សំណួរ និងចម្លើយ
« តើខ្ញុំអាចទុកឧបករណ៍អេឡិចត្រូនិចមិនឲ្យរំខានខ្ញុំ ទាំងនៅព្រះវិហារ និងនៅក្នុងថ្នាក់សិក្ខាសាលាដោយរបៀបណា ? »
ឃ្លាតកាយណាយចិត្ត
ថ្មីៗនេះ ខ្ញុំបានសង្កេតឃើញពីទំនោរចិត្តខ្ញុំក្នុងការប្រើឧបករណ៍អេឡិចត្រូនិចនៅអំឡុងពេលធ្វើសកម្មភាពព្រះវិហារ និងសកម្មភាពយុវវ័យ ។ វាបានក្លាយជាទម្លាប់មួយ ។ គ្រប់ពេលដែលខ្ញុំបានឃើញទូរសព្ទ ខ្ញុំបានចាប់យកវាភ្លាម ហើយមើលថា តើមានការជូនដំណឹងថ្មី ឬសារថ្មីអ្វីដែលឬទេ ។ ដំណោះស្រាយ ? ខ្ញុំលាក់ទូរសព្ទពីខ្លួនខ្ញុំ ។ ទោះបីលាក់វានៅក្នុងកាបូប នៅក្រោមកៅអី ឬលាក់ជាមួយនឹងមិត្តខ្ញុំក្តី—ប្រសិនបើខ្ញុំពុំឃើញទូរសព្ទខ្ញុំទេនោះ ខ្ញុំនឹងមិនត្រូវបានល្បួងឲ្យប្រើវាទេ ។
តារីន អិម អាយុ ១៥ ឆ្នាំ រដ្ឋ ហ្លូរីដា ស.រ.អា.
រៀបចំឧបករណ៍អេឡិចត្រូនិចរបស់អ្នកដើម្បីកាត់បន្ថយការរំខានអារម្មណ៍
សូមរៀបចំឧបករណ៍អេឡិចត្រូនិចរបស់អ្នក ដូចនឹងរបៀបដែលអ្នករៀបចំគំនិត និងខ្លួនប្រាណរបស់អ្នកសម្រាប់ថ្ងៃឈប់សម្រាកដែរ ។ សូមដាក់ទូរសព្ទអ្នកក្នុងម៉ូដមិនឲ្យទទួលការជូនដំណឹងនៅអំឡុងពេលរៀន ។ អ្នកអាចដាក់កម្មវិធី Gospel Library ផ្សេងពីកម្មវិធីផ្សេងទៀត ដូច្នេះពេលអ្នកត្រូវការប្រើព្រះគម្ពីរ ឬសៀវភៅកំណត់ចំណាំ នោះអ្នកពុំត្រូវបានរំខានដោយកម្មវិធីផ្សេងទៀតទេ ។
ដេលីហ្គៀម៉ា អេស អាយុ ២១ ឆ្នាំ ទីក្រុង សៅ ប៉ូឡូ ប្រទេសប្រេស៊ីល
អធិស្ឋានសូមជំនួយ
ខ្ញុំបានស្វែងរកព្រះវិញ្ញាណតាមរយៈការអធិស្ឋាន ។ វាជួយខ្ញុំឲ្យទុកឧបករណ៍អេឡិចត្រូនិចខ្ញុំមួយអន្លើសិននៅថ្ងៃឈប់សម្រាក និងអំឡុងពេលរៀនថ្នាក់សិក្ខាសាលា ។ ពេលណាខ្ញុំអធិស្ឋានទៅកាន់ព្រះវរបិតាសួគ៌ខ្ញុំ និងពេលអានព្រះគម្ពីរមរមន ខ្ញុំទទួលរបៀបមួយដើម្បីទុកឧបករណ៍អេឡិចត្រូនិចខ្ញុំមួយអន្លើសិន ។
ឌីសាយអើរ អិម អាយុ ១៨ ឆ្នាំ ស្រុកកូម៉ូអ៊ី ប្រទេសកូតឌីវ័រ
ចូរកុំភ្លេចព្រះគម្ពីរជាសៀវភៅ !
ការប្រើឧបករណ៍អេឡិចត្រូនិចសម្រាប់រៀនដំណឹងល្អគឺមិនអីទេ ប៉ុន្តែជួនកាលយើងប្រើវាជ្រុសហួសហេតុពេក ។ ដើម្បីកុំឲ្យអ្នកត្រូវបានរំខានដោយសារវា នោះសូមព្យាយាមប្រើព្រះគម្ពីរជាសៀវភៅផង ។ ព្រះអម្ចាស់នឹងដឹកនាំអ្នក ។ យើងនឹងរៀនបានកាន់តែច្រើន ហើយទទួលអារម្មណ៍ពីព្រះវិញ្ញាណ ។
អាយយ៉ាណា អេ អាយុ ១៣ ឆ្នាំ ទីក្រុងឡាហ្គូណា ប្រទេសហ្វីលីពីន
ទុកវាមួយអន្លើសិន
នៅព្រះវិហារ ខ្ញុំបានបិទសំឡេងទូរសព្ទខ្ញុំ ហើយទុកវាក្នុងហោប៉ៅ ហើយប្រើវាពេលដែលខ្ញុំប្រើព្រះគម្ពីរប៉ុណ្ណោះ ។ អំឡុងពេលសាក្រាម៉ង់ ខ្ញុំពុំមើលទូរសព្ទខ្ញុំទាល់តែសោះ ។ ខ្ញុំទុកវានៅឆ្ងាយពីដៃខ្ញុំដើម្បីចៀសវាងពីការប្រើវា ។
វិល្លាម ដបុលយូ អាយុ ១៧ ឆ្នាំ រដ្ឋវើរជីញ៉ា ស.រ.អា.