O Le Nofoaga Lenei
Simeon Nnah
Aba, Nigeria
Ata na tusia e Allen Garns
O lo’u tama, o se Kerisiano lotofaamaoni, sa aoaoina au ia ou faatuatua ia Iesu Keriso. O lena faatuatua na fesoasoani ia te au, na ou sao ai mai le taua e tolu tausaga a Nigeria i le faaiuga o le vaitau o le 1960 ao ou i ai i le au fitafita. Peitai, mulimuli ae, sa oo ina ou fenumiai ma ou le toe alu ai i le lotu.
Ina ua ou sau i le Iunaite Setete i le 1981 mo aoaoga, sa ou lagonaina sa ou manaomia le Atua i lo’u olaga. E lua tausaga o ou auai i lotu eseese i Boston, Massachusetts, ae leai se lotu na ou tosina i ai. Ou te lei lagonaina le Agaga, o lea sa ou le toe vaavaai solo ai.
E lei leva ona faatasi mai lo’u toalua o Mabel mai Nigeria i le 1984, ae amata ona ou maua se lagona malosi e toe faalatalata atu i le Atua ma ia ou auai i se ekalesia. Sa i ai se uo na asiasi mai Nigeria na te lei iloaina sa ou vaavaai mo se lotu, ae na ia faamatala mai ia te au e uiga i se ekalesia sa ia faalogo i ai faapea e i ai se tusi e igoa o le Tusi a Mamona.
Ina ua uma lena, sa faaauau pea ona ou vaavaai mo ni ekalesia. Sa ou maua se lotu e igoa O Le Ekalesia a Iesu Keriso o le Au Paia o Aso e Gata Ai. O le upu au paia na tosina i ai o’u [lagona]. Sa ou le iloaina e i ai se ekalesia o ona tagata e faaigoa o le au paia. Sa tonu ia te au i lena Aso Sa o le a ou alu e siaki.
I le sauniga faamanatuga sa ou auai, sa usuina e le faapotopotoga ia viiga i se agaga migao, sa faamanuia e le au ositaulaga le falaoa ma le vai, ma sa taitaia le sauniga i se faatulagaga maopoopo ma le agaga maualalo. Mulimuli ane, a o ou savali atu i le faapaologa ma mafaufau i le sauniga, sa ou faalogoina lo’u igoa.
“Simeona,” na fai mai le leo o le Agaga, “o le nofoaga lenei.”
O le taimi lea, na oo mai ai ni faifeautalai e toalua. Sa la faailoa mai i la’ua lava ma le Tusi a Mamona. Sa ou tilotilo atu ia te i la’ua ma fai atu, “Ou te le iloa se mea e tasi e uiga i le Tusi a Mamona, ae ou te iloa le Tusi Paia. Ua ou sauni.”
Sa amata ona la aoaoina au i le ata o le faaolataga. E lei atoa se masina mulimuli ane, ae papatisoina au. Sa auai mai lo’u toalua i le Ekalesia i se taimi e lei mamao mulimuli ane. I nai tausaga talu ona mavae lena, sa faamauina ai i ma’ua i le Malumalu o Uosigitone D.C ma sa faamauina foi ia i ma’ua le ma fanau e toalima.
I totonu o le malumalu, e tele ni mea sa faaali mai ia te au, ae o upu na ou faalogoina i lo’u uluai aso i le lotu, e tele ni taimi na faamautuina mai ai ia te au e ala i faaaliga i le malumalu: “O le nofoaga lenei.” O le aafiaga o lena faamatalaga mai le Agaga Paia na suia ai lo’u olaga e faavavau ma olaga o lo’u toalua ma la’u fanau.