Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha Meʻaʻofa Fakafāmili maʻá e Fakamoʻuí
ʻI he panaki mai ʻa Tīsemá, ne u moʻua ʻi he teuteu ki he femouʻekina ʻo e faʻahitaʻu Kilisimasí. Ko e taʻu ʻeni ʻe fā hono fakahoko ʻo e ngaahi fakafiefia ʻo e Kilisimasí ʻi homau ʻapí, ka ne u ongoʻi lōmekina ʻi he taʻú ni. ʻI he taimi ne u aleaʻi ai mo hoku husepānití e meʻa kotoa ne fie maʻu ke ma fakahokó—fakatau ha ngaahi meʻaʻofa, teuteuʻi e meʻakaí, mo fai ha ngaahi meʻa lahi kehe—ne ma pehē ke kaniseli e paati Kilisimasí pea fakahoko ha meʻa kehe ʻi he Kilisimasi ko ʻení. Ne ma loto ke fai ha meʻa ʻe lava ke mau foaki ko ha meʻaʻofa maʻá e Fakamoʻuí.
Ne mau fakahoko e ngaahi efiafi fakafāmili fekauʻaki mo e moʻui ʻa Sīsū Kalaisí, ō ki he temipalé, pea palani mo ha ngaahi ngāue ʻofa, ʻi hono kotoa ʻo Tīsemá. Ne hoko hoku husepānití ko ha pīsope ʻi he taimi ko iá, pea ne ma fakakaukau ke mau hiva ʻi he ʻAho Kilisimasí ki he kau uitou ʻi he uōtí. Ne kamata ke mau ako hiva fakafāmili ʻi he ngaahi himi te mau hivaʻí. Naʻe manako ʻeku fānaú hono hivaʻi e “Ne ʻAloʻi Mai ʻa Sīsū Kalaisi” (Ngaahi Himí, fika 114).
Ne mau faʻu ha ngaahi kaati ʻi he Efiafi Kimuʻa ʻi he Kilisimasí mo ha ngaahi pōpoaki Kilisimasi makehe pea teuteuʻi mo ha ngaahi meʻaʻofa ke mau ō mo ia ʻi heʻemau ʻaʻahí. Naʻá ku fiefia ke sio ki he uouongataha homau fāmilí pea fiefia ke tokoni ki he niʻihi kehé ʻi he ʻofa. Naʻe lava ke u ongoʻi e laumālie ʻo e Kilisimasí.
Naʻe vēkeveke ʻema fānaú ʻi he ʻaho Kilisimasí ke fai e ngaahi ʻaʻahí. Ne toe lahi ange ʻemau fiefiá he ʻapi kotoa pē ne mau ʻaʻahi ki ai, pea ngali ne sai ange ʻemau hivaʻi e ngaahi himí ʻi he taimi kotoa pē ne mau hiva aí. ʻI heʻemau aʻu ki he fale fakaʻosí, ne hangē ʻoku ʻikai ha taha ʻi ʻapi. Ne mau talitali ʻi ha ngaahi miniti siʻi, pea ne kamata ke taʻemanonga e fānaú. Ne faifai pea hū mai ha fineʻeiki ke talitali kimautolu ʻi hono vala lelei faka-Sāpaté pea kuo helu fakalelei hono ʻulú. ʻI heʻene sio mai kiate kimautolú, naʻá ne fakatē loʻimata. Naʻe kamata ke u tangi mo au pea ne ʻikai mei lava ke u hiva.
ʻI heʻemau foki ki ʻapí, ne talamai ʻe homa ʻofefine taʻu nimá ʻoku ʻikai fie foki ia ki ʻapi ka ʻoku kei fie hiva pē ia. Kimuʻa pea lava ke u tali atú, ne lea hake ʻeku taʻu hivá, “Te tau toe fai ia ʻi he taʻu kahaʻú!”
Ne hoko ʻeni ko ha Kilisimasi fakangalongataʻa ki homau fāmilí koeʻuhí ne mau hiki hake e niʻihi kehé pea fakahaaʻi ʻemau ʻofa kia Sīsū Kalaisí. ʻI heʻeku toe sio atu ki he ngaahi meʻa ne hoko ʻi he ʻaho ko iá, ne u ongoʻi e ʻofa ʻa e ʻEikí pea manatu ki Heʻene folofolá: “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40).