar kakūrmool jibadbad eo An Jemāe im kōm̧m̧an bwe en pidodo n̄an kajjojo iaad n̄an lem̧ōņōņō ilo mour wabanban in im ijo eutiej tata. Setan, ak devil eo, ej juon rikōjdrat n̄an karōk eo an Anij” im elakar jān jinoin.
“Anemkwōj in kāālet, ak maron̄ eo n̄an kāālet, ej juon iaan menin letok ko reļļap tata an Anij n̄an ajri ro Nejin. … Jej aikuj kāālet eļan̄n̄e jej ļoor Jisōs Kraist ke ak ļoor Setan.”2
Men kein rej m̧ool ko reļem waan jemaron̄ kwaļo̧ki ippān ro jet.
Kōtļo̧k bwe in ba n̄an kom̧ kōn juon iien jinō eaar kwaļo̧k m̧ool ko reļem waan ilo an kōpeļļo̧k e make n̄an bwebwenato im kile juon iien em̧m̧an.
Elōn̄ iiō ko remootļo̧k, jinō eaar ro̧o̧lļo̧k n̄an Argentina n̄an loļo̧k ļaddik eo jatū. Jinō ekar lukkuun dike ekkāke, kōn menin eaar kajjitōk ippān juon iaan ļōm̧aro nejū n̄an leļo̧k n̄an e juon kōjeram̧m̧an in kaenōm̧m̧an im kōjparok. Ļein ekar en̄jake im̧we n̄an barāinwōt kōjeraam̧m̧an jibūn kōn juon tōl ejenolo̧k im tōl jān Jetōb Kwojarjar n̄an kōkajoor im un̄ūr bōro ko būruwōn elōn̄ ro raar kōņaan ekkatak kōn gospel eo.
Ilo erboot eo ilo Salt Lake, jinō im ļaddik eo jatū kar ioon juon leddik jiljilimjuon iiō dettan me ekar jepļaaktok n̄an m̧weo im̧ōn jān juon tūreep in jikāāt ilo sno ippān baam̧le eo an. Ro jinen im jeman raar kile ewi aitokan an kar kōnono ippān jinō im ļeo jatū im kar kāālet n̄an kobaļo̧k ippāer. Raar kwaļo̧k kajeer im leddik eo nejier āinwōt Eduardo, Maria Susana im Giada Pol. Ekar wōr juon ekkejel emake waļo̧k im ejemjerā ikōtaan baam̧le in em̧m̧an.
Baam̧le ko jim̧or raar mōņōnō ilo aer itok itak ippān doon ilo juon wōt baluun n̄an Buenos Aires, Argentina. Ke ej wōnm̧aanļo̧k wōt aer bwebwenato, jinō eaar kile ippān make ke m̧ae iien eo, rejjan̄in kar ron̄ kōn Kabun̄ eo an Jisōs Kraist ekar kōjepļaaktok.
Juon iaan kajjitōk ko m̧oktata Susana eaar kajjitōk ekar, “Komaron̄ ke ba tok n̄an n̄a kōn mōn kalojooj en me ewōr annan̄ gold ioon?”
Jinō ekar kōmeļeļeik bwe m̧weo eaiboojoj ekar jab juon im̧ōn kaloojoj ak juon tampeļ an Irooj ijo jej kōm̧m̧ani bujen ko ippān Anij bwe jen maron̄ jepļaakļo̧k n̄an mour Ippān juon raan. Susana eaar kwaļo̧k n̄an jinō ke mokta jān tureep eo aer n̄an Salt Lake, eaar jar kōn juon men me emaron̄ kōkajoorļo̧k jetōb eo an.
Ilo baļuun eo, jinō eaar kwaļo̧k naan in kam̧ool eo an ekadu ak ekajoor kōn gospel eo im kar karuwaineneik Susana n̄an kappukōt mijenede ro ilo ijo jikin. Susana eaar kajjitōk ippān jinō, “Ekōjkan aō naaj lo er?”
Jinō eaar uwaak, “epidodo lo er; er remaron̄ jim̧or ruo likao ro rej jōōt mouj im tai, ak ruo jiron̄ ro ekarbōb aer nuknuk, im aolep iien rej ekōņak tag ko rej kwaļo̧k etaer im ‘Kabun̄ eo an Jisōs Kraist im Armej ro Rekwojarjar ilo Raan-Ko Āliktata.’”
