Ko e Tikite Lanu Kulokulá
ʻOku nofo e tokotaha naʻá ne fai e talanoá ʻi ʻIutā, USA.
ʻOua leva! Ne toe mole ha tikite ʻa Taniela.
“Ko e taimi pē ʻoku ou sai ai mo angaʻofa mo tokoniʻi ha taha ʻoku ou sio ki ai, ʻoku ou ongoʻi mātuʻaki fiefia” (Childrenʻs Songbook, 197).
Ne sio ʻa Mateo ki he palopalema fika ʻi he palakipoé pea tohi fakavavevave ia ki heʻene pepá. Ko e fiká ʻa e lēsoniʻ oku saiʻia taha aí, ko ia ai naʻá ne loto ke tokanga. Ka ne ʻikai mei lava ke ne fanongo ki he lea ʻa Mrs. Sanitosí he naʻe talanoa ʻa hono kaungāmeʻa ko Tanielá.
“Shh! Taniela, ʻoku ʻikai lava ke u fanongo!” Ne fanafana ʻa Mateo. Ka naʻe kei talanoa pē ʻa Taniela ia. Ne faifai pea fanongo mai ki ai ʻa Mrs. Sanitosi.
Ne pehē ange ʻe Misisi Sanitosi, “Taniela, ʻokú ke toe fakahohaʻa.” “Kuo ʻosi fakatokanga atu kiate koe. ʻOku fie maʻu leva ke ke ʻomai ha tikite kiate au.”
Ne ala māmālie hifo ʻa Taniela ki hono tesí pea ʻoange ki ai ha tikite lanu kulokula. Ne tō hifo hono umá, peá ne sio ki lalo ki he falikí. Ne ʻoange ʻe Mrs. Sanitosi ha tikite ki he fānau ako ʻoku angalelei mo muimui ki he ngaahi fakahinohinó Ne tohi ʻe he fānau akó honau hingoá ʻi he tikité ʻi he ʻaho takitaha pea tuku ia ki ha hina. Ka kuo pau ke ke fakafoki ha tikite kapau te ke anga taʻetaau. ʻI he ʻaho Falaite kotoa pē, ne toʻo hake ʻe Mrs. Sanitosi ha tikite mei he hiná pea ko e ikuná te ne fili ha pale mei he puha koloa ʻa e kalasí! Ne lahi e tikite ne fakafoki ʻe Taniela ʻi heʻene talanoá, ko ia ne ʻikai ke faʻa tohoʻi hono hingoá. Ne loto-mamahi ʻa Mateo ʻi he toe mole ha tikite ʻe taha ʻa Tanielá.
ʻI he mālōloó ne lele ʻa Mateo ki tuʻa ki he loto ʻataʻataá ke vaʻinga ʻakapulu. Naʻá ne sio ki he tuʻu tokotaha ʻa Taniela ʻi he heké. Naʻá ne sio atu ʻoku tangi ʻa Taniela. Ne fie tokoniʻi ia ʻe Mateo ke ne ongoʻi sai ange.
“ʻOkú ke fie vaʻinga ʻakapulú?” Ko e fehuʻi ange ia ʻa Mateó.
Naʻe ʻikai lea ʻa Taniela. Ne toe feinga atu ʻa Mateo ke toe fakatalanoa, ka ne sītuʻa pē ʻa Taniela ia.
“Sai, te u ʻi he malaʻe ʻakapulú pē kapau ʻe liliu ho fakakaukaú.”
Ne ʻalu ʻa Mateo ʻo vaʻinga mo hono ngaahi kaungāmeʻa kehé, ka naʻá ne kei fakakaukau pē kia Taniela. Kuo mei taʻu valu ʻa Mateo pea ʻe vavé ni hono papitaiso iá. Naʻá ne fie hangē ko Sīsuú ʻo hoko ko ha kaungāmeʻa lelei. ʻOku ʻi ai nai ha meʻa te ne lava ʻo fai ke tokoniʻi ai ʻa Taniela ke ʻoua te ne toe fai ha kovi?
ʻI he ʻaho hokó, ne lau ʻe he kalasí ha talanoa ʻi ha fanga kiʻi kulupu iiki. Ka ne lī maʻolunga ʻe Taniela ʻene tohí ki he ʻeá kae ʻikai lau.
Ne feinga ʻa Mateo ke taʻofi ia. “Taniela, ʻoku fie maʻu ke tau lau e tohí, kae ʻikai vaʻinga ʻaki.”
Ne toe lī pē ʻe Taniela ia e tohí. Ne sio atu ʻa Mrs. Sanitosi ki heʻene mei tau ʻi he ʻaofí. Naʻá ne lue atu kia Taniela ʻo folahi atu hono nimá ke maʻu mai ha tikite. Ne ala hifo ʻa Taniela ki hono tesí. Ne ʻasi hohaʻa hono fofongá ʻi heʻene kei kumí.
“ʻOiauē ʻikai! ʻOku pau pē kuo ʻosi ʻene tikité!” Ko e fakakaukau ia ʻa Mateó. Ko e hala tikité ʻe ʻuhinga ia kuo pau ke nofo ʻa Taniela ʻi loto ʻi he taimi mālōloó. Ne kamata ke hohaʻa e fakakaukau ʻa Mateó. Ko e hā nai te ne lava ʻo faí? Ne ʻi ai haʻane fakakaukau lelei.
Ne pehē ʻe Mrs. Sanitosi, “Taniela, kapau ʻoku ʻikai haʻo tikite maʻaku, ta—”
Ne fakatau ʻe Mateo ʻene mānavá. Naʻá ne ʻeke ange, “Te u lava nai ʻo totongi ia maʻana, Mrs. Sanitosi?”
Naʻe fakalongolongo e kalasí. Kuo teʻeki ai ʻeke ange ia ʻe ha taha kimuʻa. Naʻe ʻikai ke fakapapauʻi ʻe Mateo ʻa e meʻa te ne lea ʻakí.
Ne ʻohovale ʻa Mrs. Sanitosi. Peá ne malimali. “Ko ha kaungāmeʻa lelei ʻaupito koe. ʻIo, te ke lava ʻo totongi e tikite ʻa Tanielá maʻana.” Ne ʻoangeʻe Mateo ha tikite ʻe taha kia Mrs. Sanitosi.
“Mālō Mateo,” ko Taniela ange ia.
“ʻIo!” ko Mateo ange ia. “ʻOkú ke fie lau fakataha he taimí ni?”
Ne kamokamo ange ʻa Taniela pea toʻo hake ʻene tohí.
ʻI he kamata ʻa Tanela ke laú, ne ongoʻi māfana mo fiefia ʻa Mateo ʻi hono lotó. Ne haʻu e fakakaukau lelei ko iá mei he Laumālie Māʻoniʻoní! Ne ʻilo ʻe Mateo ne finangalo ʻa Sīsū ke ne tokoni kia Taniela—koeʻuhí ʻokú Ne ʻofa ʻia Taniela. Pea ne ongoʻi foki ʻe Mateo mo e ʻofa ʻa Sīsuú!