2017
ʻUhinga ʻe Valu ʻoku Hoko ai e Kilisimasí ko ha Taimi Lelei ke Hoko ko ha Faifekaú
December 2017

ʻUhinga ʻe Valu ʻoku Hoko ai e Kilisimasí ko ha Taimi Lelei ke Hoko ko ha Faifekaú

Fai ʻe Charlotte Larcabal

Ngaahi Makasini ʻa e Siasí

ʻOku ʻi ai ha meʻa fekauʻaki mo e ngaahi ʻaho mālōloó ʻoku lelei ange ai hono vahevahe ʻo e ongoongoleleí!

ʻĪmisi
Christmastime scenes

Tā Fakatātaaʻi ʻe Manu Callejon

ʻOkú ke ʻofa ʻi hoʻo ngaahi kaungāmeʻá ʻOkú ke ʻofa ʻi he ongoongoleleí. Pea ʻoku ʻikai ke ke ʻilo pe ʻe fakatahaʻi fēfeeʻi naua.

Kapau ʻoku ngali hangē ʻeni ko koé, ʻoku ʻikai te ke tuʻu toko taha pē. ʻOku tokolahi ha kakai ʻoku fie vahevahe e ongoongoleleí mo honau ngaahi kaungāmeʻá ka ʻoku nau ilifia naʻa hā ngali fakamālohi pe faikehe. ʻOku fakatupu manavahē hono vahevahe e ongoongoleleí.

Ka ʻoua ʻe ilifia! Neongo kapau kuo teʻeki ai ke ke talanoa ki ha taha ʻo kau ki he Siasí, ʻe ala fonu hoʻo ʻaho mālōloó ʻi ha ngaahi momeniti ngāue fakafaifekau ʻe faingofua mo angamaheni. ʻO anga fēfē?

Ko e fuofua meʻa ke faí ko e lotu. ʻAhiʻahi kole ki he Tamai Hēvaní ha ngaahi faingamālie ke vahevahe e ongoongoleleí. Lotu ke ʻilo pe ko hai te ke talanoa ki aí pe fakaafeʻí pea lotu ke maʻu ha loto-lahi ke fai ia!

Ko e meʻa hono hokó ke kamata. Pea kamata he taimí ni. Ko ha kiʻi fakapulipuli ʻeni: ʻOku faingofua ʻaupito e ngāue fakafaifekaú ʻi he taimi Kilisimasí. Ko e hā hono ʻuhingá? ʻOku ʻi ai ha ʻuhinga ʻe valu.

  1. ʻOku manako e taha kotoa ke fakafiefia.

    Ko hono moʻoní, mahalo ʻe fokotuʻutuʻu ʻe hoʻo uōtí pe fāmilí ha fakafiefia ʻi he Kilisimasí. Fakaafeʻi ha kaungāmeʻa ke kau atu ki he fakafiefiá! ʻE pau pē ke ʻi ai ha hiva pe ha pōpoaki ʻo kau ki he Fakamoʻuí, pea ʻe ala hoko ia ko e meʻa ne fie maʻu ʻe hoʻo kaungāmeʻá ke fanongo ki aí.

  2. Ko ha meʻa angamaheni pē hono fakaafeʻi e kakaí ki he lotú ʻi he taimi Kilisimasí.

    ʻĪmisi
    going into a Church building

    ʻOku ʻi ai ha meʻa fekauʻaki mo e Kilisimasí ʻokú ne ʻai e kakaí ke nau fie ʻalu ki he lotú! Ko ha taimi lelei ʻeni ke ʻilo ai ʻe hoʻo ngaahi kaungāmeʻá ʻoku talitali lelei kinautolu ke nau vakaiʻi e founga ʻoku moihū ai e kau mēmipa hoʻo siasí ki he Fakamoʻuí.

  3. Ko e ngaahi fakaneifua ʻi he Kilisimasí ko ha founga lelei ia ke fakamanakoa ʻaki ha fakaafe pe pōpoaki ʻo e ongoongoleleí.

    ʻĪmisi
    Christmas treats

    Ha peleti pisikete fakataha mo e folofola ʻokú ke saiʻia taha aí? Ko ha lole mo ha fakamatala ʻo kau ki he Kilisimasi? ʻIo, kataki!

  4. ʻOku meimei ke fakatahataha mai e ngaahi fāmilí.

    Ko e tuku taimi ko ia ki ho fāmilí ko ha konga lahi ia ʻo e ngaahi meʻa angamaheni ʻo e Kilisimasí, ko ia ʻoku totonu ke faingofua ke ke talanoa fekauʻaki mo hoʻo fāmilí, hoʻo ngaahi meʻa angamaheni ʻi he ʻaho mālōloó, mo hoʻo tui fekauʻaki mo e ngaahi fāmilí.

