2019
Buļōn Kōdo̧ im Det, Irooj, Pād wōt Ippa!
Oktoba 2019

Buļōn Kōdo̧ im Det, Irooj, Pād wōt Ippa!

Jān Reyna I. Aburto

Rikakpilōklōk eo Kein Karuo ilo Doulul eo Eutiej an Kōrā ro

Ij kam̧ool n̄an kwe bwe “buļōn kōdo̧ im det” Irooj enaaj pād ipped, bwe “inepata ko [remarōn] jakoļo̧k kōn mōnōnō eo ilo Kraist.”

Juon iaan al ko ad rem̧m̧an ej kwaļo̧k kajjitōk in “Buļōn Kōdo̧ im Det, Irooj, Pād wōt Ippa!”1 Ikar pād lowaan juon baļuun ke ekar jino kōpaak e juon ļan̄. Ilo aō reinamojļo̧k ilo wintō eo, imarōn kar loe jet kōdo̧ kilmej ilaļ in baļuun eo. Meram eo jān aļ iien eo ej tuļo̧k ekar kōm̧m̧ane juon annan̄ ioon kōdo̧ ko, kōm̧m̧an bwe en kajoor meram eo an. Ejjab to jān iien eo, baļuun eo ekar eļā jān kōdo̧ ko mijel, im kar jidimkij an itok juon nijōk in marok eo ekar pinej mejem ilo meram eo kōm̧ kar kam̧ool kake ilo jet iien rej mootļo̧k.2

Pija
Juron meram in aļ
Pija
Kōto̧ ko remarok

Kōdo̧ marok ko remaron̄ waļo̧k ilo mour ko ad, eo emaron̄ kōm̧m̧an bwe jan pilo jān meram in an Anij im kōm̧m̧an bwe jān kajjitōk eļan̄n̄e meram in ej pād wōt ippād. Jet iaan kōdo̧ kein rej būrom̧ōj, inepata, im wāween ko jet renij jelet ilo kōmālij im en̄jake. Remaron̄ kappok wāween ad kile kōj make, ro jet, im barāinwōt Anij. Ej jelōt aolep kōrā im em̧m̧aan ilo aolep iiō ilo aolepen kona ko ilo laļ in.

Barāinwōt kakkure ko rej kōdo̧ ko epidodo aer kabweer me remaron̄ jelōt ro jet rejan̄in kar en̄jake apan̄ kein. Āinwōt kajjojo m̧ōttan ānbwin, kōmālij eo ej en̄jake nan̄inmej, mijak, im jabwe ōn. Eļan̄n̄e kōļmenļo̧kjeņ ko ad ej pād ilo en̄taan, ejim̧we bwe jān pukōt jipan̄ jān Anij, jān ro ipelaakid, im jān taktō ro im ro retijemļo̧k ilo nan̄inmej in kōmālij.

“Aolep armej otemjej—em̧m̧aan im kōrā—kar kōm̧anm̧an ilo nememein wōt Anij. Kajjojo ej juōn jetōb jitōn bōro likao im jiron̄ nejin jined im jemed ilan̄, im … kajjojo ewōr juōn mour kwojarjar im jipadpad ippān.”3 Āinwōt Jined im Jemed Ilan̄ im ad Rilo̧mo̧o̧r, ewōr juon anbwinier4 im imminene in en̄jake.5

Sister ro rejiten bōro, ej em̧m̧an wōt n̄e jej en̄jake būrom̧ōj im inepata jet iien. Būrom̧ōj im illu rej m̧ōttan en̄jake an juon armej.6 Bōtaab, eļan̄n̄e jej wōnm̧aanļo̧k wōt im būrom̧ōj im metak eo ippād ej pinej maron̄ eo n̄an en̄jake iakwe eo an Jemedwōj Ilan̄ im eo Nejin im im̧we eo an Jetōb Kwojarjar, innem jemaron̄ en̄taan jān būrom̧ōj, inepata ak bar juon kain nainmej in en̄jake.

