O Le Iloaina o le Faaola
E alala le tusitala i Iuta, ISA.
A o e aoao e uiga ia Iesu Keriso, e te valaauliaina Lona filemu ma Lona i ai i lou olaga.
Auiliiiga mai le O Fea le Toaiva, saunia e Liz Lemon Swindle
Vaai faalemafaufau i le faitauina o mea uma e uiga i le Faaola i tusitusiga paia—o le Tusi Paia, o le Tusi a Mamona, o le Mataupu Faavae ma Feagaiga, ma le Penina Tau Tele. E fai atu foi o le tele o le taimi ma galuega! Ae ia Ianuari 2017, na tuu mai ai e Peresitene Russell M. Nelson, se lu’i ia faia le mea tonu lena—ia suesue mea uma na fetalaia ma sa faia e Iesu i tusitusiga faavae. Na saunoa mai Peresitene Nelson o lona faamaeaina o lena galuega faatino sa avea ai o ia “ma se tagata ua ese.” Sa le gata ina ia aoaoina isi mau mea e uiga ia Iesu Keriso ae sa ia lagonaina foi le toe faafouina o lona tuuto atu ia te Ia.1
E mafai foi e oe ona e latalata atili atu ia Keriso a o e aoao e uiga ia te Ia. O le suesueina o Lona soifuaga ma faamoemoega e valaaulia ai Lona filemu i lou olaga ma fesoasoani e te iloa ai o Ia ma le Tama Faalelagi. Vaai pe na faapefea ona tali e nei talavou ni fesili se lua: (1) O le a lau tala faatusi paia e uiga i le Faaola e sili ona e fiafia i ai ma aisea? (2) Ma o faapefea ona aumaia e au suesuega o le talalelei le filemu ia te oe?
Ou te fiafia i le tala i lepela e toa 10 aua sa faaali atu e Keriso le alofa faateleina i le lepela sa faafetai atu ia te Ia. Na Ia fetalai, “Ua e ola i lou faatuatua” (Luka 17:19; tagai fuaiupu 11–19). Ou te fiafia lava i le agalelei faamaoni e faaali atu e Ia i tagata uma.
Ona o ni faalavelave matuia talu ai nei i le matou aoga, ua manaomia e tagata uma iina le tele o le filemu ma faamafanafanaga. Ua ou maua le malosi ma le filemu i a’u suesuega i le seminare. E faia e faiaoga seminare ia tusitusiga paia ma le talalelei ia matua patino lava mo tagata uma. O le manaia ia o le vaai atu i le esesega o le potuaoga seminare pe a faatusatusa i se potuaoga masani. E i ai se lagona ese iina lea e aumaia ai le filemu.
Gabriel S., 16 tausaga, Colorado, ISA
O le tala ia Alema e uiga i le faatuatua ma le afioga a le Atua (tagai Alema 32:18–43) na aoaoina ai au afai tatou te totoina le alofa, tatou mauaina foi le alofa. Pei ona faamalamalama atu e Alema i le au sa Sorama, o le faatuatua e pei o se fatu. O le talitonu lea i se mea ua moni e aunoa ma le i ai iina e vaai i ai. E tupu le faatuatua pe a i ai i se tagata le manao e talitonu ma faalogo i le afioga a le Atua. O nei mea uma ua fesoasoani ia ou toafilemu ai, faaamalosia lo’u loto, ma maua ai se molimau e silasila mai le Tama Faalelagi ia te a’u i fofoga o le alofa ma le alofa mutimutivale.
A o ou suesue i tusitusiga paia i aso taitasi, ua sili atu lo’u malamalama i le alofa o lo tatou Faaola mo i tatou taitoatasi. Ua fesoasoani lea malamalama ia te au e faamalamalama atu ai i au uo i le aoga e le o tuua na o i latou pe a i ai o latou faafitauli aua o loo i ai se Atua e alofa ia i tatou.
Maria D., 17 tausaga, Guadalajara, Sepania
Auiliiliga mai le Keriso ma Tamaiti o le Tusi a Mamona, saunia e Del Parson.