Baam̧le ko raar bōk an doon nōm̧ba in taļboon im ba iakiakwe ko aer ilo erboot eo ilo Buenos Aires. Susana, eo jān kar iien eo eaar erom juon m̧ōtta em̧m̧an, kar jiron̄ eō elōn̄ kōttan bwe ekar kanooj en̄jake būrom̧ōj n̄an ilo̧k jān jinō ilo erboot eo. Eaar ba, “Jinōm̧ ekar erromak. Ijjab maron̄ kōmeļeļeiki, ak ewōr ippān juon meram eo kōn e me ikar jab kōņaan etal jān e.”
Ilo iien eo wōt Susana ekar tōparļo̧k kapijuknen eo an, e im leddik eo nejin, Giada, ekar etal n̄an kwaļo̧k en̄jake in ippān jinen Susana, eo ekar jokwe jejjo wōt būļak jān m̧weo im̧eer. Ilo aer kar kattōr, Susana ekar lo ruo likao ro rej etetal ilo iaļ eo kar nuknuk āinwōt an jinō kar kōmeļeļeik. Eaar kōbojrak wa eo waan ioļapļap in iaļ eo, diwōj, im kar kajjitōk ippān likao rein ruo, “Kom̧ro ej ke jān Kabun̄ eo an Jisōs Kraist?”
Rekar ba, “Aaet.”
“Mijenede?” eaar kajjitōk.
Raar jimo̧r uwaak, “Aaet kōm̧ij!”
Innām eaar ba, “Iuwetok n̄an lowaan wa e waaō; kom̧ij itok n̄an m̧weo n̄an katakin eō.”
Ruo allōn̄ ko tokālik, Maria Susana eaar peptaij. Leddik eo nejin, Giada, eaar bar peptaij ke eaar tōpar ruwatimjuon iiō dettan. Kōmij jerbal wōt ippān Eduardo, eo kōmij iakwe jekdo̧o̧n ta.
Jān iien eo, Susana em̧ōj an erom̧ juon iaan mijenede ro rem̧m̧antata ikar ioon e. Liin ej āinwōt ļōm̧aro nejin Mosaia, bōktok elōn̄ jetōb ko n̄an Kraist.
Ilo juon iaan bwebwenato ko am, iaar kajjitōk ippān, “ta kōl eo am̧?” Elmen am̧ kwaļo̧k gospel eo ippān ro jet?
Eaar ba n̄an n̄a, “Ekanooj in pidodo. Aolep raan m̧okta jān aō diwōjļo̧k jān m̧weo im̧ō, ij jar, kajjitōk ippān Jemedwōj ilo Lan̄ n̄an tōl eō n̄an juon eo me ej aikuji gospel eo ilo mour eo an. Jet iien ij bōk juon Bok in Mormon n̄an kwaļo̧k ippāer ak kaat in elleļo̧k ko jān mijenede ro—im n̄e ij jino kōnono n̄an juon, ij kajjitōk ippāer eļan̄n̄e em̧ōj aer kar ron̄ kōn Kabun̄ in.”
Susana eaar barāinwōt ba, “Iien ko jet ij baj ettōn̄ ilo aō kōttar tūrein eo. Juon raan juon em̧m̧aan ekar reitok n̄an n̄a im ba, ‘Ta ņe kwoj ettōn̄ kake?’ Ekar jaad kailbōk eō.
“Iaar uwaak ‘Ij ettōn̄ kōnke im̧ōņōņō’!
“Innām eaar ba, ‘Im ta ņe kwoj kanooj m̧ōņōņō kake?’
“Iaar uwaak, ‘N̄aij juon uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata, im menin ekam̧ōņōņōik eō. Em̧ōj ke am̧ ron̄ kake?’”
Ke ekar ba jaab, liin eaar leļo̧k n̄an e juon kaat in leļo̧k im karuwaineneik e n̄an etal n̄an iien jar ko rej itok wōt ilo Jabōt. Ilo Jabōt eo, liin eaar iak iakwe ļeo ilo kōjām eo.
Būreejtōn Dallin H. Oaks ekar katakin:
“Ewōr jilu men ko aolep membōr remaron̄ kōm̧m̧ane n̄an jipan̄ kwaļo̧k gospel eo. …
“M̧oktata, jemaron̄ aolep jar kōn juon ikdeelel n̄an jipan̄ ilo m̧ōttan in emenin aikuj an jerbal in lo̧mo̧o̧r. …
“Karuo, jemaron̄ kōjparok kien ko. … Ro mem̧bōr retiljek naaj wōr ippāer Jetōb eo an Rilo̧mo̧o̧r iien otemjej … n̄an tōl er ilo aer pukōt n̄an bōk kuņaer ilo jerbal in eaorōk an kwaļo̧k gospel eo kōjepļaktok an Jisōs Kraist.
