Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha Ngaahi Fakamoimoi Kilisimasi Maʻaku?
Tā fakatātaaʻi ʻe Carolyn Vibbert
Naʻá ku ngāue fakafaifekau ʻi he Misiona Sakalamenito Kalefōniá ʻi he Kilisimasi ʻo e 2003. Naʻe kamata ke maʻu ʻe hoku hoá mo e ongo faifekau fefine kehe ne mau nofo fakataha ʻi he fale nofo totongí ha ngaahi meʻaʻofa mo ha ngaahi tohi mei honau fāmilí mo e ngaahi kaungāmeʻá. Ne u ʻilo he ʻikai hoko eni kiate au.
Ne ʻikai lahi ha maʻuʻanga moʻui ʻo ʻeku fāmilí ʻi ʻAsenitina, pea naʻe faʻa tuai ʻaki ha māhina ʻe ua ki he tolu ʻenau ngaahi tohí. Ne u mamaʻo mei hoku fāmilí, ka ne u fiefia ke ngāue maʻa Sīsū Kalaisi lolotonga e Kilisimasí.
ʻI he pō kimuʻa he Kilisimasí, ne mau teuteu ke mohe pea fakahoko mai ʻe ha taha ʻo e kau sisitaá ʻoku ʻi ai ha fakamoimoi ʻi hoku hingoá ne tuku mai ʻe ha taha ʻi he matapaá.
“Maʻaku? ʻOku ʻikai tonu ia!” Ne u taliange, ʻi he ʻohovale.
Ne ʻi ha ongo puha lalahi hoku hingoá ka ne ʻikai ha tuʻasila fakafoki. Ne u fiefia, pea naʻe fiefia foki mo e kau sisitā kehé maʻaku. Ne u fakaava e ongo fakamoimoí, ne fonu ʻi he ngaahi meʻaʻofa, lole, tā fakatātā ʻa ha fānau, mo ha ngaahi meʻa kehe! Ne ʻikai ke u lava ʻo fakamaʻumaʻu hoku loʻimatá.
“Ko hai ia te ne ʻomi e ngaahi fakamoimoi ko ʻení maʻaku?” Naʻá ku fifili. Ne ʻikai te mau ʻilo, ka ne mau fiefia kotoa koeʻuhí ko e angaʻofá.
Hili ha ngaahi ʻaho siʻi mei he Kilisimasí, ne ʻikai pē ke u ʻilo pe ko hai naʻá ne ʻomi e fakamoimoí. Ko ia ai ne u tā ki he ʻōfisi ʻo e misioná ʻo kole ki he sekelitalí pe te ne lava ʻo talamai e hingoa ʻo e tokotaha fakapulipuli naʻá ne ʻomi iá. Naʻá ne talamai ne fili ha kau mēmipa ʻo ha uooti ʻa ia ne nau loto ke ʻoua naʻa fakahaaʻi honau hingoá ke ʻomi ha ngaahi fakamoimoi Kilisimasi. Te u houngaʻia maʻu pē he angaʻofa ʻa e uooti ne nau fakahoko mai ha ʻofa lahi he Efiafi ko ia Kimuʻa he Kilisimasí pea mo e tokoni ne u maʻu ʻi he lolotonga ʻo ʻeku ngāue fakafaifekaú.
Naʻá ku ako ʻe lava ʻe he mēmipa kotoa pē ʻo e Siasí ʻo ʻai e kau faifekaú—neongo ʻenau mamaʻo mei ʻapí—ke ongoʻi ʻoku nau ʻi ʻapi ʻo fakafou ʻi heʻenau poupoú mo e tokoní. Ko e taha ia ʻo e ngaahi Kilisimasi lelei taha ‘i heʻeku moʻuí. Naʻá ku ngāue maʻá e Fakamoʻuí pea ongoʻi ʻEne ʻofá ʻo fakafou ʻi he kau mēmipa ʻo Hono Siasí.