ការរៀបចំខ្លួនសម្រាប់ជីវិត
ការដាក់គោលដៅប្រាកដប្រជា ដែលអ្នកអាចសម្រេចបាន
តើអ្នករីកចម្រើនដែរឬទេ ? ក្លាយជាមនុស្សកាន់តែពូកែឡើងក្នុងជំនាញជាក់លាក់មួយដែរឬទេ ? រៀនអ្វីមួយថ្មីទាំងស្រុងដែរឬទេ ? អ្នកត្រូវតែដាក់គោលដៅមួយចំនួនដើម្បីឈានទៅដល់ទីនោះ ។
ជួនកាលយើងសរសេរទុកនូវគោលដៅជាច្រើន ហើយពិតជាព្យាយាមយ៉ាងខ្លាំងដើម្បីសម្រេចវា ប៉ុន្តែក្រោយមកយើងភ្លេចគោលដៅនោះ ឬបោះបង់វាចោល ។ ស្ដាប់ទៅដូចអញ្ចឹងដែរឬទេ ? ហេតុអ្វីវាកើតឡើងបែបនោះ នៅពេលយើងចង់ផ្លាស់ប្តូរ ហើយប្រែខ្លួនឲ្យបានកាន់តែប្រសើរនោះ ជួនកាលយើងគ្រាន់តែពុំអាចធ្វើតាមគោលដៅដែលយើងបានដាក់ឲ្យបានជាប់លាប់ប៉ុណ្ណោះ ? មែនហើយ វាត្រូវបានកំណត់ដោយភាពប្រាកដប្រជាដ៏ខ្លាំងនៃគោលដៅរបស់យើង និងការខិតខំយ៉ាងខ្លាំងដែលយើងមានឆន្ទៈដើម្បីធ្វើ !
នេះគឺជាចំណុចគន្លឹះមួយចំនួនអំពីការដាក់គោលដៅដែលប្រាកដប្រជា ៖
-
ដាក់គោលដៅផ្សេងៗ ។ ផ្ដោតទៅលើការពង្រឹងផ្នែកជាច្រើននៃជីវិតរបស់អ្នក ពុំមែនតែមួយផ្នែកទេ ។ ព្រះអង្គសង្គ្រោះបានធ្វើគំរូដ៏ល្អឥតខ្ចោះមួយ ៖ « ព្រះយេស៊ូវក៏កាន់តែធំ ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង » ( លូកា ២:៥២ ) ។ នោះជារបៀបដែលទ្រង់បានរីកចម្រើនខាងផ្លូវចិត្ត រូបកាយ សង្គម និង ខាងវិញ្ញាណ ។ អ្នកអាចដាក់គោលដៅធ្វើដូចគ្នានេះផងដែរ ។ ការដឹងថា គោលដៅរបស់អ្នកកំពុងជួយអ្នកឲ្យប្រែក្លាយជាមនុស្សប្រសើរឡើង អាចជួយជំរុញចិត្តអ្នកឲ្យបន្តខិតខំសម្រេចបានគោលដៅនោះ ។
-
កត់ត្រាគោលដៅរបស់អ្នក ។ សូមរក្សាគោលដៅរបស់អ្នកនៅកន្លែងដែលអ្នកអាចឃើញវារៀងរាល់ថ្ងៃ ។ មិនថាបិទវានៅលើក្តារខៀននៅក្នុងបន្ទប់ នៅក្នុងទូរដាក់ឥវ៉ាន់របស់អ្នកនៅឯសាលា ឬសូម្បីតែនៅក្នុងទូរសព្ទរបស់អ្នក សូមមើលវាឲ្យបានញឹកញាប់ ។ ដរាបណាអ្នកត្រូវបានរំឭកអំពីគោលដៅដែលអ្នកបានដាក់ ដរាបនោះអ្នកនឹងបន្តខិតខំដើម្បីសម្រេចវាឲ្យបាន ។
-
ត្រូវមានភាពជាក់លាក់ ។ ប្រសិនបើអ្នកមានគោលដៅមួយថា « រៀនអ្វីមួយថ្មី » នៅលើបញ្ជីគោលដៅរបស់អ្នក វាប្រាកដជាគោលដៅប្រាកដប្រជាមួយ ប៉ុន្តែវាពុំជាក់លាក់ទេ ។ តើអ្នកចង់រៀនអ្វី ? ចង់ចេះលេងឧបករណ៍តន្ត្រីមួយឬ ? ចង់ចេះធ្វើម្ហូបមួយមុខឬ ? ប្រហែលជាធ្វើកិច្ចការកម្សាន្តមួយថ្មីជាមួយគ្នាឬ ? សូមមានភាពជាក់លាក់អំពីអ្វីដែលអ្នកចង់សម្រេចបាន !
