O Le Fale Seevae o Abuelo
E alala le tusitala i Iuta, ISA.
“E te iloa oe, e tatau ona tatou faapei atili o le seevae lea,” o le tala lea a Tamamatua.
“‘Ou te faamalie atu’ e le faigofie ona fai atu” (Children’s Songbook, 98).
Sa tatala e Mikueli le faitotoa i le fale seevae o lona abuelo (lona tamamatua). Sa ia sosogiina le pa’u sa galue ai Abuelo. O se tasi o manogi e ese le fiafia i ai.
“Malo, Abuelo!”
Sa tootuli Abuelo ma tusi le vae o se tagata faatau i luga o se fasi pepa. Sa le’i ea a’e o ia i luga. Sa lei lelei tele le faalogo a Abuelo.
Sa nofo ifo i lalo Mikueli i se nofoa umi. Sa ia tilotilo atu i le faaputuga o pa’u ua uma ona tatipi. Sa ia taumanatunatu i mea o le a faia e Abuelo i pa’u taitasi, e faaaoga ai lana samala ma le palaea.
Sa faamanatu atu e meafaigaluega ia Mikueli se isi mea sa ia fiafia i ai. E masani ona tuu atu e Abuelo ia te ia se lole pe a fesoasoani Mikueli e faamama le fale.
Ae o lea ua fiaai nei Mikueli! Sa ia iloa e le tatau ona ia avea se lole e aunoa ma le fesili, ae sa foliga mai o le a pisi Abuelo mo se taimi. “Atonu ou te le tau faatali,” o mafaufauga ia o Mikueli.
Sa aapa ifo Mikueli i lalo o le fata mo le fagu lole. Sa tumu i lole e fiafia i ai—e suamalie ma feu i le pauta feu! A o ia tatalaina, sa fai si le mautonu o Mikueli. Ae sa matua foliga manaia mai le lole. Sa ia faatopetope ma tuu i lona gutu.
E lei leva ae alu le tagata faatau. Sa piki e Abuelo se fasi pa’u ma lolo i totonu o ni vai. Sa fesoasoani e faavaivai ai le pa’u ma faigofie ai ona faaaoga.
Sa folopatato e Mikueli le mea na totoe o le lole i le vave sa ia mafaia. Ona ia savali atu lea ia Abuelo.
“Talofa!” Sa fai atu ai Abuelo ma ataata. “Ua ou fiafia lava ua e sau e vaai au.”
Sa fusi atu e Mikueli ia Abuelo. Sa ia faamoemoe e lei mafai ona iloa e Abuelo sa ia ‘aia se fasi lole. Sa tulei ese e Mikueli lea popole.
“E foliga mai ua e pisi i le aso,” o le tala lea a Mikueli, ma tusi lona lima i le faaputuga pa’u. “E te manaomia se fesoasoani?”
“Ioe! E mafai ona e pasi maia le filo lena?”
Sa aapa atu Mikeuli i se fasi filo umi. Sa ia suluina i le va o ona lima. Sa malo nai lo lona foliga mai.
“Oka, ta’i malosi tele.”
Sa ataata Abuelo. “E tatau ona malo, ia umi se taimi e faaaoga ai.” Sa tosoina e Abuelo le filo i le pa’u. Ona i ai lea i ona foliga le pupula lea e faaigoa i nisi taimi e Mama o le vaai “Poto a Abuelo”.
“E te iloa oe, e tatau ona tatou faapei atili o le seevae lea,” o le tala lea a Abuelo a o lue atu lona ulu.
Sa faapuiti atu le vaai a Mikueli i le pa’u. “Um. E tatau?”
“Ioe, e sa’o. E tatau ona tumau lo tatou malolosi. O lena mea o le a le mafai ai e faaosoosoga a Satani ona tatou pauu ese ai.”
Sa emo mai le lole mumu i le mafaufau o Mikueli. Sa ia iloa e tatau ona ia ta’uina ia Abuelo.
Sa aveese mai e Abuelo se seevae tuai mai le fata. “Vaai i le pu tele lea?”
Atonu sa mafai ona ofi lelei ai le lima o Mikueli i le pu. “Ioe.”
“Sa laitiiti lava le pu lea, ma semanu e faigofie ona toe fai. Ae sa latou faatalitali, ia lea la o le a sili ona faigata ona toe fai. O mausa leaga ma filifiliga leaga e faapei o le pu lena. E sili le vave faaleleia.”
Sa toe lue atu le ulu o Abuelo, ma sa liua le vaai Poto a Abuelo i se ataata. Sa faaauau pea ona la talanoa a o galue ia Abuelo. O le taimi atoa, sa mafaufau ai pea Mikueli i le lole laau mumu.
Ina ua uma galuega a Abuelo, sa fesoasoani Mikueli ia te ia e faamama. Ona aapa atu lea o Abuelo i lana fagu lole.
Na iu ina le mafai e Mikueli ona toe taofiofi. “Sa ou aveina se tasi o au lole!” na masua atu ai.
Sa tuu e Abuelo le fagu i lalo. “O le a lau tala?”
Sa ta’u atu e Mikueli ia te ia e uiga i le aveina o le lole e aunoa ma le fesili. “Ou te matua faamalie atu, Abuelo! Ou te le toe faia lava, ou te folafola atu!”
Sa tuu atu e Abuelo ia Mikueli se opo lapo’a. Sa matua lelei lagona o Mikueli.
“Faafetai atu i lou faamaoni. E sili ona taua lena ia te au nai lo se isi lava mea.”
I le savaliga i le fale, sa lagona e Mikueli ua pei lava o ia o se tasi o pea seevae fou a Abuelo Malosi i le mea e gata ai, ma ua saunia mo le olaga!