ទុក្ករបុគ្គល និងទីបន្ទាល់របស់ខ្ញុំ
សាន់ហ៊ូ គីម មៀរ រដ្ឋម៉ារីលែន ស.រ.អា.
រចនារូបភាពដោយ អេលែន ហ្គានស៍
ខ្ញុំចេះតែសង្ស័យពេលពួកអ្នកផ្សព្វផ្សាយសាសនាបានបង្រៀនខ្ញុំអំពី យ៉ូសែប ស៊្មីធ និងព្រះគម្ពីរមរមន ។ ដំបូងខ្ញុំគិតថា យ៉ូសែប ស៊្មីធ ក៏ដូចជា « ពួកព្យាការី » ជាច្រើនទៀតផងដែរ ដែលបាននាំយកគម្ពីរក្លែងក្លាយមួយមកកាន់ពិភពលោក ដោយព្យាយាមដើម្បីក្លាយជាអ្នកមាន មនុស្សល្បីល្បាញ ឬជាវីរៈបុរស ។
ខ្ញុំគ្មានបំណងអានព្រះគម្ពីរមរមនទាល់តែសោះ ។ ប៉ុន្តែយូរៗទៅដោយសារមិត្តភាព និងភាពរីករាយរបស់ពួកអ្នកផ្សព្វផ្សាយសាសនាចំពោះដំណឹងល្អ នោះបានធ្វើឲ្យការចង់ដឹងចង់យល់របស់ខ្ញុំពីសារលិខិតរបស់ពួកគេមានការកើនឡើង ។
ពេលខ្ញុំបានអានខគម្ពីរដែលពួកអ្នកផ្សព្វផ្សាយសាសនាបានឲ្យខ្ញុំអាននៅក្នុងព្រះគម្ពីរមរមន នោះខ្ញុំបានឃើញការអញ្ជើញរបស់មរ៉ូណៃ ឲ្យទូលសូមដល់ព្រះដោយស្មោះសរ ស្មោះអស់ពីចិត្ត និងមានសេចក្តីជំនឿលើព្រះគ្រីស្ទ ប្រសិនបើព្រះគម្ពីរមរមនពិត ( សូមមើល មរ៉ូណៃ ១០:៤–៥ ) ។ ខ្ញុំបានគិតថា « បើព្រះគម្ពីរនេះក្លែងក្លាយ តើនរណាហ៊ានអញ្ជើញយើងឲ្យសួរព្រះដោយស្មោះសរ និងស្មោះអស់ពីចិត្ត ប្រសិនបើគម្ពីរមរមនពិតឬអត់នោះ ? »
បន្ទាប់មក នៅថ្ងៃមួយពួកអ្នកផ្សព្វផ្សាយសាសនាបានពន្យល់ថា យ៉ូសែប ស៊្មីធ និងបងប្រុសរបស់គាត់ ហៃរ៉ុម ត្រូវបានធ្វើទុក្ករកម្មដោយសារតែទីបន្ទាល់របស់ពួកលោក ។ រំពេចនោះ គំនិតមួយបានផុសឡើងក្នុងចិត្តខ្ញុំថា ពួកលោកនឹងពុំបូជាជីវិតពួកលោកចំពោះរឿងដែលពួកលោកដឹងថាខុសឆ្គងនោះទេ ។ នៅគ្រានោះ អារម្មណ៍កក់ក្តៅមួយដូចជាភ្លើងឆេះខ្មួលខ្មាញ់បានសាយភាយពេញខ្លួនខ្ញុំ ។ វាជាទីបន្ទាល់អំពីព្រះវិញ្ញាណបរិសុទ្ធដែលបញ្ជាក់ដល់ចិត្តខ្ញុំថា យ៉ូសែប ស៊្មីធ គឺជាព្យាការីដ៏ពិត ។ ដោយសារទីបន្ទាល់នេះ ខ្ញុំបានទទួលបុណ្យជ្រមុជទឹក និងពិធីបញ្ជាក់ ។
ខ្ញុំត្រូវបានរំឭកអំពីបទពិសោធន៍នេះរយៈពេល ២៥ ឆ្នាំក្រោយមក ពេលខ្ញុំបានអានសុន្ទរកថាមួយរបស់អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ។ នៅក្នុងសុន្ទរកថារបស់លោក អែលឌើរហូឡិនបានសួរប្រសិនបើ នៅក្នុងគ្រាដ៏សំខាន់នៃទុក្ករកម្មរបស់ពួកលោក យ៉ូសែប និង ហៃរ៉ុម បន្តប្រមាថនៅចំពោះព្រះ តាមរយៈការជួសជុលជីវិតរបស់ពួកលោក កិត្តិយសពួកលោក និងសេចក្តីសង្គ្រោះអស់កល្បរបស់ពួកលោកលើសៀវភៅមួយក្បាលដែលពួកលោកដឹងថាខុសឆ្គងឬ ។
« ពួកលោកពុំធ្វើដូច្នោះទេ ! » អែលឌើរហូឡិនបានមានប្រសាសន៍ថា ៖ « ពួកលោកសុខចិត្តស្លាប់ ជាជាងបដិសេធប្រភពមកពីព្រះ និងសេចក្តីពិតដ៏ពេញលេញអស់កល្បជានិច្ចនៃព្រះគម្ពីរមរមន » ។១
ប្រសាសន៍របស់អែលឌើរហូឡិនបានធ្វើឲ្យខ្ញុំយល់ច្រើន ហើយបានពង្រឹងទីបន្ទាល់ខ្ញុំបន្ថែមទៀតអំពីព្យាការី យ៉ូសែប ស៊្មីធ និងអំណាចនៃព្រះគម្ពីរមរមន ។
ខ្ញុំមានអំណរគុណចំពោះព្យាការី យ៉ូសែប ស៊្មីធ ។ លោកបាននាំព្រះគម្ពីរមរមនចេញមក ហើយមានឆន្ទៈលះបង់ជីវិតលោកដើម្បីធ្វើជាសាក្សីអំពីព្រះយេស៊ូវគ្រីស្ទ ។ តាមរយៈព្រះគម្ពីរមរមន ខ្ញុំបានដឹងច្បាស់ថា ព្រះមានព្រះជន្មរស់នៅ និងសេចក្តីស្រឡាញ់ដែលទ្រង់មានចំពោះខ្ញុំ ។