Peļaak KO Ad
Jeraam̧m̧an ilo am pokake Kien Juon Mōttan Jon̄oul
Sabrina T., São Paulo, Brazil
Ke iaar dik, n̄a im baam̧le eo aō kōm kar ioon apan̄ ikkijen jāān m̧ae iien eaar 10 aō iiō. Jema eaar jab maron̄ ellolo an bar jerbal, kōn menin eaar jerbal āinwōt juon riwia kake ilo kepoon in iaļ ko im eaar dik an tōprak. Jinō eaar pād wōt ilo m̧weo n̄an lale eō im ļaddik eo edik jatu.
Ak men̄e kōm eaar iioon elōn̄ apan̄ ko, eaar wōr am naan in kam̧ool kōn juon mōttan jon̄oul im menin joortak ko jet. Kōm ar lukkuun tiljek ilo kōļļā juon mōttan jon̄oul aolep allōn̄ im kar jab likjab ilo jabdewōt men. Kōm jeļā ilo m̧ool ke kōm ar wōnm̧aanļo̧k wōt im jeraam̧m̧an kōnke jouj an Irooj eaar jab jem̧ļo̧k im kōnke Eaar dāpij wōt kallim̧ur ko An n̄e jej pokake kien ko An.
Eaar jem̧ļo̧k raan in en̄taan ko am ikkijen jāān. Kōjeraam̧m̧an ko me Irooj eaar letok n̄an kōm ilo iiō ko rem̧ootļo̧k raar lukkuun kabwilōn̄lōn̄.
Ijeļā bwe ro jet me rej tiljek ilo kōļļā juon mōttan jon̄oul im kōļļā menin joortak ko aer ilo iakwe kōn kōttōpar in n̄an kōjeraam̧m̧an mour ko an ro jet, ejjeļo̧k men enaaj likjab im enaaj lōn̄ļo̧k men ko rem̧m̧an renaaj bōk jikier, āinwōt an kar waļo̧k n̄an n̄a im baam̧le eo aō. Kōjeraam̧m̧an ko renaaj ļapļo̧k. Ijeļā menin. Ij mour kōn menin.
Mool ilo Men Otemjej
Alivsi H., Jalisco, Mexico
Aolep jinoin semester ilo jikuuļ, rej letok n̄an kōm mweiūk ko ejjeļo̧k wōnāer āinwōt bok in jeje, juon ajenda, im juon sample in juon m̧weiūk. Juon tōre ilo jikuuļ iaar jutak ilo ļain eo n̄an bōk set eo aō im kile bwe m̧weik eo me iaar bōke ekar wōr tokjān n̄an n̄a.
Ilo jem̧ļo̧kin raan eo, iaar lo bwe rekar letok ruo kain sample in m̧weiūk. Enkar pidodo n̄an bar pād ilo juon ļain im bar bōk juon set, im iaar kālet bwe in kōm̧m̧ane. Ālikin men kein, raar aolep ejjeļo̧k wōnāār, im iaar lukkuun aikuji m̧weiūk eo.
Iaar bojrak ilo mōn kapojak eo, ijo iaar lo juon cell phone ie me jet leddik raar meļo̧kļo̧k e. Ekar juon model ekāāl tata, ak ej kab mōj an bar jako taļboon eo nejū juon wiik moktalo̧k. Bōtaab iaar jab ļōmņak in dāpiji. “Ko̧o̧t men ņe,” iaar ba n̄an n̄a make.
Innām, iaļ eo aō ļo̧k n̄an bōk set eo aō kein karuo, iaar kile bwe ej bar juon men ejjab m̧ool ilo aō dāpij taļboon eo kōnke inkar riab im ba ekar bar wōr aō mokta.
Iaar kam̧olool kōn en̄jake jidikdik in me eaar katakin eō juon katak em̧m̧an. Iaar kuņe taļboon eo im etal n̄an m̧weo kōn juon wōt aō bok in jeje, juon ajenda, im juon sample in m̧weiūk, ak kōn juon en̄jake em̧m̧an kōn menin m̧ool ilo men otemjej, jekdoon ta edik.