Ou te fiafia i le 3 Nifae 17 ina ua asiasi atu le Faaola i Amerika ma valaaulia tamaiti e o mai ia te Ia. Ua nofonofo faatasi o Ia ma i latou ma faaalu lona taimi ma i latou taitoatasi. O se tala ofoofogia lena ia te au, ua faailoa mai ai o ai Iesu Keriso ma le tele o Lona alofa mo i tatou taitoatasi. Ou te talitonu o le a nofo foi o Ia ma i tatou taitoatasi pe a tatou manaomia Lana fesoasoani.
O le tausaga lenei sa ou lu’iina a’u lava ia faitau se itulau o tusitusiga paia i aso taitasi. Ina ua ou faia lena mea, sa oo ina ou sagisagi atu i ai i aso uma. Ua tele naua mea ua ou aoaoina mai upu ma tala o i tusitusiga paia a o ou taumafai e faaalu se taimi ia malamalama ai i ai, ma ua ou latalata atili i lo’u Tama Faalelagi ma le Faaola a o ou aoaoina foi e uiga ia te i La’ua. Ua aumaia e lena mea le tele o le filemu i lo’u olaga.
Anna C., 16 tausaga, Montana, ISA
Ou te fiafia ina ua afio mai Keriso i Amerika, ma fesili pe i ai nisi e mama’i ma mafatia o i latou, ona [Ia] faamaloloina lea o i latou. Ona Ia faamanuia lea o tamaiti laiti. (Tagai 3 Nifae 17.) Ou te manatu o se tala manaia ma le mamana tele. Ou te fiafia lava i tamaiti laiti, ma ou te fiafia pe a avatu e tagata ia i latou se alofa faaopoopo, aua e ese le mama o tamaiti. Ua ta’u mai e le tala ia te au le loloto o le alofa o le Faaola mo i tatou. Talu ai sa lava Lona alofa i tagata i lena taimi na faia ai mea uma sa Ia faia, e mafai foi ona Ia alofa ia i tatou i le taimi nei.
Fai mai le Isaia 53:3 o le Faaola “o se tagata o le faanoanoa, e masani foi ma le tiga.” Pe a ou mafaufau e uiga i le Togiola a Keriso, i le mea na Ia oo i ai mo i tatou, ma le auala e mafai ona faamagaloina ai au pe a ou salamo i a’u agasala, ou te lagonaina lava le toafilemu. E toatele tagata i le Tusi a Mamona—o atalii o Mosaea, Amona, ma Alema le Itiiti—sa gaoa o latou olaga i aso ua mavae, ae sa mafai ona faamagaloina i latou. Sa latou liliu atu ia Keriso, salamo, ma avea o ni faataitaiga maoae e mafai ona tatou aoao mai ai i le taimi nei. E mafanafana ia te au le iloa e mafai foi ona faamagaloina au.
Alina T., 18 tausaga, Oregon, ISA
O la’u tala faatusi paia e sili ona ou fiafia i ai e uiga ia Iesu, o le taimi lea na Ia faaliliuina ai le vai e avea ma uaina i se faaipoipoga, i le fautuaga a Lona tina (tagai Ioane 2:1–11). E sili ona ou fiafia i ai aua o loo faaalia i le tala le faaaloalo o Iesu mo tamaitai aemaise ai o Lona tina. O lea tala ua faamalosiauina ai fanau ia usiusitai i o latou matua, e le ona o le fefefe ae ona o le tele naua o le alofa. O le faataitaiga a Iesu Keriso o le mea lea e tatau i tagata uma ona taumafai e fai. E lei uma Lona alofa i Lona tina, e le tatau foi ona uma lo tatou alolofa i o tatou matua. O la’u fuaitau foi e sili ona ou fiafia i ai aua o Lana vavega o se faatinoga o le auauna atu, ma e mafai foi e i tatou ona faia vavega e ala i le fesoasoani atu i isi.
O le tala lea ma isi tala i tusitusiga paia ua aumaia ai ia te au le filemu. O se mea e mafanafana tele le iloa afai ou te taumafai e le aunoa e aoao e uiga ia Keriso ma mulimuli i Ana aoaoga, e mafai ona ou toefoi atu i lo tatou Tama Faalelagi alofa i se aso.
