E Mafai Faapefea Ona Ou Faaleleia Lo’u Suesue i Tusitusiga Paia?
Sarah Keenan
Iuta, ISA
Ata na tusia e Bradley Clark
E faatoa tolu masina talu ona ou foi mai i le fale mai la’u misiona ae ua amata ona ou tauivi ma le faitauga o tusitusiga paia.
Sa ou faitauina tusitusiga paia i aso uma o la’u misiona ma sa ou folafola atu e faaauau pea pe a ou foi mai i le fale. Ae ua mavae atu taimi, sa foliga mai ua i ai mea e faalavefau. A le o le tele naua o a’u meaaoga, o le pisi tele foi e faigaluega, pe sa na o lo’u le lava lava. O nei ‘alofaga taitasi, sa faaitiitia ai a’u faitauga o tusitusiga paia seia oo lava ina ua seasea lava ona ou faitau.
Sa ou susueina le Tusi a Mamona i se tasi po ma fuafua e faitau na o se fuaiupu se tasi. O le fuaiupu na ou faitauina na faamanatu mai ai ia te au o tusitusiga paia o loo i ai ”le afioga malie a le Atua, ioe, le afioga lea e faamalolo ai le agaga ua manu’alia” (Iakopo 2:8).
Sa ou manatunatu loloto i lenei fuaiupu ma iloa ai le aafiaga le lelei i le faatuatuanai o le suesue i tusitusiga paia, ua oo mai ia te au. Sa sili ona ou lagonaina le faaatu i le aoga, ua le fiafia i le lotu, ma ua atili ona taumamao ese mai le Atua. Sa manaomia e lo’u agaga le afioga faamalolo a le Atua o loo maua i tusitusiga paia. Sa ou iloaina sa ou manaomia ona toefaatulaga a’u mea e faamuamua.
Sa ou liliu atu i a’u uo, aiga, ma taitai o le Ekalesia e fesili i ai mo fautuaga e faaleleia ai a’u suesuega o tusitusiga paia. E tolu mea na ou mauaina na aoga.
Muamua, sa ou iloaina o le suesue i tusitusiga paia i le po sa lei aoga mo au. O le suesue i le taeao na mafai ai ona ou mafaufau loloto i le aso atoa i aoaoga faavae ma mataupu faavae sa ou faitauina i le taeao.
Lona lua, ua aoaoina i tatou e faitau tusitusiga paia ma o tatou aiga, ae talu ai sa ou i le kolisi ma ou te le o i ai i lo’u aiga, sa amata ai ona matou faitauina tusitusiga paia ma i latou sa matou potu ma a’u uo. Sa fesoasoani lenei mea ou te tali atu ai, ma sa faamatua’ia ai ni talanoaga sili o le talalelei.
Lona tolu, sa amata ona ou tusia i lalo uunaiga ma mafaufauga sa ou mauaina i le taimi o a’u suesuega o tusitusiga paia. Sa fesoasaoni lenei mea ou te taulai atu ai i mea sa ou faitauina ma sa fesoasoani ou te iloa atili ai le siufofoga o le Agaga.
O le taimi lava na toe avea ai le suesue o tusitusiga paia o se faamuamua i lo’u olaga, sa ou iloa ai sa tele atu lo’u taimi ma le malosi na ou maua e faataunuu ai mea uma sa manaomia ona ou faia. O le mea aupito taua, sa ou lagonaina le toe latalata atu i le Atua a o ou faitau ma mafaufau loloto i mau. O le taimi nei a ou faaaluina se taimi i tusitusiga paia, ou te lagonaina le filemu ma maua le faamalologa mo lo’u agaga.