ការរៀបចំខ្លួនសម្រាប់ជីវិត
ថ្ងៃដំបូងរបស់ខ្ញុំ នៅថ្នាក់កូរ៉ូមអែលឌើរ
អ្នកនិពន្ធរស់នៅរដ្ឋ កាលីហ្វូញ៉ា ស.រ.អា. ។
ខ្ញុំនៅក្មេង និងជាអែលឌើរថ្មីម្នាក់ ។ តើខ្ញុំត្រូវផ្តល់អ្វីខ្លះដល់កូរ៉ុមអែលឌើរ ? ខ្ញុំឃើញថា ខ្ញុំមានអ្វីៗជាច្រើនដើម្បីចែកចាយ !
ខ្ញុំពុំសូវជាភ័យប៉ុន្មានទេ ដើម្បីចូលរួមថ្នាក់កូរ៉ុមអែលឌើរ ដោយសារខ្ញុំទទួលអារម្មណ៍ថា ខ្ញុំបានដឹងអំពីអ្វីដែលរំពឹងទុក ។ ខ្ញុំក៏ស្គាល់មនុស្សគ្រប់គ្នានៅក្នុងកូរ៉ុមអែលឌើរនៅវួដរបស់ខ្ញុំផងដែរ ។ ពួកគាត់ជាមិត្តភក្តិរបស់ឪពុកខ្ញុំ ហើយជាបុរសដែលខ្ញុំគោរពទុកដូចជាអ្នកប្រឹក្សាយោបល់ ។ ខ្ញុំបានដឹងថា ពួកគាត់រីករាយជួយខ្ញុំឲ្យយល់រឿងនានា ដូច្នេះវាពុំមែនជាការភ័យឡើយដើម្បីចូលរួមជាមួយពួកគាត់នៅក្នុងថ្នាក់កូរ៉ុមអែលឌើរនោះ ។
អ្វីមួយដែលធ្វើឲ្យមានការភិតភ័យបន្តិចនោះគឺការចូលរួមចំណែកក្នុងមេរៀន ។ គ្រាដំបូងវាពិបាកដែលខ្ញុំគិតថា តើខ្ញុំអាចផ្តល់អ្វីៗដល់ពួកបុរសដែលមានបទពិសោធន៍ជីវិត និងមានប្រាជ្ញាច្រើនជាងខ្ញុំនោះ ។
វាខុសគ្នា ប៉ុន្តែវាដូចគ្នា
ថ្នាក់កូរ៉ុមអែលឌើរគឺខុសពីថ្នាក់កូរ៉ុមសង្ឃយ៉ាងខ្លាំង ។ ក្រៅពីមនុស្សដែលមានអាយុស្របាលអ្នក អ្នកបែរជានៅជាមួយនឹងមនុស្សពេញវ័យ ។ នៅពីរបីលើកដំបូងដែលខ្ញុំបានទៅថ្នាក់នោះ ខ្ញុំពិតជាពុំហ៊ាននិយាយអ្វីសោះ ។ ខ្ញុំបារម្ភថា ខ្ញុំនៅក្មេងពេក ហើយគ្មានតម្រិះគ្រប់គ្រាន់ដើម្បីចូលរួមចំណែក ។
ប៉ុន្តែកាលណាខ្ញុំកាន់តែចូលរួម នោះខ្ញុំកាន់តែមានអារម្មណ៍សុខស្រួល ហើយកាលណាខ្ញុំកាន់តែដឹងថា ទោះជាអ្នកអាយុប៉ុន្មានក្តី ខ្ញុំកាន់តែដឹងថា មនុស្សគ្រប់គ្នាមានអ្វីមួយដើម្បីចូលរួមចំណែក ។ មនុស្សម្នាក់ៗមានបទពិសោធន៍ផ្សេងគ្នាជាមួយនឹងដំណឹងល្អ ហើយមនុស្សម្នាក់ៗមានកម្រិតនៃការយល់ដឹងផ្សេងៗគ្នាអំពីគោលការណ៍ផ្សេងៗ ។
ខ្ញុំមានអ្វីមួយចំនួនដើម្បីចែកចាយ
គ្រាមួយពេលយើងកំពុងតែនិយាយអំពីដង្វាយធួនរបស់ព្រះអង្គសង្គ្រោះ ហើយខ្ញុំបានលើកដៃឆ្លើយ ។ ខ្ញុំបានប្រាប់អំពីអំណរគុណចំពោះដង្វាយធួនរបស់ទ្រង់ថា ព្រះយេស៊ូវគ្រីស្ទមិនគ្រាន់តែដោះលែងឲ្យយើងមានសេរីភាពឡើយ តែទ្រង់ថែមទាំងជួយយើងឲ្យខិតកាន់តែជិតទ្រង់ និងព្រះ ។ ខ្ញុំបាននិយាយអំពីទំនាក់ទំនងរបស់ខ្ញុំជាមួយព្រះវរបិតាសួគ៌ និងព្រះយេស៊ូវគ្រីស្ទ និងរបៀបដែលទំនាក់ទំនងនោះបានពង្រឹងខ្ញុំ ពេលការយល់ដឹងរបស់ខ្ញុំអំពីដង្វាយធួនមានការរីកចម្រើនឡើង ។ បន្ទាប់ពីរៀនចប់ បុរសម្នាក់បានមកជួបខ្ញុំ ហើយថ្លែងអំណរគុណចំពោះយោបល់របស់ខ្ញុំ ។ គាត់បានប្រាប់ខ្ញុំថា គាត់ពុំធ្លាប់គិតអំពីអ្វីៗទាំងនោះតាមរបៀបដែលខ្ញុំបាននិយាយឡើយ ហើយគាត់ពិតជាមានអំណរគុណចំពោះការយល់ដឹងរបស់ខ្ញុំ ។
ការបង្រៀនតាមផ្ទះគឺអស្ចារ្យណាស់ !
