Jutak ilo Kallim̧ur ko im Bujen ko Ad
Ij kūr kom̧ n̄an ļōmņak kōn kallim̧ur ko im bujen ko kom̧ij kōm̧m̧ani ippān Irooj, im ippān ro jet, kōn eļap m̧ool, jeļā bwe kallim̧ur eo am̧ ej naan eo am̧.
Ro jeiū im jatū rejitōnbōro, ilo ad kiil m̧wen̄an in, kōm̧m̧an bwe kōj kajjojo jen dāpij ilo būruwōd kam̧ool eo kar kwaļo̧ki rainin kōn m̧ool ko an gospel eo an Jisōs Kraist. Jej jeraam̧m̧an ilo an wōr ad iien in ippān doon ekwojarjar n̄an kapenļo̧k kallim̧ur eo ad n̄an Irooj Jisōs Kraist bwe jej ro Rikarejeran im E ej ad Rilo̧mo̧o̧r.
Aorōk eo an kōm̧m̧an im kōjparok kallim̧ur ko im bujen ko ej juon men eo eddo ilo kōļmenļo̧kjeņ e aō. Ewi jon̄an an aorōk n̄an kom̧ n̄an kōjparok wōt naan ko ami? n̄an lōke? n̄an kōm̧m̧ane ta eo kom̧ij ba kom̧ naaj kōm̧m̧ane? n̄an kajjieon̄ kautiej bujen ko ami rekwojarjar? n̄an m̧ool? Jān mour m̧ool n̄an kallim̧ur ko ad n̄an Irooj im n̄an ro jet, jej etetal ilo iaļ eo ļo̧k n̄an ippān Jemed Ilan̄ im jej en̄jake iakwe eo An ilo mour ko ad.
Ad Rilo̧mo̧o̧r, Jisōs Kraist, ej ad Ri waanjon̄ak em̧m̧an n̄e ej itok n̄an kōm̧m̧an im kōjparok kallim̧ur ko im bujen ko. Eaar itok n̄an laļ in im kar kallim̧ur n̄an kōm̧anm̧an ankilan Jemen. Eaar katakin pedped in katak ko an gospel eo ilo naan im ilo kōm̧m̧an. Eaar pinmuur kōn jerawiwi ko ad bwe jen maron̄ bar mour. Eaar kautiej aolep kajjojo kallim̧ur ko An.
Jemaron̄ ke ba ejja menin wōt kōn kajjojo iaad? Ta kauwōtata ko eļan̄n̄e jej ko̧o̧t jidik, po jidik, ak jab lukkuun kain ņe kōjparok kallim̧ur ko ad? Ta eļan̄n̄e jenaaj kowaan bujen ko ad? Ro jet renaaj ke itok n̄an Kraist ilo meram kōn waanjon̄ak eo ad? Kwoj ettōr wōt ke ium̧win naan ko am̧? Kōjparok kallim̧ur ko ejjab juon iminene; ej juon m̧wil kōn am̧ juon rikaļooran Jisōs Kraist.
Iien otemjej ej keememej m̧ōjņo̧ ko ad ilo mour in, Irooj eaar kallim̧ur, “Kom̧in m̧ōņōņō im jab mijak, bwe N̄a Irooj Ij pād ippemi, im naaj jutak ippemi.”1 Em̧ōj aō kar en̄jake An pād n̄e aikuji bar kam̧ool eo, kaenōm̧m̧an, ak ļapļo̧k in kōļmenļo̧kjeņ eo ilo jetōb ak kōkajoor, im em̧ōj aō kar lukkuun in ettā im kam̧m̧oolol kōn jemjerā eo An ekwojarjar.
Irooj ekar ba, “Jabdewōt armej eo ej eļļo̧k jān jero̧wiwi ko an im itok n̄an E, im kūr ioon Eta, im pokake Ainikiō, im kōjparok kien ko Aō, enaaj lo turin Meja im jeļā bwe N̄aij mour.”2 En̄in bolen ej kallim̧ur eo An aorōk tata.
Iaar ekkatak aorōk eo an kōjparok kallim̧ur ko aō ilo aō kar jodikdik. Juon waanjon̄ak rōt in ej ke iaar jutak kankan n̄an ba Kallim̧ur eo an Jikaut. Jemjerā eo ad ippān Boy Scouts an America, eo em̧ōj an jem̧ļo̧k, enaaj iien otemjej juon bwebwenato aorōk n̄an n̄a im Kabun̄ in. N̄an doulul in Jikaut eo, n̄an em̧m̧aan im kōrā lōn̄lōn̄ ro me raar jerbal niknik āinwōt ritōl jikaut ro, n̄an m̧am̧a ro—lukkuun nōbar eo ej ilo̧k n̄an ijōņ—im n̄an likao ro me raar bōk koņaer ilo Jikaut, kōmij ba, “Kom̧ em̧ool.”
