O Se Lesona Ofoofogia
Saunia e Elder Valeri V. Cordón
O Le Fitugafulu
“Ou te … toina pupuni o le lagi, ma sasaa atu le manuia mo outou” (Malaki 3:10).
A o ou tuputupu ae i Kuatemala, sa i ai se falegaosimea a lo matou aiga sa faia ai ofutoniga mo au taaalo.
Sa manao lo’u tama i tamaiti o lo matou aiga e aoao e galulue malosi. Sa matou fesoasoani ia te ia i le falegaosimea. Sa tele ina ou ’afu a o ou laitiiti. Sa foliga mai o a’u lava e gaui ai mea! Ae ina ua ou matua teisi, sa tuu mai e lo’u tama ia te au e vaai ia laau suisui.
Sa totogi i matou e lo matou tama mo galuega sa matou faia. Ona ia fesili mai lea, “O a au mea o le a fai i au tupe?” Na ou iloa le tali sa’o: “Totogi la’u sefuluai ma sefe mo la’u misiona.”
Ina ua pe a ma le 13 o’u tausaga, sa tele tupe o le matou pisinisi na gau. Sa tatau ona aveese le tele o a matou laau suisui. Nai lo le luaselau tagata faigaluega, sa itiiti ifo ma le toalima. Sa latou faigaluega i le matou faletaavale i le fale.
Sa ou totogia e le aunoa la’u sefuluai, ae ou te le i matuai malamalama lava i lona taua. Ona ou aoaoina ai lea o se lesona ofoofogia. I se tasi taeao o se Aso Toonai, sa ou faalogo ai o talanoa filemu o’u matua. Sa ta’u atu e lo’u tama i lo’u tina, sa lava le tupe e totogi ai le sefuluai pe faatau ai meaai. Sa lei lava mo mea uma ia e lua. Sa ou popole. Mata o le a le mea o le a fai e lo’u tama?
I le Aso Sa sa ou vaai ai i lo’u tama o tuuina atu se teutusi i le peresitene o le matou paranesi. Sa filifili o ia e totogi le sefuluai! Sa ou fiafia sa ia faia, ae sa ou popole foi. Mata o le a le matou mea a ‘ai?
I le taeao na sosoo ai, na tuitui mai ai ni tagata i lo matou faitotoa. Sa latou fai atu i lo’u tama ua latou manaomia vave lava ni toniga. E masani ona totogi e tagata i matou pe a uma se oka. Ae na totogi e nei tagata lo’u tama i lena lava aso, ae matou te lei amataina ona su’i toniga!
I se tasi faaiuga o se vaiaso, sa ou aoaoina ai se lesona matagofie sa tumau ia te au i lo’u olaga atoa. E fesoasoani le tulafono o le sefuluai e fausia lo tatou faatuatua ma faaali atu lo tatou faafetai mo le Tama Faalelagi. O le totogi o le sefuluai o se faamanuiaga!