Leddik eo nejin ekar jeje juon iien: “Ekar wōr juon … [iien] ikar lukkuun būrom̧ōj aolep iien. Ikar ļōmn̄ak bwe būrom̧ōj ekar juon men eo jej jook kake, im kar juon kakōļļe in m̧ōjņo̧. Im ikar likūt wot ippa make. Ikar lukkuun en̄jake bwe ejjeļo̧k tokja.”7

Juon mōtta ekar kōmeļeļeik ilo wāween in: “Jān ke ikar dik, ikar jelmae juon tarinae in en̄jake in ejjeļo̧k kōjatdikdik, make iaō, im mijak im juon en̄jake bwe ilukkuun rup im irļo̧k. Ikar kajjieon̄ aolep kain n̄an ņooje metak eo aō im ikar jab kwaļo̧k ak kar kōtanke wōnm̧aanļo̧k wōt im kajoor.”8

Ro mōtta rejiten bōro, emaron̄ waļo̧k n̄an kōj aolep—eļaptata n̄e, āinwōt ritōmak ro ilo karōk in m̧ōņōņō, jej likūt eddo ko ejjeļo̧k tokjāer ippād ilo ad ļōmn̄ak bwe jej aikuj in wānōk. Kain ļōmn̄ak rōt kein remaron̄ tarjān jon̄an. Kajjieon̄ in wānōk ebōk juon iien aitok eo enij bōk jikin ilo aolepān mour ko ad im tal wōt—im ilo wōt jouj eo an Jisōs Kraist.9

N̄an keidi, eļan̄n̄e jenaaj kōpelļo̧k apan̄ in en̄jake ko ad, kwaļo̧k bwe jej jab wānōk, jej leļo̧k mālim n̄an ro jet bwe ren kwaļo̧k kōn apan̄ ko aer. Ippān doon jenij jeļā bwe ewōr kōjatdikdik im jej jab aikuj en̄taan make iaad.10

Pija
Kōjatdikdik ilo Itok eo Kein Karuo

Āinwōt rikaļoor ro an Jisōs Kraist, emōj ad kōm̧m̧an kallim̧ur ippān Anij bwe jenaaj “ineek eddo ko an doon” im “jan̄ ippen ro rej jan̄.”11 Menin emaron̄ kwaļo̧k ke jejeļā kōn ta eo ej waļo̧k kōn nan̄inmej in ļōmn̄ak, kapukōt jipan̄ ko remaron̄ jipan̄ kwaļo̧k apan̄ ko im nej marōn boktok kōj im ro jet n̄an Kraist, eo ej Maajta in Kōmour.12 Men̄e jejab jeļā kilen kōn ta ko jet armej rej iooni, jeļā bwe metak ko aer rej m̧ool emaron̄ aorōk n̄an m̧oktata pukōt meļeļe ko im ājmour.13

Ilo jet wāween ko, unin būrom̧ōj im inepata emaron̄ waļo̧k, ak jet iien emaron̄ pen n̄an loe kōn mejād make.14 Kōmālij ko aer emaron̄ en̄taan kōn mōk15 ak nana tam̧m̧win,16 eo emaron̄ em̧m̧anļo̧k eļan̄n̄e jej kōm̧m̧an oktak ilo mōn̄ā ko kijed, kiki, im kōmmālmel. Iien ko jet, jikin jipan̄ ko ak uno ko jān tōl an ro emoj kipel ilo tijemļo̧k emaron̄ bar men in aikuj.