Ilo m̧wen̄an in, rikanaan eo ad ejitōn bōro, Būreejtōn Russell M. Nelson, im Elder Quentin L. Cook raar kōjjeļā kōn oktak ko me naaj bar pedped e kōļmenļo̧kjeņ eo ad ioon jodikdik ro im kajetjet doulul ko ad ippān m̧ool eo kar kwaļo̧k. Ilo kakobaba, Jabōt eo ļo̧k, Būreejtōn Nelson im Būreejtōn M. Russell Ballard kar kōmeļeļeik būrookraam̧ eo ekāāl an Ajri ro im Jodikdik ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata n̄an aolepān Kabun̄ in. Ej juon ijjino in m̧akūtkūt ilo aolepān laļ in pedped ioon ad Irooj im Rilo̧mo̧o̧r eo, Jisōs Kraist. Būreejtōnji eo Kein Kajuon im Doulul eo an Jon̄oulruo Rijilōk ro rej juon wōt ilo em̧m̧akūt in ekāāl, im n̄a make ij kwaļo̧k kam̧ool bwe Irooj eaar tōl kōm ilo aolep jokāālet ko kōm kar kōm̧m̧ani. Ij lo̧udin̄din̄ kōn ajri ro im jodikdik ro an Kabun̄ in n̄an jeļā koba in jibadbad eo kōn er jim̧or ilo m̧weo im ilo m̧ōnjar eo.
Unin tōl eo an jodikdik ro n̄an iiō in tok, 2020, ej kōnono kōn kallim̧ur eo aiboojoj an Nipai “ilo̧k im kōm̧m̧ani.” Eaar je, “Im ālkin men kein n̄a, Nipai, iaar ba n̄an jema: Inaaj ilo̧k im kōm̧m̧ani men ko Irooj eaar kean̄, bwe ijeļā Irooj ejjamin letok kien ko n̄an ro nejin armej, eļan̄n̄e Ejjab kōpooj juon iaļ n̄an aer kōtōprak men eo Ej kean̄ er.”3 Men̄e ekar kōm̧m̧ane etto, kōj ilo Kabun̄ jej jutak wōt ilo kallim̧ur in rainin.
N̄an “ilo̧k im kōm̧m̧ane” ej meļeļe in ļōn̄jak ilōn̄ in wāween ko an laļ in, bōk im jerbal ekkar n̄an revelesōn an juon make, mour jim̧we kōn kōjatdikdik eo im tōmak eo ilo jekļaj, kōm̧m̧an im kōjparok bujen ko n̄an ļoor Jisōs Kraist, im kōļapļo̧k ad iakwe n̄an E, Rilo̧mo̧o̧r an laļ in.
Bujen ej ruo-iaļ kallim̧ur me ej ikōtaad im Irooj. Āinwōt ro uwaan Kabun̄ in, jej bujen ilo iien peptaij eo n̄an bōk iood etan Jisōs Kraist, n̄an mour āinwōt Ekar mour. Ejja āinwōt ro raar peptaij ilo Dān ko an Mormon, jej bujen n̄an erom̧ armej ro An, “n̄an ineek eddo ko an ro jet, bwe ren maron̄ mera; … n̄an jan̄ ippān ro rej jan̄; … kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko.”4 Jerbal in karejar eo ad n̄an doon ilo Kabun̄ in ej kwaļo̧k kallim̧ur eo ad n̄an kautiej lukkuun kallim̧ur ko.
N̄e jej bōk kwokwoj eo, jej bar kōkāāl bujen eo n̄an bōk iood Etan im kōm̧m̧an elōn̄ļo̧k kallim̧ur ko n̄an em̧m̧anļo̧k. Kōļmenļo̧kjeņ ko im jerbal ko ad raan otemjej, jim̧or ļap im dik, rej kwaļo̧k kallim̧ur eo ad n̄an E. An kallim̧ur ekwojarjar ilo an letok ej “Eļan̄n̄e kom̧ij keememej Eō iien otemjej kom̧ naaj bōk Jetōb eo Aō bwe en pād ippemi.”5
Kajjitōk eo aō rainin ej, jej ke jutak wōt ilo kallim̧ur ko im bujen ko ad ak rej ke jet iien kallim̧ur ko rejjab likio, kar kōm̧m̧ani bajjōk im epidodo aer rup? N̄e jej ba n̄an jabdewōt, “Inaaj jar kōn eok,” jej ke? N̄e jej kallim̧ur, “Inaaj pād n̄an jipan̄,” jenaaj ke? N̄e jej kallim̧uri kōj make n̄an kōļļā m̧uri, jej ke? N̄e jej kajutak peid n̄an rejtake juon m̧ōttad membōr ilo juon kūr kāāl, eo ej meļeļe in n̄an leļo̧k rie, jej ke?
