Kakai Lalahi Kei Talavoú
Ko e Palani Haohaoá
Ko e fē e taimi fakamuimuitaha naʻá ke ongoʻi ai kuo holafa hoʻo ngaahi palaní? Uike kuo ʻosí? Naʻe pehē au ia. Neongo pe ko e hā ʻetau ngaahi palani haohaoá, ʻoku ngali hoko e ngaahi pikopiko mo e afeafe taʻeʻamanekina ʻi he moʻuí ko ha foʻi moʻoni ia ʻo e moʻui fakamatelié. Naʻe ʻikai ke u teitei palani ke ʻi ai haʻaku tamatō ʻe fā ʻi he vahaʻa ʻo ʻeku fānau ʻe toko uá, ka naʻe hoko ia. ʻI he taimi ʻoku fakaʻohovaleʻi ai kitautolu ʻe he ngaahi palani ne lotua pea fokotuʻutuʻú ʻi ha ngaahi founga taʻeʻamanekiná—pe matuʻaki holafa kotoa ia ki laló—ko e hā ʻoku tau faí? ʻI he makasini ko ʻení, ʻoku vahevahe ʻe ha kakai lalahi kei talavou mei ha ngaahi tūkunga kehekehe ʻa e ngaahi tali kuo nau maʻu ki he fehuʻi ko ení, ʻi he taimi ne ʻikai hoko ai ʻenau palani fakafāmilí.
Kiate au mo hoku husepānití, naʻe taʻofi ʻe he tamatoó homa halá pea mamahi ai homa lotó (vakai peesi 44). Naʻe hoko e faifeinga ʻa Katalina mo hono husepānití ke vakavakaiʻi e ngaahi fakakaukau ʻa e kakaí ke maʻu e leʻo ʻo e ʻEikí ko ha meʻa faingataʻa ʻi hona halá (vakai peesi 48).
ʻOku vahevahe ʻe Kilisitina, ʻi ha ngaahi fakamatala fakaʻilekitulōnika pē, ʻene momou mo e manavasiʻi ke hoko ko ha faʻeé, pea fakaikiiki ʻe Palauni e meimei ngata ʻene palani fāmili mo hono uaifí ʻi he fehikitaki fakakautaú. ʻOku ʻomi ʻe Keiti, ko ha taha lahi kei talavou, ha ngaahi fakakaukau ki he natula taʻengata ʻo hotau tuʻunga ko e mātuʻá.
ʻOku tatau ai pē pe ʻokú ke tatali ki ha fānau ke tāpuekina ho ʻapí, maʻu ha fānau lahi ange ʻi he meʻa naʻá ke palani ki aí, pe ʻokú ke tatali ke ke mali, ko e meʻa ʻe taha ʻoku paú: ʻOku maʻu ʻe he Tamai Hēvaní e palani haohaoá, pea te Ne kei tataki mo pukepuke kitautolu ʻi ha ngaahi founga fakafoʻituitui, fakataautaha ʻi heʻetau fekumi ke fakatonutonu hotau lotó ki Hono finangaló.
ʻE tatau ai pē pe ko e hā e olá, ka ʻe tāpuekina kitautolu ʻe he fakaʻamu pē ke ʻomi ha fānau ki he māmaní ʻaki ha fakakaukau maʻongoʻonga ki he palani lahi ʻo e fiefia ʻa e Tamai Hēvaní. ʻI hoʻo lau ʻemau ngaahi talanoá, ʻo tatau ai pē pe ʻokú ke ʻi he tuʻunga fē ʻi he halafononga ʻo e fakatupulaki ha fāmilí, ʻoku ou fakaʻamu ʻi he loto-moʻoni, ʻe tataki koe ʻe he Laumālie Māʻoniʻoní ki ha ngaahi fakakaukau pe tali ʻe ala tokoni atu ʻi hoʻo fonongá.
Laukonga fiefia!
Marianne von Bracht