Nan̄inmej in kōļmejļo̧kjen ejjab kakōlkōl ak en̄jake rej jab kōm̧adm̧ōd in emaron̄ tōl n̄an eļapļo̧k make iaad, jamelele, jepel, make kakure, im barāinwōt m̧an kōj make. Ijeļā men in m̧oktata, āinwōt eo jema make ekar jako jān make m̧ane elōn̄ iiō ko rem̧ootļo̧k. Jako eo an ekar lukkuun kabwilōn̄lōn̄ im kabūrom̧ōjm̧ōj n̄an baam̧le eo aō im n̄a. Ekar bōk iiō ko n̄an jerbale būrom̧ōj in aō, im ejjab kar to jān rainin ikar maron̄ katak kōņaan kōn make m̧ane kōj make ilo jim̧we ilo wāween ko remaron̄ jipan̄ n̄an kapojrake jān an wanm̧aanļo̧k wot.17 Imaron̄ kiiō kōpeļļo̧k ao kōņaan kōn jako eo an jema ippān ro neju im kam̧ool kōn kajoor bwe Rilo̧mo̧o̧r eo emaron̄ letok jim̧or ilo laļ in im iturājet.18

Būrom̧ōj, bwe elōn̄ ro rej ioone eļap en̄taan in būrom̧ōj rej katoļo̧k er make jān ro m̧ōttaer rekwojarjar kōnke rej en̄jake bwe ejjab mo aer pād ilo ijin ba kake. Jemaron̄ jipan̄ er jeļā im en̄jake bwe aet rej aikuj pād ippād. Elukkuun aorōk n̄an kile bwe būrom̧ōj ejjab waļo̧k jān m̧ōjņo̧, ak bwe ej itok jān jerawiwi.19 Ej “eddōkļo̧k ilo noje ak womak ilo kōļmenļo̧kjen.”20 Ippān doon, jemaron̄ rupe kōdo̧ in make iaad im jook bwe eddo in jook ej walōn̄tak im kabwilōn̄ ko kōn mour rej waļo̧k.

Ilo tore Ekar jerbal ilo laļ in, Jisōs Kraist ekar kōmour ro renan̄inmej im rebwebwe, bōtaab kajjojo armej rej aikuj kōmmālmel tōmak ilo E im em̧m̧akūt n̄an bok kōjeraam̧m̧an eo an. Jet rekar etetal etoļo̧k, jet rekar eļake peir n̄an jibwe nuknuk eo an, im jet rekar aikuj in kar bokļo̧k er n̄an E bwe re maron̄ mour.21 N̄e ej itok n̄an kōmour, kwoj aikuj eļap ad ke aikuji E? “Jej jab aolep uwo̧o̧r Ke?”22

Jān aolep ļoor iaļ eo an Rilo̧mo̧o̧r eo im kōļapļo̧k ad būrom̧ōj, kadikļo̧k ad ekajet, im bōjrak ad etale mour in jetōb ko an ro jet. Ron̄jake kōn iakwe ej juon iaan menin letok ko reļļap jemaron̄ leļo̧k, im jemaron̄ jipan̄ aljek ak kotak kōdo̧ ko reddo rej pinij menowan ro jaar iakwe ak ro m̧ōttad23 bwe, kōn iakwe eo ad, remaron̄ bar juon alen en̄jake Jetōb Kwojarjar im bōke meram eo ej itok jān Jisōs Kraist.

Eļan̄n̄e ekkā am̧ pād ilo “tab in marok,”24 oktak n̄an Jemedwōj Ilan̄. Ejjeļo̧k juon men eo kwoj ioone emaron̄ ukōt m̧ool eo bwe kwe eo kwoj nejin im bwe E ej iakwe eok.25 Keememej bwe Kraist ej am Rilo̧mo̧o̧r im Ripinmuur, Anij ej Jemōm̧. Rimeļeļe. Pijaik Er ilo tūrim, rej ron̄jake im lewaj jipan̄.26 “[Renij] kamōnōnō kwe ilo iien am inepata.”27 Kōm̧m̧ane jon̄an wōt am̧ maron̄, im lōke pinmuur eo an Irooj.