Juon joteen ke iaar juon jodikdik, jinō ekar jijet ippa ioon peet eo an im ekar kajoor an ekōnono kōn aorōkin mour kōn Naan in Mālōtlōt. “Ijeļā jān en̄jake ko an ro jet, jān elōn̄ iiō ko remootļo̧k,” eaar ba, “jako kilaan ilo jetōb im en̄jake eo me ej itok jān jab ļoor Naan in Mālōtlōt.” Eaar lukkuun reitok n̄an meja, im iaar en̄jake naan ko an aer dāil būruwō: “Kallim̧ur n̄an eō, Ronnie, rainin [ej kūr eō Ronnie], bwe kwonaaj iien otemjej mour kōn Naan in Mālōtlōt eo.” Iaar lukkuun m̧ool ilo kōm̧m̧ane kallim̧ur eo n̄an e, im ilakkar kōjparok wōt ilo aolepān iiō kein.
Kallim̧ur eo eaar lukkuun jipan̄ eō ke ikar jodikdik im ilo iiō ko tokālik ke iaar pād ilo jekjek ko me ro m̧ōtta ilo pejnej rej jijet ippān doon im idaak dānin kadōk. Iaar kōm̧m̧ane juon jokāālet m̧oktaļo̧k n̄an ļoor kakien ko an Anij, im ijjan̄in kar bar etale kakien eo. Irooj eaar ba, “N̄a, Irooj, I lokjak n̄e kom̧ij kōm̧m̧ane ta Ij ba; ak n̄e kom̧ij jab kōm̧m̧ane ta Ij ba, kom̧ ejjeļo̧k ami kallim̧ur.”6 Ta eo Ej ba n̄an ro me rej mour kōn Naan in Mālōtlōt? Bwe jenaaj bōk kallim̧ur eo an ājmour, kajoor, mālōtlōt, jeļāļo̧kjeņ, im enjeļ ro n̄an kōjparok kōj.7
Jet iiō ko remootļo̧k, Sister Rasband im n̄a kar pād ilo Salt Lake Tampeļ eo n̄an liāp eo an juon iaan leddik ro nejim. Ke kōm kar jutak inabōj in tampeļ eo ippān leddik eo edik tata nejim ekar dik wōt n̄an an pād ilo iien liāp eo, kōm kar kōnono kōn aorōk eo an liāp ilo tampeļ oe ekwojarjar eo an Anij. Ke jinō ekar katakin eō iiō ko m̧oktaļo̧k, kōm kar ba n̄an leddik eo nejim, “Kōm kōņaan bwe kwon liāp ilo tampeļ, im kōm kōņaan bwe kwon kallim̧uri kōm bwe n̄e kwoj lo eo m̧ōttan indeeo, kwonaaj kōm̧m̧ane juon iien ippān n̄an liāp ilo tampeļ.” Eaar letok n̄an kōm kallim̧ur eo an.
Ekar ba jān iien eo bwe kōnono eo am im kallim̧ur eo an raar kōjparok e im kar kakeememej e “ta eo ekar aorōk tata.” Tokālik eaar kōm̧m̧an bujen ko rekwojarjar ke eaar liāp n̄an ļeo pāleen ilo tampeļ.
Būreejtōn Nelson eaar katakin: “Jej … kōļapļo̧k kajoor eo an Rilo̧mo̧o̧r ilo mour ko ad n̄e jej kōm̧m̧ani bujen ko rekwojarjar im kōjparok bujen ko ilo jejjet. Bujen ko ad rej liāpe kōj Ippān im letok n̄an kōj kajoor an Anij.”8
N̄e jej kōjparok kallim̧ur ko n̄an doon, eļapļo̧k ad maron̄ kōjparok kallim̧ur ko n̄an Irooj. Keememej naan ko an Irooj: “Ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧an n̄an eō.”9
Kōļmenļo̧kjeņ ippa kōn waanjon̄ak ko an kallim̧ur ko ilo jeje ko rekwojarjar. Ammōn im ļōm̧aro nejin Mosaia ilo Bok in Mormon raar kallim̧ur “n̄an kwaļo̧k naan an Anij.”10 Ke Ammōn kar kalbuuj jān ritariņae ro an Ril Leman ro kar bōkļo̧k e im̧aan Kiin̄ Lamonai Ri Leman eo. Eaar kallim̧ur n̄an kiin̄ eo, “Inaaj am̧ rijerbal.”11 Ke rijodik ro raar itok n̄an ko̧o̧te jiip ko an kiin̄ eo, Ammōn ekar jōk peier. Kōn menin kiin̄ eo ekar ļo̧kjeņ an, ekar ron̄jake ennaan eo an Ammōn kōn gospel eo im ekar oktak.