-
ដាក់គោលដៅរយៈពេលខ្លី ។ អ្នកអាចដាក់គោលដៅធំមួយសម្រាប់ខ្លួនអ្នក ប៉ុន្តែដើម្បីសម្រេចបានគោលដៅនោះ អ្នកត្រូវសម្រេចគោលដៅតូចៗសិនដើម្បីសម្រេចគោលដៅធំនោះ ។ ប្រាកដណាស់ អ្នកចាំបាច់ត្រូវមានផែនការមួយ ។ ឧទាហរណ៍ អ្នកចង់រត់កីឡាម៉ារ៉ាតុនឆ្នាំនេះ ។ ដើម្បីហាត់ប្រាណឲ្យអ្នកអាចរត់ចម្ងាយ ៤២ គីឡូម៉ែត្រ អ្នកត្រូវចាប់ផ្តើមពីចម្ងាយតិចៗសិន ។ សូមដាក់គោលដៅរត់ចម្ងាយពីរបីគីឡូម៉ែត្ររៀងរាល់សប្តាហ៍ ហើយបង្កើនចម្ងាយរបស់អ្នកដោយសន្សឹមៗរៀងរាល់សប្តាហ៍ ។ ពេលយើងដាក់ផែនការសម្រេចគោលដៅរបស់យើង ព្រះនឹងជួយយើងសម្រេចគោលដៅទាំងនោះ ( សូមមើល សុភាសិត ១៦:៩ ) ។
-
សូមមានពេលវេលាដើម្បីសម្រេចគោលដៅរបស់អ្នក ។ ដោយសារអ្នកមានភាពមមាញឹក វាអាចងាយធ្វើឲ្យគោលដៅអ្នកត្រូវបានបំភ្លេច ដោយសារតែសាលារៀន ការងារ មិត្តភក្តិ និងគ្រួសារ ។ ប៉ុន្តែប្រសិនបើអ្នកញែកពេលវេលាជាក់លាក់ ដើម្បីខិតខំធ្វើគោលដៅរបស់អ្នករៀងរាល់ថ្ងៃ រៀងរាល់សប្តាហ៍ ឬពេលណាក៏ដោយដែលអ្នកចង់ធ្វើ នោះអ្នកកាន់តែបន្តធ្វើតាមគោលដៅនោះ ។
-
សូមកុំធ្វើច្រើនពេក ។ កុំដាក់គោលដៅច្រើនពេកដែលអ្នកពិបាកចាំនូវអ្វីគ្រប់យ៉ាងដែលអ្នកបានគ្រោងដើម្បីធ្វើ ។ ប្រសិនបើអ្នកចាប់ផ្តើមជាមួយនឹងគោលដៅសំខាន់ៗពីរ ជំនួសឲ្យការខិតខំព្យាយាមសម្រេចគោលដៅ ៤០ ក្នុងពេលតែមួយ នោះអ្នកនឹងមានអារម្មណ៍ពុំសូវស្មុគស្មាញ ហើយមានទំនុកចិត្តកាន់តែច្រើនឡើងនៅក្នុងការខិតខំរបស់អ្នកដើម្បីសម្រេចគោលដៅនោះ ។ យើងត្រូវធ្វើកិច្ចការនានា « ក្នុងប្រាជ្ញា និងរបៀបរៀបរយ ដ្បិតមិនត្រូវឲ្យអ្នកណារត់លឿនជាងកម្លាំងដែលគេមាននោះឡើយ » ( ម៉ូសាយ ៤:២៧ ) ។ ហើយពេលអ្នកសម្រេចបានគោលដៅមួយ អ្នកទំនងជាសម្រេចបានគោលដៅផ្សេងមួយទៀត ! កិច្ចការតូចតាចដឹកនាំទៅរកកិច្ចការធំបាន ។ ◼