Apan̄ ko am̧ rej jab kwaļo̧k wōn kwe, ak remaron̄ kakōm̧anm̧an kwe.28 Kōnke emōj am en̄jake “kalōklōk ilo kanniōk,”29 komaron̄ lōn̄ am maron̄ n̄an būrom̧ōj kōn ro jet. Kōn tōl eo an Jetōb Kwojarjar, kwaļo̧k bwebwenato ko an n̄an maron̄ “kōmour eo em̧ōjņo̧, kotak pā ko rej etoto, im kōkajoor bukwe ko rem̧ōjņo̧.”30

N̄an kōj ro rej apan̄ rainin ak jipan̄ ro jet rej apan̄, kōm̧m̧an bwe jān ļoore kien ko an Anij bwe en iien otemjej en maron̄ pād Jetōb eo an ippād.31 Jān kōm̧m̧ani men ko “men ko reddik im reļam waan”32 bwe enij letok n̄an kōj kajoor in jetōb. Āinwōt an Būreejtōn Russell M. Nelson ba, “Ejjeļo̧k juon men ej kōppeļļo̧k lan̄ āinwōt kobain an ļapļo̧k erreo, jejjet pokake, tiljek kappukot, emakijkij kwojkwoj ioon naan ko an Kraist ilo Bok in Mormon, im aolep iien kallim̧ur n̄an etal n̄an tampeļ im jerbal in menmenbwij.”33

Pija
Rilo̧mo̧o̧r eo ej kōmour

Jen aolep keememej bwe Rilo̧mo̧o̧r eo ad, Jisōs Kraist, “[emoj] bōk ioon [ad] m̧ōjņo̧, bwe būruōn ren maron̄ obrak kōn tūriam̧o, ekkar n̄an kanniok, bwe en marōn jeļā … ekōjkan jipan̄ [koj[ ekkar n̄an m̧ōjņo̧ ko [ad].”34 Ekar itok “n̄an kūtimi ro e rup būrueir, … im kaenōm̧m̧an ro rej liaajloļ; … im leļo̧k n̄an er pāllin bōraer kōn bwidej in upaaj, oil in lan̄lōn̄ kōn būrom̧ōj, im nuknuk in nōbar kōn jetōb in parōk.”35

Pija
Itok eo Kein Kauro

Ij kam̧ool n̄an kwe bwe “buļōn kōdō im det” Irooj enaaj jpād wōt ippād, “inepata ko [remaron̄] jakoļo̧k kōn mōnōnō eo ilo Kraist,”36 im “ej kōn jouj jej ped ilo kōjparok, ālkin aolep men ko jej kōm̧m̧ani.”37 Ij kam̧ool bwe Jisōs Kraist enaaj jepļaak tok n̄an laļ in “ilo kōmour ilo pein.”38 Tokālik, Enaaj “kōmōrāik jān [mejeer] dānnin kōm̧jaaļaļ otemjej; im ej jāmin bar lōn̄ … būrom̧ōj.”39 N̄an aolep ro renij “itok n̄an Kraist, im weeppān ilo E,”40 aļ eo eban bar walaļļo̧k; … bwe Irooj enij [ad] meram n̄an indeeo, im raan in jan̄ ko [ad] enij jemļo̧k.”41 Ilo etan Jisōs Kraist, amen.

Kakeememej ko

  1. “Abide with Me!” Hymns, no. 166

  2. Ke kemim ekar ped lōn̄ in kōdo̧ kōdō ko, jekar jab lukkun loe marok eo ekar ped jejjo ne iumwin, im kej kemim ekar ped ilo marok eo, ekar pen am loe meram eo jān aļ eo ekar meram tok ilo jejjo ne ilōn̄im.

  3. “Baam̧le Eo: Juon Naan in Kean̄ n̄an Laļ in,” Liaona, Māe 2017, 145.

  4. “Im jetōb im ānbwin rej ejaake an eo an armej” (Katak im Bujen Ko 88:15). Ānbwinimi ej juon tampeļ n̄an am jetōb. Im kilen am kōjerbale anbwinim enij jeļōt jetōb eo am” (Russell M. Nelson, “Decisions for Eternity,” Liahona, Nov. 2013, 107).

