Mensahe sa Unang Kapangulohan
Samtang Dungan Kita nga Magpadayon sa Unahan
Ni Presidente Russell M. Nelson
Minahal nga kaigsoonan, mibati ako og kamapaubsanon nga makauban kamo karong buntaga. Upat ka adlaw ang milabay atong gilubong ang halangdon kaayo nga tawo, usa ka propeta sa Dios—si Presidente Thomas S. Monson. Walay pulong nga tukmang makahulagway sa kamahinungdanon ug katalagsaon sa iyang kinabuhi. Ihambin nako sa hangtud ang among panaghigalaay uban sa pasalamat sa unsay iyang gitudlo kanako. Kinahanglang motan-aw kita karon sa umaabut uban sa hingpit nga pagtuo diha ni Ginoong Jesukristo, nga maoy tag-iya niini nga Simbahan.
Duha ka adlaw ang milabay ang tanang buhi nga mga Apostoles nagpundok diha sa ibabaw nga lawak sa Templo sa Salt Lake. Didto hingpit sila nga nagkauyon sa paghimo og desisyon, una, sa pag-organisar og usab sa Unang Kapangulohan karon ug, ikaduha, nga moserbisyo ako isip Presidente sa Simbahan. Dili igo ang mga pulong aron isulti kaninyo ang akong pagbati sa dihang ang akong mga Kaigsoonan—Kaigsoonan nga naghupot sa tanang yawe sa priesthood nga gipahiuli pinaagi ni Propeta Joseph Smith niini nga dispensasyon—mibutang sa ilang mga kamot diha sa akong ulo aron sa pag-orden ug pag-set apart kanako aron mahimong Presidente sa Simbahan. Usa kadto ka sagrado ug makapainubsanon nga kasinatian.
Dayon ako nang responsibilidad ang pag-ila kinsa ang giandam sa Ginoo nga mahimo nakong mga magtatambag. Unsaon nako pagpili og duha lang sa Napulog Duha pa ka mga Apostoles, nga ang matag usa gimahal nako pag-ayo? Mapasalamaton kaayo ko sa Ginoo tungod sa pagtubag sa akong matinguhaon nga mga pag-ampo. Mapasalamaton kaayo ko nga si Presidente Dallin Harris Oaks ug Presidente Henry Bennion Eyring andam nga moserbisyo uban kanako isip Una ug Ikaduha nga mga Magtatambag. Si Presidente Dieter F. Uchtdorf mibalik sa iyang pwesto diha sa Korum sa Napulog Duha ka mga Apostoles. Nakadawat na siya og dagkong mga assignment nga haum kaayo sa iyang kwalipikasyon.
Pasidunggan nako siya ug si Presidente Eyring sa ilang talagsaong pagserbisyo isip mga magtatambag ni Presidente Monson. Makamao, mapahinunguron, ug madasigon kaayo sila. Mapasalamaton kaayo kita kanila. Ang matag usa andam nga moserbisyo karon kon diin siya labing gikinahanglan.
Isip ang Apostol nga maoy ikaduha sa seniority, si Presidente Oaks nahimo usab nga Presidente sa Korum sa Napulog Duha ka mga Apostoles. Hinoon, tungod kay gitawag siya ngadto sa Unang Kapangulohan ug subay sa han-ay sa Simbahan, si Presidente M. Russell Ballard, sunod sa seniority, moserbisyo isip Acting President niana nga korum. Ang Unang Kapangulohan makigtambayayong sa Napulog Duha sa pagtino sa kabubut-on sa Ginoo ug sa pagpauswag sa Iyang sagrado nga buhat.
Mapasalamaton kami sa inyong mga pag-ampo. Gihalad kini sa tibuok kalibutan alang kanamo. Sa buntag human sa pagkamatay ni Presidente Monson, ang usa ka sama nga pag-ampo gihalad sa usa ka kwatro anyos nga batang lalaki nga ginganlan og Benson. Mohatag ko og mga kinutlo gikan sa sulat sa iyang inahan ngadto sa akong asawa, si Wendy. Si Benson nag-ampo, “Langitnong Amahan, salamat nga makita na pag-usab ni Presidente Thomas S. Monson ang iyang asawa. Salamat sa among bag-o nga propeta. Tabangi siya nga magmaisugon ug dili mahadlok nga bag-o pa siya. Tabangi siya nga modako nga himsug ug lig-on. Tabangi siya nga makaangkon og gahum tungod kay aduna siyay priesthood. Ug tabangi mi kanunay nga mahimong maayo.”
Magpasalamat ko sa Dios alang sa mga bata nga sama niini ug sa mga ginikanan nga seryuso sa ilang pasalig sa matarung, tinuyo nga pagkaginikanan—alang sa matag ginikanan, magtutudlo, ug miyembro nga nagdala og bug-at nga palas-anon apan andam kaayo sa pagserbisyo. Sa laing pagkasulti, alang sa matag usa kaninyo, labing mapainubsanon akong nagpasalamat.