Anne R., 17 tausaga, Victoria, Ausetalia
Ou te fiafia i le tala i le taimi na savali ai Keriso i luga o le vai. Ua savali atu o Ia i le vaa sa i ai uma le au Aposetolo, ma ua Ia valaaulia Peteru e sau i fafo i luga o le vai. Sa i ai muamua ia Peteru le faatuatua ma mafai ai ona savali i luga o le vai, ona mou ese lea o lona faatuatua ma amata ai ona magoto. Ona aapa atu lea o le aao o Keriso ma toso ae o ia (tagai Mataio 14:26–33). E tulaga ese le tala ia te au aua e i ai lava e le aunoa le aao o Keriso i o tatou olaga—Na te puipuia i tatou.
Ua fesoasoani a’u suesuega ia te au aua ou te suesueina a’u tusitusiga paia i le taeao ma e lelei atili ai lo’u aso. A ou le suesue, e le fiafia pe malie lo’u aso—e matua le lagonaina lava se lelei. A ou faitauina e le aunoa a’u tusitusiga paia i le taeao, e matuai lelei lava lo’u aso aua ua ou valaaulia le Agaga Paia e mafuta ma au i le aso.
James K., 17 tausaga, Alaska, ISA
Auiliiliga mai le Le Alii e, Ia E Laveai Mai Au saunia e Gary L. Kapp
Ou te fiafia i le tala ia Keriso ma le taulealea mauoa (tagai Mareko 10:17–22). E aumaia ai ia te au le tele o se malamalamaaga ma le vaaiga mamao e uiga i le faamuamua o le Atua i mea uma. O le talosagaina e faatau atu oa uma faalelalolagi o se talosaga faigata tele mo le toetoe o tagata uma. Ae ou te manatu o le naunau e faamuamua le Atua i lo oa o se tasi lea o mea e tatau ia i tatou taitoatasi ona iloa i le olaga. O le alofa le faatuaoia o Iesu Keriso mo i tatou e matua tulaga ese moni lava. E mautinoa lava le sili atu nai lo soo se aofaiga o tupe po o meatotino tatou te maua i lenei olaga.
O le faitauina o tusitusiga paia e aumaia ai ia te au le filemu ma le mafanafana, faapea foi le poto ma le malamalama sili atu. E ui atonu ou te le vave lagonaina i taimi uma le mana o le suesue i tusitusiga paia, ae ou te iloa o le faitauina o tusitusiga paia e lelei ona faatosinaga i lo’u olaga ma fesoasoani ia ou lagona ai le Agaga ma iloa Ana uunaiga.
Yuzhen C., 19 tausaga, Taichung, Taiuani
Auiliiliga mai le Ua Pa’i Atu le Fafine i le Tuupao o le Ofu o Keriso, saunia e Heidi Daynes Darley
A o malaga atu Keriso i Lona ala e vaai se teineitiiti talavou o le a oti, sa i ai se fafine na maua i le punatoto sa na ona pa’i atu i Ona ofu ma faamaloloina ai. Ua faliu Keriso ma talanoa atu ia te ia ina ua iloa na pa’i atu o ia ia te Ia (tagai Luka 8:43–48). E ui ina sa alu atu e fesoasoani i se isi tagata, ae na faaavanoa lava e Keriso se taimi mo le fafine foi. E faaavanoa foi e Keriso le taimi mo i tatou uma.
E matuai pisi lava lo’u olaga, ou te tamoe i le aoga po o vasega palei po o isi feau. I na taimi uma, ou te le maua se taimi na o au pe lagonaina le filemu. A faitau a’u tusitusiga paia pe fai sa’u tatalo, ou te lagonaina lava le filemu. E manaia le lagona faapena ma maua sina mapu mai le gaogaosa. I na taimi o le filemu, ou te latalata atili ai lava i le Faaola ma ou tuputupu ae i le talalelei.
Zoen B., 17 tausaga, Iuta, ISA