  5. Lale, wanjon̄ak, Aiseia 65:19; Luk 7:13; 3 Nipai 17:6–7; Moses 7:28. ekatak n̄an kile im kaorōk en̄jake ko emaron̄ jipan̄ kōj kajjieon̄ in erom̧ āinwōt ad Rilo̧mo̧o̧r, Jisōs Kraist.

  6. Lale “Sadness and Depression,” kidshealth.org/en/kids/depression.html.

  7. Hermana Elena Aburto blog, hermanaelenaaburto.blogspot.com/2015/08. Liin ekar barāinwōt je:

    “Melijon ko rekar letok n̄an iō n̄an lukkuun kōmmālmel tōmak eo aō ilo karōk in ļo̧mo̧o̧r. Bwe ijeļā bwe Jema Ilan̄ ej iakwe n̄a, im bwe ewōr An pepe n̄an n̄a, im bwe Kraist emeļeļe lukkuun ta eo ikar jelm̧ae.”

    Ewi wāween an Jisōs jipan̄ eok n̄e kwōj būrom̧ōj? Ej mōnōnō in jipan̄ eok n̄an em̧m̧anļo̧k im ukweļo̧k. Ejjab kōtļo̧k bwe kwon kajimwe aolep men ilo juon wōt iien. Kwoj jab aikuj kōm̧m̧ane menin makeļok iaam̧” (iwillhealthee.blogspot.com/2018/09).

  8. Personal correspondence. Ekar barāinwōt jeje: “Kōmour eo an ao Rilo̧mo̧o̧r ej men eo ejiban̄ tata ilo aenōman im jipo̧kwe ilo ial eo ao. N̄e ij make iaō ilo apan̄ ko ao, Ej kakeememej iō bwe emoj An en̄jake ejja ta eo ij en̄jake ilo eta. Elukkun lōn̄ kōjatdikdik ilo ilju im jeklaj eo ao ejimwe, jekakpeje an anbwin ejjab kōn [inepata] ko an mour in.”

  9. Lale Russell M. Nelson, “Perfection Pending,” Ensign, Nov. 1995, 86–88; Jeffrey R. Holland, “Be Ye Therefore Perfect—Eventually,” Liahona, Nov. 2017, 40–42; J. Devn Cornish, “Am I Good Enough? Imarōn ke Tōpare?” Liahona, Nov. 2016, 32–34; Cecil O. Samuelson, “Ta Melele in n̄an Weppan?” New Era, Jan. 2006, 10–13.

  10. Elukkuun aorōk n̄an kōnaan kake apan̄ kein ippen ro nejid, baam̧le ko ad, im ro m̧ōttad ilo m̧oko imōd, ward eo, im ijo jikid.

  11. Mosaia 18:8–9.

  12. Lale Russell M. Nelson, “Jesus Christ—the Master Healer,” Liahona, Nov. 2005, 85–88; Carole M. Stephens, “The Master Healer,” Liahona, Nov. 2016, 9–12.

  13. Ilo ad jeļa kilen loe jain im kakōļļe ko ilo koj make im ro jet emarōn juon men in jiban̄. Jemarōn barāinwōt katak kilen lelo ļōmn̄ak rej jab jim̧we im ājmour im elmen kilen bōk jikin ippen ta ko rejimwe im ajmour.

  14. Būrom̧ōj emaron itok kōn oktak in mour ko rem̧m̧an—āinwōt ļotak eo an juon ajri ak jerbal ekāāl—im remarōn waļo̧k ne men ko rem̧m̧an rej waļo̧k ilo mour eo an juon armej.

