Pōpoaki ʻo e Faiako ʻAʻahí
Ko e Loto Fiemālie Ke Fefuaʻaki ʻEtau Ngaahi Kavengá
Ako ʻi he faʻa lotu e fakamatala ko ʻení pea fekumi ki ha ueʻi fakalaumālie ke ke ʻiloʻi ʻa e meʻa ke ke vahevahé. ʻE teuteuʻi fēfē ʻe he mahino e taumuʻa ʻo e Fineʻofá ʻa e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?
Ne pehē ʻe Palesiteni Tōmasi S. Monisoni, “ʻOku ʻākilotoa kitautolu ʻe ha niʻihi ʻoku nau fie maʻu ʻetau tokangá, fakalotolahí, poupoú, fakafiemālié, ʻetau angaʻofá”. Ko e toʻukupu kitautolu ʻo e ʻEikí ʻi he funga ʻo e māmaní, kuo fekauʻi mai ke tau tokoniʻi mo hiki hake ʻEne fānaú. ʻOkú Ne fakafalala mai kiate kitautolu takitaha.”1
Naʻe pehē ʻe Palesiteni Henelī B. ʻAealingi, Tokoni ʻUluaki ʻo e Kau Palesitenisī ʻUluakí: “Naʻe kamata ha fuʻu liliu lahi ʻi ho lotó ʻi he taimi naʻá ke kau ai ki Hono Siasí. Naʻá ke fai ha fuakava, peá ke maʻu ha talaʻofa ne kamata ke ne liliu ho natulá.
“… Naʻá ke palōmesi ange te ke tokoni ki he ʻEikí ke fakamaʻamaʻa ʻenau kavengá mo fakafiemālieʻi kinautolu. Naʻe foaki atu kiate koe ʻa e mālohi ke ke tokoni ʻi hono fakamaʻamaʻa e ngaahi kavenga ko iá ʻi he taimi naʻá ke maʻu ai e meʻafoaki ʻo e Laumālie Māʻoniʻoní.”2
Naʻe pehē ʻe Sini B. Pingihema, Palesiteni Lahi ʻo e Fineʻofá, “ʻOku tau fie fakaʻaongaʻi e maama ʻo e ongoongoleleí ke vakai ʻaki ki he niʻihi kehé ʻo hangē ko e Fakamoʻuí—ʻi he manavaʻofa, ʻamanaki lelei mo e ʻofa faka-Kalaisi. ʻE hokosia e ʻaho ʻe mahino kakato ai kiate kitautolu e loto ʻo e niʻihi kehé pea te tau houngaʻia ʻi hano fakahaaʻi mai ʻo ha ʻaloʻofa kiate kitautolu—hangē pē ko ʻetau fakahaaʻi ha fakakaukau ʻofa mo e lea ʻofa ki he niʻihi kehé. …
“Ko hotau tufakanga mo e faingamālie lelei ke tali ʻa e fakalakalaka e tokotaha kotoa pē ʻi heʻetau faifeinga ke hangē ko hotau Fakamoʻui ko Sīsū Kalaisí.”3
ʻI heʻetau fefuaʻaki ʻetau ngaahi kavengá mo tauhi ʻetau ngaahi fuakavá, ʻoku tau fakaʻatā e halá ke fakamoʻui ʻe Sīsū Kalaisi e niʻihi kehé. Ne akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá: “Fakakaukau ki hono taʻe-fakangatangata ʻo e totongi kuó Ne fai ʻi he Tutukí mo e Fakaleleí, ʻoku ou palōmesi atu, he ʻikai te Ne tuku taʻetokoniʻi kitautolu he taimí ni. ʻI Heʻene folofola ki he angavaivaí, ‘Haʻu kiate aú,’ ko ʻEne ʻuhinga ia ki Heʻene ʻafioʻi ʻa e hala ke tau hao aí peá Ne ʻafioʻi mo e hala ki hēvaní. ʻOkú Ne ʻafioʻi iá koeʻuhí he kuó Ne fonongaʻia ʻa e hala ko iá. ʻOkú Ne ʻafioʻi ʻa e halá koeʻuhí he ko Ia ʻa e halá.”4
Ngaahi Potufolofola Kehé
Tui Fāmili Fakafiemālie