“Ko Hono Moʻoní, Ko e Taha Au ʻO Kinautolu”
ʻEpi Tōnē
ʻIutā, USA
Tā fakatātaaʻi ʻe Bradley Clark
Naʻá ku toki tangutu hifo pē ʻi he pasí ʻi he taimi ne maleʻei mai ai ha tangata mei he tafaʻaki ʻe tahá, ʻo pehē mai, “ʻOkú ke maʻu ha laumālie lelei.”
ʻOku ʻikai fie maʻu ke u tala atu, naʻá ku ʻohovale. Kuo teʻeki tuʻotaha ke teitei vikia au kimuʻa koeʻuhi ko hoku laumalié. ʻI he ʻikai ke u ʻiloʻi haʻaku talí, ne u pehē atu ai pē, “Mālō.”
Naʻe talamai ʻe he tangatá naʻá ne lava ke tala koeʻuhí ko ʻene ngāue mo ʻene kulupu tui fakalotú. Ne u fanongo kiate ia ʻi heʻene ʻomi e faleʻi ki he founga ʻo hono tauhi hoku laumālié ke fakaʻofoʻofá.
Ko e taimi ne tuʻu ai e pasí, naʻá ma fakatou tuʻu ke hū ki tuʻa pea naʻá ne foaki mai ha fakakaukau fakaʻosi kiate au: “Fakapapauʻi ʻoku ʻikai ke ke fanongo ki he kau Māmongá.”
Ne hangē ne tuʻu maʻu e taimí ʻi ha kiʻi mōmēnití. Naʻe fakatokangaʻi ʻe he tangatá ni ha meʻa makehe ʻi hoku matá, ka naʻe ʻikai ke ne ʻiloʻi ne tuʻunga ia koeʻuhí ko ʻeku tui fakalotú.
ʻE founga fēfē haʻaku tali? Ko hono moʻoní, ko ʻeku ʻuluaki fakakaukaú ke ʻoua naʻá ku lea peá u fakangalingali pē ne ʻikai ke u ongoʻi ia. Naʻá ku manavasiʻi kapau te u talaange ko ha mēmipa au ʻo e Siasí, mahalo te ne fai ha tali ʻoku kovi pe fefeka.
Ka naʻe haʻu ha potu folofola ki hoku ʻatamaí: “He ʻoku ʻikai te u mā ʻi he ongoongolelei ʻo Kalaisí: he ko e mālohi ia ʻo e ʻOtuá ki he fakamoʻuí kiate kinautolu kotoa pē ʻoku tuí” (Loma 1:16). Ne u fakatokangaʻi naʻe ʻikai ke u mā ʻi he ongoongoleleí, pea naʻá ku ʻiloʻi ʻe ʻikai lava ke ulo atu hoku laumālié ki he niʻihi kehé kapau he ʻikai ke u tuʻu ko ha fakamoʻoni. ʻI heʻeku tukupā foʻoú, ne u sio ki he tangatá mo pehē ange, “Ko hono moʻoní, ko e taha au ʻo kinautolu.”
Ne sio fakamamaʻu mai e tangatá peá u sio fakamamaʻu atu. Ne u ʻohovale ʻi heʻene kata mo pehē mai he ʻikai ke ne kau ki he Siasí koeʻuhí he naʻá ne fuʻu saiʻia ʻi he kofí. Naʻá ku kata mo au, peá ma māvae ai.
ʻOku ou fiefia ʻi he fili naʻá ku faí ʻo aʻu mai pē ki he ʻahó ni. ʻOku ou ʻiloʻi ʻe lava ke faingataʻa ke te tuʻu ko ha mēmipa ʻo e Siasí. ʻE lava pē ke mātuʻaki fakailifia ʻi he taimi ʻe niʻihi! Ka ʻi he taimi ʻoku tau fakafofongaʻi ai ʻa e ʻOtuá, ʻe lava hotau ngaahi laumālié ʻo ulo atu ko ha ngaahi maama ki māmani.