Ua Sili Atu le Mea Ua Mauaina e le Tagata Samoa na Liliu Mai Nai lo le Na o Lana Galuega na Moemiti i Ai i Iapani
Semanu e ese se mea e oo i ai le olaga o le tagata fai musika o Elia Gaitau.
O le sefulutasi tausaga ua tea, sa ofo atu ai ia Elia se galuega e faigaluega ai i luga o se vaa tele la’upasese. Na ia teena ona sa ia lagona “e le sa’o”.
O ni nai vaiaso mulimuli ane, sa talosagaina ai o ia e alu i Iapani e tapiano i se faletalimalo. E lei toe tutusa lona olaga talu mai lena taimi, o lana tala lea.
O Elia e sau mai Henderson, Niu Sila ae o loo aumau i Tokyo, Iapani lea o loo ia faiaoga ai i le musika ma tapiano i faleaiga, kalapu, faafiafiaga ma faaipoipoga.
Na te tusiaina foi ana lava musika ma o loo galue nei e pue sana lipine.
O Iapani lea na feiloai ai Elia, e 44 tausaga, i lona toalua o Naoko ma faaauau ai se matata o se fai musika.
“Sa ou amataina se olaga fou i lo’u sau i Iapani,” na ia fai mai ai.
“Ua faamanuiaina a’u i le mafai ona ou tapiano ma fesoasoani i tagata ia lagona le agaga—peitai ua na o se meafaigaluega lea ua faamanuiaina ai a’u e le Tama Faalelagi. E tofu tagata uma ma se taleni—o lea ou te taumafai ai e faaaoga la’u [taleni].”
Sa ola ae Elia i se lotu Samoa ae na auai i Le Ekalesia a Iesu Keriso o le Au Paia o Aso e Gata Ai ina ua 20 ona tausaga. Sa amata ona ia fia suesue ina ua ia feiloai i se tagata musika a le AAG i le aoga maualuga o le na “tumu i le malamalama”.
Sa ia tapiano talu mai lena taimi e ui e lei aoaoina aloaia o ia.
“O le taina o le piano sa avea lava pea o se auala e faailoa atu ai lou lava tagata,” o lana tala lea.
“Ou te manatua le saofai i autafa o le piano i Aso Sa ma na o le mafaufau e uiga i le Atua. Ona amata lea ona ou taina [le piano]. Ia te a’u lava ia, o se auala lea e fesootai ai ma le Atua.”
O Elia o se tagata e talitonu tele i le ola tutoatasi faaletino ma faaleagaga.
“O le taina o le piano ua fesoasoani ia te a’u i le tausiga o lo’u toalua ma lo’u atalii ma ou te lei mafaufauina o se mea e mafai ona ou faia,” na ia fai mai ai.
“Ua aoaoina i tatou i le Ekalesia ina ia ola tutoatasi. Mo a’u, o le tausia lea o poloaiga, faamamaluina o o’u tiute o se umia le perisitua faapea ma le faia o lotu ma le faitauga o tusitusiga paia.
“E oo mai vavega pe a tatou faia le mea sa’o.”
E tele tagata na avea ma faataitaiga ia Elia i lona tuputupu ae o e na uunaia o ia e taulai atu i le musika e avea ma se matata. Na te uunaia isi ina ia galulue i a latou taleni ae na fai mai e le faigofie.
“E faatatau i le aoaoina o lau matata, o le faaaloalo lea i isi, faatino, ma ia sili atu ona lelei. O se taumafaiga faifai pea o le Tulaga aupito silisili.”
Fai mai o ia o le faamanuiaga silisili o le mafai lea ona faaaoga o lana taleni e auauna atu ai ma tausia lona aiga.
“O le fetagisi o tagata ma le latou o mai ma fai mai ia te oe ua e pai atu ia i latou e ala i lau musika. O se faamalo sili e mafai ona e maua i le avea ai ma se tagata musika, o le mafai lea ona pa’i atu lau musika i se tasi.”