Ainikien ko an Armej ro Rekwojarjar ilo Raan-ko Āliktata
Etal Jipan̄ E
Thomas Robbins, California, USA
Ikar jutak ioon ļain ilo imōn etten̄ kiaaj eo. Im̧aaō, juon m̧am̧a im ruo ajri jiddik rekar kajjitōk $3 taļa aorōk in kiaaj im ruo vanilla ice cream cone.
Imaron̄ kile bwe ejjab lukkuun lōn̄ jabdewōt m̧weiūk ippāer. Ajri ro ejjeļo̧k aer jodi im rej ekkōņak nuknuk m̧ōr.
Ikar ron̄ an kōrā eo likūt būjin jāān jiddik ioon tebōļ eo n̄an an kōļļāik wōnāān kiaaj in wa eo waan.
Ālkin aō kar kōļļāik wōnāān kiaaj eo, ikar diwōjļo̧k im kalimjōke wa eo waan jineer. Ekar juon wa eo em̧ōr im ejjab em̧m̧an injin eo an.
Ikar en̄jake aō būromōj kōn kōrā in ewōr nejin ajri, ak ikar wōnm̧aanļo̧k wōt im kōjo̧ wōtbai eo waaō im etal.
Ekar jab etto ke ikar ettōrļo̧k ioon highway eo, juon ainikien ekar itok n̄an eō: “Etal Jipan̄ E.” Alen kein karuo ekar bar itok im̧we in.
Ikar kajjiboluul bōra, ļōmņak bwe bōlen emōj an etal. Ta eo inaaj ba n̄an e?
Ainikien eo ekar bar itok alen kein kajilu: “Etal Jipan̄ E!”
Ikar kajeer wōtbai eo waaō im jibadekļo̧k m̧ōn kiaaj eo, kajjieon̄ ļōmņak kōn ta eo inaaj ba eļan̄n̄e enaaj pād wōt ijo.
Ke ikar tōkeekļo̧k, ikar loe bwe kōjem̧ in wa eo waan ekar peļļo̧k. Ekar jijet ilo jea eo, im ajri ro reddik nejin rej m̧ōņōņō kōn ice cream ko kijeer ilo jea eo ļo̧kwan.
Ikar jar, kajjitōk ippān Jemedwōj Ilan̄ kōn ta eo inaaj ba. Ejja ainikien eo wōt ekar ba n̄an eō, “Kwaļo̧k kadkadim im kajjitōk eļan̄n̄e eaikuj jipan̄.” Ikar kepaakļo̧k wa eo waan im kwaļo̧k kadkad eō. Ikar ba n̄an e ikar en̄jake juon men bwe in kajjitōk ippān eļan̄n̄e eaikuj jipan̄.
Ekar jino jan̄ im ba, “Ej kab mōj aō jar n̄an Jisōs, kajjitōk Ippān bwe en jilkintok juon armej bwe en jipan̄ eō.”
Jemedwōj Ilan̄ ekar uwaake jar eo an. Ikar kōļļāik wōnāān kiaaj eo an wa eo waan im kar leļo̧k n̄an e nōm̧ba in taļboon eo an juon armej ilo doulul eo an em̧m̧aan ro eo ej kappukōt rijerbal n̄an kōjerbale ilo tōre eo. Ikar jab jeļā ta eo ekar waļo̧k ippān kōrā in tokālik, ak ikar kam̧m̧oolol bwe ikar ļoor im̧we eo n̄an jipan̄ e.