  15. Lale “Understanding Stress,” Adjusting to Missionary Life (2013), 5–10.

  16. Lale Jeffrey R. Holland, “Āinwōt juon Jāpe E Rub,,” Liaona, Nov. 2013, 40.

  17. Lale Dale G. Renlund, “Understanding Suicide” (video), ChurchofJesusChrist.org; “Talking about Suicide” (video), ChurchofJesusChrist.org; Kenishi Shimokawa, “Understanding Suicide: Warning Signs and Prevention,” Liahona, Oct. 2016, 35–39.

  18. “Jinoin ājmour ej aikuji tōmak eo an juon ajri ilo juon ae em̧ool bwe Jemed ilo Lan̄ ej iakwe eok im emōj an letok juon ial n̄an ājmour. Eo Nejin Ejitōnbōro, Jisōs Kraist, ekar doon mour eo an n̄an letok ājmour in. Bōtaab ejeļo̧k juon anijnij in uwaak, ejeļo̧k juon n̄aj n̄an ājmour, barāinwōt ejeļo̧k juon ial epidod n̄an ial eo ededeļo̧k. Kōmour emenin aikuj n̄an tōmak ilo Jisōs Kraist im kajoor eo An n̄an kōmour” (Richard G. Scott,”To Heal the Shattering Consequences of Abuse,” Liahona, Māe 2008, 42). Ne ewor būraamlōm ko, ej ad eddo n̄an m̧adm̧ōde. Ijoke, jej jab aikuj in make m̧adm̧ōde n̄an kōj make ak ro jet. Jej jab aikuj kōm̧m̧ane aolep men make iaad. Eļapļo̧k jān juon kōttan iien ilo mour eo ao, ikar loļo̧k juon therapists n̄an jipan̄ n̄a anjo ioon men ko reppen.

  19. Lale Jon 9:1–7

  20. Jane Clayson Johnson, Silent Souls Weeping (2018), 197.

  21. Lale Matu 9:2–7, 20–22; 14:35–36; Mark 1:40–42; 2:3–5; 3 Nipai 17:6–7.

  22. Mosaia 4:19; lale barāinwōt Jeffrey R. Holland, “Are We Not All Beggars?” Liaona, Nov. 2014, 40–42.

  23. Lale Romans 2:19; 13:12; bar lale Jeffrey R. Holland, “Come unto Me” (Brigham Young University devotional, Mar. 2, 1997), speeches.byu.edu.

  24. 1 Nipai 8:23; lale barāinwōt 1 Nipai 12:4, 17; 3 Nipai 8:22.

  25. Lale Sam Ko 82:6; Rom 8:16–18; Katak im Bujen Ko 24:1; 76:24; Moses 1:1–39.

  26. Lale Adjusting to Missionary Life, 20; barāinwōt lale Micah 7:8; Matu 4:16; Luk 1:78–79; Jon 8:12.

  27. Jekab 3:1; lale barāinwōt Epesōs 5:8; Colosse 1:10–14; Mosaia 24:13–14; Alma 38:5. Riiti patriarchal blessing eo am ak kajjitok kōn kōjeramon eo an priesthood eo bwe kwon ron̄ im keememej ewi jon̄an an Jemedwōj Ilan̄ iakwe eo im kōņan kōjeraam̧m̧an eok.

  28. Lale 2 Korint 4:16–18; Katak im Bujen Ko 121:7–8, 33; 122:5–9.

  29. 2 Korint 12:7.

  30. Katak im Bujen Ko 81:5; lale barāinwōt Aiseia 35:3.

  31. Lale Moronai 4:3; Katak im Bujen Ko 20:77.

  32. Alma 37:6.

  33. Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 95.

  34. Alma 7:12; lale barāinwōt Aiseia 53:4; 2 Nipai 9:21; Mosaia 14:4.

  35. Aiseia 61:1–3; lale barāinwōt Luk 4:18

  36. Alma 31:38; lale barāinwōt Alma 32:43; 33:23

  37. 2 Nipai 25:23

  38. Malakai 4:2; 3 Nipai 25:2.

  39. Revelesōn 21:4.

  40. Moronai 10:32.

  41. Aiseia 60:20.