Kakai Lalahi Kei Talavoú
Fekumi kia Kalaisi kae ʻikai ko e Nunuʻa Kovi ʻo e Ponokalafí
Tā mei he Getty Images, fakaʻaongaʻi ki he ngaahi taumuʻa fakatātā, fakatātaaʻi ʻe ha kau mōtolo.
ʻI hono palaniʻi ʻo e ngaahi fakamatala maʻá e kakai lalahi kei talavoú, ʻoku mau fakamoleki ha taimi lahi ki hono fakakaukauʻi e ngaahi palopalema ʻoku nau fehangahangai mo ia he taimi ní. ʻOku fuʻu lahi fau ia. Ka ʻi heʻemau tānaki e ngaahi fakakaukau ki he māhina ní, ne tataki kimautolu ki ha kaveinga ʻa ia kuó ne uesia fakafoʻituitui kimautolu, ko homau ngaahi kaungāmeʻá, mo e niʻihi kehe tokolahi: ko e teití mo e ponokalafí. Ne mau ʻiloʻi ʻe faingataʻa ʻo hono palaniʻi ʻo e konga ko ʻení. Ko hono moʻoní, ʻoku uesia ʻe he ponokalafí ʻa e kakai tokolahi ʻi he ngaahi founga fakamamahi pea taimi ʻe niʻihi ʻokú ne fakaʻauha e moʻui ʻa e kakaí. Pea ʻoku malava ke ne fakanenefu ange ʻa e kahaʻu ʻo e kau taautaha kei talavoú mei he tuʻunga ʻoku lolotonga ʻi aí, tautautefito ki he teuteu ke nofomalí.
Ne mau mamata moʻoni ki he toʻukupu ʻo e Tamai Hēvaní ʻi Heʻene tataki ʻemau ngāué ʻi he kamata ke mau maʻu e ngaahi talanoa mei he kakai lalahi kei talavou ne uesia ʻenau vā fetuʻutakí ʻe he ponokalafí. Pea ʻoku mau vakai ʻoku ʻi ai ha kihiʻi faingamālie ki ha nofomali fiefia taʻengata mo ʻatā mei he maʻunimaá. Ko e hā hono ʻuhingá? He ko e talanoa kotoa pē ʻoku fakamoʻoni ki he mālohi liliu moʻui, fakatuʻamelie, mo faifakamoʻui ʻo Sīsū Kalaisi mo ʻEne Fakaleleí.
Ko ia kapau ʻokú ke ʻi ha vā fetuʻutaki ʻoku uesia ʻe he ponokalafí, ʻoku mau fakaafeʻi kimoutolu ke mou lau ʻa e konga ʻo e māhina ní, ʻoku ʻi ai e ngaahi fakamatala kuo vahevahe ʻe ha niʻihi ʻoku nau ʻiloʻi lelei ʻa hono moʻoni ʻo e fefaʻuhi mo e ponokalafí. ʻOku kāpui ʻe he ngaahi fakamatala ko ʻení ʻa e ngaahi kaveinga hangē ko e founga ki hono kamataʻi ʻo ha fepōtalanoaʻaki fekauʻaki mo e ponokalafí ʻi he taimi ʻokú ke teiti aí mo e founga ke fekuki ai mo iá (peesi 44), founga ke tali ʻi he taimi ʻoku tala moʻoni ai ʻe ha taha ʻene fefaʻuhi mo e ponokalafí (fakaʻilekitulōnika pē), founga ʻoku malava ke maʻu ai ʻa e fakamolemolé mo e fakamoʻuí maʻanaua fakatouʻosi (fakaʻilekitulōnika pē), pea mo e founga ʻe lava ke tataki ai koe ke ke ʻiloʻi ʻa e founga ke hoko atu ʻaki hoʻo vā fetuʻutakí (fakaʻilekitulōnika pē).
ʻOku mau ʻiloʻi kapau te ke falala ki he Fakamoʻuí pea fakaafeʻi ʻa e Laumālié ki hoʻo moʻuí lolotonga hoʻo fekumi ki ha ngaahi talí, ʻe tataki koe ʻe he Tamai Hēvaní ʻi he hala totonu ki hoʻo tūkunga fakafoʻituituí. Mahalo ʻoku ʻiloa ʻi he māmaní ʻa e ngaahi nunuʻa fakapoʻuli ʻo e ponokalafí, ka ʻoku mālohi ange ʻa e maama faifakamoʻui ʻa e Fakamoʻuí ʻi ha toe fakapoʻuli. Ko e meʻa pē ke tau faí ko e fekumi kiate Ia.
Fakaʻapaʻapa atu,
Chakell Wardleigh mo Mindy Selu
Ongo ʻētita ʻi he konga ki he kakai lalahi kei talavoú ʻi he ʻŪ Makasini ʻa e Siasí