  5. Ko ha meʻa fakamanakoa e ngaahi māmá mo ha ipu koko.

    ʻĪmisi
    hot cocoa

    Inu ha ipu koko pe vakaiʻi e ngaahi teuteu Kilisimasi ʻi he koló ko ha efiafi fakafāmili pe ʻekitivitī faka-Mutualé. ʻOku fakafiefia e ngaahi ʻekitivitī ʻo e ʻaho mālōloó ki he tokotaha kotoa, pea ko ha founga lelei ia ki haʻo kaungāmeʻa ke vakai ki he founga ʻokú ke moʻuiʻaki ai hoʻo tui fakalotú.

  6. ʻOku fakaʻofoʻofa mo faingofua hono vahevahe e ngaahi Pōpoaki Faka-Kilisimasi e Māmongá.

    ʻOmi e laumālie ʻo e Kilisimasí ki he mītia fakasōsialé ʻaki hono vahevahe e “A Savior Is Born—Christmas Video (ʻOku ʻAloʻi Ha Fakamoʻui—Vitiō Kilisimasi)”! Ko ha toko fiha nai ʻo hoʻo ngaahi kaungāmeʻa ʻi he Facebook te nau fie manatuʻi ha kiʻi ʻāngelo ʻokú ne tokoniʻi ha tokotaha fakamaau fale ʻiteʻita ʻi he “The Reason Behind Christmas (Ko e ʻUhinga ʻo e Kilisimasí)” pe ko ha talanoa fakaʻofoʻofa fekauʻaki mo e taʻesiokitá ʻi he “The Coat: A Story of Charity (Ko e Koté: Ko ha Talanoa ʻo e ʻOfá)”? Fekumi ʻi he LDS.org pe ʻi he Mormon Channel ki he ngaahi meʻá ni mo ha ngaahi pōpoaki Kilisimasi lelei kehe ke vahevahe.

  7. Ko e Kilisimasí ko hano kātoangaʻi ha fakafiefiaʻi ʻo e Fakamoʻuí.

    ʻE tokolahi ha kau Kalisitiane ʻe hanga taha pē ki he Fakamoʻuí ʻi he taimi Kilisimasí. ʻE fakaʻilongaʻi ʻi he Mormon.org ʻa e ngaahi akonaki mo e hala ki he “Fakamaama e Māmaní” ʻo tāatu ia ki hono vahevahe fakaʻaho ha ngaahi fakakaukau faka-ngāue tokoni. Mahalo ko e meʻa tonu pē ia ʻoku fekumi ki ai hoʻo ngaahi kaungāmeʻá ke fakafiefiaʻi ʻaki ʻa Kalaisi ʻi he Kilisimasí.

  8. ʻOku lahi ha ngaahi founga ke foaki mo tokoni ʻi he Kilisimasí!

    ʻĪmisi
    singing Christmas carols with friends

    Ko e ngāue tokoní ko ha founga fakaʻofoʻofa ia ke hoko ai ko ha faifekau, pea ʻoku lahi mo ha ngaahi faingamālie ke tokoniʻi e niʻihi kehé ʻi he ngaahi ʻaho mālōloó. Te ke ala ʻaʻahi ki ha ʻapi ʻo e kau toulekeleká, hiva ha ngaahi hiva Kilisimasi ki ha kaungāʻapi, pe foaki ha ngaahi koloa ki ha fale tauhi paea fakalotofonua. ʻE lava ke ke maʻu ha ngaahi fakakaukau ki ha ngāue tokoni ʻi he ʻuluaki ʻaho ʻe 25 ʻo Tīsemá ʻi hoʻo ʻalu ki he Mormon.org.

Ko e hā ʻokú ke tatali ki aí?

Koeʻuhí ko e ongoongoleleí, ʻokú ke ʻilo ai fekauʻaki mo Sīsū Kalaisi mo e ʻamanaki lelei kotoa ʻokú Ne ʻomí. Ko ha meʻaʻofa fungani ia, pea ʻe lava ke ke foaki ia ki he niʻihi kehé. Kapau te ke kole ʻi he loto-fakatōkilalo ki he Tamai Hēvaní ki ha ngaahi faingamālie ke vahevahe e ongoongoleleí, te Ne tataki koe ke ke ʻilo e tokotaha te ke lava ʻo talanoa ki aí. Ko e Kilisimasí ko ha taimi ia ʻo e vahevahe, ʻo e foaki, mo hono manatua ʻo Sīsū Kalaisí.