Ruth, ilo Kallim̧ur M̧okta, ekar kallim̧uri kōrā eo jinen-jinen ļeo pāleen, “Bwe ijo kwōj ilo̧k ie ļo̧k, inaaj ilo̧k ie ļo̧k.”12 Liin ekar mour m̧ool n̄an kallim̧ur eo an. Ri Samaria eo em̧m̧an, ilo būrabōļ eo ilo Kallim̧ur Ekāāl, kar kallim̧uri rilale m̧weo eļan̄n̄e enaaj kar kōjparok ritoitak eo ejorrāān, “Jabdewōt eo kwōj korļo̧k, n̄e ij bar itok, I naaj ņa oņeam̧.”13 Zoram, ilo Bok in Mormon, ekar kallim̧ur n̄an ilo̧k n̄an āne jem̧aden ippān Nipai ilo ļōm̧aro jein. Nipai ekar ba, “Ke Zoram eaar kōm̧m̧ane kanejnej eo ippām, lōļn̄o̧n̄ ko am ar jako kōn e.”14
Ta kallim̧ur in etto eo “kar kōm̧m̧ani n̄an ro jim̧maer” āinwōt kar kōmeļeļeik ilo jeje ko rekwojarjar me “būruōn ro nejier renaaj oktakļo̧k n̄an ro jemāer”?15 Ilo mour eo m̧okta ke jaar kāālet karōk eo an Anij, jaar kōm̧m̧ane juon kallim̧ur n̄an jipan̄ aintok Israel ilo rājet ko jim̧or an rōn̄ōl eo. “Jaar deļo̧n̄e juon leiaia ippān Irooj,” Elder John A. Widtsoe ekar kōmeļeļeik elōn̄ iiō ko remootļo̧k. “Innām jerbal jān karōk eo ekar jab erom̧ wōt jerbal eo an Jemen, im jerbal eo an Rilo̧mo̧o̧r eo, ak barāinwōt jerbal eo ad.”16
“Aintok [eo] ej men eo aorōk tata ej bōk jikin ioon laļ in rainin,” Būreejtōn Nelson ekar ba ilo an kar itok itak ilo laļ in. “N̄e jej kōnono kōn aintok eo, jej ba m̧ool in eaorōk: aolep kajjojo ajri ro nejin Jemedwōj Ilan̄, ilo turājet ko ruo an rōn̄ōl eo, raikuj ron̄jake ennaan eo an gospel eo an Jisōs Kraist me em̧ōj an kōjepļaaktok.”17
Āinwōt juon Rijilōk an Irooj Jisōs Kraist, ij ikkilōk kōn juon kūr im juon kallim̧ur. Kein kajuon, kūr eo: Ij kūr kom̧ n̄an ļōmņak kōn kallim̧ur ko im bujen ko kom̧ij kōm̧m̧ani ippān Irooj, im ippān ro jet, kōn eļap m̧ool, jeļā bwe kallim̧ur eo am̧ ej naan eo am̧. Kein karuo, ij kallim̧uri kom̧, eļan̄n̄e kom̧ij kōm̧m̧ane menin, Irooj enaaj ejaaki naan ko am̧ im kōjeraam̧m̧an jerbal ko ami ilo ami kajjieon̄ kōn niknik kōm̧tālik n̄an kalōk mour ko ami, baam̧le ko ami, im Kabun̄ eo an Jisōs Kraist im Armej ro Rekwojarjar ilo Raan Ko Āliktata. Enaaj pād ippāmi, ro jeiū im jatū jitōn bōro, im kom̧ maron̄, kōn lōke, erreim̧aanļo̧k n̄an “bōk er ilo lan̄, bwe [kwon] maron̄ jokwe ippān Anij ilo wāween m̧ōņōņō eo ejjeļo̧k jem̧ļo̧kin … bwe Irooj Anij eaar kōnono e.”18
Kōn menin ij kam̧ool im kallim̧ur ilo etan Jisōs Kraist, amen.