Ko ʻEtau Tafaʻakí
Maʻu Ha Ngaahi Kaungāmeʻa Foʻou
ʻI hono talamai ʻe heʻeku mātuʻá ʻe hiki homau fāmilí, ne u vēkeveke ke maʻu ha ngaahi kaungāmeʻa foʻou. ʻI heʻemau tūʻuta ki homau kolo foʻoú, ne mau ō ki he lotú. Naʻá ku ongoʻi mālohi e Laumālié ʻi ai, pea ne u ʻilo ʻe lelei e meʻa kotoa.
Hili pē ha taimi siʻi, ne u kamata ʻi heʻeku ʻapiako foʻoú. Ko ha taha au ʻo e kau Māmonga ʻi he akó. ʻI heʻeku hū atú, ne u ongoʻi ne ʻikai talitali lelei au. Naʻá ku lava ʻo tala ne u kehe mei he kau ako kehé.
ʻI he ʻuluaki uiké, ne u feinga ke fakakaungāmeʻa. Ka ne u ongoʻi faikeheʻia! Ne u ʻahiʻahi tangutu mo ha taha kehe ʻi he kalasi takitaha pea kai hoʻatā ʻi ha tēpile kehe he ʻaho takitaha. Naʻe ʻikai ngali kuó u fakalakalaka ʻi heʻeku feingá.
Naʻá ku fakakaukau ke u feinga ke hoko ko ha sīpinga lelei ki hoku ngaahi kaungā akó. Ne tukutaha ʻeku tokangá ki he Fakalakalaka Fakataautahá mo ako faivelenga e folofolá. ʻI heʻeku ngāue mālohí, ne u fakatokangaʻi lahi ange ko ha ʻōfefine au ʻa e ʻOtuá pea ʻokú Ne ʻofa ʻiate au.
ʻI he ʻalu ʻa e taimí pea mo ʻeku hokohoko atu ke fai e ngaahi meʻá ni, ne u fakatokangaʻi ha meʻa: Naʻe kamata ke ʻi ai haʻaku ngaahi kaungāmeʻa ʻi he akó. Ne meimei hangē ʻoku ou tohoakiʻi mai e kakaí. Ne nau fakaongoongoleleiʻi au ʻi heʻeku makehé. Naʻá ku fakatokangaʻi ne tupu ia mei heʻeku tuku ke ulo atu ʻeku maamá. Ne kehe hoku ʻulungaangá mei hoku kaungāakó, ne u tui ha vala taau, ne u lea ʻaki ha ngaahi lea lelei, pea naʻá ku angalelei ki he niʻihi kehé.
Ko e fānau kotoa kitautolu ʻa e ʻOtuá. ʻOku ou houngaʻia ne u tuku ʻeku maamá ke ulo atu, neongo ne u ongoʻi ne ʻikai talitali lelei au. ʻOku ou ʻilo ʻoku ʻikai ke tau tuēnoa ʻo kapau ʻoku tau ʻi he tafaʻaki ʻa e ʻEikí!
Lepeka C., Motu ko Pilinisi ʻEtuaté, Kānata
ʻE Lava Nai Ke u Vahevahe e Tohi ʻa Molomoná?
ʻI he lolotonga ʻo e Mutualé, ne tuku mai ha ngāue ke mau hoko ko ha kau faifekau ʻaki hano maʻu ʻo ha hoa faifekau, vahevahe ʻemau fakamoʻoní mo ha tokotaha taʻesiasi, pea foaki ha tatau ʻo e Tohi ʻa Molomoná ki homau kaungāmeʻa taʻesiasí.
Hili e Mutualé, ne u kole faleʻi mei heʻeku faʻeé. Naʻá ne palōmesi fakapapau mai kapau te u lotu ʻi he tui ʻo kole ki he Tamai Hēvaní, ko e moʻoni te Ne tali.