Kajilu, jemaron̄ jar kōn im̧we kōn ta ko jej maron̄ kōm̧m̧ane … n̄an kwaļo̧k gospel n̄an ro jet … [im] jar kōn juon kallim̧ur n̄an jerbal e im̧we eo kwoj bōke.”3
M̧aan ro, kōrā ro, ajri ro, jodikdik ro, jemaron̄ ke āinwōt in m̧ōtta Susana im kwaļo̧k gospel eo n̄an ro jet? Jemaron̄ ke karuwaineneik juon m̧ōttad eo ejjab jān tōmak in ad n̄an itok im jar ippād ilo Jabōt? Ak jemaron̄ ke bōlen leļo̧k juon kape in Bok in Mormon n̄an juon nukid ak juon m̧ōttad? Jemaron̄ ke jipan̄ ro jet lo rūtto ro aer ilo FamilySearch eo ak kwaļo̧k ippān ro jet ta eo jaar ekkatak ilo wiikin ilo ad kar ekkatak Itok, Ļoor Eō? Emaron̄ ke ļapļo̧k ad āinwōt Rilo̧mo̧o̧r, Jisōs Kraist im kwaļo̧k ippān ro jet ta eo ej bōktok n̄an kōj lan̄lōn̄ n̄an mour ko ad? Uwaak eo n̄an aolepān kajjitōk kein ej aeet! Jemaron̄ kōm̧m̧ane!
Ilo jeje ko rekwojarjar jej riit bwe ro uwaan Kabun̄ eo an Jisōs Kraist rej jilkinļo̧k er “n̄an jerbal ilo jikin kallib grep eo an n̄an lo̧mo̧o̧r eo an jetōb ro an armej raņ’ (Katak im Bujen Ko 138:56). “Jerbal in lo̧mo̧o̧r in ekoba jerbal in mijenede an membōr, jerbal in dāpij rioktak, kōkajoorļo̧k membōr ro rejeniknik, jerbal an tampeļ im menmenbwij an baam̧le, im katakin gospel eo.”4
Ro jera rejitōn bōro, Irooj ej aikuji ad aiintok Israel. Ilo Katak im Bujen ko, Eaar ba, “Im kom̧in jab ļōmņak im̧aanļo̧k ta kom̧ naaj ba; ak ko̧koņi ilo ļōmņak ko ami iien otemjej naan ko in mour, im enaaj lewōj n̄an kom̧ ilo ejja awa eo wōt m̧ōttan eo naaj jon̄e n̄an armej otemjej.”5
Ilo kakkobaba, Ekar kallim̧uri kōj:
“Im eļan̄n̄e āindein bwe kom̧ro en aikuj jerbal aolepān raan ko amiro ilo kwaļo̧k ukeļo̧k n̄an armej rein, im bōktok, juon wōt armej n̄an Eō, ewi jon̄an an ļap naaj amiro m̧ōņōņō ippān ilo aelōn̄ eo an Jema!
“Im kiiō, eļan̄n̄e amiro m̧ōņōņō enaaj kanooj ļap ippān juon armej eo kom̧ro ar bōktok n̄an Eō ilo aelōn̄ eo an Jema, ewi jon̄an an ļap naaj amiro m̧ōņōņō eļan̄n̄e kom̧ro ej bōktok elōn̄ armej n̄an Eō!”6
Al eo an Būraimere eo iaar jino kake ej kōjjem̧ļo̧k kōn enaan in ekajoor:
Ij tōmak ilo Rilo̧mo̧o̧r, Jisōs Kraist.
Inaaj kautiej etan.
Inaaj kōm̧m̧ane ta eo ejim̧we.
Inaaj ļoor An meram.
An m̧ool inaaj kean̄ kake.7
Ij kwaļo̧k kam̧ool bwe naan kein rej m̧ool im bwe ewōr juon Jemed ilo Lan̄ eo ej iakwe eo ej kōttar kōj n̄an jepļaak n̄an E n̄an kōjeraam̧m̧an mour ko ad im mour ko an ro ipeļaakid. Kōm̧m̧an en wōr ad ikdeelel n̄an bōktok ro jeid im jatid n̄an Kraist ej jar eo aō ilo etan Jisōs Kraist, amen.