នៅក្នុងថ្នាក់កូរ៉ុមអែលឌើរ អ្នកពុំគ្រាន់តែរៀនពីគ្រូបង្រៀនឡើយ អ្នកក៏រៀនពីព្រះវិញ្ញាណ និងមនុស្សគ្រប់គ្នានៅក្នុងកូរ៉ុមផងដែរ ។ ទស្សនៈវិស័យទាំងអស់នោះជួយអ្នកឲ្យទទួលបានការយល់ដឹងកាន់តែប្រសើរឡើងលើរឿងនានាដែលអ្នកត្រូវបានបង្រៀន ។ ហើយវាជួយឲ្យអ្នកក្លាយជាអ្នកបម្រើកាន់តែប្រសើរឡើងរបស់ព្រះអម្ចាស់ ។ ឧទាហរណ៍ ចាប់តាំងពីខ្ញុំក្លាយជាអែលឌើរមក ខ្ញុំបានចាប់ផ្តើមចូលចិត្តការបង្រៀនតាមផ្ទះកាន់តែខ្លាំងឡើង ! ខ្ញុំគិតថា វាកាន់តែសំខាន់ខ្លាំងឡើង ដោយសារខ្ញុំដឹងថា ពេលខ្ញុំក្លាយជាអ្នកផ្សព្វផ្សាយសាសនានៅរយៈពេលពីរបីខែទៀត នោះខ្ញុំនឹងជួបមនុស្ស ហើយចែកចាយសារលិខិតដំណឹងល្អជាមួយពួកគេ គឺដូចជាពេលដែលខ្ញុំធ្វើការបង្រៀនតាមផ្ទះផងដែរ ។ ជំនួសឲ្យការគ្រាន់តែអង្គុយនៅទីនោះ ហើយឲ្យដៃគូរបស់ខ្ញុំបង្រៀនអ្វីៗទាំងអស់ នោះខ្ញុំបានចាប់ផ្តើមរៀបចំសម្រាប់ការជួបរបស់យើង ។ ខ្ញុំត្រូវប្រាកដថា ខ្ញុំហ៊ាននិយាយ ។ ខ្ញុំដឹងថា វាល្អដើម្បីរៀបចំបេសកកម្មរបស់ខ្ញុំ ប៉ុន្តែវាក៏ធ្វើឲ្យការបង្រៀនតាមផ្ទះប្រែកាន់តែមានអត្ថន័យចំពោះខ្ញុំផងដែរ ។ ឥឡូវនេះខ្ញុំមានអំណរគុណកាន់តែខ្លាំងដល់មនុស្សនៅក្នុងវួដរបស់ខ្ញុំ និងមនុស្សដែលខ្ញុំបង្រៀនតាមផ្ទះ ។
ប្រសិនបើខ្ញុំអាចធ្វើបាន នោះអ្នកក៏អាចធ្វើបានផងដែរ
អ្នកពុំចាំបាច់ភ័យខ្លាចនឹងកូរ៉ុមអែលឌើរឡើយ ប៉ុន្តែអ្នកអាចទន្ទឹងរង់ចាំយ៉ាងពិតប្រាកដ ដើម្បីស្តាប់ប្រធានបទដែលមានប្រាជ្ញាថែមទៀត ដែលជាប្រធានបទដែលអ្នកកំពុងរៀន ។ អ្នកអាចទន្ទឹងរង់ចាំដើម្បីក្លាយជាគ្រូបង្រៀន អ្នកដឹកនាំ និងអ្នកបម្រើរបស់ព្រះអម្ចាស់កាន់តែប្រសើរឡើង ។ ហើយរឿងនោះគឺអស្ចារ្យណាស់ !