Leiloa ma toe Maua
Ou te iloa e tali mai le Tama Faalelagi i tatalo. A o nonofo lo matou aiga i Siamani, sa matou o ai i se Volksmarch i lo matou nuu. O leVolksmarch o se mea e fiafia ai uo ma tuaoi e faaalu ai se taimi e fegalegaleai fiafia ai le tasi ma le isi e ala i le o faatasi i se savaliga faanatura. Sa fai mai o’u matua e mafai ona ou savali i luma atu o le vaega faatasi ma se tasi o a’u uo, ma sa matou amata i le alasopo umi.
I ni nai minute sa le mafai ona ou iloa atu se tasi o lo’u aiga. Sa ou fai i la’u uo o le a ou nofo i le ala ma faatalitali ai i latou. E lei leva ae ua ou le toe iloa atu la’u uo po o lona aiga, ma e lei oo mai foi o’u matua. Sa na o a’u i le togavao, ma sa ou lagona le fefe. Sa tonu e fai se tatalo ia tau mai se tasi ia te a’u.
I se isi vaega o le togavao, sa lagona e lo’u tama le fai atu o le Agaga Paia, “Alu e sue lou atalii.” Sa ia lagonaina lo’u matua manaomia lava o ia, o lea sa ia toe faliu ma fai atu i lo’u tina o le a alu e sue au. I nai minute mulimuli ane, sa tamoe mai lo’u tama i le alasopo i le mea sa ou faatalitali ai ma maua ai au. Sa ou matua fiafia lava ina ua ou vaai atu i lo’u tama! Ina ua ia fai mai sa ia maua se lagona malosi o loo ou manaomia se fesoasoani, sa ou iloa ai na tali e le Tama Faalelagi la’u tatalo.
E ese lo’u fiafia i lo’u iloa po o fea lava oute i ai, e mafai ona ou talanoa i le Tama Faalelagi. O le a fesoasoani mai o Ia ia te au ia ou maua lo’u ala.