Ang Ginoo ang Nangulo
Samtang dungan kita nga magpadayon sa unahan, dapiton ko kamo sa paghunahuna sa talagsaong paagi nga gidumala sa Ginoo ang Iyang Simbahan. Kon ang usa ka Presidente sa Simbahan mamatay, walay misteryo kon si kinsa ang sunod nga tawagon nga moserbisyo niana nga kapasidad. Walay pagpapili, walay pangampanya, apan ang hilum lamang nga kalihokan sa balaan nga plano sa pagpuli, nga gihan-ay mismo sa Ginoo.
Ang matag adlaw sa pagserbisyo sa usa ka Apostol usa ka adlaw sa pagkat-on ug pagpangandam alang sa dugang nga mga responsibilidad sa umaabut. Nagkinahanglan kini og daghang dekada nga pagserbisyo aron ang usa ka Apostol mabalhin gikan sa junior nga lingkuranan ngadto sa senior nga lingkuranan diha sa pundok. Nianang panahona, makakuha siya mismo og kasinatian sa matag aspeto sa buhat sa Simbahan. Iya usab nga makaila pag-ayo ang mga katawhan sa kalibutan, lakip ang ilang kasaysayan, mga kultura, mga pinulongan samtang balik-balik siya nga motadlas sa tibuok kalibutan tungod sa mga assignment. Kini nga proseso sa pagpuli diha sa pagpangulo sa Simbahan talagsaon. Wala akoy laing nasayran nga sama niini. Dili nato kana angay nga ikatingala, kay kini ang Simbahan sa Ginoo. Wala Siya maglihok subay sa paagi sa mga tawo.
Nakaserbisyo ko sa Korum sa Napulog Duha ubos sa lima ka nangaging mga Presidente sa Simbahan. Nakita nako ang matag Presidente nga midawat og pagpadayag ug misanong niana nga pagpadayag. Ang Ginoo kanunay nga nagtudlo ug kanunay nga motudlo ug modasig sa Iyang mga propeta. Ang Ginoo ang nangulo. Kami nga gi-orden sa pagsaksi sa Iyang balaan nga ngalan sa tibuok kalibutan mopadayon sa pagtinguha nga mahibalo sa Iyang kabubut-on ug mosunod niini.
Pabilin diha sa Dalan sa Pakigsaad
Karon, ngadto sa matag miyembro sa Simbahan moingon ko, pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga bata bisan asa.
Isip bag-o nga Kapangulohan, gusto namong mosugod nga maghunahuna sa tumong. Tungod niini, namulong kami karon kaninyo gikan sa usa ka templo. Ang tumong nga gipaningkamutan sa matag usa nato mao ang matugahan og gahum diha sa balay sa Ginoo, ma-seal isip mga pamilya, matinud-anon sa mga pakigsaad sa templo nga maghimo kanatong takus sa labing mahinungdanong gasa sa Dios—ang kinabuhing dayon. Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.
Karon, kon mipahawa kamo sa dalan, dapiton ko kamo uban sa tanang paglaum sa akong kasingkasing nga balik palihug. Bisan unsa ang inyong problema, bisan unsa ang inyong mga hagit, adunay luna alang kaninyo dinhi, sa Simbahan sa Ginoo. Kamo ug ang mga henerasyon nga wala pa matawo mapanalanginan sa inyong mga buhat karon nga mobalik sa dalan sa pakigsaad. Ang atong Amahan sa Langit nagpangga sa Iyang mga anak, ug gusto Niya nga ang matag usa kanato mobalik ngadto Kaniya. Kini usa ka dakong tumong sa Ang Simbahan ni Jesukristo sa mga Santos sa Ulahing mga Adlaw—sa pagtabang sa matag usa kanato nga makapauli.
Akong ipahayag ang akong dakong gugma alang kaninyo—gugma nga milambo sulod sa daghang mga dekada sa pakighimamat kaninyo, pagsimba uban kaninyo, ug pag-alagad kaninyo. Ang atong balaang sugo mao ang pag-adto sa matag nasud, kaliwatan, pinulongan, ug katawhan, nagtabang sa pag-andam sa kalibutan alang sa Ikaduhang Pag-anhi sa Ginoo. Kini atong buhaton uban sa hugot nga pagtuo diha ni Jesukristo, nasayud nga Siya ang nagdumala. Kini Iyang Buhat ug Iyang Simbahan. Kita Iyang mga sulugoon.
Akong ipahayag ang akong debosyon ngadto sa Dios nga atong Mahangturong Amahan ug sa Iyang Anak, si Jesukristo. Nakaila ako Kanila, naghigugma Kanila, ug mopasalig sa pag-alagad Kanila—ug kaninyo—sa matag ginhawa nga nahabilin sa akong kinabuhi. Sa sagradong pangalan ni Jesukristo, amen.