Ne ʻosi ha uike ʻe ua peá u toki maʻu ha taha naʻá ne tali e Tohi ʻa Molomoná. Ne toutou fakaʻikaiʻi au ʻi he fuofua taimí. Naʻe fakaongosia ʻeku loto mamahí pea ne kamata ke u tukulolo.
ʻI ha pō ʻe taha, ne u misi ki ha fefine ko ha kaungāmeʻa ofi ʻo hoku fāmilí. ʻI heʻeku misí, ne u ʻiloʻi ko e tokotaha ia ke u ʻaʻahi ki ai mo hoku hoa faifekaú. ʻI heʻeku ʻā haké, ne u fakafetaʻi ki he ʻEikí ʻi hono tokonia aú.
ʻI he Mutuale hokó, ne u tohi mo hoku hoá ʻema fakamoʻoní ʻi he peesi ʻuluaki ʻo e tohí pea teuteuʻi mo ha poulu fuaʻiʻakau maʻae fefiné. Naʻa ma ō ki hono falé ʻo tukituki ʻi he matapaá, mo talitali pē. Neongo naʻá ku manavasiʻi naʻa faifai pea ʻikai ke ne tali ia, naʻá ku pehē loto pē ke u maʻu pē ha kiʻi tui. Naʻe faifai peá ne hū mai ki tuʻa mo ha fofonga malimali mo tali e Tohi ʻa Molomoná.
ʻI he aʻusia ko ʻení, ne u ako ai kapau te ke maʻu ha kihiʻi tui mo ke ʻilo ʻoku ʻi ai e Tamai Hēvaní, te ke ongoʻi ngofua ʻe malava pē ʻa e taʻemalavá.
Lapanisolo L., Haʻamoa ʻAmelika
Ko ʻEku Taimi Mālōlō mei he Ngaahi Lēsoni Pianó
ʻI ha uike ʻe taha, ne u fakakaukau ai ke u kiʻi mālōlō mei he ako pianó. Naʻe ʻikai ke fakangofua ʻe heʻeku faiako pianó e ʻaho mālōlō ko ʻení pea pehē foki ki heʻeku faʻeé. Ne ʻikai ke u akoako ʻi ha uike kakato ʻe taha. Naʻá ku pehē fuʻu lelei ʻaupito koeʻuhí ne ʻi ai hoku taimi ke u mālōlō mo fai ha ngaahi meʻa kehe.
Ne ʻosi e fiefiá ʻi he pō Tuʻapulelulú ʻi hono fakamanatu mai ʻe heʻeku faʻeé ko ʻeku lēsoni pianó ʻi he pongipongi hokó. Ne u pehē naʻá ku ʻilo hono fakaleleiʻí: Naʻá ku ʻā hake ʻi ha houa ʻe taha kimuʻa ʻo kamata ke u akoako. Ka ne u fakatokangaʻi ne siʻisiʻi mo tuai ʻeku feingá. Ne u fiefia ʻi he tauʻatāina ke filí, ka naʻe ʻikai ke u fakakaukau ki he ngaahi nunuʻá.
ʻI heʻeku feʻiloaki mo ʻeku faiakó ʻi he pongipongi hokó, ne kamata ke hā mai e ngaahi nunuʻá. Ne u fie maʻu ke u fakahā moʻoni ne ʻikai ke u akoako, pea talamai ʻe heʻeku faiakó ʻoku totonu ke u fakakakato e ngaahi taimi akoako kotoa ne molé, ʻo tānaki atu ki heʻeku taimi akoako angamahení.
ʻOku ou houngaʻia ʻi he ngaahi meʻa ne u ako fekauʻaki mo e tauʻatāiná, fatongiá, mo hono ʻekeʻi meia kita e meʻa ke faí. ʻOku ʻi ai ha nunuʻa ʻo e fili kotoa pē, pea ne u ako te u fai ha fili lelei ange kapau te u tuku taimi ke tomuʻa fakakaukau ki hono ngaahi nunuʻá.
Palake H., ʻIutā, USA