Ua Filifilia e le Ofisa Tutotonu mo Auaunaga a le AAG i Samoa se Uluai Pule Tamaitai
Na faatoa tofia talu ai nei Aiolupotea Sauimalae Malolo-Chu Ling e avea ma pule o le ofisa tutotonu mo auaunaga i Samoa ma Amerika Samoa. E le na o le avea ai o Ms. Chu Ling ma uluai tamaitai ua avea ma Pule o le Ofisa Tutotonu mo Auaunaga i Samoa, ae o ia o le uluai tamaitai ua avea ma Pule o le Ofisa Tutotonu mo Auaunaga i le Eria o le Pasefika.
Sa auauna atu Malae mo le fitu tausaga ua mavae o se Pule o Mea Tautupe o le ofisa tutotonu, ae o se toe faatulagaga talu ai nei o tiutetauave i le Eria o le Pasefika atoa o le Ekalesia, ua talosagaina ai o ia ina ia faaauau pea le avea ai ma Pule o Mea Tautupe ma ua tofia foi e faaauau le tiutetauave faaopoopo o se Pule o le Ofisa Tutotonu mo Auaunaga. Ua suitulaga o ia ia Denny Afualo, o le tagata mulimuli lea o tagata e toalima na sosoo na tofia mai fafo o e na auauna atu o ni Pule o le Ofisa Tutotonu mo Auaunaga i Samoa.
O Malae e tupuga mai nuu o Vaisala ma Falelima i Savaii, ma na aotauina i le Kolisi o Samoa, mauaina le Faailoga o le Tagata Malaga mai le Iunivesite a Samoa ma mulimuli ane maua le Faailoga o le Matuaofaiva i Pulega Faapisinisi mai le Iunivesite o le Pasefika i Saute. O ia foi o se Suetusi Aloaia Lautele. O le avea ai ma se vaega o ana auaunaga mo le atunuu i le lotoifale, o ia foi o se sui o le Au Faatonu mo le Faletupe o Atiinae i Samoa.
O Sauimalae ma lona toalua, o Pulotu Lyndon Chu Ling, o loo avea ma peresitene o le Siteki a Upolu Malie ma o le CEO o le Matagaluega o Pisinisi, Ala Manuia ma Leipa [Ministry of Commerce, Industry and Labour] i Samoa, e toaono le la fanau tama. Sa ia faaalia le agaga faafetai mo le fesoasoani o lana fanau tama matutua e toatolu ia na fesoasoani i lana fanau tama laiti e toatolu, ua mafai ai e ia ma Lyndon ona tulimatai atu ia laua galuega fita ma valaauga o le ekalesia.
E fiafia o ia e faigaluega mo le Ekalesia ma fai mai e ese le manaia ma le lelei o le siosiomaga faalegaluega.
O le ofisa tutotonu mo auaunaga i Samoa o se tasi lea o le fitu (7) o ofisa tutotonu i le Pasefika i Saute. E toa 90 le aufaigaluega o loo galulue i le Ofisa Tutotonu mo Auaunaga i Samoa, ma o loo tuuina atu le tautua lagolago i taitai perisitua o le Ekalesia i Samoa ma Amerika Samoa.