Lele ki he Siasí
Tāniela R. Tomisoni, Kalefōnia, USA
Tā fakatātā ʻa Allen Garns
ʻI ha ʻaho ʻe taha, lolotonga ʻeku kumi ha feituʻu ke u lele aí, naʻá ku fakakaukau ke ʻahiʻahiʻi e tauʻanga meʻalele ʻo ha ʻapisiasi ʻi homau feituʻú. Naʻá ku saiʻia ai koeʻuhí he naʻe maama mo ʻosi valitaaʻi. Ne u ʻiloʻi kapau te u lele takai tuʻo 10 ki he 15 ʻi he falé ʻe kakato ai ʻeku fakamālohisino maile ʻe tolú (kilomita ʻe 4.8).
Ne u lele hokohoko ʻi he tauʻanga meʻalelé ʻi ha taʻu ʻe tolu. Naʻá ku sio, mei he taimi ki he taimi, ki ha kakai ʻi he tauʻanga meʻalelé koeʻuhí he naʻá ku lele he taimi ʻe niʻihi he lolotonga e ngaahi houalotú mo ha ngaahi ʻekitivitī kehe.
Ne tuʻo lahi haʻaku maʻu ha ongo ne fie maʻu ke u talanoa mo ha taha ʻo kau ki he Siasí, ka ne ʻikai haʻaku ʻilo ha founga ke fai ai ia. ʻI heʻeku foki ki ʻapi mei he ngāué ʻi ha efiafi ʻe taha, ne u fakakaukau ke u afe ʻo vakai pe te u lava ʻo maʻu ha taha ai. ʻI heʻeku hū ki he falelotú, ne u maʻu atu e ongo faifekaú ʻi heʻenau fakaʻosiʻosi e ngaahi ʻinitaviu mo ʻenau palesiteni fakamisioná. Naʻá ku fakafeʻiloaki au pea mau tangutu leva he feituʻu talitalí. Ko e feituʻu ia ne na akoʻi ai au ʻi heʻeku ʻuluaki lēsoni he ongoongoleleí.
Ne hokohoko atu ʻeku fakataha mo e ongo faifekaú ʻi he uike ʻe ua ne hoko maí. Ko e taimi naʻá ku ʻalu ai ki he houalotu sākalamēnití, ne fakahā mai ‘e he kāingalotu ʻo e uōtí ha ʻofa, talitali lelei, fakafeohi, mo fakalotolahi. ʻI heʻeku fakakaukau ki he meʻa naʻá ku akó, ne u fakatokangaʻi ne fakatupulaki ʻe heʻeku fie ʻilo ki he Siasí ʻa e fie maʻu ko ia ke u fili ke papitaisó. Naʻá ku ongoʻi naʻe ueʻi au ʻe he Laumālié ke fai ʻa e finangalo ʻa ʻeku Tamai Hēvaní, ka naʻá ku kei fāinga mo e fili ko iá. Fāifai pea naʻe papitaiso au ʻi Nōvema ʻo e 2001, ʻi hoku taʻu 36.
Ko ʻeku fili ke lele ʻi he tauʻanga meʻalele ʻo e siasí ne hā ngali taʻe-mahuʻinga pē ʻi he taimi ko iá. Ka naʻe iku ai ki hoku ngaahi tāpuaki maʻongoʻonga tahá: ki heʻeku hoko ko e mēmipa he Siasí; ki heʻeku feʻiloaki mo hoku uaifi fakaʻofoʻofa, ko Senifaá; pea mo ʻeku sila kiate ia ki he moʻuí ni mo ʻitāniti ʻi he Temipale San Diego California.
Ko ia, kapau ʻokú ke sio ki ha taha ʻoku fakamālohisino holo ʻi he tauʻanga meʻalele ʻo homou falelotú, fakafeʻiloaki koe ki ai! ʻOku ʻikai te ke ʻilo—mahalo ko ia ʻe hoko vavé ni mai ko e mēmipa foʻou taha ʻi ho uōtí!